Смирнова Светлана Константиновна

Материал из Воршуда
Перейти к навигацииПерейти к поиску

Югыт кузьмась[править]

Смирнова С. К.

Туннэ редакция тодматэ тӥледыз Россия Федерациысь Кун Думалэн депутатэныз Светлана СМИРНОВАЕН. Мар вуттӥз кыдёкысь гуртын будэм нылашез бадӟым политикае? Кинэн со али эшъяське? Кытын адӟе ассэ азьланьын?

- Светлана Константиновна, ужамды но мар лэсьтэмды сярысь ивортонъёс газетамы ӵем печатласько. Но туннэ вераськем потэ вал асьтэос сярысь. Ойдолэ кутском таӵе юан бордысен. Тани ӵем кылоно луэ: политика - со кырсь маке. Озьы ке, малы тӥ, нылкышноос, отчы пыриськоно кожаськоды?

- Политика пумысен сыӵе веранэн мон соглаш ӧвӧл. Бен, мукет удысъёсын сямен, отын но вань кырсь мылкыдъёсы выем муртъёс. Но ӟеч адямиос тросгес ук. Политикалэсь кырсьсэ гинэ адӟись муртъёслы тазьы но шуыны быгатӥсько: ми, нылкышноос, та уже сое чылкытгес карон вылысь ик мынӥськом. Учке ай, кин-о гуртады тросгес выре котырез утялтонэн, жуг-жагез ӵужонэн, дӥсь миськонэн? Озьы уго.

Асьмелы туннэ туж уг тырмы вӧзысь адямилы юрттыны тыршон, ӟеч лэсьтыны сюлмаськон. Мон малпасько, политикаын кышномуртъёс тросгес луизы ке, асьме пӧлын ог-огдэ валан мургес выжыяськоз. Котьма шуэ, но обществолэсь висись интыоссэ нылкышно умойгес шӧдэ, котькуд ужпумез со сюлэм пыртӥз поттэ, пӧртэм мылкыдо адямиосты огазеяны быгатэ.

Ачим сярысь ке верано, политикае вуи шуыса уг жаляськы. Со мыным луонлык сётэ кужымме эскерыны, кинлы ке коть ӟеч лэсьтыны, трос выльзэ тодыны. Валамон ни, пичи дыръям чик но ӧй но малпа вал, кытчы ке вылӥе, кивалтон удысэ шедё шуыса. Но озьы луиз...

- Нациосъя комитетэн кивалтыкуды но, Кун Кенешлэн депутатэз луэмды бере но, али но - котьку ик тӥ сьӧры азьлань “мынэ” Байгурезьлэн туспуктэмез. Борддоре ошем чебер фото пинал дырдэс тодэ вайытэ, лэся?

- Со шулдыр инты мон понна зэм но туж дуно. Чайковскийлэн крезьгуреныз, Кулаковалэн куасъёсыныз, Калашниковлэн автоматэныз ӵош Байгурезь но быдэс элькунмылэн одӥгез данъяськымон тодметэз луэ ук. Нош Дэбес палъёсын вордскемъёс понна со вераны луонтэм мылкыдъёсты бугыртӥсь гурезь. Арлы быдэ вазен со котырын турслёт но мукет ужрадъёс ортчыло вал. Ӵем отчы шутэтскыны но ветлылӥм. Тямысэтӥ классын дышетскыкум, Байгурезь дорын ортчизы спортивной ориентированиея элькун ӵошатсконъёс. Спортын соку вал сыӵе удыс - котырез возьматӥсь картая созэ яке тазэ интыез ӝог утчан-шедьтон. Мыным удалтӥз ас ёзъёсы пӧлын азьпала потыны. Кыӵе со бадӟым шумпотон вал пичи нылаш понна! Кин тодэ, оло, со нырысетӥ вормон ик азьланьын дӥсьтысагес вамышъяны кужым но сётӥз.

