Никитина Галина Аркадьевна

Материал из Воршуда
Перейти к: навигация, поиск

Сюлэмъя быръем удыс тонэ уз аналты

Г. А. Никитина

Шуизы: гожтоно тодмо адями сярысь. Кема малпаськытэк, бырйи Галина Аркадьевна Никитинаез. Куке-соку ми соин дышетскимы Удмурт кун университетлэн историяя факультетаз, собере ӵош ужаны кылдӥз “Нылкышно кенешлэн” исполкомаз. Бӧрысь тодӥ на, кыкмы ик одӥг нуналэ, одӥг кизили улын вордскиськеммы шуыса.

Туннэ Галина Аркадьевна - история наукаосъя доктор. Ужа Россиысь Наукаосъя академилэн Урал люкетэзлэн Кылъя, литературая но историяя Удмурт институтаз. Мылысь-кыдысь кивалтэ удмурт нылкышноослэн огазеяськонэнызы.

Со сяна, со луэ на институтлэн директорезлэн наука ужъёсъя воштӥсез. Солы сётэмын Удмурт Республикаысь наука удысысь сӥё-дано ужась ним.

Солэсь улон сярысь мадемзэ кылзыса, таӵе малпанэ вуи: уг, уг быгаты адями, ас кужымезлы оскыса гинэ, кыӵе ке азинсконъёс басьтыны, вӧзаз улонэтӥ валтӥсь муртъёс ке уг сюро. Со ласянь Галина Аркадьевна - шудо адями.

- Семьяысен кутске адямилэн сюресэз. Кыӵе тодэ ваёнъёс со тӥлед кельтӥз?

- Вордӥськи Игра ёросысь Мазьги гуртын. Муми колхозын ужалляз, буби - школаын. Пинал дыръёсме туж шуныт мылкыдын гинэ тодам ваисько. Семья кусыпъёсмы туж умоесь вал.

Ми, куинь сузэръёс, мон шоретӥез, юн яратӥськом вал атаймес. Вань шумпотонъёсмес, пинал куректонъёсмес нырысь ик солы вераллямы. Сыӵе серемес дыръёс но вал. Шузи-мази вакытам, 5-тӥ—6-тӥ классын дышетскыкум, мукет гуртысь пиослэсь гожтэтъёс вуылыны кутскизы. Атае милесьтым вазьгес гуртэ бертылӥз ке, гожтэтэз, анай кие медаз сюры шуыса, ӝогак ачиз басьтылӥз. Сое куддыръя ӵош ик лыдӟылӥм но. Ваньмыз со умой ӧй вал, дыр, но, атаймес юн гажаса, солы вожмы ноку ӧз потылы. Атаймы ми понна пыраклы эш кылиз.

Пичи дырысен туж эшъяськи книгаосын. Мумы-бубыосы алылӥзы но. Туж кельшо вал выжыкылъёс. Атае шуиз, тырмоз ни, пе, выжыкылъёсты гинэ лыдӟыны, бадӟым книгаос борды басьтӥськы. Солэн дэмламезъя библиотекаысь Зоя Космодемьянская сярысь “Повесть о Зое и Шуре” книга басьтӥ. Озьы книгаос пыр кутскиз мӧйыослэн улоназы выжонэ.

Собере туж ӵем ветлыны кутски песятаймы доры. Со 25 ар пала “Рассвет” колхозэн кивалтӥз. Доразы туж трос книгаос вал. Соос гуртамы нырысьсэ телевизор басьтӥзы.

Быдэ вуымтэ дыръям нырысетӥ бадӟым кайгуэн но пумиськи: 8-тӥ классын, берпуметӥ экзамен сётон азьын, атаймы витьымтэ шорысь кулӥз. Сое яратон кужымме пумен быдэсак песятае борды выжтӥ. 8-тӥ классэз ушъян грамотаен йылпумъяй.

- Визьмо нылпиослы дышетӥсьёс дэмлалляло вал 10-тӥ классэз йылпумъяны, собере институтэ пырыны.

- Мынам озьы ӧз луы. Атаелэн агай-вынъёсыз (соос трос кузя) валэктӥзы: грамотаен, пе, экзаменъёстэк техникуме пырыны капчигес. Ойдо отчы дасяськы. Ӵектӥзы Сарапулысь радиотехникуме мыныны. Ялан врач луон сярысь малпаськисько ке но вал, мӧйыослы ӧй пумитъяськы.

