Сапожникова Анна

Материал из Воршуда
Перейти к: навигация, поиск

Сапожникова Анна Максимовна - удмурт кылбурчи.

575.jpg

Улон сюресэз

Сапожникова (Кузнецова) Анна Максимовна вордӥськиз Грак ёросысь Байтуган гуртын 1953-тӥ арын 18 южтолэзе (мартэ). [1]

Дышетскиз пичи Ани Вылӥ Игра шор ёзо школаын. Тямысэтӥ классэз йылпумъяса, Сарапулысь дошкольной педучилищее дышетскыны пыриз. 1971-тӥ арын сое пыр потыса, нылпиосты визьнодась луиз. Вазь анай-атайтэк кылем нылашлы визь-кенешен но, коньдонэн но юрттӥсь ӧй вал. Стипендия вылын улӥз. Кытӥ сием потон дырыз но луылӥз, вылаз кема нуллэм дэремен но ветлӥз. Озьы ке но дышетсконзэ ӧз кушты, йылпумъяз. [2]

Анналэн пинал дырыз курадӟысагес ик ортчиз. Бызён вакытаз вуэм нылашез, вуоно картэз лушкаса нуиз. Картлы бызьыса но курадӟонъёс ӧз кельтэ. Но егит нылкышно ӧз сётскы. Вазь куспалтэк кылён но ӧз куасалты. Ваньзэ вормиз. [2]

Удмуртлыкмы ӝутӥськон вакытэ, Анна Максимовна нырысьёсыз пӧлын басьтӥськиз удмурт нылпи сад кылдытон борды. Ужез туж ӟеч радъяськиз. Аслаз етӥз мылкыдыныз мукетъёссэ но ӝутъяз-бурдъяз. Валаса ужаменыз, педагог А. М. Сапожникова удмуртъёсты гинэ ӧз, ӟуч воспитательёсты но ас бордаз кыскыны быгатӥз. Анна Максимовна валаз, покчи нылпиосты таза, визьмо будэтон понна, нырысь ик луонлыкъёс усьтоно семьяын. Воспитательёс мумы-бубыослы юрттӥсьёс, визь-кенеш сётӥсьёс гинэ луыны кулэ. Кыӵе гинэ амалъёс ӧз малпаллялэ воспитательёс, нылпиосты чебер, вольыт удмурт кылын вераськыны дышетон понна. Но куд-ог семьяосын анай-атайёс доразы пиналэнызы ӟуч верасько. Но вал валасьёсыз но анай-атайёс. Соос котькытын пиналъёсынызы удмурт кылын вераськизы, воспитателъёслэсь тыршемзэс палэнэ ӧз каре. [3]

Ужамъяз Анна шӧдӥз, ас выжыезлэсь культуразэ ӟечгес тодон понна – дышетсконо. 1988-тӥ арын, ужан висказ, Удмурт Кун университетысь филологи факультетысь удмурт ёзэтаз дышетскыны пыриз. Приёмной комиссиен кивалтӥсь Иван Васильевич Тараканов нырысь-валысь юн пумитъяськиз: тон удмурт кылэз школаын гинэ но дышетэмын ӧвӧл, «кык» интые «куинь» ке но пуктӥм, кызьы визь-нод люкалод? Ӧз чигна: удмуртъёс сярысь номыр ӧй тоды ке, пе, кызьы дӥсьтом котьмалы оскись пиналъёсты улонэ поттыны. 1994-тӥ арын Анна дышетсконзэ «витьёслы» йылпумъяз, эшшо аспирантурае но пыриз на. [2]

Олокытын но ужаны вуиз егит кышномурт. Огвакыт Анна Сапожникова тыршиз Ижкарысь «Юный техник» клубын методист луыса, кружокен кивалтӥз. Вань сюлэмзэ поныса ужаз. Кивалтӥсьёс туж гажало но дунъяло вал ужасьёсэс: дӥськут но, путёвкаос но шедьтылӥзы. Но Анналы маке но ӧз тырмылы. Удмуртъёстэк шоканы уг быгатӥськы, шуыса, кошкиз. [2]

Анна Максимовна удмурт нылпиосын ужаны кутскемезлэсь азьло но ӧз палэнскылы удмурт культуралэсь. Котькыӵе ужрадэ мыло-кыдо пыриськыса тодматскылӥз но кусыпъёс тупатылӥз удмурт кырӟасьёсын, гожъяськисьёсын (писательёсын), кивалтӥсьёсын. Тӥни озьы азьвыл тупатэм кусыпъёсыз юрттӥзы педагоглы ужзэ умойгес радъяны. Трос шуг-секытъёс сюрылӥзы Анналэн ужан сюрес вылаз. Нылпи садын ужысьтыз кошконо луиз. [3]

