Родионова Елена

Материал из Воршуда
Перейти к: навигация, поиск

Елена Валерьевна Родионова - егит кылбурчи, удмурт литературая но кылъя дышетӥсь, кылысь кылэ берыктӥсь.

X 1051acb9.jpg

Улон сюресэз

Родионова Елена Валерьевна вордӥськиз 1983-тӥ арын 9-тӥ южтолэзе Вавож ёросысь Монья гуртын. Семьяосыз пичи дырысеныз ик сое Алёна нимаса будэтӥзы. 1988-тӥ арын анай-атаез вордскем гуртазы – та ёросысь ик Выль Бия гуртэ улыны берытско. Ньыль арлы бадӟымгес агаез вань, али со гуртазы ик агроном луыса тырше. [1] 1989-тӥ арын Алёна Выль Биялась шорёзо школае мынӥз. Пиналъёссы школаын дышетскон вакытэ анай-атайзы сюлмаськизы, гуртын улыса но соос тырмыт но мур тодон-валан мед басьтозы шуыса. Трос аръёс ӵоже нылпи газетъёслы но журналъёслы гожтӥськизы: «Кизили», «Ӟечбур!», «Мурзилка», «Весёлые картинки», «Юный техник», «Инвожо» но мукет. Огыр-бугыр вакыт кутскемлэсь азьло пиналъёсынызы ӵош Москвае но Ленинградэ вуылӥзы. [1]

Леналэн кылъёсты дышетон мылкыдыз пичи дырысеныз ик ӝутскиз ни вал. Чидатэк возьмаз 5-тӥ классэ выжемзэ, тодэ вал уго, соку немец кылъя урокъёс кутскозы шуыса. Но жаляса верано, Лена дышетскыку гуртазы йӧнала дышетӥсьсы ӧй вал. Дырын-дырын практикант яке бускель гуртысь лыктылӥсь дышетӥсь deutsch сямен мар но со валэктоз вал но, собере ар, кык но ортчылӥз, нокин ӧз вуылы. [2] Бадӟымгес классъёсын Алёна биологиен но тунсыкъяськыны кутскиз, та предметъя арысь аре ёрос олимпиадаосы ветлӥз, отын со котьку сямен вылӥ интыос басьтылӥз. Берпуметӥ классъёсын золгес но золгес малпаськылӥз, биологиен, медицинаен яке кылъёсын герӟаськем удысэз быръёно шуыса. Кыкез но тунсыко потылӥз, кыкез но сюлмызлы матын вал. Нош одӥг пол, «Ӟечбурысь» финн-угор отделение сярысь ялонэз адӟыса, отчы пырон ласянь малпаськыны кутскиз, одӥгаз кӧснуналэ Удмурт кун университетлэн «усьтэм ӧсъёсаз» но вуылӥз, отын матэгес тодматскиз Удмурт кылосбуръя факультетлэн улонэныз. Биология куддыръя Алёналэсь сюлэмзэ сюпсиз ик ке но, выльысен школа аръёссэ малпаса со уг жаля ни, мукет удысэз бырйиз шуыса. Пичи дырысь кылем тунсыкъяськонъёс быдэ вуэм бере одно ик берытско на: али Алёна туж яратэ сяськаосты, дораз но трос гинэ будосъёсыз, Бияла бертылыкуз но шумпотыса бакчаязы берга. Со сяна, школаысен ик солы ас тазалыктэ утьыса улон сям пыӵаз, али но со туж чакласа пӧраське но сиське, кема аръёс ӵоже ини арнялы кык-куинь пол бызьылыны пота. [1] 2000-тӥ арын, школазэ азвесь медален йылпумъяса, Алёна Удмурт кун университетысь венгер отделение дышетскыны пыре. Нырысетӥ семестрысен студентъёсты венгер кыллы Пётр Иванович Воронцов дышетӥз, нош вуоно араз секыт висьыса со улонысь кошкиз. Соку гинэ университетлэсь шӧмзэ валаны кутскем студентъёслы со бадӟым шуккет вал. Курсовой ужъёссэ но дипломзэ Алёна Валентин Кельмакович Кельмаковлы гожъя, солэн дышетскисьёсыз азе вылӥ куронъёс пуктэмез удмурт дуннеын тросэзлы тодмо. Вылӥгес курсъёсын удмурт нимберъёсъя (послелогъёсъя) дасям докладъёссэ Алёна пӧртэм конференциосын лыдӟиз, нырысетӥ научной статьяосыз но печатласькизы. Мадьяр кылзэ волятон понна Венгрие стажировкаосы но сюре. Вераны кулэ, Будапештысь Этвеш Лоранд нимо университетэ но Балашши Институтэ Алёна одногруппницаосыныз ӵош удмурт студентъёс пӧлысь нырысьсэ сюрес лёге, со дырысен отчы арысь аре выльёсыз но выльёсыз дышетскисьёс вуыло. [1]

