Орлов Сергей Анатольевич

Материал из Воршуда
Перейти к: навигация, поиск

Гуртын дыр кузь…

С. А. Орлов


Сергей Орлов – Россиысь улос художникъёс пӧлысь огез тодмоез, выриз перформансъёсын, инсталляциен, али быдэсак берытскиз живопись, графика пала. Творчествояз огазея язычникъёслэсь, христианъёслэсь но буддистъёслэсь улон шоры учконъёссэс. Кивалтэ УдГУ-ысь Искусствоосъя но дизайнъя институтысь живописья кафедраен, Удмуртиысь культура удысысь дано ужась, Россиысь вылӥ профессиональной образование сётон удысь дано ужась. 55 арес тырмонзэ пумиталоз мастерскояз мольбертэныз ваче син – декабре Санкт-Петербургын но Москваын бӧрсьысь бӧрсе ортчозы Ижысь усточиослэн выставкаоссы.

Танатос, Эрос но этнос

- Сергей Анатольевич, тӥ - Удмуртиысь огез тодмоез художник. Тӥледыз тодо аспӧртэм амалэн суредаськисез яке йӧспӧртэм проектъёсы пыриськисез сямен?

- Тӥ «сьӧрос искусство» сярысь, дыр, озьы? 500 пол юазы ини, 501-тӥзэ валэктӥсько: Макс Верёвкинлэн «Галерея» центрысь туалетын суредъёсме возьматыны дэмланэз тодам вайытӥз егит дырме – андеграунд вакытме. 1980-тӥ-1990-тӥ аръёсы но ми адӟытонъёсмес ортчытъямы гулбечъёсын, мукет кылем-мылем интыосын. Малы ке шуоно соцреализмлэн куронъёсызлы пумитъяськись художникъёслы (Энвиль Касимов, Витя Чувашов, Миша Басов, Паша Аксёнов) калык азе потыны мукет амалъёс ӧй вал: абстракция гулбече уллямын вал. Сьӧросэ суредъёсме ошылыса, мынам возьматэме потӥз, Удмуртиын выставкаослы йӧнала зал ӧвӧл шуыса. Ижысь Киров нимо ульчаысь Суредаськон искусствоосъя музейын борддоръёс кузя суредъёс вылэ зор ву вия! Совето Союз куашкаса, кызьы мылыд потэ суредаськыны, гожъяськыны эрик вуэм бере, андеграунд толло нуналэ кылиз вал кадь ини. Но туннэ со нош ик улӟе, мукетгес пуштросэн ке но. Азьвыл со партилэн идеологиезлы пумит нюръяськиз ке, табере социумлэн, обществолэн шузи-мази луэмезлы пумит. Учке ай, Россиын мынэ калыкез нуналмысь быдтон, адямиос ӵуказе нуналлы осконзэс ыштӥзы, узыргес улӥсьёс гинэ но. Асьсэос, оло, уг но шӧдо борддоре мырӟиськемзэс, но сое ӟеч валазы ини суредасьёс – соослэн кузы векчи, сюлэмзы чильпырась. Сое возьмато огъя малпанлы пумит мынӥсь, калыкез бугыртӥсь выставкаос. Кылсярысь, мынам дышетскисе Евгения Мальцева Москваын ортчытӥз Pussy Riot-лы дурбасьтӥсь выставка. Мон Женяез визьмай вал туала мудоръёс суредан борды басьтӥськыны. Ас сяменыз малпаськыны быгатэмез, данак калыклы пумит луэмез понна табере сое куд-огез быдтыны дась. Соослэсь пегӟыса, ӝамдэлы Испание кошкыло шуэ кадь. Судэ сётонэн кышкато адӟытонэз радъясь Марат Гельманэз но. Гельман – Россиысь нырысетӥез галерист. Пермьын улэмез бере Москваысь галереяяз возьматъяны ӧдъяз провинциысь художникъёсты – зэм, абстракция манерен суредасьёсты гинэ. Ӵапак солэн галереяяз декабре ортчоз Ижысь суредасьёслэн выставказы, сое вордӥськем нуналэлы но сӥзисько. Жаляса верано, Ижын сыӵе ужрадлы инты ӧз шедьы.

5 ар талэсь азьло, удмурт пластикаен, буёлъёсын суредам абстракциосме учкыса, Гельман валэктӥз, малы дораз ӧте пыдлось улосъёсысь художникъёсты. Шоркар (Москва, Санкт-Петербург) искусствоысь, пе, 2000-тӥ аръёсы абстракция чылкак ышиз, огъя дуннеын сямен ик. Нош провинция ог 20 арлы котыр ласянь бере кыле, соин художникъёс абстракцилэсь куштӥськыны ӧз вуэ, суредазы азьло сямен ик – сюлэмзэс поныса. Табере абстракция нош ик пыре модае. Но шоркаръёс понна милям «вуж» суредаськон амалмы луэ ини выль.

