Перевощиков Василий Яковлевич

Материал из Воршуда
Перейти к: навигация, поиск

Луысал ке берыктыны…

В. Я. Перевощиков

«Удмурт театрысь актёръёс пӧлын Василий Перевощиков одӥгез яркыт кизили луэ. Василий Яковлевичлэсь адӟем каризы, дышетскизы егит артистъёс но пӧртэм арлыдо драматургъёс, художникъёс – ваньмыз, кин соин ӵош кылдытъяз спектакльёсты, шумпоттӥз учкисьёсты».

Василий Перевощиков сярысь таӵе ӟеч кылъёс гожтӥз критик, театровед, Удмурт Республикаысь культура удысысь дано ужась Т. Ардашева. Василий Яковлевич вордӥськиз Эгра ёросысь Пазяли гуртын 1928-тӥ арын 17-тӥ июле. Милям атаймы (мон Василий Перевощиковлэн сузэрез луисько) Яков Николаевич Перевощиков 1929-тӥ арлэн пумаз улыны лыктэ Иже, ужаны интыяське машиностроительной заводэ. Ӝытъёсы Центральной удмурт клубе но ТРАМ-е – ужась егитъёслэн клубазы – удмурт драмая кружоке мыло-кыдо ветлэ.

1931-тӥ арын атаймы ужаны лыктэ Удмурт театрлэн нырысетӥ труппаяз. Валамон ини, репетициосы но спектакльёсы пичи Вася ӵем вуылӥз, отын ӝыны нуналъёсын пукылӥз. Собере, доре бертыса, ӵошеннамы кыльыкумы, артистъёслэсь кылэм кылъёссэс ас понназ вераса ветлылӥз, мизансценаосты шудылӥз. Со бордысь ик потӥзы, дыр, вуоно артистлэн улон шоры учконъёсыз, сямъёсыз. Дас аресъем Васялы профессиональной артистъёсын ӵош концерт программаын кылбур лыдӟыны оскизы. Пичи артистэз сцена вылысь озьы гинэ ӧз лэзе ни, сыӵе быгатыса со лыдӟиз кылбурзэ. Со сярысь одӥгез рецензент 1938-тӥ арын 3-тӥ апреле потэм «Удмурт коммуна» газетын гожтэм: «Востэм, со вакытэ ик шаплы пияш кылзӥсьёсты паймытӥз кылбур лыдӟыны быгатэменыз. Со лыдӟиз «Мечта» кылбурез. Собере кема кичабонъёс чузъяськизы. Учкисьёслэн куремзыя Вася лыдӟиз на Александр Пушкинлэсь «Памятник» кылбурзэ».

1944-тӥ арын Перевощиков ужаны кутске Удмурт театрын, нырысь-валысь массовкаосын шудэ. Собере солы шуд усе Ф. Кноррелэн «Встреча в темноте» спектакляз шудыны. Со вакытэ театр ужаз Можга карын. Лек ож бырытозь, кылемын на вал ар но ӝыны. Вакытъёс туж секытэсь ке но тупазы, театр ужамысь ӧз дугды, гуртын улӥсьёслы спектальёс возьматъялляз. Учкисьлы со туж кулэ вал. Спектакльёсын шудыны артистъёс ӧз тырмылэ, ӝыныез воргоронъёс ож лудэ кошкемын вал. Удмурт театрысь актёръёс пӧлын ужазы эвакуацие вуэм артистъёс, соин ик троссэ спектакльёсты ӟуч кылын шудӥзы. «Встреча в темноте» пьеса сӥземын фашистэн нюръяськонлы. Василий Перевощиков шудӥз партизан отрядэн кусып возись пияшез. Премьера туж тунсыко пӧрмиз. Василий учкисьлэсь сюлэмзэ бугыртӥз, шудыны быгатэменыз но таланто луэменыз. Мон али ке но син азям пуктӥсько сюлэмез чигтӥсь сценаез: бадӟым синкылиосын зар-зар бӧрдӥсь пияш вием дышетӥсез доры мыкырске…

1946-тӥ арын Удмуртиысь кивалтӥсьёс егит нылъёсты но пиосты келязы Ленинградысь театральной институтэ. Вить ар ортчыса, 1951-тӥ арын, 16 егитъёс шумпотыса берытскизы Удмурт театре. Отын соос арлыдо артистъёсын одӥг радэ султӥзы, тупаса улӥсь семьяе пыризы, спектакльёсын ӵош шудыны кутскизы.

