Перевозчиков Олег Орестович

Материал из Воршуда
Перейти к: навигация, поиск

Чемпионъёсты будэтэ гурт

81-5.jpg

Берло дыре шаерысьтымы куасэн бызьылӥсьёс ваньзэс паймытъяло быгатонлыкъёсынызы. Россиысь сборное но арысь аре тросгес спортсменъёсмы, тренеръёсмы шедё. Шарканысь Олег Перевозчиков воргоронъёслэн сборноенызы кыкетӥ арзэ кивалтэ, нош талэсь азьвыл куать ар ужаз Россиысь егит пиосын. Азинсконъёс басьтыны юрттэмез понна со пусъемын «Удмуртиысь дано тренер» нимын.

— Вордски но быдэ вуи Шаркан черкогуртын, — веранзэ мытӥз Олег Перевозчиков. — Пичи дыръям туж шаплы вылӥськем, интыям пуконэз ӧй валалля. Куинетӥ классын дышетскыкум, куасэн бызьылонъя секцие гожтӥськи. Кин ке отын ар возиськиз, нош мон пыраклы спортэн эшъяськи. Туннэ кадь ик тодӥсько на нырысетӥ тренерме Владимир Стрелковез. Отӥяз мугорме кыдатӥ Николай Лопатин дорын.

- Нош нырысетӥ вормондэс тодӥськоды на-а?

— Асме мон зол бызьылӥсен ӧй лыдъялля. Районысь спортсменъёсмы туж кужмоесь вал, вормон басьтон понна бадӟым вожвылъяськон пыр потоно луылӥз. 9-тӥ классын дышетскыкум гинэ, шаерысь ас ёзо эшъёсы пӧлын нырысетӥ вормон басьтӥ. Отӥяз биатлонэн гочатӥзы. Куасэн зол бызьылӥ ке но, ыбылӥськонэ ялан чутӥзгес. Собере мукетыз монэ сюлмаськытӥз: арлэн пумаз (19-тӥ декабре) вордскемын бере, ялан аслэсьтым бадӟымгес (арлэн кутсконаз вордскемъёсын) эшъёсыным вожвылъяськоно луылӥз. Кин тодэ, оло, со но люкетӥз спортын бадӟым вормонъёс басьтыны.

- Озьыен, школаез йылпумъякуды, кин луондэс тӥ тодӥды ни?

— Пичи дыръям кин гинэ но луэме ӧз потылы: тракторист-машинист, дышетӥсь, инметӥ лобась… Озьы ке но школаме йылпумъян азьын ӝот-ӝот вераны быгатӥ: азьпал улонме спортэн герӟало — луо яке спортсмен, яке тренер. Удмурт кун университетысь мугорез кыдатон культурая но спортъя факультетэ вамыштӥ. Дышетскон вискам армие ветлӥ, службаме ортчытӥ Свердловск улосын — спортротаын. Сурон сапег нуллэме токма ӧз луы, армиысь бертыса, спортъя мастерлэсь куронзэ быдэстӥ. Россиысь кужмо спортсменъёслэн радазы шедьыны ӧз удалты бере, оло, тренерлэн удысаз тросгес удалтоз, малпай. Дышетсконме йылпумъяса, вордскем палъёсам бертӥ.

- Шарканысь егит биатлонистъёсты дасян борды басьтӥськиды-а?

— Биатлонын бадӟымесьгес вормонъёс басьтыны удалтӥз бере, та удысэз ик азинтыны малпай вал. Но 1990-тӥ аръёсы ортчем выльдӥськон ваньзэ тарказ. Озьы вуи мон ёросысь куасэн бызьылӥсьёс доры. Пинал спортсменъёсыз бадӟым ӵошатсконэ поттон вылысь ӟеч инвентарь кулэ вал бере, эшъёсме-тодмоосме ёртыса вози. Эше Алексей Кобелев со вакытэ дуннеысь ӵошатсконъёсы пота ни вал, кунгож сьӧрысь куас зыран мазьёс вайылӥз, нош «Ижпланета» спорткомплексын ужась Валерий Журавлёв инвентарь шедьтыны юрттылӥз. Мон пичи дыръя но, тренерын ужаны кутскеме бере но Шарканысь спортэн эшъяськись пиналъёслэн лыдзы ӧз кулэсмылы. Вуж пу юртын ӟоскыт вал ке но, дорамы лыктӥсьёсты одӥгзэ но ӧм уллялэ.

