Тарасов Николай Михайлович

Материал из Воршуда
Перейти к: навигация, поиск

Тӧдьы юсьёс берто

Н. М. Тарасов

Дунне вылын вань сыӵе адямиос: мар борды гинэ уг йӧтско - ваньмыз улӟе. Пичи Пурга ёросысь Вуж Мӧнья гуртысь Николай Тарасовлэн малпамезъя, сыӵеос туж трос, та сярысь асьсэос но уг тодо. Нош валатскон понна трос ик кулэ ӧвӧл: ӵемгес кылзоно сюлэмдэ, ӧвӧл мыноно аслад шӧдонъёсыдлы пумит, инкуазен огкылысь улыны тыршоно.

Николай Михайлович - шудо адями, малы ке шуоно Инмарен сётэм талантсэ дыраз шараяны быгатӥз, ас тыршеменыз табере шумпоттэ мукет адямиосты но. Зарни киё мастер тодмо ни шаермылэн палэназ но, кунгож сьӧрын но.

Николай Тарасов - Пичи Пурга ёросысь Вуж Мӧнья гуртысь Кибашлыослэн юртсылэн кивалтӥсез, Удмуртиысь культура удысысь дано ужась, Удмуртиысь Кун премилэн лауреатэз.

- Николай Михайлович, гуртын улӥсь-ужась муртлы данэ потыны данаклы секытгес кадь. Тӥ со малпанэз пазьгиды, Тарасов фамилия пӧрмиз, кызьы туала вакытэ шуо, зэмос брендлы.

- Мон тӥледын соглаш уг кариськы, ява. Мон малпамъя, ӵап татын, инкуазьын гинэ, адямилэн луонлыкез кылдэ быдэсак усьтӥськыны, Инмарен сётэм быгатонлыксэ муромытыны, соин мукетъёссэ шумпоттыны. Тӥ вераськоды, дыр, дышетскыны луонлыкъёс, кусыпъёс тупатон сярысь но мукет, но асьмеос вашкала вакытэ ум улӥське ук, кулэ ке, котькытчы вутскиськом - Иже но, Москвае но, кунгож сьӧры но. Табере бадӟым дуннеез усьтыны луэ, кыӵе ке пичи гуртын улыса но. Ай ми асьмеос дышетӥськом городъёсты. Мыным удалтӥз, дыр, кутсконаз - сюризы малпанэлы дурбасьтӥсьёс, эшъёс, визьмо кивалтӥсьёс.

- Худграфын тӥ выриды линогравюраосын, графикаен, нош данэ потӥды… куроен.

- Университетын мон дасяськи суредаськонъя огшоры дышетӥсь луыны. Тодӥсько вал: диплом басьтыса, гуртам берытско, соин-а, мар-а, кыӵе ке вылӥ малпанъёсы ӧз ик кылдылэ. Зэм, дышетӥсе, тодмо суредась Рэм Тагиров дораз ӧтчаз: уд-а, пе, выжы Ленинградэ дышетскыны? Мон чутрак пумит луи, угось гуртын монэ возьма песянае. Вылаз ик, кышнояськыны малпасько ни вал. Академиын дышетскыса, мон, оло, зэмзэ но яркыт суредась луысал, но соку усьтӥськысал-а мон калык киуж ласянь? Нош таиз удысэ мыным туж дуно. Улонын луэ озьы, кызьы луыны кулэ.

Диплом басьтыса, мон берытски яратоно гуртам, интыяськи школае. Со вакытэ отын нылпиосты суредаськыны дышетэ вал ай дышетӥсе Семён Николаевич Филимонов. Люкетэме ӧз поты, малпай быгатӥсь нылпиос понна нимаз изостудия кылдытыны. Малпанме роноын умоен лыдъязы, угось быдэс ёросын, нялтас вераса, али ке но(!) ӧвӧл искусствоосъя школа. Пиналъёс студие мыло-кыдо ветлӥзы. Куддыр кытчы пуктыны но паймоно вал - сомында кузя люкаськылӥзы, тросэз туж ӟеч пӧрмытъязы, пӧртэм конкурсъёсын вормылӥзы. Мон понна туж дуно вал пиналъёслэн малпаськон ӧрзылэн паськытамез-муромемез - угось ӵапак солы нырысь ик дышетыны кулэ искусстволэн котькуд удысэз.

