Пугачёва Наталья
Мынэмъя мынэм потэ[править]
Мынэмъя мынэм потэ
28-тӥ октябре 80 арес тырмиз Пичи Пурга ёросысь Брангуртысь кырӟась песянайёс пӧлысь Наталья Пугачёвалы. Афанасий кузпалэныз ӵош 4 пинал будэтӥзы, туэ декабрь толэзе валче улэмзылы 60 ар тырмоз.
1935-тӥ арын вордскем кышномурт дядяезлэсь тусбуйзэ бус пыртӥ кадь тодаз вае, оже кошкыса, пе, вордскем гуртаз бертыны солы ӧз кылды.
— Чутожмон гуртамы, нылпи садмы вал, но мон отчы ӧй ветлы, вынъёсыным пуки, — вера Наталья Яковлевна. — 1943-тӥ арын похоронка басьтӥмы, анае трос синкыли кисьтӥз, кызьы пичи пиналъёсме огнам будэто шуыса. Анаелы юрттӥськон вылысь ик школае ветлонлэсь но кыли. Быдӟым ож йылпумъяськем бере нэнэмы сяська йылысь сузэр шедьтӥз на. Туж шумпотӥсько солы, коть куное ветлон интымы вань.
— Нылпиосты вань кадь ук? — юасько мон Натальяпайлэсь.
— Афанасий Афанасьевич кузпалэным ӵош 4 пинал вордӥмы. Та вакытлы 2-ез пенсие потӥзы ни, городын уло ке но, тазалыкмес эскерыны, юрттӥськыны шуыса, дорамы арнялы быдэ вуыло.
— Нош кызьы тодматскиды вал?
— 19 арес вал соку мыным. Кӧня ке дыр ортчыса, куинь нунал сюан шудӥмы но Брангуртысь сельсоветын гожтӥськимы. Со вакытэз туннэ кадь ик тодӥсько на, нош учконо ке, туэ декабрь толэзе валче улэммылы 60 ар тырмоз.
— Дышетскымтэ нылашез кышно вайиськоды шуыса, ӧз куаретэ-а? — юасько Афанасий Афанасьевичлэсь.
— Пичи мугоро нылашез вазенгес ик синйылтӥ, — вераськонамы итӥське Афанасий Афанасьевич. — Чутожмон гуртын кирпич лэсьтон заводзы вал, Брангуртысь колхозмы монэ отчы 2 арнялы ужаны ыстӥз. Нош заводэн артэ интыяськем парсь гидэ егит нылъёс ужаны ветлӥзы. Вазьыны муг шедьымтэен сэрен со аре тодматскытэк ик кыли. Эшъёсы дышетскемзэ шедьтод ай шуизы ке но, нылашез вунэтыны ӧй быгаты. Тупаны но кулэ, вуоно гужемаз со нылашез Брангуртысь фермае ужаны ыстӥллям, нош улӥз колхоз квартираын. Скал кыскисьёс пӧлын но та нылаш шаплы вылэм. Таяз учыре мон соин тодматски. Со толалтэяз ик кышно вайи. Шубае бинялтӥ, валам пуктӥ но дорам нуи. Ми дорын улэмез сярысь кытысь ке анаез тодэм но дӥнямы тышкаськыны вуиз вал. Лек мылкыдыз буйгаз, сюан сярысь кенешимы. Бадӟым шулдыръяськон азьын перепеч пӧрамы, тӧдьы пызь басьтыны юри Ижевске ветлӥмы, анае вина пӧзьтӥз.
— Натальяпай, пинал дыръяды но таӵе ик мынясь вал-а?
— Огшоры вал, дыр. Кылзӥськись но кылзӥськымтэ дыръёс пумиськылӥзы, вылды. Шудэм потон вакытэ нэнэ сьӧрын ветлӥ. Гужемзэ бусыын ужаз, монэ но сьӧраз нуллӥз. Со араз, нош монэ керттэм культооссэ огазе нуллытӥз. Будыса клубе лушкем потаны кутски. Шонергес шуыны луоз, дыр, бадӟым нылъёсты, пиосты адӟыны. Соосты кӧня ке минут учкиськом но тапыр бызьыса бертӥськом, кутозы вал потэ вал-а, мар-а. Нош пиосын калгонэз валаса но ӧм вуттэ кадь.
— Кузпалдылэн фамилиез Пугачёв, ӟуч выжыысь ӧвӧл-а?
— Чутожмон гуртамы улӥсьёс ваньмыз удмуртъёс вал. Одӥг класс дышетскытозям, ма но со ӟуч кыллы дышыса вуттӥ, нош вераськыны возьдаськылӥ.
— Кырӟан дуннее кызьы вуиды?
— Вазенгес вал со. Лавкае васьки но гурт клубын ужасен Ольга Туктареваен пумиськи, шулдыръяськыны мыло-кыдо шуыса, монэ но коллективаз ӧтиз. Кырӟаны уг быгаты, дыр, пумитъяськисько. Со монэ буйгатӥз: ӧд ке быгаты, дугдод. Озьы тӥни кырӟась луиськиз.
— Кузпалды уг лэзьы шуо вал кадь ук.