- Иське, ёрос команда люкан ласянь сюлмаськонъёсты ӧз кылдылэ?

— Куд-ог ёросъёсысь тренеръёс одӥг пиналъёссэс ик пӧртэм пумо ӵошатсконъёсы нулло ке вал, милям куасэн бызьылӥсьёсмы гинэ кык команда пала люкаськылӥзы. Мыным соку котыр ласянь ужаны капчигес вал. Ёрос центръёсын туж ӧжыт кружокъёс но секциос радъяськылӥзы. Вань пиналъёс пӧлысь 90 процент палаез куасэн бызьылонъя секцие гожтӥськылӥзы. Отӥяз милям спортшколаямы черкогуртысь гинэ ӧвӧл, гуртъёсысь пиналъёс но мугорзэс кыдатыны кутскизы. Кужмо спортсменъёсмылэн лыдзы арысь аре йылӥз. 5-тӥ классын дышетскыкуз, мон доры нырысьсэ вуиз Максим Вылегжанин. Со вакытэ ик кужмо спортсменъёслэн радазы шедиз Екатерина Воронцова. Куд-огезлэн пыкылэмзы потэ ке но Катяез, та вакытэ Тюмень улос понна бызьылэ шуыса, со — мынам дышетэм пиналы. Туж шумпотӥсько, шуг-секытъёсты вормыса, Катя та вакытэ нош ик Россиысь нылкышно спортсменъёслэн радазы шедьыны быгатӥз шуыса. Озьы ик данъяськисько Николай Хохряковен, Андрей Вахрушевен, Александр Мезинцевен. Кужмо, быгатӥсь спортсменъёсмы лыдъяса быдтонтэм вал, одӥгзэ жалясько: пӧлысьтызы тросэзлы Россиысь сборноёзь будыны ӧз кылды.

- Нош мар люкетӥз соослы вылэгес ӝутскыны?

— Куасэн бызьылон — со чиданэз эскерон. Муэз гырем сяна, шуг-секытъёслы сётскытэк, емышлэсь кисьмамзэ но витьыны быгатоно. Котькуд адями азяз ужпумъёс пуктыны кулэ. Мынам льӧль малпанэ вал дуннелэн чемпионэз луыны. Улонын сое быдэстыны ӧз кылды бере, азям мукет ужпум пуктӥ — одӥг ке но чемпион будэтоно. Оскисько, Шарканысь ик воргоронъёс мынэсьтым малпанъёсме быдэстыны быгатозы шуыса. Та вакытлы вице-чемпионозь ӝутскимы ни.

- Тренерлэн «сием потонэз» соку эшшо но уз буды-а?

— Соиз зэм: одӥг пагӟалы вылӥегес ӝутскиськод ке, эшшо ӝужытгес луэм потэ. Мон малпамъя, тренерлэн сыӵе «аппетитэз» одно ик луыны кулэ. Нош вормонъёсын кӧтыз тыре ке ини, ужан удыссэ мукетызлы кельтыны кулэ. Бен, мукет сюрес но бырйыны луоз: пукиськод интыяд, бадӟым уждун басьтыса, нош азьпала вамыш уд лэсьтӥськы. Мон озьы пукыны дышемын ӧвӧл, ужамелэн соку ик пайдаез мед адӟиськоз.

Мукетсэ но верасал: одӥг сюрес вылтӥ адями кык пол вамыштыны кулэ ӧвӧл. Куд-огезлэн верамез потоз: выльысь вамыштыку, янгышъёс бордын ужаны луонлык кылдэ, удалтон но бадӟымгес луоз. Мынам малпанъёсы чылкак мукетэсь. Спортсменэз одӥг пол чемпионозь будэтыны ӧд быгаты ке, сое кыкетӥзэ вылӥе уд ӝуты ни. Тренерлэн янгышъёсыз понна спортсменъёс кыл кутыны кулэ ӧвӧл. Ачим сярысь ке верано, спортсменъёслэн басьтэм вормонъёссы та вакытэ монэ бурдъяло гинэ. Удмуртиысь куасэн бызьылӥсьёс арлы быдэ азьпала вамышъёс лэсьто бере, ужаны луоно.

- Куд-ог тренеръёс, доразы пукыса но, спортсменъёсын кивалтыны быгато.

