Прокопьев Андрей Николаевич

Материал из Воршуда
Перейти к навигацииПерейти к поиску

«Эктэме потэ!..»[править]

А. Н. Прокопьев

Та егит пиосмурт вордӥськиз тунсыко, кужмо выжыысь семьяын. Пичи дырысеныз ик анай йӧлын пыӵазы солы ас калыксэ, солэсь культуразэ яратон но гажан сямъёс.

Али Андрейлэн нимыз тодмо быдэс финн-угор дуннеын. Со – этнограф, этнохореолог, Удмурт кун университетысь этнологияя но регионоведениея кафедраысь валтӥсь дышетӥсь, Традиционной крезьгуръя огъя дунне кенешлэн ёзчиез, «Эктон корка» студилэн кивалтӥсез.

- Андрей, городын вордӥськем но будэм адями, кызьы тӥ удмуртлыкез сыӵе юн пыӵатыны быгатӥды?

- Удмурт интеллигенция гуртысь потэмын шуиськом. Нош мон одӥгез городын водӥськемез. Ӵемысь луэ озьы: удмурт егитъёс лыкто городэ, интыясько, шудзэс шедьто, семья кылдыто. Но нылпизы вордӥськем бере, удмуртлыксы уг азинскы ни, пиналзы ӟуч луэ.

Нош мынам анай-атайёсы монэ мукет сямен будэтӥллям. Вордӥськи 1972-тӥ арын. Соку Ижевскын удмурт садъёс, школаос ӧй вал ке но, анай-атае быгатӥллям удмурт кыллы рос-прос дышетыны, удмурт культураез гажан мылкыд пыӵатыны. Та понна музъемозь ик йыбырттӥсько соослы. Озьы куинь-ньыль арескозь удмурт сямен гинэ вераськиськем. Нылпи садэ монэ бер сётӥзы. Соку гинэ, мукет выжыысь пиналъёсын кусып тупатыны кулэ вал бере, ӟуч кылэз ас поннам дышетыны кутски.

Атае но, анае но Татарстанлэн Огырчи ёросысьтыз Сарсак-Омга гуртысь. Соин ик гужем пичи дыры отын ортче вал. Туж яратӥсько ӵужанайме. Пичи дырысеным ик со луэ удмурт культурая нырысетӥ дышетӥсе. Мон сое эксперт № 1 шуысал. Ӵужанае – паймымон адями, котыр ласянь визьмо, кибашлы, быгатӥсь, улонэз адӟем. Али со Ижевскын улэ, анай-атае вӧзын. Но калык сямъёсъя, кылъя мае ке юаме потэ ке, нырысь ик солы вазиськисько.

- Озьыен, дунне валандылы инъет сётӥз ӵужанайды. Пушкинлэн Арина Родионовна песянаез выллем…

- Озьы. Мынам ӵужанае туж секыт улонэз ортчемын, рос-прос дышетскемез ик ӧвӧл, но сыӵе умой тодэ калык сямъёсты, фольклорез. Туэ солы 84 ар тырме. Синмыз но уг адӟы ни, озьы ке но, сыӵе чебер, векчи-векчи пужыё носкиос, пӧзьёс керттэ на. Вашкалазэ яратон но гажан мылкыд пыӵатэмез понна мон солы бадӟым тау шуисько.

Туннэ нуналлы маин вырисько, улон шоры учконэ – таиз ини герӟаськемын анай-атаен, соослэн дышетэменызы.

- Секыт ӧй вал-а ӟуч кылэз чылкак тодӥсьтэм пиналлы ӟуч нылпиос пӧлын ассэ шедьтыны? Сыӵе шуак-дуак воштӥськон капчиен ӧз сётӥськы, дыр?

- Пичи дыр тодэ ваёнъёсам та ласянь кыӵе ке шугъяськонме уг тодӥськы. Анай-атае туж сак чакласа возизы, лэся. Но бадӟымгес луэм берам ни туж сюлэм вӧсь луэ вал, Ижевскын удмурт школаос ӧвӧл шуыса. Дышетски крезьгуръя школаын. Ас мылкыд каремея 8-тӥ классысен усьтӥ удмурт кылэз дышетонъя кружок. Трос гинэ пиналъёс ветлӥзы. Ар пумын мон соослы ас уксёеным басьтэм книгаос кузьмасько вал, азьланяз но мылкыдзы медаз пуксьы шуыса.