— Оломалы ваньмыз озьы шуо. Со мынам туж лякыт. Кырӟаны потало шуэмелы шумпотӥз, али но ветлыны косэ, но амалы уггес тырмы. Клубе мынон-бертонэ кыдёкынгес, нуналъёс ӝог вакчияло, сюресмы асфальтэн шобыртэмын ӧвӧл бере, дэри шедьтӥсько. Кырӟаны яратӥсько, но кылъёссэ кема дышетоно луэ. Та ласянь азьло капчигес вал, табере арлыд аслэсьтыз басьтэ, куд-ог дыръя йыр но сураськылэ. Арлыд вуыса, быдэс дуннеез котыртомы на шуыса ноку ӧй малпалля.
— Пугачёва фамилиды нимо-дано луыны юрттӥз кадь.
— Соиз но вань. Собыдӟа арлыдам тодмо артистъёсын пумиськыны кылдоз шуыса ноку ӧй малпа. Москвае ветлыкумы, ми понна Алла Пугачёваен пумиськон радъязы. Здравствуйте! Может, мы дальние родственники, шуисько. Соку Алла Борисовна пумитам ма вазьыны ик паймиз кадь, бордаз сылӥсь Максим Галкинэз гинэ серекъяз, может быть, может быть, пе. Соос но ми кадь адямиос вылӥллям. Ачим бон мон пересьмыса гинэ кыло-бурогес луи. Возьдаськон быдтэ вылэм, егит дыръя тодэмзэ но троссэ вератэк кылиськиз. Табере возьытбур возь вылын.
— Тӥледыз самолётэн нуо-ваё, кизили кадь уд потӥське-а асьтэлы?
— Ой-ё! Огшоры песянай мон, колхозын ужамын. Брангуртысь песянайёсын, пӧртэм интыосы ветлыса, копак одӥг семья кадь луимы.
— Гуртысь сцена вылын кырӟан со одӥг, нош бадӟым сценалэсь уд куалектӥське-а?
— Одӥг учыр тодам лыктэ. Людмила Зыкиналэн концертаз Москвае ветлӥмы, залэз бадӟым, оло, быдэс гуртмы тэроз. Сцена вылын пуке ачиз юбиляр Л. Зыкина, солы, пе, кузьым сётоно. Дораз вуи, кузьым сётӥ но кудпала вамыштыны уг тодӥськы, крезьгур шудэмъя эктыны кутски, бергасько, эшъёсме утчаса. Пӧлазы вуытозям, кырӟанлэн нырысетӥ куплетэз быре ни вал.
Тау кареме потэ Ольга Николаевнамылы. Со милемыз пичи пиналъёсты сямен нуныя. Янгыш лэсьтӥськомы ке но, уг куареты. «Евровидение» шедеммылэсь азьло Москваын выступать каримы. Отын дасо нунал улытозям, ялан бӧрдӥ, гуртэлэсь, семьяелэсь мӧзмыса. Ураме мултэссэ потаны ӧй дӥсьты, йыромонлэсь кышкай. Нош «Евровидение» бере быдэс Россиез котыртӥмы ни кадь. Мынэмъя мынэм потэ, кырӟамъя кырӟам потэ вылэм. Дуннеез адӟомы шуыса, ветлӥмы. Но дунне котькытын одӥг кадь вылэм, гуртлэсь умойзэ нокытысь ӧй пумита. Милемыз ваньмыз шумпотыса пумитало, тодмооссэс кадь ӟыгыръяло, маке вераськемзы потэ. Оло, соин но мыным вань калыкъёс удмуртъёс кадь пото.
Кыллы чупырес
Брангуртысь песянайёсын кивалтӥсь Ольга Туктарева котькуд кырӟасез сярысь нимаз вераны быгатэ:
— Паймисько Натальяпайлэн капчи мылкыдо луэмезлы. Дышетскемез 1 класс гинэ шуиськомы ке но, кыллы етӥз. Кулэ интые сальк гинэ маке меӵкытоз. Мугорыз пичи ке но, йырыз туж ужась. Тодам вайисько «Евровидение» дыръя Бакуын ортчем пресс-конференциез. Соку котькуд песянайлы нимаз юанъёс сётъязы, Натальяпайлы — нимо-дано фамилиез сярысь. Оло валаз, оло ӧз, но юанзэс удмуртэ берыктыны вырытозям, со валэктон сётӥз ни: котькудӥзлэн, пе, аслаз ужез. Натальяпаймы калык веранъёсты трос тодэ, тетраде гожтыса кельтоно вал, дыр, соосты.
28-тӥ октябре Брангуртысь песянайёс клубе люкаськизы но Натальяпайлэсь вордӥськем нуналзэ пусйизы. Ӵыжы-выжыосыз ӟечкыланы вуылӥзы. Шаерысьтымы бадӟым кивалтӥсьёс куное карисько вылэм, но песянайёслэн ас кожазы гань-гань пукемзы потэм. Люкаськемъёс азьын кивалтӥсьёслэсь ӟечкылан телеграммаоссэс лыдӟизы.
Россиысь песянайлэн тусыз
Наталья Пугачёваез 80 арес тырмеменыз ӟечкылаз Удмурт Республикалэн Тӧроез Александр Соловьёв.
Удмурт культураез ӝутонын тӥ вераны луонтэм трос лэсьтӥды. 2012-тӥ арын Брангуртысь песянайёс пичи шаермес «Евровидение» вожвылъяськонын данъязы. Бадӟым сцена вылын удмурт кылын кырӟан быдэстӥзы, нош тӥляд мусо серекъямды Россиысь песянайлэн тусаз пыӵаз. Тазалык но шудбур тӥледлы!
Источник:
За предоставление материала выражаем огромную благодарность редакции газеты "Удмурт дунне"