Удмуртиысь тренеръёс

— Бен, тренерлэн ужез пӧртэм. Кылсярысь, куд-огез дорысьтыз уг пота, нош ассэ спортсменлэн тренереныз лыдъя. Туала вакытэ компьютер кусып возьыны юрттэ. Нош мынам чылкак мукет удысэ: спортсменъёс бызьыло — ми но мугормес кыдатӥськомы. Толэзьёсын гуртэ уг пыраськы, шуыны луоз. Кемалась ик ӧвӧл спортсменъёсынымы шутэтскон нуналъёсмес чотамы. Отпускмес лыдъяса, ваньмыз-ӧвӧлэз ог 90 нунал люкаське. Быдэс арлэсь ньыльмос люкетсэ гинэ дорамы, семьяен ӵош пукыны кылдэ. Валтӥсь тренерлэн ужез лыдъяса быдтонтэм. Куд-ог дыръя медальёс басьтыны уг удалты ке, тэк пукиськомы шуыса, пыкылэмзы потэ. Та вакытэ мыным кыл кутоно ваньмыз понна: документъёс, спортсменъёс, сервисменъёс, эмъясьёс… Тыршеммылэн ӟечлыкез ӵошатсконъёс дыръя адске.

- Туннэ нуналлы кӧня спортсмен тӥляд бурд улады мугорзэ кыдатэ?

— Кылем арын Россиысь сборное кутэмын вал 16 воргорон (со пӧлысь 4-ез — Удмуртиысь спортсменъёс, эшшо 2-ез Россиысь сборноен ӵош мугорзэ кыдатӥз Удмуртия чот), туэ 18 мурт лыдъяське. Шумпотӥсько, со пӧлысь 6-ез — асьме шаерысь. Мукетыныз но данъяськыны быгатӥсько: Россиысь сборнойын, мон сяна, тренер луыса ужа Якшур-Бӧдья черкогуртысь Эдуард Михайлов, эмъясьёслэсь ужзэс быдэсто Ижысь Евгений Шутов но Даниил Семёнов. Дэмен тыршыны шулдыргес, ог-огмылэсь визь-кенеш юаны но ум кепыраське.

Спортсменъёс сярысь ке верано, ми соосты, асьмелэн карыса, ум кутӥське, ваньзэ лыдпусъёс возьмато. Кылсярысь, Удмуртиысь куатетӥ спортсмен интые мукетсэ — кужмозэгес — шедьтӥзы ке, сборное кутыны пумит луо шат? Бен, аспал эшъёсын ужаны, огкыл шедьтыны капчигес. Шаерысьтымы спортсменъёсмес вить чиньымес кадь тодӥськомы, нош спортсменлэсь быгатонлыкъёссэ шараян понна ӧжытсэ кык ар чидано, эскероно котыр ласянь. Нырысетӥ араз адямиен тодматскиськод, со сярысь пӧртэм иворъёс бичаськод. Кыкетӥ араз сямъёссэ шараяськомы. Шуг-секытъёсты вормыны быгатэм сяна, азяз пуктэм ужпумъёссэ но быдэстыны мед вормоз. Юн сямо спортсменъёсын гинэ Олимп гурезёзь ӝутскыны луоно.

- Удмуртиысь спортсменъёс тужгес чидасесь, шуо?

— Россиысь ӵошатсконъёсыз басьтоно ке, 50 иськеме Тюменьын ортчем марафон но 70 иськеме Мончегорскын ортчем супермарафон дыръя шаерысьтымы куасэн бызьылӥсьёсмы ваньзы сямен дас кужмоосыз пӧлы шедизы. Асьме пиналъёс тужгес чидасесь, ужез ярато. Жаляса верано, Россиысь бадӟым городъёсысь спортсменъёслэн спринтын сяна вожвылъяськыны кужымзы уг ни тырмы. Та вакытэ куасэн бызьылӥсьёслэн лыдзы гуртъёс вылын возиське шуи ке, уг янгыша. Кышкасько, азьланяз соос но азьтэмскозы. Угось туала вакытэ гуртын улон капчияны ӧдъяз. Талы шумпотоно кадь, нош мон сюлмаськисько: кужмо но таза пиналъёслэн лыдзы арысь аре ӧжытгес кыле. Азьвыл аръёсы кужмо школаос вал Свердловск, Москва, Новосибирск улосъёсын, 1990-тӥ аръёсы ваньмыз куашказ. Спортэн эшъяськись пиналъёс одӥг тренер борды дышыса вуттылӥзы гинэ, нош со пичи коньдон басьтэмысьтыз мукет интые ужаны кошкылӥз.