Бӧрысь ини, Нациосъя комитетын ужакум, эшъёсыным вераським Ижын улӥсь дэбесъёсты землячествое огазеяны. Ӵектонэз умоен лыдъязы ёрос кузёос. Выль организацилы ним малпанэн ӧм курадӟе - “Байгурезь” шуим. Туннэ землячествомы асьме республикаын тужгес кужмоез. Олома но радъя. Сяме пыӵатыны турттӥськом арлы быдэ июне Байгурезь котырын огъя пумиськонъёс ортчытъянэз. Мед огазе люкаськозы Чупчи палан вазен будэмъёс, отын али улӥсьёс, мед ог-огзылы юрттыны, ог-огенызы данъяськыны тыршозы.

- Туннэ асьмеос котьма сярысь шара вераськыны кенешим бере, мон быгатӥсько, вылды, куд-ог умойтэм сямъёсты сярысь но юаны. Матысь адямиостылэсь тазьы верамзэс кылылэм вань: Смирнова, пе, ачиз уен-нуналэн ужа, мукетъёсызлы но маза уг сёты. Куать часын, шуо, кошке ни кыдёкысь ёросэ бырйисьёсын пумиськыны, вить-куать интые вуылэ, бер уин дораз берытске но ӵуказеяз выльысь сюрес вылэ потэ. Озьы-а? Я, быръён вакытэ данакез кандидатъёс кӧлонэз вунэто, нош малы кулэ озьы астэ жалятэк ужаны мандат басьтэм бере?

- Эшъёсы, зэм ик, та ласянь весь пыкылыны туртто. Тани туэ январь пумын но февральлэн кутсконаз быдэс арня ветлылӥм республикаетӥ. Ар ӵоже ужамлы йылпумъян лэсьтоно вал ук. Интыосысь кивалтӥсьёсын, активен тямыс огъя кенеш ортчытӥм, со сяна, ньыль-вить нимаз коллективъёсы ветлӥм на. Пятницае Сарапулысь укмыс час котырын ӝытазе берытским. Нош ӵуказеяз мыноно Москвае, нуназеозь пумиськоно на асьме министръёсын, мукет кивалтӥсьёсын. Соос доры дасяськытэк уд мыны ук. Бырйисьёслэсь вань куронъёссэс, гожтэтъёссэс кызьы ке но “сӥсъяно”, удысъёсъя люкылоно. Доре уин куинетӥ часэ мыныку бертӥськиз ни. Кыкез юрттӥсьёсы дасям документъёсты ӵукнаозь печатласа пукизы.

Ачим но валасько, озьы ужаны уг яра шуыса. Но мукет сямен уг быгатӥськы. Вот пичиысен дышемын - маке пусйид, кыӵе ке уж борды басьтӥськид, вутты сое пумозяз. Озьы ке ӧвӧл, кутсконэз ик ӧй вал.

- Ма, асьмеос пӧлын, мон удмуртъёсты верасько, сыӵе чурыт сямо муртъёс укыр ӵем уг пумиськыло кадь. Кытысь меда со тӥляд?

- Верамед шонер ӧвӧл, потэ мыным. Удмуртлэн ужез яратэмез котькинлы тодмо ук. Быгатэ со юн кариськыны но. Мон сямен, ӵем дыръя люкетэ мукетыз: удмуртъёс асьсэдыз уг дунъяло, весь малы ке но асьсэдыз мукет выжыосысь потэмъёслэсь улэгес пукто. Нош адями ачиз ассэ уг гажа ке, кин ке гажалоз шат сое?

- Юанэлэсь палэнскиды кадь. Асьтэ сярысь ӧд вералэ ук...

- Мар меда сыӵе-таӵеез? Уг тодӥськы, кин ке юри дышетӥз меда юн сямо луыны? Ачиз улон ке шат?

Капчи ӧй вал пинал дыры. Будӥ огшоры гуртын. Семьяямы воргорон ӧй вал. Бабушмы кузёяськиз. Мынам анае - Елихонида Павловна - весь рядовойын ужаз, со бак кышномурт. Уг но кылы, уг но вераськы. Милемын ӵош улӥз анаелэн сузэрез. Со куинь пи будэтӥз. Ачиз фермаын скал кыскиз. Тӥни озьы сизьым кузя улӥм. Валамон ни, ужлэсь шӧмзэ пичиысен ик веръяськиз. Пу дасян но, турнан но, ваньмыз мукетыз но мыным тодмо. Вӧжогес луыса, гужемъёсы вынъёсыным колхозын ужам. Ӵукна вить часлы ик бызиськом вал конюховкае - уго вазь вуэмезлы ӟечгес уж шедьылӥз.

