Перевощиков Семён Никифорович

Материал из Воршуда
Перейти к: навигация, поиск

Уй пӧйшур

Перевощиков С Н.jpg

Якшур-Бӧдья черкогуртын улӥсь Семён Никифорович Перевощиков Быдӟым оже ветлэмзэ туннэ кадь син азяз возе. Пичи, начар мугоро пияш армиын 20 сантиметрлы нуйтӥськем.

Тодматскон

Семён Никифорович ветеранъёс пӧлысь одӥгез егитэз луэ. Оже шедемын 1944-тӥ арын, 17 аресказ. Семён Никифорович мынэсьтым лыктэмме вите ни вылэм. Ӟезьы азязы машинаен дугдэммы бере ик укноетӥ учкиз но, пырыны косыса, киыныз шонтӥз. Корка вамыштӥ гинэ но, кемалась тодмо адямиеныз сямен соку ик вераськыны кутскиз:

– Редакциын ужасьёсты гажасько, одӥгезлы гинэ чиданэ пӧсьтэ – умойтэм гожъяськиськоды.

Ма шуыны паймемысьтым, пельпумъёсме гинэ ӝуткасько.

– Нунал нимъёсты удмурт сямен гожтэмдэс уг яратӥськы. Мар шуэм со – вирнунал? Удмуртъёс арня шорын ноку пудо ӧз вандылэ, нош отӥяз – покчиарня, удмуртарня, кӧснунал, арнянунал. Арня шуыку, шутэтскон нунал син азе пуксе, 4 нунал шат ужатэк улӥзы?

Кӧня ке секунд куспын песятай вань малпанъёссэ шара вераз но буйгатскиз. Ойдо, пе, вылӥе, отын вераськомы. Залэ пыри гинэ но, син шорам «Удмурт дунне» газет йӧтӥз. Газетэз, пе, вазенгес басьтӥсько, гожъямъёсыз умоесь, нуналъёслэн удмурт нимъёссы гинэ уг ярало.

Пичи мугор

– Вордски Якшур-Бӧдья ёросысь Выӝойыл гуртын 1926-тӥ арын 9-тӥ сентябре. Семьяын мон 5-тӥез пинал вал, кыкез быризы пичиысен, мон бере эшшо 6 но 9 ареслы пичи вынъёсы будӥзы, – веранзэ мытӥз ветеран. – Муми неграмотной вал, гожъяськонэз ӧз тодылы, документъёсы нимзэ пуктыны гинэ быгатылӥз. Айи более-менее гожъяськыны пӧрмытылӥз, кладовщикын но ужамын. Жаляса верано, со трудармиын быриз.

Мыным 5 класс сяна дышетскыны ӧз кылды. Начар улэменымы сэрен пичиысен колхозын ужано луи. Нырысь ик бусыосты усыямы, бӧрысьгес гырыны но кутски. Колхозмы «Выль улон» шуыса нимаськиз ке но, мон малпамъя, ассэ оправдать ӧз кары кадь. Порозъёсты СХТЗ тракторъёс воштӥзы. Сталинградско-Харьковской тракторной заводын лэсьтэм техникалы воксё ӧй синмаськы. Оло трактор кырыж нуиз, оло руль сьӧрын пукисьёс нодтэмесь вал, милемлы со курадӟон гинэ вайылӥз кадь. Вольыт сюрестӥ мыныкуз но, буксовать каре вал. Соин ик порозэн ӝоггес гырим-кизьылӥмы.

Война кутскон вакытэ ӵапак колхоз бусые кыед поттӥськомы вал. Шимес иворез, коркась корка пыраса, калыклы вӧлмытыны куризы. Гуртысь мынэсьтым бадӟым пиослы соку ик повестка сётъязы. Соос интые 13-16 аресъем пиналъёс кылизы.

Война кутскон аре 15 арес тырмиз, нош 17 аресам мыным но повестка вуылыны кутскиз. Военкоматэ мынӥськомы но, милемыз, ӝыны арлы шуыса, дорамы лэзё. Кык арня но уг ортчы, нош ик повестказы вуэ.

1944-тӥ арын январь толэзе оже басьтӥзы ик. Туала вакытэ нокин уз но оскы, дыр: мугор пичи – 140 сантиметр, секталае ог 40 килограмм. Озьы учконо ке, мон фронтэ шедьыны кулэ ӧй вал. Но ожын лачак калык быре, соосты воштӥсьёс кулэ.