Отметкаосме учкыса, техникумын шуизы: “Кутомы тонэ, но синъёсыд лябесьгес, очки басьтоно”. Городэз уг тодӥськы, кызьы, кытысь со очки шуонэз шедьтоно? Документъёсме берлань кутӥ но дорам бертӥ.

- Озьыен, очки улон сюрестэс воштӥз?

- Витьымтэ шорысь озьы луиз. Бертэме бере песятае шуиз: “Дасяськы, ӵуказе Можгае мыном”. Малы, кытчы мынӥськом - ӧй юа. Кепырай, вылды.

Можга педучилищее вуимы. Монэ кырӟаны косӥзы, кылзӥзы но шуизы, тон, пе, училищее кутэмын. Озьы мон отын дышетскыны кутски. Со педучилище мыным сомында сётӥз! Вань дышетӥсьёс анай-атай интыын вал. Татын визьмаськи. Азьланяз филолог но, историк но кариськеме потӥз. Со гинэ ма! Юрист но луысал! Ньылетӥ курсысен дышетӥсьёс учительское ӧтизы. Галя, тӥляд, пе, луонлыкты вань горд диплом басьтыны. Но со понна чистописаниен но лыдӟонэн выльысь экзаменъёс сётоно.

Мон соку ӧй малпаськылы, мар со сыӵе горд диплом. Но дышетӥсьёс монэ ялан синйылтыса возиллям, лэся. Вань улытозям соослы тау карисько. Кӧня визь-кенеш соос улонэз валасьтэм муртъёслы сётылӥзы. Училищеысь дышетӥсьёс дэмламъя ик университетэ сюрес усьтӥськиз.

Но кыӵе факультетэз быръёно? Туж матысь адямие, песятае, 2-тӥ курсын дышетскыкум, улонысь кошкиз. Кинлэсь визь-кенеш куроно? Апае бызьыса Латвиын улэ ни вал. Ӵыжы-выжыосы дэмлазы историяя факультетэз.

Тӥни озьы одӥг экзаменме гинэ “витьлы” сётыса, Удмурт кун университетын студент луи.

- Татысен наукае вольыт сюрес усьтӥськиз-а?

- Огласянь со озьы, вылды. Туж бордаз кыскиз этнография. Нырысетӥ курсысен ик кельшизы Владимир Емельянович Владыкинлэн лекциосыз. Бӧрысь со ик луиз научной ужъёсъя кивалтӥсе. Удмуртъёслэсь сямъёссэс-йылолъёссэс тодон вылысь гуртъёсы потамы. Диплом уже но этнографиен герӟаськемын. Университетэз озьы ик горд дипломен быдэстӥ.

Но наукае вуон сюресме меӵак вольыт уд шуы. Одӥг ар ужано луи Чутыр школаын, ньыль ар - шаерысьтымы музейын. Нош соос вискын вал на бызён, нылпи ваён. Музейын ужакум ини витьымтэ шорысь пумиськи Владимир Емельяновичен, “Галя, одно ик дышетсконо”, - шуиз со.

Картэным кенешыса, аспирантурае мыноно кариськи таки. Капчиен ӧй пыры.

Аръёс но ортчемын вал ини. Англи кыл но вунэмын. Документъёсы но дырыз дыръя аспирантурае вуиллямтэ. Та шуг-секытъёсты вормыны нош ик ӟеч адямиос юрттӥзы, соос пӧлын одӥгез вал Н. П. Павлов.

- Нош пичи нылдэс кытчы кариды?

- Куинь ар аспирантураын дышетскытозям, нылы сьӧрам вал. Ачим дышетскисько Москваысь университетын, картэ Казахстанысь Байконур космодроме ӵем вуылӥз, отын ракетаослы лобӟон интыос лэсьтылӥз, нылы нылпи садэ ветлӥз. Апае но, анае но нылме доразы возьыны пумит ӧй вал. Но мон шуи: “Мынам нылы, мынам ик сюлмаськонэ”. Наука ужен кивалтӥсе Клавдия Ивановна Козлова юн сюлмаськиз нылме Москваысь огаз садике интыяны.

Меӵак верано ке, улонам котьку но ӟеч адямиос сюрылӥзы. Кин мон луысал соостэк! Аспирантураын дышетскыкум, ялан шӧдыса кадь улӥ: мыным та сюресэз ӟеч адямиос сӥзизы, соос азьын возьытэ ӧвӧл усёно, соослэсь осконзэс быдэстоно.