Пумен басьтӥськи киуж борды. Книгаосъя-мар дышетски пуэз вандылыны, кызьпу туен ужаны. Ӵап со вакытэ Культурая министерство басьтӥськиз калык киужъёсты улӟытон борды. Вазиськизы милемлы но. Вуж Мӧньялась центр нырысетӥосыз пӧлын луиз. Со учыр но косӥз кадь милемды устогес луыны, удмурт калыкмес паймытъяны-шумпоттыны. Милемлы удалтӥз - гуртамы зарни киё адямиос трос. Огез соос пӧлысь Юлия Трофимовна Фомина - туж усто куиськись. Со ми дорын кема дыр ӵоже мастерын ужаз, быдэс шаерысьтымы адямиосты та киужлы дышетӥз, шуыны луоз.

Нош куро сярысь ке, со кызьы ке ваньмыз ас кожаз пӧрмиз. Гуртын улӥськом бере, котьку но сюлэм лычсузьыса кадь ортчиськод зарни луд дортӥ, кисьмась ю-нянез вешам потэ, куроезлэсь син палёме. Нош комбайн ортче но, ваньмыз со нелькиське. Мынам со чеберлэсь даурзэ кузёмытэме потӥз. Но со киужлы юромо дышетскеме ӧй вал бере, нырысь-валысь, тол ӝытъёсы дорын пукон сямен, огшорыгес арбериос пуныса пукылӥ. Юаськи песянаелэсь, мар пуно вал куролэсь вашкала дыръёсы. Со вераз: выж лёгетъёс, шляпаос, мунёос. Мыным малы ке мунё тунсыко потӥз. Эскерон вылысь лэсьтӥ кӧнязэ ке. Песянае дунъяз, вераз на эктӥсь мунёос сярысь. Соку мылкыд уката пӧзьыны ӧдъяз, та уже кыски нылпиосты, кузпалме, мукет мылкыд карисьёсты.

- Тӥляд карьерады туж яркыт кутскиз. Киужъёсъя центр усьтӥськытозь ик, тӥ пыриськылӥды ни кунгож сьӧрын ортчылӥсь адӟытонъёсы, ужъёсты возьматъяськизы Швециын, Голландиын, Китайын, Япониын, Турциын, финн-угор кунъёсын, Россилэн пӧртэм улосъёсаз, Москваын. Котькуд ӵошатсконын - диплом, вормон вылысь вормон, тодмо луон, дан… Ӵапак соин валче табере калыкез паймытъяны арысь аре секытгес, дыр?

- Ӧвӧл шуи ке, пӧяло. Со зэм но озьы - ми котьку нырысь вал бере, табере но мышкын ветлэм уг поты. Но мон али аслэсьтым кужымме шӧдӥсько ай. Центрмы та вие дасо удысъя азинске: куро пунон, пу арбериос лэсьтон, куиськон, удмурт дэрем вурон но мукет. Туж мыло-кыдо ужало Людмила Архипова, Эльвира Александрова, Зоя Силантьева, Ольга Прохорова, Елена Анисимова, Марина Орлова, Игорь Абрамов, Василий Мишин… Ялан дышетскисько ачим но - лыэн ужан борды басьтӥськи.

Берлоез данъяськонмы пӧлын - Ижысь зоопаркез лэсьтонэ пыриськеммы. Выжыкыл коркаос, выжъёс, пӧйшуръёслэн каръёссы - ваньмыз со милям кибервылмы. Мыным потэ, синмаськымон пӧрмиз. Сюлэм шумпотэ, ачиз Президент (нош со лэсьтӥськись) ужмес ушъя ке, адямиос, пӧйшуръёсты вунэтыса, пуктӥськемъёс котыртӥ берганы кутско, фото лэсьто, удмурт кафеямы пырыса, перепеч сиё.

Тодӥськоды-а, маиз ӝож: вот ми вань сюлэммес поныса ужаськом, аспӧртэм, чеберлыко арбери кылдытӥськом, искусствоез улӟытӥськом, шуом ини, нош сое асьме дорын уг дунъяло на. Со понна вожмаськыса басьто кунгож сьӧрын. Кыӵе сюлэм вӧсь луэ сыӵе дыръя: тынэсьтыд арберидэ куто сьӧрлось адямиос, киязы бергато, дун ӵекто… Огласянь, шумпотоно кадь: тынэсьтыд, тынад мастеръёсыдлэсь ужзэс бырйизы ук. Мукет ласянь валаськод: пырак сыӵе ик арбери лэсьтыны уз луы ни, озьыен, со пыраклы кошке асьме палась. Нош мынам потэ вылэм, искусствомы нырысь ик асьмеды, удмуртъёсты, мед шумпоттоз.