Удмуртлык понна тыршись адямиез синйылтӥз суредаськись, усточи удмурт нылпиослы искусствоя школаысь дышетӥсь Василий Николаевич Морозов. Отчы ӧтиз. Школаын, пӧртэм быгатонлыко пиналъёс пӧлын, Анна Максимовна но ас ӧраз сюриз. Со мылысь-кыдысь визьнода Иже гуртъёсысь вуись удмурт нылпиосты. Соослэн анай-атайёсынызы сюлмысь кенешылэ. «Уен-нуналэн вӧзазы пукысал – сыӵе бурдъяське мылкыды», – шуэ со. [2]

Али но А. М. Сапожникова ужа яратоно ужаз, удмурт пиналъёс бордын. Анна Максимовна мыло-кыдо пыриськылӥз общественной ужъёсы. Со – «Дэмен» удмурт культура обществолэн ёзчиез. [1]

Гожъямъёсыз сярысь

Анна Сапожниковалэн нырысетӥ кылбуръёсыз печатласькизы «Удмурт дунне» газетын но «Инвожо» журналын. [1] Анна Сапожникова кылбуръёс гожъя ваньмон дыръяз. Солэн поэзиез но, ачиз кадь ик, туж чылкыт, ненег, малпаськытӥсь. Исаны дӥсьтонтэм, аспӧртэмлыко. Котькуд кылзэ, котькуд чурзэ соин ик туж чакласькыса, сюлэме пыӵатыса лыдӟоно. Анна Максимовналэн, аслаз сямен ик, поэзиезлэн но нимаз Инмарез вань. Со малпанъёссэ Югдытӥсь, Радъясь, чебер кышномуртэ вылӥе Ӝутӥсь, ӵуказелы оскон Сётӥсь. Нош оскон ке вань, кужым но золгес дыа, кылбур но аспӧртэмгес ӧръяське. [4]

Туннэ кужымме жаляло вожанлы,

Югыт вылӥ сӥ – чылкыт яратонлы,

Сюлэмы – черке – одӥгезлы, сяська кизисезлы.

Кылбурчи яратыса возьматэ вордӥськем палъёссэ:

Кыӵе шулдыр тон, Муркемыр!

Вордскем анай-атай гуртэ –

Тэльёс, возьёс, чылкыт омыр –

Лул-сюлэмме инмозь ӝутэ.


Ужась-тыршись гурт калыке

Нылпи вордэ, корка пуктэ.

Удмурт кылын со вераське,

Чебер кырӟа, мусо эктэ.


Дуно, дано Муркемыре,

Тонэн потэ данъяськеме.

Дор музъеме, дэлет каре,

Тыныд потэ йыбырттэме.

2003-тӥ арын Анна Сапожникова «Инвожо» издательствын «Луэме потэ кужмогес» кылбуръёсын бичетсэ поттӥз. Та авторлэн кылбуръёсаз аспӧртэм куара чузъяське: возьматӥське авторлэн улон шоры учконэз, философской малпаськонъёсыз, улонысь зэмлыксэ утчан. Солэн лирической героиняезлэн лулыз инкуазен но яратонэн тупаса улэ. [1] Куд-ог кылбуръёсыз кырӟан луизы.

Кин ке но вӧсяське

Инмысь кизилилы.


Кин ке но вожъяське

Пельпумын чилясезлы.


Нош мон шумпотӥсько

Сюлмам пиштӥсезлы.

Премиосыз

Удмурт Элькунысь Культурая министерстволэн Данъян грамотаез

Кун Кенешлэн Данъян грамотаез

Кун Кенешлэн медалез, 2007

Библиография

Книгаосыз

Луэме потэ кужмогес : кылбуръёс. - Ижевск : Инвожо, 2003. - 78 с.

Статьяосыз

Усьтӥськы... ; "Азьвыл мытэм, туннэ юнмам..." ; "Гурезь йылысь чылкыт лымы ке тон..." ; "Куддыръя йыр висён йыгаське сюлэмам..." : кылбуръёс // Удмурт дунне. - 2006. - 30 мая. - С. 6.


Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.

Уже кутэм литература

  1. 1,0 1,1 1,2 1,3 Хайдаров Р. Анна Сапожникова (1953) // Писатели и литературоведы Удмуртии : биобиблиогр. справ. / сост. А. Н. Уваров. – Ижевск, 2006. – С. 173-174.
  2. 2,0 2,1 2,2 2,3 2,4 Сараматова Е. Чеберъятэк но чебер // Удмурт дунне. – 2008. – 21 март. – С. 6, 11. – (Удмурт кизилиос).
  3. 3,0 3,1 Банникова Т. Удыс мытыны секыт // Удмурт дунне. – 1992. – 2 сент. – С. 3.
  4. Ломагин К. Валтэ аслаз Инмарез // Удмурт дунне. – 1995. – 13 янв. – С. 2.