- Тодмо анай-атай вӧзын нылпиослы секыт, шуо – саклык но, пе, ӧжытгес висъяське. Вань на мукетыз веран: инкуазь, пе, нылпиос вылын шутэтске…

- Та веранъёслы мон чутрак пумит. Анай-атайлэн «Италмас» ансамбльын ужамзы, тодмо луэмзы мыным ӟеч палыныз гинэ берытскиз. Вераськыны кутскемлэсь азьло ик ини удмурт культураен тодматски. Гастрольёсы потакузы, монэ ӵемысь нокинэн кельтыны луэ вал. Соин ик сьӧразы нуллӥзы. Пичи дырысен ик пӧртэм шаеръёсы вуылӥ. Монэн сэрен юмоке но шедё вылэм. Одӥг пол, вить-куать арес дыръям, концерт мыныку, сцена вылын эктӥсьёс азе потӥськем но, ну, тапыр поттыса эктӥсько, пе. Мамонтов йырыз борды кырмиськем. Артистъёс мар карыны уг валало. Вань калык мон шоры учке. Соку Мамонтов, сцена вылэ потыса, монэ ӝутэм но кулиса сьӧры нуэм. Мон, пичи маке, шер-вай ӵыжаськисько, «эктэме потэ!» кесяськисько, пе.

«Италмаслэсь» репертуарзэ ваньзэ тодӥсько вал.

Пиналъёс пичи дыръязы маин шудо? Нылъёс – мунёосын, пиос – машинаосын. Нош мон, кубикъёсты артистъёс шуыса, сцена вылын кызьы сылоно, озьы пуктылӥсько вылэм. Собере котькудӥзлэсь кырӟанзэ нёръясько.

- Университетысь удмурт филологияя факультетлэн деканатаз одӥг пол вераськон вал: вань-а, пе, сыӵе финн-угор кун, кудаз Андрей Прокопьев ӧз вуылы на. Ваньзы малпаськонэ усизы. Озьыен, вань-а?

- Туж ветлэме потэ на Урал сьӧрысь ӵыжы-выжыосмы доры – хантыослэн, мансиослэн шаеразы мон ӧй вал на. Россиысь финн-угор калыкъёс пӧлысь тужгес но юн кусып воземе потэ комиосын. Соос выжызыя удмурт калыклы тужгес но матын луо бере, коми культура пыр асьме калыкмес ӟечгес валаны, эскерыны малпасько.

Нош кунгож сьӧрысь финн-угор шаеръёс сярысь ке - котькытын мон вал ни. Та ласянь тужгес но тунсыко пото Норвегиысь но Финляндиысь саамъёс. Соос сярысь тодон-валанъёсме мон азьланяз научной ужъёсам возьмато на, вылды.

- Андрей, нош кытысь тӥляд пӧртэм кылъёсты дышетон мылкыдды?

- Аслэсьтым анай кылме яратэм, со сярысь тросгес тодэм потэмен, дыр. Собере этнограф луисько бере, та удысъя ужасьёслэн туж визьмо веранзы вань: «Одӥг калыкез гинэ тодӥськод ке, сое но уд тодӥськы». Соин ик кыӵе ке калыклэсь культуразэ эскерыны, валаны тыршиськод ке, сое одно ик мукетъёсыныз ӵошатӥськод. Нош культуралэн инъетэз – кыл. Калыкез тодон понна, нырысь ик солэсь кыл чеберлыксэ, кыл философиезлэсь мурдалазэ шӧдоно. Та бордысен ик кутски удмуртъёслы ӵыжы-выжы луись калыкъёслэсь кылзэс дышетон борды.

Оглом вераса, удмуртъёс шудоесь. Кык кылэз тодыса, соос валаны быгатыны кулэ кадь ас анай кылзылэсь чеберлыксэ. Нош полиглотъёс шуо на: «Котькуд берлоез дышетэм кыл азьвылэзлэсь капчиенгес сётӥське».

- Кӧня кылын бен вераськыны быгатӥськоды?

- Чебер вераськисько англи кылын. Университетын басьтэм дипломея мон историк но кылысь кылэ берыктӥсь. Умой вераськисько, ӟучсэ но удмуртсэ вератэк, венгер, финн кылъёсын. Пичи гинэ тодӥсько бигерзэ. Дышетыны кутски норвег кылэз.