- Ортчем толлы кыӵе дунъет сётысалды?

— Огъя зачётын Нациослэсь кубоксэс Россиысь команда утӥз, соин ушъяськыса гаде мыжганы кулэ кадь, нош мынам малпанъёсы мукетгес вал. Куд-ог стартъёсын Россиысь воргоронъёс пьедестал дорозь кыстӥськыны быгатысалзы — медальёсмы ныр ултӥмы пегӟизы. Озьы ке но азьпала вамышъёсмы лэсьтэмын. Умоен пусйысал трос нунал кыстӥськись «Тур де Ски» ӵошатсконэз. Отчы пыриськем спортсменъёсмылы ваньзылы финишозь вуыны кылдӥз. Азьвыл аръёсы троссэ висён погыртылӥз. Озьы бере, мугорзэс кыдатон ласянь шонер сюрес быръемын вал. Ӵошатсконлэн берпуметӥ нуналаз Максим Вылегжанинлэн луонлыкез вал вормисьёс пӧлы шедьыны. Солы быгатэмъяз юрттыны тыршиз Александр Легков но. 5-тӥ-6-тӥ интые потысал ке, пьедестал асьмелэн луысал. Жаляса верано, 22,5 иськеме классика амалэн бызён дыръяз Максимлэн куас бодыосыз тӥяськизы, дас кужмоосыз пӧлы шедем интые, 27-тӥ инты сяна ӧз донгиськы.

Со сяна, Россиысь спортсменъёс туж бездыт адскизы нырысетӥ стартъёсын. 2011-тӥ арын ноябрь толэзе дуннеысь тросэз спортсменъёс мугорзэс кыдатӥзы выль лымы вылын, нош ми Норвегиын вал — искусственной лымы вылын бызьылӥмы. Трос малпанъёсмес соку быдэстытэк кылимы. Соин но, дыр, нырысь стартъёсын шуг-секытъёс кылдӥзы куасъёсты зыран пумысен, тупамон мазьёс шедьтыны ӧз кылды. Кылем сезонэз пыр-поч эскереммы бере туэлы чаклам ужпумъёсамы куд-ог выльдонъёс пыртӥмы. Бадӟым саклык висъяно луиз сӥзьыл мугор кыдатонлы.

2010-тӥ арен ӵошатоно ке, Удмуртиысь пиосмы трослы азьпала вамышъёс лэсьтӥзы. Можгаысь Дмитрий Япаров дуннеысь куамын кужмо спортсменъёс пӧлы шедьылӥз ке, 2011-тӥ арын кык пол шедьылӥз дас кужмоосыз пӧлы. Нош Россилэн чемпионатаз котькуд стартын медаль басьтыны быгатӥз. Со сяна, вормонъёсыныз шумпоттӥз Кезысь Константин Главатских. Россиысь воргоронъёсты ке верано, азьпала вамыш лэсьтӥзы Сергей Турышев но Александр Бессмертных.

- Россиысь спортсменъёс А. Легков но И. Черноусов мугорзэс кыдато немец тренер дорын. Кызьы учкиськоды со шоры?

— Та пиос кыкетӥ арзэ нимаз дасясько. Туэысен соослэсь адӟем каризы на Евгений Дементьев но Станислав Волженцев. Нимаз тренерен ужаны кельше ке, мон пумит ӧвӧл. Котькуд спортсменлэн луонлыкез вань аслыз кельшымон тренер бырйыны. Мынам малпамея, кужмо спортсмен кужмоосыныз ӵош ик мугорзэ кыдатыны кулэ. Сборнойлэн палэназ улыса но, кужмо луэмзэс возьматӥзы ке, солы шумпото гинэ. Мукет ласянь ке учконо, оло, соос шонер лэсьто: 20 спортсмен одӥг тренер дорын мугорзэ кыдатыны, ваньзэ одӥг кадь лэсьтыны но кулэ ӧвӧл, дыр. Кунгож сьӧрысь спортсменъёс бадӟым «уллёен» мугорзэс уг кыдато. Отын сборной командазылы бадӟым саклык но, трос коньдон но уг висъяло. Нимысьтыз саклык висъяло спортъя клубъёслы. Котькуд спортсменлэн аслаз тренерез, шуыны луоз, быгатонлыкъёссэс эскерон вылысь толэзьлы одӥг-кык пол, огазе люкаськыса, ӵошатсконъёс ортчыто но выльысь ас клубъёсазы берытско.

