Соснов Сергей

Материал из Воршуда
Перейти к навигацииПерейти к поиску

Соснов Сергей Анатольевич - удмурт кылбурчи.

580.jpg

Улон сюресэз[править]

Соснов Сергей Анатольевич вордскиз Пичи Пурга ёросысь Баграш-Бигра гуртын 1965-тӥ арын 2-тӥ оштолэзе. [1]

Сергей будӥз трос ныло-пио семьяын. Володя, Семён, Александр но Сергей. Со бере эшшо вордӥськизы на Игорь, Жанна но Милитина.

Атайзы, Анатолий Иванович, быдэсъяз гурт ужъёсты, анайзы, Нина Кузьминична, 33 ар ӵоже скал кыскыса ужаз. Нина Кузьминична сизьым нылпи будэтэм анай-героиня, Октябрь Революция но Ленин орденъёсын пусъем дано кышномурт. [2]

Баграш-Биграын нылпи сад-яслизы ӧй вал. Соин ик 1971-тӥ арын Сергей мынӥз школае "0"-тӥ классэ, подготовительной группае. 1973-тӥ арын атаез арган басьтӥз. Туж бадӟым шумпотон вал. Нырысь шудыны дышетскиз тятязы, туж зол ӧз ке но шудылы, кызьы шудыны пиосызлы возьматӥз. Ваньзы ик шудыны дышизы.

1981-тӥ арын южтолэзе Сергейлы Бигра арганчиослэн ансамбленызы шуд усиз Москвае, Удмуртиысь литературалы но искусстволы сӥзем нуналъёсы вуылыны. Нош 1982-тӥ арын пӧсьтолэзе пичи арганчиослэн ансамбленызы Москвае, центральной телевидение "Творчество юных" телепередачае ветлӥзы. [3]

Вордскем гуртаз школазэ йылпумъяса, 1982-тӥ арын Сергей Соснов Баграш-Биграысь ЦСДК-ын методист луыса ужаны кутскиз. Нош сӥзьыл дышетскыны пыриз Ижевскысь Культурно-просветительной училищее оркестровой отделенияз. Ветлыны кутскиз "Зангари" ансамбле. 1983-тӥ арын ансамбленызы вуылӥзы Приморской крае, Владивостоке но Монголие.

Но пияшлы дышетсконзэ быдэстыны ӧз сётэ. 1984-тӥ арын сое басьтӥзы армие. Служить карыны Сергей Соснов сюриз Дальний Востокысь но Восточной Сибирьысь СССР-ысь МВД-лэн внутренней войскоосызлэн эктонъя но кырӟанъя ансамбляз. [2]

1986-тӥ арын оштолэзе, армиысь бертыса, Сергей методист луыса ужаны кутскиз Баграш-Бигра гуртаз. 1987-тӥ арын Ижевскысь культпросветучилищелэн оркестръя люкетаз дышетсконзэ йылпумъяса, вордскем гуртаз Культура юртын методист луыса но собере Пичи Пурга ёрос Культура юртлэн директорез луыса тыршиз. Мыло-кыдо ветлӥз Пичи Пурга Калык хоре. Ужан куспаз ик дышетскыны пыриз Пермысь Культурая институтэ.

1995-тӥ арын Пичи Пурга РОВД-ысь фольклоръя коллективен Москваын "Салют, Победа!" фестивальын лауреат луизы. [3] Сергей Соснов кылбур гожъям сяна, ачиз ик крезьгур малпа, баянэн шудэ, кырӟа. Нош эшшо со туж усто суредаське вылэм. Но 1997-тӥ арын Сергей Анатольевич яратоно ужысьтыз, собере воксё чеберлыко (культура) удысысь, кошконо луиз.

2000-тӥ арысен Сергей Анатольевич Соснов Пичи Пургалась Сюрес лэсьтонъя кивалтонниын (дорожное управление) нырысь рабочий, нош собере художник-оформитель луыса ужаз. [1] 2004-тӥ арысен ужа РЖД-лэн ведомственной охранаяз.

Гожъямъёсыз сярысь[править]

«Школаын дышетскыкум ик, бадӟым агае Вова, шудыса гинэ, кыӵе ке серемес кылбур чуръёс кылдытъя вал. Солэсь адӟем карыса, мон но мар ке со гожтыны вырылӥ. Йӧнтэмгес гожтӥсько вылэм, дыр, малы ке шуоно, Песянае, Елизавета Ивановна, пӧрам кылбуръёсме кылыса, тышкаське вал», – тодаз вае Сергей Анатольевич. [3]

Нырысетӥ кылбуръёсыз Сергей Сосновлэн печатласькизы удмурт газетъёсын но журналъёсын: «Дась лу!», «Советской Удмуртия», «Кенеш», «Инвожо», «Маяк» но мукет ёрос газетъёсын.

2003-тӥ арын «Удмуртия» книгапоттониын «Кизили лыдъян уйёс» нимо авторлэн кема возьмам нырысетӥ книгаез потӥз. Книгалэн азькылаз шуэмын: «Мӧзмон, сюлэмшугъяськон, шумпотон, уйёсты изьытэк ортчытон, гужем шорын лымы поръян яке тол вакытэ льӧмпу пурыослэн синъёссэс усьтэмзы – ваньмыз та Яратон нимо мылкыдлэн турлы буёло тодметъёсыз, мае суреда аслаз кылбуръёсаз кылбурчи Сергей Соснов». Зэм вера книгалэн редакторез Сергей Матвеев. Быдэс сборник тырмемын чеберез шӧдӥсь-валась, шугъяськись-тулкымъяськись сюлэмлэн ас яратонзэ утчаменыз. Кылбуръёсызлэн нимъёсыз гинэ но со сярысь верало: «Тон шудэ-а мынам?», «Италмасэз утчан», «Пумиськонлы оскон», «Тон кулэ мыным», «Тулысэз витён» но трос мукетъёсыз.