«Егит артистъёс пичи но ӧз вылтӥяське, мукетъёслэсь висъяськыны ӧз тырше, соос каллен гинэ милемыз сьӧразы кыскизы», – егитъёс сярысь тодаз вайылӥз РСФСР-ысь дано артистка А. Шкляева. Ленинградысь вуэмъёс пӧлысь тросэз шудыны быгатонлыкенызы висъяськылӥзы. Егит артистъёслэн нимъёссы быдэс республикае вӧлмизы, учкись соосты яратӥз, соослы луыса Удмурт театрлэн данэз эшшо но вылӥе ӝутӥськиз. Арлыдо учкисьёс али ке но туж умой тодо на, луоз, Н. Бакишеваез, Б. Безумовез, И. Протодьяконовез, И. Кудрявцевез…

* * *

Василий Яковлевичлы котькыӵе рольёс капчиен сётӥськылӥзы: со комедиын но, трагедиын но, огшоры улонэз возьматӥсь спектакльёсын но шудылӥз. Солэн лэчыт визьмыз но малпаськыса шудэмез котькуд рользэ мур пуштросъем карылӥзы. Героезлэн улоназ быдэсак пырыны быгатылӥз. Со шоры палэнысен учкылӥз кадь, аслыз ачиз дунъет пуктыны быгатылӥз.

Василий Перевощиков нокинлы ӧз сётскылы, ӧз пыриськылы – сямыз капчи ӧй вал. Творчество ласянь бадӟымесь куронъёс пуктылӥз, котьку но котькытын аслэсьтыз малпанзэ шара вералляз, кыл вылаз сылӥз. Но, жаляса верано, малпанзэ но верам кылъёссэ котьку ик санэ ӧз басьтылэ.

Солэн тросэз геройёсыз аслыз тупало: чидасьтэмесь но сюлмоесь. Удмурт театрлэн сцена вылаз Василий Перевощиков сю пала рольёсты шудӥз. Кылсярысь: Труффальдино (К. Гольдони «Слуга двух господ»), Перчихин (М. Горький «Мещане»), Максим (И. Гаврилов «Шунды ӝужаз»), Тэмыр (И. Гаврилов «Лымы тӧдьы»). Зэм ик но, тунсыкоесь но туж пӧртэмесь рольёс. Жаляса верано, артистлэн быгатонлыкез быдэсак усьтӥськыса ӧз вутты. Театрын ӵемысь озьы луэ: кудъёсыз ке спектакльёс ышо-быро, репертуарысь усё. Нош улон ортче, артистлэн быгатонлыкез кулэ уг луы ни.

Режиссёр сямен Василий Перевощиков 20 спектакль пуктӥз. Тодэ кылизы В. Садовниковлэн «Гондыр куш» спектаклез, А. Островскийлэн «Зэмлык умой, нош шуд дуногес» («Правда хорошо, а счастье лучше»), А. Вампиловлэн «Прошлым летом в Чулимске», А. Макаёноклэн «Трибунал», Е. Загребинлэн «Асьмелэн со одӥг». Спектакльёсыз син пӧртман понна гинэ пуктэмын ӧй вал, режиссёр ӧз кыстӥськылы аспӧртэм вылтус, шӧдтэк шорысь мизансцена котыре. Нырысетӥ интыын – пуштрос. Котькудӥз герой висъяське аслаз сямыныз, выросъёсыныз, улон шоры учконэныз. Вераны кулэ, пуктэм спектакльёсыз пӧлын вал, дыр, лябъёсыз но – пьеса бордысь тросэз потэ.

Василий Яковлевич, удмурт пьесаосты пуктыкуз, драматургъёслы трос юрттӥськиз. Авторен огинын ужалляз, йылаз-пумаз вуттылӥз котькуд сценаез, сюжетэз. Кылсярысь, ӵош тыршизы Егор Загребинлэн «Тулыс зор» пьесаез бордын, бӧрысь та авторлэн ик пьесаезъя пуктӥз «Асьмелэн со одӥг» спектакль. С. Самсоновлэн «Тугаськем бугор» повестезъя «Луысал ке берыктыны» инсценировка дасяз, В. Садовниковлэсь но М. Тронинлэсь «Гондыр куш» сатирической комедизэс пуктӥз.

Агае сярысь тодэ ваёнъёсын «Память сердца» книгае потӥз 1991-тӥ арын «Удмуртия» издательствоын, тросэз эшъёсыз, артистъёс, режиссёръёс, Василий Перевощиков зэмос адями, умой артист но быгатӥсь режиссёр шуыса, ӟеч кылъёссэс веразы.

Василий Перевощиков, студент вакытысеныз кутскыса, берпум нуналозяз улэм-вылэмез но театрын ужамез сярысь дневник нуиз. Нырысетӥ гожъямъёсыз кутско 1948-тӥ арын 30-тӥ июне. Отысь чуръёсты лыдӟыса, валаськод но шӧдӥськод, макем Василий Яковлевич адямилыко, улонэз гажась но яратӥсь, аспӧртэмлыко адями вал.

Источник:

Евсеева А. Луысал ке берыктыны… / А. Евсеева // Удмурт дунне. - 2013. - 19 июля.

За предоставление материала выражаем огромную благодарность редакции газеты "Удмурт дунне"