Будапештын

Ньылетӥ курс бере Удмурт кун университетысь студентъёс пӧлын самой усто научной ужъя ялэм конкурсын Алёна куинетӥ интые потэ. Озьы со быдэс университет азьын возьматэ, физикая, математикая, информатикая но мукет «улонын кулэгес луись» удысъя гожтэм ужъёс сяна, удмурт кылэз сэрттон-пертчонэн но вылӥ вормонъёс басьтыны луоно шуыса. [3]

2005-тӥ арын, университетэз йылпумъяса, Игнатьева Ольга эшеныз нош ик нырысьёсыз пӧлын Будапештысь Этвеш Лоранд университетэ аспирантурае пырыны документъёссэс сёто. Малпам ужзы пӧрме. Алёна научной ужзэ финн-угор дуннеын туж тодмо луись литературовед дорын – Петер Домокош дорын уте. 2011-тӥ арын Алёна философи наукая доктор степень басьтэ. Кылтодонэз литературалы воштыса, берло аръёсы со туала удмурт но венгер прозаен выре, отысь гурт но город вискы «чуртнам» геройёсты эскере, туала тодос сыӵе адямиосты «маргиналъёс» шуэ. Валентин Кельмаковичлэсь басьтэм тодон-валанъёсыз Алёналы берло но туж кулэ луизы, кылсярысь 2010-тӥ но 2012-тӥ аръёс вискын Будапештысь Финн-угор кафедраын удмурт но ӟуч кылъя лектор луыса ужан вакытаз. Анай кылъёссэ венгер студентъёслы дышетон дыръяз солы кылчи но, историк но, артист но луытэк ӧйлась. Кылъя урокъёсты нуэм сяна, Алёна пичи лыдъем финн-угор калыкъёслэн литературазы сярысь лекциос лыдӟиз, озьы ик удмурт культуралы сӥзем занятиос но ортчытӥз. Та дыре Алёна Этвеш Лоранд нимо университетын ик постдокторской грантэн пӧртэм пумо тодос ужъёсын выре. Университетын дышетэм но научной ужен вырем сяна, Алёна туж трос дырзэ но кужымзэ сётэ ӵыжы-выжы луись венгер литератураез удмуртъёс пӧлын вӧлмытонлы. [1]

Гожъямъёсыз сярысь

Пиналъёссы школаын дышетскон вакытэ анай-атаез сюлмаськизы, гуртын улыса но соос тырмыт но мур тодон-валан мед басьтозы шуыса. Трос аръёс ӵоже нылпи газетъёслы но журнылъёслы гожтӥськизы («Кизили», «Ӟечбур!», «Мурзилка», «Весёлые картинки», «Юный техник», «Инвожо» но мукет), огыр-бугыр вакыт кутскемлэсь азьло пиналъёсынызы ӵош Москвае но Ленинградэ вуылӥзы. Ӵапак Москвае ветлэмез бере ик Алёна гожъяськыны кутскиз, угось ас ёзъем эшъёсызлы кузь сюресэз сярысь мадемез потӥз. «Ӟечбурысь» пичи статьяез нылашлэсь мылкыдзэ ӝутӥз, табере со кылбуръёс но, суредъёс но, йыртӥянъёс но пӧрмытъяны ӧдъяз. Алёна трос аръёс ӵоже «Ӟечбурлэн» одӥгез тужгес но ӵем гожъясь юнкорез вал, пӧртэм конкурсъёсы пыриськыса, ӵемысь вормисе потылӥз, 1995-тӥ арын редакциын ужасьёс дораз интервью басьтыны но вуылӥзы. Со аръёсы ик Алёна ёросысьтызы «Авангард» газетысь «Герд выжыос» нимаськись баме но печатласькыны кутскиз. Озьыен, нырысетӥ кылбуръёсыз «Ӟечбурлэн» бамъёсаз потӥзы, нош 15-18 аресказ гожтэм ужъёсыз «Инвожоын» печатласько ини. Кылбуранлы инмарен сётэм быгатонлыкъёссэ Пётр Захаров но шӧдӥз, соин Алёна нырысьсэ «Шундыкар» лагерьын пумиськиз. Кык-куинь ар ӵоже литературной кружокын басьтэм визьнод, лагерьын огъёзъёсыныз тодматскон нылашлэн школаын но берлогес университетын ортчытэм аръёсаз бадӟым пытьы кельтӥз. [1]

Канадаын

Пусйыны кулэ Алёналэсь берыктонъёслы сӥзем ужъёссэ но. Студент вакытаз удмурт журналъёсын венгер кылысь удмуртэ берыктэм веросъёссэ поттэмез бере али нимаз книгаен потэм ужъёсыз но печатласькизы ини. Тани 2011-тӥ но 2012-тӥ аръёсы гинэ куинь книгаез ӝажыосы сюриз, со сяна, кинэн ке ӵошен яке бадӟымгес коллективен лэсьтэм ужъёсыз но потӥзы.