- Спортсменлэн ӝыны вормонэз куаслэн ӟечлыкез бордысь потэ, кин быръе соосты?

— Куас быръён — тужгес секытэз ужпум. Ӵошатсконъёс дыръя спортсменъёслы куасъёс дасясько нуналлы азьлапал. Мазьёсты кутэмлэсь азьло чаклано луэ куазьлэсь воштӥськемзэ. Куд-ог дыръя шуге-леке вуон учыръёс но кылдыло, вань мазьёсты эскериськомы, нош пайдаез уг шӧдӥськы. Кунгож сьӧрысь эшъёсмылэсь секретсэс шараян вылысь музъем вылын погылляськеммы но вань. Спортсменъёс, гурезе тубыкузы, куассэс музъем бордысь ӧжытак ке но ӝуто, ӵапак соку адске, кыӵе мазъёсты уже кутӥллям.

Туннэ нуналозь воргоронъёслэн но нылкышноослэн сборноязы быдэн 4 сервисёръёс вал. Ӵошатсконъёс дыръя соослы тужгес пӧсь йӧтэ, уйзэс но уг кӧло. Куас дасясьёслэн ужзы туэысен ӧжытак капчиятэмын луоз — лыдзы кык поллы йылэтэмын. Кунгож сьӧрысь командаосын ӵошатоно ке, соослэн азьвыл аръёсы ик 8-10 сервисёръёссы вал ни.

Бадӟым ӵошатсконъёс ортчем бере спортсменъёслы медаль басьтыны уг удалты ке, янгыш муртэ утчаны кутско. Ваньмызлы кельшымон луыны уд быгаты. Соин ик верасал: куасъёс быръё асьсэос спортсменъёс. Куд-ог дыръя соослэн куас дасясьёсты янгыше уськытэмзы потэ, мынам малпамея, асьсэос но янгыш луо. Озьы уз луы ук, вормон кузьмась куасъёс вить ар ӵоже шумпоттозы, нош куатетӥ араз нискылтэмысь дугдозы. Куас — со кузпал выллем. Яратӥд ке — семья кусыпъёс но радъяськозы, вормонъёс но басьтод. Малпамтэ шорысь куспады керетон пуромиз ке, люкиськыны дыртод шат? Соин ик куасъёсмы лултэмесь ке но, соосты нуныяны кулэ.

- Одӥг спортсменлы куас дасян кӧня манет тыр усе, кӧня куз куасъёссы сборнойысь воргоронъёслэн?

— Котькуд спортсменлы быдэн 4-5 куз куас дасяськомы, ӵошатсконлэсь статуссэ лыдэ басьтытэк. Ӵем дыръя эскеронъёс ортчытӥськомы. Выль кылдэм мазьёслы дунъет сётыны луэ бадӟым ӵошатсконъёсын гинэ. Коть-кудӥзлэн аслаз бызьылон тӥрлыкез. Одӥг куз куас дасян 500 манетлэсь ӧжыт уг луы. Кылсярысь, сборнойын трос аръёс ӵоже возиськись спортсменъёслэн, шуом, Максим Вылегжанинлэн, 40 куз — классикалы, эшшо сомында ик эркын амалэн бызьылыны чакламын. Спортсменъёслэсь инвентарьзэс 4 автобусэн нуллӥськомы. Лымы ӧвӧлтэм дыръя питрано куасъёсын мугормес кыдатӥськомы, нимысьтыз саклык висъяськомы гурезьёстӥ бызьылонлы.

- Максим Вылегжанин вице-чемпионозь ӝутскиз ни, зарни медаль басьтыны ялан люкетэ Норвегиысь Петер Нортуг. Соин вожвылъяськонлы дасяськиськоды-а?