- Наукае сюрес лёгемын. Уноез малпанъёсты быдэсмизы, шуыны луоз ни. Озьыен, та ласянь удалтӥз?

- Та институтын 16-тӥ арзэ тыршисько ни. 1999-тӥ арын доктор ужме быдэстӥ-ути. Со герӟаськемын удмуртъёслэн гурт общинаын улэменызы. Наукаен вырон понна институтын туж умоесь луонлыкъёс кылдытэмын. Собере директормы Кузьма Иванович Куликов но пыкмыса пукыны маза уг сёты. Татын куинь книгаосы потӥзы ни.

- Галина Аркадьевна, асьме улонын нылкышнолы кыӵе ке сюбеггес инты висъяло кадь. Кивалтонысь но политикаысь донгыны туртто. Оло, зэмзэ ик, нокытчы ӧвӧл месӥськоно? Быдэсъя ас уждэ гинэ но тӥни.

- Куддыръя “Нылкышно кенешез” но политика ужъёсын выремез понна пыкыло. Но туала вакытэ кызьы меда политикае пыриськытэк улоно? Ул вал, но уг луы. Ачид ке политикае уд пыриськиськы, политика тонэныд кивалтыны кутске. Собере кин ке ик калыклы улонлэсь ӧрзэ валэктыны кулэ ук. Тӧллэсь кудпалась пельтэмзэ валамтэенымы но, дыр, ӵемысь янгышъёс лэсьтӥськомы.

Тани берло аръёсы гинэ куинь быръён ортчиз - Кун Кенеше, Кун Думае но Удмуртилы президентэ. Калык пӧлын валэктон уж нуыса, данак гуртъёстӥ ортчоно луи. Соку мон эшшо но мур валай, макем секытэ шедемын отын улӥсьёс. Асьсэлы но осконзы быремын ни. Мар веранэз на мурт адямиослы, кандидатъёслы, депутатъёслы оскон сярысь. Соин ик юн сюлмаськоно калыклэсь асваланзэ ӝутон сярысь. Удмурт нылкышноослэн огазеяськонзы та ласянь номыр уг кары шуыса, мон ӧй верасал.

Калыкен ужанлы трос дыр быре. Но солэсь кулэзэ валаса бергам потэ. Ярам, институтын со понна уг пыкыло. Мынам малпамея, институтмы удмурт движенилэн идеологияя центрезлы пӧрмиз ни кадь. Со шӧдӥськиз удмуртъёслэн берло съездзылы дасяськон дыръя но. Озьы ик со луыны кулэ, дыр. Институтын 24 адями ужа, 9-эз наукая докторъёс. Ми ваньмы калыклэн коньдонэныз дышетскемын. Табере калыкмылы кыӵе ке пайда вайыны быгатоно.

- Удмуртилы президент быръемын. “Удмурт кенеш” мукет кандидат понна ужаз вал. Мар кароно табере удмурт огазеяськонлы Президентэн ваче ужан кусыпъёс тупатон понна.

- Котькуд кунын властьлы дурбасьтӥсь партилы пумит оппозиция сылэ. Макем визьмо кивалтӥсь, сокем быгатыса со радъя оппозициен кусыпъёсты. Отысь со ӟечсэ уг, тушмонъёсты гинэ адӟе ке, номыр умоез уз пӧрмы. Мон соглаш: табере вань Президент, со шоры калыкен быръем адями шуыса учконо. Со калык понна ик ужаны кулэ.

Но критика шуонлэсь нокытчы уд кариськы. Возиськыны быгатоно вылэм адямиез ултӥясь критикалэсь.

- Мукет сямен вераса, ваче кыл (компромисс) шедьтоно?

- Озьы. Но компромисс шуон но кык пумо луэ. Ялан мыкырскыса, кылзӥськыса, кивалтӥсьёслэн ымазы учкыса улыны уг яра, дыр. Сыӵе компромисс чебер ӧвӧл. Луоз озьы мыкырскыны - мугордэ но ӝутыны уд ни быгаты, кужымед уз тырмы. Ачид но уд шӧды пыдес вылад вуэмдэ.