Якшур-Бӧдья ёросысь 3 кузя кошкимы. Люказы милемды Ижевске. Ог 25 кузя пиосын вамышъяськомы город ульча кузя. Ваньмылэн тыбырамы пичильтык котомкаос. Адямиос шорамы жаляса учко.

Пересылочной пункт Пичи Пургаын вал. Отын калыкез лачак, инты ӟоскыт, кин кытчы мынэ, валантэм. Ярано коть, 2 уй сяна ӧм кӧлэ, отӥяз милемыз поездэн Калининград пала нуизы. Соку ик оже ӧз ыстэ. Военкоматысен нош ик юалляськыны кутскизы. Ми Удмуртиысь, шуиськомы, паймыса шорамы учко: Чукоткаын-а со?

Вӧзам Шарканысь эшшо 2 пиос сылӥзы, соос ӟуч кылэз ӧз тодэ но чус улӥзы, сьӧрам лякиськем кадь ветлӥзы. Удмуртилэн столицаез Ижевск шуэме бере гинэ военкоматын пукисьёс буйгазы. Документъёсмес пыр-поч эскеремзы бере нош ик милемын ма карыны паймизы, опять комиссиез ортчоно, пе. Валатски, монэ «будэтыса» оже келязы – мугорме но, секталаме но Якшур-Бӧдьяын ватсаса гожтӥллям.

Берен дор палъёсамы ыстыны медо вал. Мон ваментӥськи: отсрочка сётӥськоды ке но, арня но уг ортчы, берен военкоматэ ӧтиськоды, акыльтӥз ни таӵе улон, ожмаськоно. Та кылъёс бере воргоронъёс шорам мукет синмын учкизы. Удмуртиысь одӥг эшме дораз ыстӥзы, нош мукетыз – Титово гуртысь Титов (нимзэ уг тодӥськы ни) – бырыны шедиз.

Ез кузя вераськон

– Войнае кутӥзы гинэ, нош ик быдэс котырме выльысь эскеризы: нокин кунгож сьӧрын уг улы-а, кинмы ке раскулачить каремын ӧвӧл-а, кыӵе ке партие пыремын ӧвӧл-а. Мукет интые вуи но, нош ик та выллем юанъёсын тэбинизы: оло, кытын ке пӧяськеме шараяськоз. Огшоры юалляськиллямтэ вылэм, монэ правительственной связьлэн войскоосаз кутӥзы. Ялан передовойын ветлӥмы.

Туж секытэн сётскизы нырысетӥ ожмаськон нуналъёс. Связь кыскон понна бадӟым катушкаосты нуллоно вал, нош мынам мугоры пичи. Кытчы но кӧня иськем кысконо, потон азямы гинэ вераллязы. Ӵем дыръя милемыз «уй пӧйшуръёс» шуылӥзы. Угось связь кыскылӥмы уйёсы. Эшъёсы умоесь вал – Свердловскысь, Нижний Тагилысь но Ирбитысь.

Связь сярысь войнаын гинэ рос-прос тодӥ, телефонэз гинэ но адӟылэме ӧй вал бере. Нырысь туж паймымон потылӥз, кызьы ез кузя вераськем кылӥське шуыса. Куд-огез шуэ вал, вераськонэз, пе, тушмонъёс кылзо. Но милям связьмы борды лушкемен подключиться кариськыны ӧз луылы, не подслушаешь.

Ачим но сое одӥг пол эскери. Одӥг нуналэ связьмы быриз, тӥяськем интыез, пе, шедьтоно. Линия кузя кыкналасянь адямиос ваче лыкто. Тӥяськем интыез шедьтэммы бере ми линия борды итӥськимы, парольёсмес верамы гинэ, вераськонмы куспетӥ луиз. Адями куара интые, милемлы атас чоръям, пороз бӧксэм, пуны утэм гинэ на кылӥськиз.

Война вакытэ одӥг местаын ноку но кема ӧм улэ, ялан фронтэн артэ, вамышен-вамышен азьпала мынӥмы. Одӥг полаз нунал куспын ог 500 иськемез ортчоно луиз. Офицеръёсын весь артэ вал бере, Польшаысен Константин Рокоссовский маршалэн пумиськыны кылдӥз. Чебер тусо, ӝужыт мугоро, етӥз вамышъя. Тросэз генералъёс, маршалъёс бадӟым кӧтоесь вал, нош таиз чиед. Кузпалыз но вӧзаз, пичи гинэ мугоро. Ог-огзылы чик уг тупало кадь. Трос пумиськыны кылдылӥз власовецъёсын. Вераськемзыя ик ӟучъёс шуыса адске, нош асьсэос – немецъёс палан.