- Тӥ котькуд уждэс быдэстон азьын туж кема дасяськиськоды, шуо. Одӥг пу арберилы удмурт шӧм пыӵатон понна гинэ 22 книга лыдӟиллямды, пе…

- Оло, 22, оло, солэсь но трос. Мыным туж кулэ вал валаны перм пусъёсты. Тодытэк кызьы ужалод, кызьы арберилы лул пыртод? Соку со удмурт уз лу ни ук, кыӵе ке валантэм. Художник ӟеч тодыны кулэ историез, калык культураез, мифологиез, инкуазез…

Трос лыдӟиськеме, озьы ик Кузьма Куликов, Владимир Владыкин тодосчиосын кенешылэме юрттӥзы мыным парк скульптура борды басьтӥськыны. Мон малпай писпулы кыкетӥ улон сётыны. Со кичӧлтонэлы шаерысьтымы усточиос дурбасьтӥзы, табере ми арысь аре ӵошатсконъёс ортчытъяськом, гуртъёсты удмурт шӧмо пу скульптураосын узырмытӥськом.

- Тӥ зэмзэ но синмаськымон скульптор, «Инмар юсьёстэс» устоен пусъё валтӥсь художникъёс, но ӵап со «юсьёсты» ик тӥледыз огвакытэ туж зол чепыльтӥзы, шуо…

- Со мынам огез яратоно уже. Вашкала дыръя удмуртъёс, арлы быдэ кык юсез кутыса доразы сюдӥллям-возиллям, собере вӧсяськыса инбаме лэзьяллям. Калык малпаллям, бурдоос одно лобозы Инмар доры, адямиослэсь куронзэс отчы вуттозы шуыса.

Гуртамы сыло на мукет мастеръёслэн но скульптураосы. Ваньмызлы со кельшылӥз кадь, гуртэз аспӧртэм карем, чеберматэм сяна, калык ас выжыосызлэн историеныз тунсыкъяськыны ӧдъяз ни вал кадь, но… Гуртысьтымы одӥг семьяын шудтэм учыр луиз: картэз кышнозэ вииз, собере ассэ ачиз быдтӥз. Ватон дыръя вӧсяны черкысь баӵкоез ӧтизы. Солы милям скульптураосмы сюлмаз лякиськиллямтэ: вот, пе, тӥ, сыӵе-таӵе язычникъёс, вашкалаез сярысь малпаса улӥськоды, кулэтэмзэ данъяськоды, соин ик гуртэтӥды тӧлпери но ортче, адями но йырзэ быдтэ… Огкылын вераса, ваньмыз понна мон янгыш луи. Сыӵе пыкылонъёсты кылыны туж вӧсь вал. Эшшо секытэзгес - калык зэмзэ но куалектӥз. Мон газет пыр баӵкоен споръяськоно луи. Тау гуртоосылы, валазы кадь - скульптураосмы туннэ но сыло. Кызьы соос уродзэ ваёзы, ӟеч мылкыдын лэсьтэмын ке?

- Йӧспӧртэм муртлы улыны секыт, дыр?

- ?

- Ну, тӥ мукетъёслэсь пӧртэм ук: кин ке тросгес пудо вордыны турттэ, кин ке лавка усьтэ, кин ке бусы гыре, нош тӥ «мунёен шудӥськоды», пужыос, пусъёс сярысь малпаськыса улӥськоды… Кызьы со шоры учко гуртоосты?

- Вот озьы ик - шудон шоры сямен учкыло кадь тросэз. Огласянь, мон соосты валасько - адямиос секыт ужын, гурт хозяйствоын тыршо, нош уксё ӧжыт басьто. Нош милям юртамы лумбытэн пуко, «маке дауртыса», эшшо со понна соослы уждун тыро… Жаляса верано, туала улон адямиез лекгес каре, солы тросгес сюлмаськоно луэ ваньлык, коньдон поттон сярысь. Чеберлык, пуш дунне сярысь малпаськыны дырзы но, мылкыдзы но уг тырмы ни. Нош учконо ке, котькуд адями - со ас понназ художник ук…

Соин мынам гуртме адӟеме потэ мукетъёслэсь пӧртэмгес, чебергес, удмуртгес - отчы пырыку ик, мед шӧдӥськоз кинлэн, кыӵе калыклэн со «государствоез».

- Кӧня ке ар талэсь азьвыл тӥ дасяды вал «Кызьы ӟечомытоно гуртэз» экономикая но улон-вылонъя проект. Улосъёсты азинтонъя институт сое умоен лыдъяз, тӥ вормисьёс радэ сюриды. Пыӵа-а проектты улонэ?