- Кӧня ке ар талэсь азьло Национальной музей азьын пуктылэм пу курегъёсты калыкез кыӵе малпанэ вуттыны кулэ вал?

- Пулэсь ӧй вал соос – пенопластлэсь. Но материал бордын ужпум ӧвӧл. Туала искусствоез валаны секыт. Ваньзэ кылын валэктыны но уг луы – валано сюлмын, синъёсын. Тани али со курегъёсты валэктыны кутски ке, кытчы вуэмме уг шӧды… Вакчияк ке, курег ассэ курбон сётэ адямиослы – Удмуртиын курег вордон азинскемын, укыр трос соосты сииськом. Со сыӵе дун-чылкыт курег… Солы тау карыса, малпамы йӧспӧртэм проект. Кызьы ке озьы… Сыӵе перформансъёсты, абстракциез йырын уд вала – синмын шӧдод. Макем ӵемгес учкылод абстракциен суредъёсты – сокем капчиенгес валалод. Кылсярысь, Борис Гребенщиковлэсь кырӟанъёссэ озьы ик вылысьтыз вылаз кылӥд ке, валаны ӧдъялод, выльысь кылзэмед потоз… яке синазькыль карод. Удмуртиысь тросэз туала художникъёс огазеясько, тунсыко малпанъёсынызы калыке пото. Тодмо луиз «Кынар кабон» проект. Со сӥземын удмурт сям-йылолъёслы, суредаськонын реализм амалэз утёнлы. Ми Энвиль Касимовен кылдытӥм «Танатос» огазеяськон, вань «Археоптерикс»… Ваньмы пыриськомы на «Ижкар» огазеяськонэ. Ми выриськомы удмурт культураез туала амалъёсын быдэс дунне тыр азинтыны. Асьмелы гинэ тупась культурамес пыртӥськом вань калыкъёсын кылдытэм чеберлыке. Али талэн дырыз – шаерамы суредаськон искусство зол азинскемын, солэн аслаз «ымнырыз». Мон, Энвиль Касимов, Алексей Чернышов, Зоя Лебедева но «Город Устинов» группаысь мукет художникъёс ужъёсмес возьматом Санкт-Петербургысь «Эрарта» галереяын, собере, верай ини, Москваын. Ми бере отчы мукетъёс вуыны кулэ, собере нош ик ми эшшо но муресьгес суредъёсын. Ми трос, ми пӧртэмесь, кужыммы, быгатонлыкмы быдэс Россилы тырмымон – Ижевскез котькытын тодозы.

- Танатос – вашкала грекъёслэн мифологиысьтызы кулон понна кыл кутӥсь инмар. Творчестволы со уггес тупа кадь.

- Танатослы ваче пумит сылэ Эрос – яратонлэн, улонлэн инмарзы. Таослэн валчеяськемзы бордысь кылдэ искусстволэн актэз. Кылдытэм потэ маке выль вордӥськемзэ. Туала вакытэ искусство ыштӥз Инмарен герӟетсэ – сакральной луэмысь дугдӥз. Художникъёс возьмато улонлэн копиезлэсь копизэ – симулякръёс кылдытонэн выро. Валэктӥсько: 13-тӥ даурын суредамын вал Богородицалэн Владимирской мудорез – философилэн кылыныз со луэ трансгрессор. Нош со вылысь лэсьтэм списокъёс (копиос) луо ини симулякръёс. Вот со симулякръёсты вормыса, кутсконлэсь кутсконзэ шедьтэм, возьматэм потэ. Кутсконлэн кутсконэз кулонэн но герӟаськемын.

- Калык вала-а творчествоеныды ма вераны турттэмдэс, кытчы кыстӥськемдэс? Тросэз малпало, пиар понна йӧспӧртэм выриськоды, кылсярысь перформансъёс ортчытъяськоды.

- Асьмелэн калык эркын малпаськыны дышемын ӧвӧл. Кытчы косо, отчы ик мынэ. Газет верамъя, телевизор возьматэмъя улэ. Тужгес но СССР вакытэ быдэ вуэмъёс бырйиськонэз уг валало, ваньзэ ньылоно кожало. Котьмалы но котькинлы тупыттэм оскись луэменызы, Западысь культуралы йыбыртъяло.