Кылтэм кино, гожтэт но махорка

– Вормон Нуналэз Латвиысь Тукумс городын пумитамы, но тушмонэн ожмаськонмес 15-тӥ мае йылпумъямы. Вот соку партизанъёс сярысь «немой» кино учкимы. Борддоре кык тӧдьы простыня ошемын вал экран интыын, Людмила Целиковская актрисалы вань солдатъёс синмаськизы кадь, угось туж чебер вал.

Война йылпумъяськем бере милесьтым полкмес расформировать карозы шуыса, тодӥськомы ни вал. Нимысьтыз приказ гожтэмлэсь азьло пӧртэм вераськонъёс ветлӥзы: ӝынызэ, пе, Дальний Востоке келялозы, Япониен ожмаськонэ. Вань котырмес вагонъёсы бичаса, кузь сюрес вылэ потыны дасяськыса, толэзь пала улӥмы. Служба ӧвӧл, шуыны луоз, кухняын асьмеос сиён пӧрамы. Курортын шутэтскон выллем, тросэз егит пиос син куспын чеберскизы.

Шулдыр улонмес куспетӥ кариз приказ: ӝынызэ келяно Польшае, кылемзэ – Дальний Востоке. Штабысь ротноймы список лыдӟиз, кинлы кытчы мыноно шуыса. Мыным Польша усиз. Отын но правительственной связь кулэ вал. Война вакытэ огдырлы линия кыскылӥмы ке, татын – пыраклы, юбоосын. Озьы мон эшшо 4 но ӝыны ар армиын связист вал. Со дыр куспын поляк сямен вераськыны дыши.

Дальний Востоке кошкем эшъёсмылы кӧня ке гожтэт гожтӥмы, отӥяз кусыпмы ышиз. Мон лыдӟиськыны-гожъяськыны сокем ӧй яратылы. Гуртэ 3-4 гожтэт сяна ӧй ысты. Анаелэн гожъяськемез ӧз луы, со интые апае гожъяз. Гуртысьтымы иворъёсты тодылӥ эшъёсы пыр.

Ожмаськон вакытэ тросэз верало вал боевой сю грамм сярысь. Война пумын мынэмъёсты егит карылӥзы, лэся. Курытсэ милем ӧз сётъялэ, нош тамак кыскисьёслы махорка висъяллязы. Войнае кошкыкум, уг кыскиськы вал, нош отысен бадӟымгес луэм потӥз, лэся, ӝыны арзэ мон но пурккетӥ. Война йылпумъяськем бере солдатъёсты ӵукна зарядка лэсьтытъяны кутскизы. Шӧдӥсько, бызьылыны шуг, озьы тамаклэсь куштӥськыны малпай. Махоркаме эшъёсылы люкылӥ. Соос монэ серекъязы, бӧрысь курид ке, ум сётэ ни шуыса. Арня, кык, толэзь ортчем бере эшъёсы пыкылӥзы на, лушкемен, пе, кыскиськод. Уд шӧдӥське шат, шуисько, тамак пурккетӥсь мурт бордысь ӝыны иськемысь зын паке.

Колхозысь пегӟон

– 1949-тӥ арын доре бертылыны отпуск сётӥзы. Гуртысь мон куашкам мылкыдын кошки: ваньмыз пурысь, юртъёс вужесь, выль коркаос сярысь веранэз ик ӧвӧл. Ар ортчыса, улон умой пала воштӥськиз ни кожай вал, янгышаськем. Но визьмы окмиз, армиысь бертыкум ик, Ижевске дугдӥ. Нырысь заводэ интыяськыны малпасько вал. Ужысь сьӧд ымнырын потӥсьёсты адӟеме бере малпанэ воштӥськиз. Связистэ ик кутски но адӟиськыны деревняям кошки.

Деревняын соку ик председательмы пумитаз. Ладно, пе, простой колхозник уг кары, фермаен кивалтӥсь луод. Фермаяз васькыса, учки но – пропади пропадом, ваньмыз сисьмемын, тани-тани йыр вылэ куашкалоз, кыедэн ветлыны уг луы. Ужаны ӧй пота. Сое председатель кылэм но колхозысь, пе, кошкыны медӥськод, мон тонэ нокытчы уг лэзьы, паспорттэ уг сёты. Нош мынам киям трудовой книжкае вал ни. Городэ кошки. Ижевскез Якшур-Бӧдьяен герӟан понна кыл кутӥ.