- «Чипчирган» ансамбле ветлӥсь эшмы туспуктэмъёссэ возьматъя вал. Нош таиз, пе, Андрей Прокопьевлэн вордӥськем нуналыз дыръя. Быдэс ӝӧк тыр сиён-юонъёс, Анна кенак, егитъёс… Нош кытын ачиз Андрей, юаськом. Со, пе, соку Норвегиын вал… Сыӵе учыръёс ӵем-а луо?

- Одӥг пол гинэ вал. Анае-атае мынэсьтым мӧзмыса, лэся, эшъёсме люкаллям. Норвегиын мон ӝыны ар ӵоже дышетски. Гожтӥ калык эктонэз эскеронъя проект. Соя басьтӥ грант. Норвегиысь Калык крезьгуръя но калык эктонъёсъя королевской кенеш мыным стипендия висъяз.

Норвегиын дышетскыкум, мон шунды пуксён пал Европаысь калык эктонъёсты дышетӥ.

Нош кунгож сьӧры нырысьсэ потай 1993-тӥ арын. Вуылӥ США-е. Толэзьлэсь кема дышетски отысь Канзас штатын. Со бере быдэс толэзь ӵоже ужай Берлинысь Гумбольдт нимо университетын. Вуылӥ Румыниысь венгеръёс доры. Отысь калык сярысь трос тунсыкозэ люкай. Ужай Норвегиысь, Финляндиысь саамъёс пӧлын. Нялтас вераса, Финляндие кыкетӥ дорам кадь вуылӥсько. Отысь Турку городын стажировкаме ортчи, лекциос лыдӟыны шуыса ӧтчало, «Эктон корка» студилэсь этнофутуризмъя проектъёссэ радъяны но вуылӥськом.

- Тӥ «Эктон корка» студилэн кылдытӥсез но кивалтӥсез. Мар бордысен кутскиз эктон культураен тунсыкъяськонды?

- Удмурт кун университетысь историяя факультетын дышетскыкум, мон рос-прос уг тодӥськы на вал маин выро. Нырысетӥ курсовой уже сӥземын вал ӵыжы-выжыосты, семья кусыпъёсты возьматон радлыклы. Быдӟалаезъя та уже диплом выллем луиз. Кивалтӥсе Владимир Владыкин туж ушъяз. 1991-тӥ арын Удмуртие лыктӥзы Венгриысь Наукая академилэн Крезьгурез эскеронъя институтысьтыз калык эктонъя специалистъёс. Озьы тупаз: монэ соосын ужаны бырйизы. Ноку но уг малпаськы вал, калык эктонэз сокем мур эскерыны луоно шуыса. Со дырысен мынам наука удысъя ужъёсылэн кыкетӥ кивалтӥсез луиз Ласло Фелфёльди – Венгриысь Наукая академилэн Крезьгурез эскеронъя институтысьтыз калык эктонъя тужгес но бадӟымез специалист.

Со вакытысен дас кык ар ӵоже мон калык эктонъёсты бичасько, этнохореология наукаен вырисько. Та удысэн ӟечгес тодматски ни 1994-тӥ арын, Венгриысь Крезьгурез эскеронъя институтын стажировкаме ортчыкум. Табере мон Традиционной крезьгуръя огъя дунне кенешлэн этнохореографияя ёзаз пырисько. Та огазеяськонлэн штаб-квартираез Даниын интыяськемын. Нош ёзчиосыз – дуннелэн котькуд сэрегаз. Дырын-дырын ми ортчытъяськом конгрессъёс, конференциос, поттӥськомы этнохореологилы сӥзем ужъёсмес, тодматскиськом та удысъя пӧртэм методикаосын. Этнохореологияя ёзлэн вань аслаз газетэз но.

- Калык эктонъёсын тунсыкъяськонды ик вуттӥз «Эктон корка» студиез усьтонэ.