— Ялан кыкетӥ инты асьмелы но акыльтӥз ни, норвежецен нюръяськон амалъёс утчаськомы, трос литература лыдӟиськомы. Тыршеммылэн пайдаез одно ик уж вылын шӧдӥськыны кулэ. Азьвыл аръёсы марафонъёс дыръя Россиысь командаез, стартэ потыкуз ик, вормисьёслэн радысьтызы палэнтыны выризы ке, берло дыре, финише вуытозязы, асьме воргоронъёс шоры учко. Озьыен, азьпала вамышъёсмы вань.

- Егитъёслэн сборноязы 6 ар ужам муртлы капчигес вал, дыр, воргоронъёслэн сборноенызы кивалтыны?

— Одӥг интыын сылӥд ке, кыжмод, шуо. Кивалтон удысын тыршемын ке но, ялан выленыз тодматсконо луэ. Кылсярысь, азьвыл аръёсы тренеръёс ужамзы сярысь отчётъёс лэсьтӥзы ортчем иськемъёс вылын, нош табере ваньзэ часъёсы берыктоно. Кык тол ӵоже кивалтэме бере малпай: та удысын мыным тросэзлы дышетсконо на. Спортэз валан, валтӥсь тренерлэсь ужзэ ӟеч быдэсъян понна тодон-валанъёсме будэтон бордын тыршисько. Интернетын бугыръяськонэз уг яратӥськы. Книгаос басьясько, кунгож сьӧрысь авторъёслэсь ужъёссэс чакласа возисько. Толэзьлы быдэ выль малпанъёсы кылдо.

- Ялан спорт сярысь вераськиськомы, семьяды нош тӥ шоры кызьы учке, ваньзэ куштыса, бертыны уг косо-а?

Семьяеныз

— Дышетсконме йылпумъяме берегес ик кузпалъяськи. Озьы тупаз — кышноелэн ныл фамилиез Перевозчикова вал, тросэз шуизы: ог-огмылы кылдэмын. Лариса Петровна спортсменлэсь улонзэ гажаны дышиз ни, нырысьгес куаретылэмез потӥз ке но. Антон пимы мынам сюрестӥм вамыштӥз. Та вакытэ Удмурт кун университетын 4-тӥ курсын дышетске. Ас мылкыд каремезъя армие ветлӥз, службазэ спортротаын ортчытӥз. Туэ Мончегорскын ортчем ӵошатскон дыръя спортъя мастерлэсь куронзэ быдэстӥз. Арина нылмы 2-тӥ классын дышетске ай. Эктонъя кружоке ветлэ, куасъёсмы шоры но тунсыкъяськыса учке. Ар-кык ортчыса, мылкыдыз луиз на ке, куасэн бызьылонъя секцие гожтомы. Одӥгзэ жалясько: туала вакытэ пиналъёслы ас кожазы кыданы но будыны маза ум сётӥське, кружокъёсын, секциосын коскатӥськомы. Озьы соос дырызлэсь вазь котьмалэсь акыльтыны вуо, бӧрысь куашкам мылкыдзэс ӝутыны туж секыт.

- Ваньмон дырды кыле на-а? Ма карыны яратӥськоды?

— Ужтэк пукыны дышемын ӧвӧл, киосы висьыны кутско (серекъя). Юртъер котырын ужан понна пӧртэм инструментъёсы вань, пуэз но чеберъясько, кирпич но шуккисько. Сборъёсысь бертылон вискам юртъер ӝутӥ. Та вакытэ гужем кухня но гараж лэсьтон бордын тыршисько. Егитгес дыръям биатлонлы синмаськемын вал бере, мынам сюлмам ыбылӥськон пыраклы кылиз. Соин но, дыр, ваньмон дыръям пӧйшураны яратӥсько.

- Олег Орестович, туж паймымон атай нимды.

— Анае но, атае но — Шарканысь удмуртъёс. Тренерлэсь ужзэ быдэсъяны кутскеме бере атай нимме шонер вераны быгатӥсьёсыз чиньыен лыдъямон гинэ вал, куд-огез паймыса, кыӵе выжыысь шуыса, юаллязы. Чик кӧбератэк валэктылӥ: грек выжыысь. Кин ке оскылӥз, тодӥсез серекъялляз.

Источник:

Перевозчиков, О. О. Чемпионъёсты будэтэ гурт / О. О. Перевозчиков ; записала В. Емельянова // Удмурт дунне. - 2012. - 8 июня. - С. 6, 11 : фот.

За предоставление материала выражаем огромную благодарность редакции газеты "Удмурт дунне"