Ньылетӥ классысен ас кожам улыны кутски, шуыны луоз. Школамы мукет гуртын вал бере, интернатэ интыяськи. Отысен ик кыстӥськи общественной уже. Мар но ӧм малпаллялэ соку! Пӧртэм-пӧртэм ужрадъёс ортчытъям.

Улытозям тау карисько но каро анаелы но тётяелы, песянаелы. Та огшоры удмурт нылкышноос, дышетскемзы но тыро-пыдо ӧй вал ке но, вань сюлэм шунытсэс сётӥзы но сёто мыным. Соос дышетӥзы шонер малпаськыны, шонер лэсьтыны, шонер сюрес бырйыны.

- Мон тодӥсько, пичи дыръяды тӥ туж синмаськемын вал дышетӥсьлэн ужезлы...

- Зэм, асме со интыын адӟисько вал. Бӧрысь малпан воштӥськиз. Дорамы вуылӥзы Асан совхоз-техникумысь егитъёс. Соос сокем бурдъяськыса мадизы дышетскемзы, улэм-вылэмзы сярысь, мон аслым шуи: всё, мынӥсько Асанэ. Оло, озьы ик луысал но - дышетӥсьёсмы ӧз лэзе, нырысь, пе, аттестат басьтоно. 10-тӥ класс бере ми, куинь эшъёс, Ижысь сельхозэ пырыны кенешим. Али кадь син азям на отчы нырысьсэ мынэммы. Автобусмы дэрие нӧдыса тӥяськиз. Зураозь пыдын мыноно луиз. Кытчы-о пырод? Дэриез коласа ик вамышъям ни. Колонкаын пыдъёсмес миським но отӥяз автобусэн кошким. Студент дырме туж шуныт мылкыдын тодам ваисько. Номырин ӵошатонтэм шудо аръёс. Бен, вал дӥськутлы ёрмон, малэсь ке керпотон. Но уродэз вунэ ук. Кыӵе ӟеч адямиос дышетӥзы милемыз! Али но ваньзэ сямен ик нимын-тулын тодам возисько.

- Сельхозинститут ик тӥледлы кузпал но кузьмаз ук.

- Володяен тодматским комсомоллэн комитетаз. Со политсектор понна кыл кутэ вал. Эшъяським. Ӵош луыны кенешим. Институт бере монэ отчы ик ужаны кельтӥзы, Володя дышетскиз на. Первомай праздник азьын вераським ог-огмес ӵыжы-выжыосынымы тодматыны. Озьы Шарканозь вуим. Отысен Зар.-Медлае пыдын кошким. Тодмотэм сюрестӥ, кыӵе ке но лудъёс-нюлэсъёс пыр мынӥськом. Тани гуртэ но адӟиське ни. Но... пичи гинэ Медла шурмы, тудвуэн пачылмыса, Чупчилэсь паськыт вӧлскем. Мар кароно? Володя мукет ярдурысь, гурт пумысь пыж адӟиз. Кылиськиз но кезьыт вуэ омырскиз. Вуттӥз со лодкаез мон доры. Вот соку валай, та адями секыт учыре но вӧзам луоз шуыса. Соин ик Сюмси ёросысь Орловской посёлоке мыныкумы (отын уло Володялэн анай-атайёсыз), азьланьын кызьы-мар луоноез тодмо ни вал.

Я, олома но верасько ни. Ваньмыз уго тодэ лыктэ... Вордскиз Антонмы. Пимылы куинь толэзь тырмиз но, мон уже потӥ. Собере ӝоген Пермьысь аспирантурае пыри. Йыды будэтонъя научной уж бордын выри. Но монэ ӧтизы соку гинэ кылдэм выль кивалтон ёзэ - Егитъёсын ужанъя кун комитетэ. Тӥни сыӵе огшоры улон сюрес. Берло аръёссэ - весь калык пӧлын. “Удмурт дуннеез” лыдӟисьёс кытын ма ужамме тодо, дыр.