- Вал сыӵе учыр. Сыӵе конкурс радъяськиз со вакытэ Кун Думаысь депутат Светлана Смирнова кичӧлтэмъя. Ми наукая ужасеным Наталья Порцеваен ӵош проект дасям. Соя малпаськом вал гуртамы киужъя тросгес мастерскойёс кылдытыны. Со котыр ласянь пайдаен берытскысал: адями мылкыдзэ но буйгатысал, выль ужлы но дышысал, коньдон но поттысал. Оло, ужтэк кылемъёс но ӧжытгес луысалзы. Жаль, депутат милемлы юрттыса ӧз вутты. Мон туж данъяськисько Вуж Мӧньяеным. Мукет гуртъёсын ӵошатыса, со узыргес но: милям вань пичи предприятимы. СПК-мы, арендаторъёсмы. Нош кӧня визьмо, ужась адямиосмы, уг пашмы удмуртлыкмы. Но мыным потэ, со уката устогес мед луоз - гуртысь егитъёс медаз кошке, дышетскыса татчы берытскемзы мед потоз. Малы ӟеч тодон-валанэн адямиос городын гинэ уло - соос татын туж кулэ ук! Мар тӥ со городысьтыды шедьтӥськоды, уг валаськы. Одӥг нуналлы мыноно ке, акляк потоно. Ярам, творчествоен вырись адямиос, соослэн пӧртэм тунсыкъёссы, трос эшъёссы, котькытчы вуо, котьма сярысь вераськыны быгато, нош мукетъёс? Уж - дор - шыд - телевизор… Мар отын сокемез? Гуртоослэсь шулдыргес но, узыргес но уг уло. Шуо, гуртын уж секыт. Зэм. Но куддыр асьмеды асьмеос токма курадӟытӥськом ук: кулэ-а, ӧвӧл-а, быдэс луд картош-кубиста мерттӥськом. Выриськом-выриськом, а пайдаез ӧвӧл. Мерттоно ке, валаса, ӟеч выжыез, сисьмисьтэмзэ, бадӟым урожай сётӥсьсэ кулэ, дыр. Бичакуд сюлэм мед шумпотоз. Озьы ик пудоен. Пайдаез трос ӧвӧл кадь, но курадӟоно: кызьы уд возьы, бускель вордэ ук! Конечно, ӟеч уж, бадӟым уждун луысал ке, сыӵе улон манерез, оло, воштысал, адямиос тросгес саклык висъясалзы лулпушсылы.

Мынам тросэз эшъёсы, кылсярысь, Ува ёросысь Сидоровъёс, Алнашысь Печниковъёс гуртын уло, но соос туж тунсыко, визьмо адямиос. Мынам мылкыды вань гуртам кыӵе ке аспӧртэм клуб манер кылдытыны: ужзы бере адямиос ӵош пукыны, кенешыны, мылкыдзэс кисьтыны мед быгатозы.

- Нош тӥ быгатӥськоды-а огдыре огкадь ӟеч мастер но, кивалтӥсь но луыны?

- Нырысетӥез, зэм, мыным матынгес. Куддыр ваньзэ куштыса, гань-гань пукысал кадь киужаса, мастеръёсме дышетыса. Директор ужен акылляськоно луылэ, отын мылкыдъя гинэ уг пӧрмы ни: косонэз но быдэстоно, аслыд но косъяськоно. Мон бордысь гинэ потысал ке, ужасьёсылы уксё но тросгес тырысал, юртмес но паськытатысал кадь…

Зэмзэ вераса, ужасьёсылы монэн секыт, дыр, малы ке шуоно мыным уг кельшо огшоры ужъёс, огшоры тыршисьёс. Мыным кулэ аспӧртэм, нокытын пумиськылӥсьтэм, паймытӥсь арбериос, ас ужзылы вань сюлэмзэс, визьзэс, быгатонлыксэс сётыса тыршисьёс.

- Улонады ваньмыз удалтӥз, шуыны луоз. Кыӵе шуд сярысь малпаськиськоды на?

- Ваньмыз ӧй, шуысал ай. Корка пуктоно на. Сыӵе мон - маке весь лэсьтӥськисько-лусйиськисько, нош аслым, пиналъёсылы юрт ӧй ӝуты на. Нош со луиз ке но, асме мон «пенсие» уг келя, дыр ай. Корка пуктон, сад мерттон, нылпи будэтон - адями понна со туж ӧжыт. Ассэ буйгатон понна озьы вераз, дыр, улоназ бадӟым малпанзэ быдэстыса вуттымтэ мурт.

Кыӵе шуд? Мынам та улонысь зэмлыкез (истинаез) шедьтэме потэ… Ваньмыз ог-огзэс валаса, дунъяса мед улысалзы кадь, сюлэмазы каньыл мед луоз.

Источник:

Тарасов Н. М. Тӧдьы юсьёс берто / Н. М. Тарасов ; записала Зинаида Рябинина // Удмурт дунне. - 2009. - 6 февр. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"