- Мыным потэ, егитъёс сопала золгес кыстӥсько…

- Егитъёс эркынэсь, соос созэ но, тазэ но бырйыны быгато. Соослэн визьзы оскымонгес. Нош мӧйыос кыл вылын гинэ Родиназэс ярато: кунгож сьӧрын ӟеч уж, уждун сӥзьысалзы ке, данакез чальтчысалзы. Соиз валамон но: зэмос Родинамы асьмелэн 1990-тӥ аръёсысен ӧвӧл ни. Ярам, семьяосмы татын, кылъёсты ум тодӥське – ишкалскыны ум быгатӥське. Ма, мон ачим но пӧртэм ӧвӧл: англи кылын вераськысал ке, Швециын искусстволы дышетысал ини, 5 ар талэсь азьло отчы ӧтё вал.

- Оскиськоды-а, сыӵе калыкен мае ке воштыны луоз шуыса?

- Оскисько-а, уг-а – со бордын ужпум ӧвӧл. Мон политикаен уг выриськы ук. Аслам улонэ понна ачим кыл кутӥсько – бӧрысь керпотоно, жаляно медам луы, луонозэ лэсьтыны ӧй быгаты шуыса.

- Иське, егитъёсты дышетон ик шумпотон вае?

- Быдэсак озьы шуыны уг луы. Туэ 25 ар тырмиз ини Удмурт кун университетын дышетыны кутскеме дырысен. Ки улысьтым трос гинэ тодмо адямиос потӥзы. Данъяськисько пери кадь котькытчы вутскись Максим Верёвкинэн, РТР каналын компьютер графикаен выре Михаил Басов, Анжела Романоваез суредаськон вуттӥз Германие, Елена Набелез – Италие.

Туала вакытэ тросэз дизайнэ лыкто, та удыс кузь коньдон вае шуыса. Дышеты собере не суредаськыны, не малпаськыны быгатӥсьтэмъёсты! Уксё сярысь уйбыртӥсьлэсь уг пӧрмы художник. Суредась луон сярысь малпан лыктыны кулэ воксё еж йыре. Соин Ижысь Гуманитарной лицей бордын усьтэм Сколково школаын радъяй Туала искусствоя школа 7-тӥ-10-тӥ классъёсын дышетскисьёс понна. Шумпотымон, суредаськыны мылкыд карисьёс тырмыт люкаськизы. Суредаськыны дышетэм сяна, пиналъёсты тодматъялом палэнысь ӧтем визьмо адямиосын, соос суредаськонэн гинэ герњаськемын уз луэ.

Уг тодӥськы, со пиналъёс пӧлысь кӧняезлэсь пӧрмоз художник, кӧняез тодмо луоз. Угось суредасьлэн улонэз Инмарен сётэм быгатонлыкен гинэ герӟаськемын ӧвӧл – тросэз потэ удалтон бордысь. Соин сэрен кќняез быгатћсь адямиос асьсэ понна суредаськисе гинэ кылё. Туала суредаськон искусство сокем паськыт, галеристъёс, искусствоведъёс ваньзэ зэмос художникъёсты синйылтыса уг быдто – пичи оглюкетэз гинэ шеде соослэн шуныт, югыт сиоссы улэ. Но син азязы огпол шедиськод ке, кыӵе капчи луэ улыны! Трос-трос аръёс ӵоже аслыд ачид сямен гинэ суредаськем бере солы ту-у-ж! шумпотоно. Искусствоез дунъясьёс асьсэос лыкто, быръё, нуо, вузало - коньдонзэ тыныд сёто. Суредаськы но суредаськы! Нокинлы пычкиськыса возьматоно ӧвӧл, тынад талантэд вань шуыса – кӧня егит аръёс сётэмын солы. Али мон сыӵе арбериосты суредасько, кудъёсыз сярысь аръёсын малпай гинэ. Ӧз тырмылы быгатонлыкелы оскон, укыр трос кужым кошкылӥз суредъёсты вӧлмытонлы, нянь шедьтон сярысь сюлмаськонлы. Табере со дэмӟонъёс тыбыр сьӧрын – мыным капчи, лякыт.

Аръёс но вакытъёс

- Кыӵе кылын вераськиськоды мумы-бубыеныды?

- Соос монэным удмурт сямен, мон соосын шенгыль-пенгыль удмурт сямен…

- Юаны малпасько вал мукетсэ: валаськоды-а ог-огдэс? Кызьы верады вал ай… Симулякръёс но трансгрессоръёс сярысь уд вераськиське, дыр, ук?