- Озьы. Дас кык ар ӵоже люкай калык эктонъёсты. Дыр вуиз сое возьматыны, калыклэсь басьтэм чеберлыкез калыклы ик берыктыны. Кыӵе амалэн? Луысал кылдытыны концерт возьматонъя огшоры ансамбль. Но мынам малпанэ паськытгес вал: калык эктон вылэ пыкиськыса кылдытоно вань удмуртъёслы быдэс фольклор ӧр. Та удыс умой азинскемын Европаын. Венгриын сыӵе ӧр «Танцхаз» шуыса нимаське. Асьме кылэ берыктыса – «Эктон корка».

Малы нош мон шуисько малпанэ паськытгес вал. Малы ке шуоно, ансамбльёс фольклорез одӥг ласянь гинэ возьмато. Учкисьёс люкемын эктӥсьёслэсь, кырӟасьёслэсь сценаен. Отын фольклор уг улы. Фольклор улӟе соку гинэ, куке учкись но эктӥсь интыенызы воштӥськыны быгато. Озьыен, ми кылдытӥм «Эктон корка» ӝытъёс. Соосты ортчытъямы толэзьлы быдэ. Шӧдӥм, адӟим: «Эктон коркалы» кулэяськон вань. Тросэз шуизы: толэзьлы одӥг пол пумиськылыны – со, пе, ӧжыт. Чылкак эктэммы уг луы, кимес но выретыны ум валаське шуисьёс гинэ но ӝоген туж ӟеч эктыны кутскылӥзы. Ньыль ар ӵоже гинэ ми 100-лэсь трос адямиез калык эктонъёслы дышетӥм.

«Эктон корка» кыӵе ке фан-клублы пӧрмиз кадь. Кытчы ке концертэн потӥськом ке, сьӧрамы егитъёс но, мӧйыос но мыно, кудӥз быдэс семьяеныз ик.

- Малы нош озьы луэ меда?

- Городысь удмуртъёслы удмуртлыксэс шӧдыны секыт, нош ми дорын соос усьтӥсько. Концертэ мыныса, адями огшоры пуке, мукетъёсызлэсь быгатэмзэс учке. Нош ми дорын соос экто но, кырӟало но, фольклор пыр быгато возьматыны удмурт луэмзэс. Ӵемысь адямиос дорамы удмурт сямен вераськемез кылзыны лыкто, асьсэлэсь удмурт луэмзэс возьматэмзы потэ.

Милемын тунсыкъясько ӟучъёс но. Соос удмурт луэменызы данъяськись удмуртъёс шоры учкыны лыкто. Та ласянь мон шуысал: «Со удмуртъёс гинэ тунсыко луозы дуннелы, кудъёсыз асьсэос асьсэлы тунсыко пото». «Эктон корка» азьын сылӥсь одӥгез ужпум: мукет выжы калыкъёслы но возьматоно удмурт калыклэсь чеберлыксэ.

Котькуд «Эктон корка» ӝыт кыӵе ке темалы, йылоллы сӥземын вал. Ӧтиськом удмуртъёслэсь эктон сямъёссэс усто возьматыны быгатӥсь фольклор ансамбльёсты, гуртысь пересь кышноосты. Соос эктыны дышето. Яке, шуом, пӧртмаськонлы сӥзем ӝыт ортчытӥськом, яке кунгож сьӧрысь калыкъёслэсь эктонъёссэс дышетӥськом.

- Улонын озьы луэ ини яке юромо кылдытӥське, но котькуд калыкез маизъя ке но висъяло. Удмуртъёсты кырӟась калык шуыны дышемын. Соин но, вылды, тросэз паймо: удмуртъёслэн эктон культуразы вань шат?

- Тӥни малы мон калык эктон культураен вырыны кутски. Азьвыл солы саклык ӧз висъялэ. Тодмо, гажамон адямиос ик удмуртъёслэн эктон культуразы вань шат шуылӥзы. Тани поръёс – эктӥсь калык, нош удмуртъёсты, пе, эктӥсесь уд шуы. Сыӵе малпанэз мон шонерен уг лыдъяськы вал. Соин ик та удысэз аслам эскереме, бугыртэме потӥз. Али мон шумпотыса но данъяськыса шуисько: эктон культурамы вылэм но, вань но. Луоз но шуыса оскисько. Тае табере кунгож сьӧрын гинэ ӧвӧл, асьме дорын но пусъё.