Соосыз лыдӟемъя, гажан мылкыдлэсь пӧртэм буёлъёсын ворекъямзэ-тылсияськемзэ адӟиськом. Лирической герой тужгес яратэ ке но гужем ӝытъёсыз, «кизили лыдъян уйёсын» (ӵемысь со сярысь тодэ ваён пыр вера, кылсярысь, «Гужем уй» кылбурын), та мылкыдыз, гадяз тэрытэк, быдэс инкуазь тыр пальккаське кадь. Соин ик яратоно нылыз – со быдэс дунне, вылтусыз но солэн тодметъёсыныз герӟаськемын. Тани, кылсярысь «Тон шудэ-а мынам?» кылбурысь удмурт поэтикаын ӵем пумиськылӥсь образъёсыз адӟиськом: [2]

Синъёсыд – шундыен чагыр ин,

Куараед – азвесен жильыртӥсь ошмес ву,

Йырсиед - ӵук тӧлэн лӧсъяськись ӵуж буртчин,

Мугорыд – веськырес мугоро тӧдь кызьпу.

Ӵем дыръя нылмуртлэн тусбуйыз но яратон – со одӥг, висъянтэм-люконтэм макеос кадь. Тае шӧдыны луэ «Льӧль сяська» кылбурысь:

Муспотон сяськаяд, льӧль тылын гомаса,

Югдытӥд, чебермад тон пурысь улонме.

Ӝокатӥсь сьӧд уйлэсь сайкатӥд, эсьмаса,

Бен соин кырӟанэн мылкыды пуроме.

Татын но, мукет кылбуръёсаз но С. Соснов вера: яратон – со бадӟым шуд, нош кепыран-возьдаськон со шудэз ӧвӧлтэм каре: «Адӟисько ке тонэ, тыршисько ватскыны, эх, быдэс улонэ ведь шудтэм» («Тон шудэ-а мынам?»). [2] Сергей Соснов – кырӟась, крезьгурась кылбурчи, соин ик пумиськыло таӵе кылъёсыз: «золто арганме жингыртӥсь крезьгурен», «кырӟанэн мылкыды пуроме»… 2011-тӥ арын авторлэн «Лысвуос-а, синвуос-а…» кыкетӥ кылбур бичетэз потӥз.

Уно кырӟанъёссэ С. Соснов ас чуръёсызъя гожтӥз. Кельшо на солы Александр Белоноговлэн, Семён Перевощиковлэн, Михаил Федотовлэн, Любовь Тихоновалэн, Алексей Ельцовлэн но Илья Пельтемовлэн кылбуръёссы. Огъя вераса, Сергей Анатольевич 50-лэсь ятыр кырӟанъёс кылдытӥз ини. [4]

Гожтэм кырӟанъёссэ автор ачиз ик сцена вылысен калыклы возьматэ. Мукетъёсыз но дано артистъёсмы, кылсярысь, Михаил Ворончихин, мылысь-кыдысь басьто ас репертуаразы Сергей Сосновлэсь кырӟанъёссэ но быдэсто соосты бадӟым сценаос вылын.

Премиосыз[править]

МВД-лэн "Салют, Победа!" фестивальысь лауреат (Москва), 1995

Удмурт Элькунысь лулчеберет удысысь сӥё-дано ужась, 2003

Библиография[править]

Книгаосыз[править]

Кизили лыдъян уйёс : кылбуръёс . – Ижевск : Удмуртия, 2003. – 62 с.

Лысвуос-а, синвуос-а... : кылбуръёс . – Ижевск : Удмуртия, 2011. – 78 с.

Шурдымон веттаське улонэ : кылбуръёс. - Ижевск : Шелест, 2017. - 81 с.

Статьяосыз[править]

Мискинь така : серемес верос // Инвожо. – 2006. – № 2/3. – С. 75.

Кырӟанъёсыз[править]

Волков Ю. Дор палъёс : "Кисьтасько ву пырыос..." / кылъёссэ гожтӥз С. Соснов // Кенеш. – 2011. – № 5/6. – С. 78–79 ; Удмурт дунне. – 2011. – 26 окт. – С. 6. – (Шудэлэ тӥ, серектэ).

Кузнецов П. Уг возьмаськы : "Чик уг пот возьмаме..." / кылъёссэ гожтӥз С. Соснов // Удмурт дунне. – 2012. – 13 нояб. – С. 7. – (Шудэлэ тӥ, серектэ).


Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.

Уже кутэм литература[править]

  1. 1,0 1,1 Хайдаров Р. Сергей Соснов (1965) // Писатели и литературоведы Удмуртии : биобиблиогр. справ. / сост. А. Н. Уваров. – Ижевск, 2006. – С. 177.
  2. 2,0 2,1 2,2 2,3 Чернова Т. Кизили лыдъян вакыт // Удмурт дунне. – 2003. – 20 мая. – С. 3.
  3. 3,0 3,1 3,2 Рукопись.
  4. Ельцов А. Лысвуос-а, синвуос-а… // Удмурт дунне. – 2011. – 11 мая. – С. 8.