Связистын каньылля ужасько ни вал. Чылкыт омыретӥ, шулдыр бусыостӥ ветлон сяменым ужелэсь акыльтыны кутски. Огдыре юон вылэ но чӧлскылӥ. Ярано коть, со вакытэ одӥг тодмое монэ мувӧй кыскисьёс доры ӧтиз. Отчы, пе, любойзэ куто, дышетскымтэ муртъёсты но. Озьы мон связистысь электрике выжи. Лачак коньдон басьтыса, ужай. Мукет ӟеч уж уд шедьты ни шуыса, визьмаськи, юонлэсь но куштӥськи. Эсьмаса, пенсие потыса, эшшо 5 арзэ электрикын ужай на.

Йыр поромон

– Войнаысь бертэме бере йырез поромытыны кутскизы нылъёс. Чыртыям асьсэос ошисько, кужмысь кышнояськытыны выро. Армиысь 24 аресам вуи ке но, кышнояськыны ӧй дырты. Ма, кытчы кышно ваёд? Коркамы пичи, нуллыны дӥськут ӧвӧл, мон сяна, вынъёсы дорын на. Соин эшшо 2 но ӝыны ар огнам улӥ на.

Деревняын соку ог 10 пала нылъёс вал, нош егит пиос – 2. Армиысь ӵош бертэм эше соку ик кышнояськиз, солэн мумиз огназ улӥз, юртъерзы но бадӟым вал. Монэ но кышноязы, шуыны луоз. Бускельёсмы сюан шудӥзы, макмыр веськатӥсьёссы дӥнямы вуизы. Нылзы сярысь кылпум поттылӥзы но сектаськыны ӧтизы. Мазэ-созэ валатэк, дӥнязы мынӥ но, эмеспи чот каризы. Сюан шудыны кузпалылэн мумиз-бубиз юрттӥзы, соос дорын улӥмы но.

Валентина Егоровнаен ӵош 4 пинал будэтӥмы. Отӥяз милемлы Якшур-Бӧдьяе ик музъем висъязы, юртъер пуктӥзы. Кузпалэным ӵош 30 ар пала улӥмы. Секыт висён улонзэ куспетӥ кариз. Со гинэ куректонэ вылымтэ. Нылмы юон бекчее выйиз. Кема ӧз улы со но. Солэсь пизэ мон будэтӥ, шуыны луоз. Ӝытлы быдэ куасэн бызьылыны потамы, котькыӵе ужез ӵошен быдэсъямы. Та вакытэ монэ учке. Нылпиосыз но яратыса дорам бертыло.

Якшур-Бӧдья черкогуртын улӥсь арлыдоос понна пумиськон ӝытъёс ортчытъяллязы. Нырысь отчы кышноеным потай. Огнам кылеме бере но дорын ӧй пукылы. Арлыдоос понна мон кумир вал, 70 арес дыръям но туж эктыны-кырӟаны яратылӥ. Озьы ветлон сяменым ик мукет кышномуртэ синйылтӥ. Галина Николаевна Ардашеваен 20 ар пала ог-огмы доры куное ветлыса улӥмы, котькыӵе учыр дыръя юрттӥськылӥмы. Берло арзэ тани кунояны кынармы быриз, висёнъёс но котырамы тэбинё.

Пӧртэм вакытэз чидаськиз. Туннэ нуналэз раен ӵошатысал: ваньмыз вань, калык чебер юртъёс пуктэ, котькуд семьялэн нимаз машинаез вань. Нуналлы быдэ телевизор учкисько, иворъёс кылзӥсько но паймисько: малы ожмаськонтэк улыны ум чидаське? Мыло-кыдо учкисько спорт каналэз. Чидатэк витисько ни хоккеен шудонъя дуннелэсь чемпионатсэ, яратӥсько на боксэз, нош смешанной единоборство шуонзэс уг яратӥськы. Токма шорысь йыразы мыжгало, ӵыжало. Аслам йыры висьылэ бере, соослэн но йырзы висе, кожасько. Шулдыр нуналъёс тросгес мед луозы.

Источник:

Перевощиков, С. Н. Уй пӧйшур / С. Н. Перевощиков ; подгот. к публ. В. Емельянова // Удмурт дунне. - 2016. - 6 мая. - С. 10, 15 : фот. - (Тӧр шорын).

За предоставление материала выражаем огромную благодарность редакции газеты "Удмурт дунне"