«Туэ трос ӟеч ужъёс пӧрмизы. Ӝӧк пушкам кыллемъёсыз но, выльёсыз но берыктонъёсы потӥзы», – шумпотыса вера пинал тодосчи. Поттэмын Костоланилэн веросъёсыз, «Дорвыжы» эпос венгер, удмурт но ӟуч кылъёсын. Тодмо венгер тодосчиен Янош Пустаиен ӵош «12 тужгес но чебер венгер кылбур» книга поттӥзы. Отын венгер классикаысь кылбуръёс тямыс финн-угор кылэ берыктэмын. Со сяна, та нуналъёсы, «Инмозь сузись писпу» нимо венгер выжыкыл нимаз книгаен поттэмын вал. Сое поттыны юрттӥз «Ӟечбур!» газет. Али та ар понна витетӥез книгаез дасяське. Но со берпуметӥез ӧвӧл на. Ар пумозь солы эшшо одӥг книга берыктыса вуттоно ай. Та книгаос поттэмын Венгриысь но Финляндиысь фондъёс юрттэмен, нош асьме палась но саклык висъяно вылэм. Азьланезлы нылашлэн трос малпанъёсыз: «Шумпотыса Нациосын ужан политикая министерствоен но кусып возьысал, малы ке шуоно удмурт кылъя шудонъёс, ужан тетрадьёс, нылпи книгаос поттон ласянь трос гинэ выль малпанъёсы вань». [1]

Библиография

Статьяосыз

Улэм потыны кутске : кылбур // Удмурт дунне. – 2005. – 11 марта.

Берыктэмъёсыз

Книгаос

Костолани Д. Веросъёс = Novellák / берыктӥз Е. Родионова. – Ижкар : Инвожо, 2011. – 104 б.

Бенэдэк Э. Инме сузись писпу = Az égig érő fa : венгер калык выжыкыл / берыктӥз Е. Родионова. – Ижкар : Буква, 2012. – 44 б.

Статьяос

Йожеф А. Нуны веттан гур : кылбур // Удмурт дунне. – 2009. – 28 окт. – С. 4.

Йожеф А. Сюлэм но син ; Лулӟон ; Куректон ; Борддоръёс ; Толалтэ ; Садчи луо ; Чылкыт сюлэмын ; 11-тӥ оштолэзь ; Куке яратонэ ульчаетӥ ортчиз ; Пон ай кидэ ; Веттан ; Кар пумысь уй ; Сизьыметӥез ; Элегия ; Кӧшкемыт ; Анай ; Нуны веттан гур ; Беромем ватон гур ; Омыр кулэ! ; Отчётэ дась ; Флоралы ; Вордскем шаере ; Оло, ышо шӧдтэк шорысь… // Чылкыт сюлэмын / А. Йожеф. – Сомбатхей ; Ижкар, 2009. – С. 15, 18, 19, 21, 22, 25, 32, 35–36, 37, 41, 42, 59–62, 63–64, 76–78, 79–83, 89, 91–92, 93–94, 97–99, 109, 112–113, 114–115, 119.

Костолани Д. Ӟуч : верос // Удмурт дунне. – 2012. – 21 нояб. – С. 6. – (ИнГОЖ).

Костолани Д. Куно : верос // Инвожо. – 2007. – № 11/12. – С. 70–71.

Костолани Д. Мон тонэ яратӥсько : новелла // Инвожо. – 2012. – № 6. – С. 52–54.

Костолани Д. Шуд : новелла // Инвожо : ПЕН-клублэн альманахез. – 2012. – № 4/5. – С. 190–192.

Пустаи, Янош. "Шундыё зарни выж кузя..."; "Гольык вайёс пӧлын..." ; "Акшан югытын..." ; "Мугорыд пустыняысь луое ватэмын..." ; "Лымшор кызъёс..." ; "Котьма луэ малпаны луолэсь..." ; "Нюлэс ӵындэ..." ; "Пушказ кыскиз..." : кылбуръёс / мадьяр кылысь берыктӥзы Н. Пчеловодова, Е. Родионова // Инвожо. - 2013. - № 10. - С. 51.

Сабо А. Кошке ; Ӟардон ; Куинь аресъем ; Луытэк ; Эмъяськонни ; Улон-вылон ; Зор ; Баллада ; Ву но, тыл но ӧвӧл ; Тыл но музъем но ӧвӧл ; Выль ар ; Эмъяськӧннилэн нылпӥ ваён интыез : кылбуръёс // Инвожо. – 2009. – № 8/9. – С. 52–56. – Вакчияк авторез сярысь гожтэмын.

Сабо Л. Яратэ нылпиосмес : покчиослы кылбуръёс // Вордскем кыл = Родное слово. – 2011. – № 4. – Вкл. л. . – («Вордскем кыллэн» книжкаез). – Пуштросэз: Лоци бадӟым луоз ; Куалялюльы ; Яратэ нылпиосмес ; Тулыс.


Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.

Уже кутэм литература