Вераме потэ на тани ма сярысь но. Басьтомы Культурая училищеез. Отчы лыктэ гуртысь пияш, арганэн шудӥсь. Но татын сое арганэн шудэмлэсь ало, кияз но медаз кутылы шуо, арганэз векчи кыскаса шудонэз шонертэмен лыдъяло. Пиналъёс талы лушкемен-лушкемен ог-огзылэсь дышетско. Нош мынам малпамея, арганэз векчи кыскаса шудон – со удмуртъёслэн аспӧртэм марӟанзы. Сое эскероно, дышетоно. Та амалэз ик соку ик синйылтӥзы, Эстониысь тодмо фольклор ужрадэ, Вильянди фестивале пыриськыкумы но. Бӧрысь та сярысь туж ӟеч гожъяз крезьгурлы но критикалы сӥзем Германиын потӥсь журнал.

«Эктон корка» студиямы шедьтӥськом сыӵе кабъёсты, кудъёсыз матын зэмос культуралы но, калыклы но. Соин ик кунгож сьӧрын но милемын тунсыкъясько, удмурт калык но яратэ.

- Асьтэлэн вуоно кузпалэныды но тӥ тодматскиды «Эктон корка» студилэн ӝытаз. Алнаш палась нылаш соку ик сюлмады пыриз-а?

- Шонерзэ ке верано, Наташаез нырысьсэ адӟеме бере, мон малы ке малпай, та адями ми доры кема уз ветлы шуыса.

Наташа йылпумъяз Можга педучилищеез, дышетскиз Удмурт кун университетысь художественно-графической факультетын. Спортэн эшъяськиз. Нырысетӥ курсысен сое профессиональной спортсмен карыны туртто вылэм. Но Наташа культура удысэ ик кылёно кариськем. «Эктон корка» студие ветлэмезъя, Наташаен ми куинь ар ӵоже тодмо вал ини. Собере гинэ ӵош кариськыны малпам.

- Андрей, наука, творчество удысын тон азьын паськыт инвисъёс. Азьланезлы малпанъёсыд туж трос, дыр?

- Валлян арын Эстоние ветлыкум пумиськи Кореяысь тодосчиен, профессорен. Солы туж яразы асьме удмурт эктонъёс. Кореяысь студентъёс понна удмурт эктонъёслы сӥзем лекциос лыдӟыны ӧтиз.

«Эктон корка» студимы азьын выль сюрес усьтӥськиз. Малпаськомы социальной удысъя ужаны. Кылсярысь, дасямы «Нуны сюан» проект. Университетын солы презентация ортчытӥм. Ӵош ужаммы понна бадӟым тау кариськом социальной ужъя кафедралэн кивалтӥсезлы Анатолий Ишмуратовлы, психология но педагогикая факультетлэн деканэзлы Николай Леоновлы.

«Нуны сюан» проект азьын сылӥсь ужпум – егит семьяослэсь нылпи вордыны мылкыдзэс ӝутон. Семья мед шӧдоз солы юрттэт сётэмез. Азьвыл удмуртъёс ог-огзылы ялан юрттыса улӥллям, веме ортчытъялям, та сямъёсты ми городын улӥсь удмуртъёс пӧлы пыӵатыны тыршиськом. Али ик ини доразы ӧтисьёс вань.

Туэ ар понна лэсьтоно ужъёс пӧлын нырысь интыын – диссертациме утён. Соку инвисъёс эшшо но паськыталозы.

- Нош семьядэс будэтон сярысь уд малпаське-а?

- Кызьы сотэк, малпаськиськом. Тани кылем арняе Наташалэн атаез мешок пызь вайыса кельтӥз. Кошкон азяз лушкем гинэ пелям сипыртэ: пызь ваи ни, пӧралэ. - Алан уж, наука. Со сяна маин ке тунсыкъяськиськоды на-а? - Компьютерен, Интернетэн. Яратӥсько лыдӟиськыны. Азьвыл йӧндырисько вал крезьгур гожъяны. Али дышетскисько кубызэн шудыны. Куддыръя семья куспамы огшоры кырӟаса пукиськом. Яратӥсько гуртэ потаны, гурт калыкен вераськыны. Со мыным выль кужым сётэ.


Источник:

Прокопьев А. Н. "Эктэме потэ!.." / А. Н. Прокопьев ; записала Елена Миннигараева // Удмурт дунне. - 2003. - 17 янв. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"