- Тӥляд туж трос эшъёсты. Кивалтонэ вылэгес тубемен валче, соослэн лыдзы йылэ-а, кулэсме-а?

- Асьме кылын “эш” шуэм трос валан сётэ. Друг, приятель, товарищ, коллега - учкы ай ӟучъёслэн “эшмылы” кыӵе гинэ тупасез кылзы ӧвӧл. Соин ик висъяны кулэ зэмос эшъёсты но тодмоосты.

Лыдзыя вераны шуг. Тодӥсько созэ: кинэн умой-умой эшъяськи, шуом, студент дыръям, соосын али но тыршисько ӵемгес пумиськылыны, ваньмон дырез ӵош ортчытъяны. Тани берлозэ Удмуртие талэсь азьло вуылыкум но, дыр шедьтӥ Вавожысь Ложкинъёсы дорын кӧня ке шутэтскыны, Уваысь Глазыринъёсме адӟыны. Ижын но оскымон эшъёсы вань. Ми соосын, ог-огмылэн кытын-мар ужаммы шоры учкытэк, эшъяськиськом.

Со сяна, ӟеч кусып возисько асьме тодосчиосын, творчество удысын ужасьёсын. Валамон, Москваын но табере кылдо ни ӟеч тодмоос. Но туннэ мыным тужгес но матын луо юрттӥсьёсы. Соос котькуд ёросын вань. Ижысь общественной приёмнойын ужасьёссэ но вератэк кельтэме уг поты. Туж пӧртэмесь кадь соос, но ваньзы ик огъя малпанэн уло. Тани Геннадий Петрович Климентов арлыдо ни, со отставкаысь генерал-лейтенант. Владислав Прозоров - бизнесын ассэ эскерем егит удмурт воргорон, малпасько, кӧня ке ар ортчыса, со вылӥе ӝутскыны быгатоз. Николай Силин - Якшур-Бодьяын будэм мурт, туж яратэ ӝикыт ужанэз, ӝог вала пуктэм ужпумез. Зоя Пономарёваен Нациосъя комитетын но ӵош ужам. Али со наукаосъя кандидат луыны дасяське.

Юрттӥсьёсы пӧлын озьы ик - Анатолий Марченко (“Удмуртторфлэн” директорез), Александр Прасолов (Лэсьтӥськонъя управленилэн кивалтӥсез), Татьяна Прокопьева (“Шундылэн” азьветлӥсез), Зоя Суворова (тодосчи). Пӧлысьтызы котькудӥз мыным дуно. Уго огнам мон нокызьы но ӧй быгатысал бырйисьёслэсь сюосын вуись куронъёссэс быдэсъяны.

- Светлана Константиновна, кытын тӥ луоды меда, кӧня ке ар ортчыса?

- Тод вылэм, о-о. Ну, куинь арзэ, валамон, депутат ужез ик быдэсъяло на (Думаез возизы ке, Россиын олома но луыны быгатэ ук). Отӥяз... Шугъяськисько ма вераны. оло наука ас бордаз кыскоз... 90-тӥ аръёсы мон Москваысь кык академиын дышетски, туж мылкыд вань калык кусыпъёсты радъян опытэз, тодон-валанъёсме кызьы ке но огазеяны, мукетъёсыз дорозь вуттыны. Куке пӧрмоз меда? Сюлмы шӧдэ, со ужлы дыр но, кужым но шедьто шуыса. Мукет но малпанъёс трос. Огъя вераса, инмар утиз ке, олома но лэсьтыса вуттом на, дыр. Мон понна котьмалэсь главноез со бордын. Котькытын мед ужалом, котьку ик адямиослы пайда вайыны тыршо. Кин ке шуоз: о-о, таид макем чебер вера. Мед. Но калыкмылэн, элькунмылэн ӵуказе нуналыз монэ зэм ик сюлмаськытэ.

Источник:

Смирнова С. К. Югыт кузьмась / С. К. Смирнова ; записал И. Лебедев // Удмурт дунне. - 2001. - 16 фев. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"