- Азьвыл мадиськыса пукылӥм философия, Инмар сярысь. Табере анае-атае пересьмизы. Сугон удалтӥз-а, картошка люкаськиз-а шуыса юалляськисько. Пичи дырме тодамы вайиськом.

Муми Ольга Григорьевна Воткинскысь огаз больницаын врач-педиатр луыса ужаз, алигес 80 арессэ пусйим. Буби Анатолий Иванович – инженер, маке кадь шудэ арганэн. Пичи дыръям туж ӧй яратылы бакча котырысь секыт ужез. Убо копакум, кунэрес мылкыдме шӧдыса, мама шуоз вал: мын ай книгадэ лыдӟы. Атайлы ке пыкылыны али но муг шеде: машинаен уг ворттылӥськы, мотоциклэз уг сэрттӥськы-бичаськы, электричествоез уг валаськы. Гайка бергатыны, кортӵог шуккыны быгатӥсько ик, но мылкыдтэк, кин ке со ужез мед быдэстысал, мон солы коньдон тырысал. Озьы ке но бубиным 2 корка пуктӥмы. Шаркан ёросысь Собино куштӥськем гуртын артысь участокъёс басьтӥм. Солэн коркаез толалтэ но улыны ярамон, мынамез мастерскойлы пӧрмытэмын. Бакчаям музъемез туж умой – гизьыё-гизьыё горд сюй, суредаськыны туж тупа. Тросэз суредъёсы соин лэсьтэмын.

- Кытын ӝужаз суредаськон мылкыдды?

- Быгатонлыкме усьтӥз, искусстволы яратон пыӵатӥз Воткинскысь пионеръёслэн юртысьтызы кружокен кивалтӥсь, тодмо художник Лев Костылев. Со ик визьмаз пырыны Свердловскысь художественной училищее. Отын дышетскыса, бертӥ дорам, огнам ӧй – Людмила кузпалэным, со но суредась. Куинь ар ужай Воткинскысь школаын. Куинь пол йыгаськи Москваысь В. Суриков нимо художественной институтэ. Кыкетӥзэ буш бертыкум но, ӧй малпалля, уг пыры шуыса – аслым осконэ юн вал. Пыри, Москваын 6 ар ӝог ортчиз.

- Кузпалды сомында арзэ огназ чидаз?

- Малы чидаз? Яратӥз. Кӧня ке ар талэсь азьло Францие ветлӥ – юромо Джоконда шоры учкыны. Отысь бертыса, кузпалме Джоконда выллем суредай этнофутуристической амалъя. Вот озьы мынам аслам Джокондае вань! Суред весяклы кылиз, кузпалэным ар талэсь азьло люкиським.

Нылмылы 33 арес, выре дизайнэн, инсталляциен. Вож Юлямес нырысьсэ адӟыса, песянае шуиз: куртчылыса чупасал. Верамзэ али гинэ валаны ӧдъяй. Жаль, вешаны нокинэ: нылылэн пиналыз ӧвӧл ай. Песянаелэн 6 нылпиез вал, вань улонзэ сётӥз соосты будэтонлы. Мон ке семьяямы – огнам пинал. Тодӥсько на, сузэр я вын курыса, дынгыр тэтчаса, бӧрдэмме. Кылзӥськись ӧйлась.

Нылпи ваёнлы укша суредэз вордон но: озьы ик курадӟон пыр потоно. Художник ассэ чакласа, кылзыса кадь лапак ветлэ. Пушказ учке сиськыкуз но, вераськыкуз но, вождэс эн вае, сьӧросын пукыкуз но. Собере шуак маке луэ, кыӵе ке куара чузъяське, троллейбус жиетэ – хоба! гадьын маке ӝабыръяськыны, гожмаськыны кутске. Йыре, ишанъёс сямен, кыӵе ке образъёс лыкто. Адӟемдэ суреданы выронъяд, сиён-юон, кӧлон сярысь вунэтӥськод, йыр сураське. Озьы транс выллем состояниын холстэз кисточкаен пырак пасялляме но вань.

Мыным капчи ужаны гужем Собиноысь мастерскоям. Городын сопала-тапала кыстаськонъя номыр карыса вуттоно ӧвӧл. Гуртын омыр сайкыт, шунды вазь ик сайкатэ. Отын дыр кузь…

Источник:

Орлов С. А. Гуртын дыр кузь… / С. А. Орлов ; записала О. Вахитова // Удмурт дунне. - 2012. - 19 окт. - С. 10, 15. - (Удмурт кизилиос).

За предоставление материала выражаем огромную благодарность редакции газеты "Удмурт дунне"