Мынам малпамея, адямилэн вань ке осконэз (убеждениез), сое котькуд ласянь гажалозы. Зэм, куд-ог дыръя зол мылкыдо адямиез, оло, сокем уг но ярато калыкын - котьку гажало. Берло быръёнъёс туж умой возьматӥзы кытчы вуттэ куд-огзэ мыкырскон сям.

- Университетын дышетскыкуды, тӥ пӧртэм ужъёсы пыриськылӥды. Нош пинал дыръяды сыӵе ик-а чырткем вал?

- Школаын бырйизы пионеръёслэн дружинаенызы кивалтӥсе, та ужлэсь ӧз мозмытэ комсомолэ пыреме бере но. Педучилищеын политклуб нуи, огдыре ик студентъёслэн профкоменызы кивалтыны оскизы.

Та ужен собере университетын но выри. Со сяна, “Историк” бордгазетлэн редакторез вал. Ялан пыриськылӥ куасэн ӵошатсконъёсы. Общественной ужъёс ялан сьӧрам ветлӥзы кадь. Институтэ ужаны лыктэме бере но татысь профкомлэсь ужзэ оскизы. Собере Ижысь горсоветлэн депутатэз вал. Табере тани ачим но ӧй шӧды, кызьы удмуртъёслэн “Нылкышно кенешенызы” кивалтыны бырйизы. Ӧй верасал, та уже туж мылкыд карыса пыри шуыса. Но, кӧня ке дыр ортчыса, со ужен “висьыны” кутски.

- Семья кусыпъёстылы со уг люкеты-а? Командировкаос, семинаръёс, конгрессъёс. Тӥледыз дорысьтыды ик шуг шедьтыны ке?

- Нош дорын гинэ ялан пукысал, оло картэлы ӝоггес синазькыль луысал? Кузпалы Игра ёросысь ик. Ог-огмес умой валаськомы кадь.

- Тӥ но, Евгений картты но - удмуртъёс. Нош нылпиосты удмурт сямен валало-а?

- Бадӟымез, Светлана, вала, вераськыны но йӧндыре. Со туэ университетэз йылпумъялоз ни, дизайнере дышетскиз. Милемыз куд-ог дыръя пыкылэ, куспамы удмурт кылын ум вераськиське шуыса. Пичиез, Настямы, 8-тӥ классын. Англи кылын золгес тунсыкъяське. Но кыксы ик нылмы сямъёссыя быдэсак удмуртъёс.

- Ваньмон дыръяды маин выриськоды?

- Киужъёсты яратӥсько. Училищеын вожъяськыса учкылӥ лымшор палась нылъёслэн пужыятыса керттэм дӥсьёссы шоры. Но ачим та уж борды басьтӥськи аспирантураез йылпумъяме бере гинэ. Вуриськисько. Туж яратӥсько квартира пушме чеберманы. Но пӧраськон - со мынам уже ӧвӧл, лэся.

- Яратоно удмурт сиёнды вань, вылды?

- Яратоно сиёнэ - табань. Москваын дышетскыкум, эшъёсы куро вал: пӧра ас калыкедлэсь сиёнъёссэ, кырӟа удмурт кырӟанъёсты. Сотэк ми кызьы валаломы, тон удмурт шуыса. Зэм, кырӟаны яратӥсько, нош пӧраны, тужгес но пыжиськыны, уггес пӧрмытӥськы.

- Кызьы буйгатӥськоды урод мылкыддэс? Тросэз нылкышноос, кылсярысь, мисьтаськон борды кутско.

- Мыным но со юрттэ. Асме книгаен буйгатӥсько на. Мылкыды туж урод дыръя пушкам ватскисько, асме сиыны кутскисько, ма, мон Скорпион ук.

- Котькуд адями ассэ мар ке понна ик дунъяны кулэ. Сотэк гажалод шат мукетъёссэ? Мар понна тӥ яратскоды асьтэдыз?

- Мон туж кема но трос дышетски ас ужелы, азинсконъёсы вань - со понна но мон асме но ужме гажаны кулэ. Сюлэмъя быръем удыс ноку тонэ уз вуза, уз аналты.

- Матэктэ 8-тӥ Март. Ма тӥ сӥзьысалды удмурт нылкышноослы?

- Тазалык, шуныт кусыпъёс. Умоезлы осконзы медаз быры.

Источник:

Никитина Г. А. Сюлэмъя быръем удыс тонэ уз аналты / Г. А. Никитина ; записала Татьяна Банникова // Удмурт дунне. - 2001. - 2 марта. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"