Мустаева Людмила Геннадьевна

Материал из Воршуда
Перейти к: навигация, поиск

Паймымонэз – огшоры…

Л.Г. Мустаева

Нырысетӥ курсын дышетскыкумы, нылъёс-пиос мӧзмемысьтызы туж трос мадиськизы гуртысь эшъёссы сярысь. Дэри ёросысь Якшур гуртысь нылашмы туж данъяськыса вералляз школаысьтызы Людмила Мустаева сярысь: Люда сое но вала, тазэ но быгатэ, дышетӥсьёслэсь трос лыдӟиське, кандидатъёсын но споръяське… Милям туж потылӥз соин тодматскеммы. Но Людмила дышетскиз Свердловскысь педагогикая институтын.

Табере мынам гинэ ӧвӧл, тӥляд но вань луонлыкты та визьмо но синмаськымон нылкышноен матысьгес тодматскыны. Туннэ Людмила Геннадьевна МУСТАЕВА тырше Удмурт Элькунысь Дышетӥсьёслэсь тодон-валанзэс будэтонъя институтын, ректорлэсь ужзэ быдэсъя.

- Людмила Геннадьевна, озьыен, Тӥ пинал дырысен витьчи?

- Ой, тау эшелы ӟеч кылъёсыз понна, но мон школаын ноку отличница ӧй вал. Сыӵе луон понна пуксет кулэ ук, мон ӧжытак чидасьтэмгес, дыр. Маке тунсыко ке, бен, пилисько, но валаны тыршо, ӧвӧл ке – киултӥм лэзё. Вот лыдӟиськылӥ зэмзэ но дугдылытэк, книга мыным омыр кадь потылӥз. Со сямы али но кылемын. Яратӥсько детективъёсты, фантастикаез, фэнтезиез. Куд ке дыръя выйисько психологие.

- Тӥ школаез йылпумъяку, агайды Василий Мустаев тодмо суредась вал ни. Солэсь адӟем ӧд карылэ-а?

- Мон туж гажалляй агайме, суредаськем сяна, со кырӟаз, крезьгуро инструментъёсын шудӥз, спортэн выриз. Мыным Инкуазь зорымтэ… Одӥг пол ас поннам малпай художник-мультипликатор луыны. Собере потӥз художник-сказочник луэме (ачим сыӵе профессия малпай), но ӝоген валай, суредаськеме воксё но уг луы шуыса. Собере малпай: луо писатель!

Бадӟым классъёсын дышетскыкум, ас поннам рос-прос быръён лэсьтӥ кадь: яке журналист, яке филолог. Туж мыло-кыдо гожъяськи ёрос газетэ. Но пумен гожъяськон мылкыды лапкомиз. Дышетӥсе, шонаськемме валаса, ӵектӥз Свердловске дефектологе мыныны – республикаысь, пе, кык муртэ гинэ ысто. Озьы, кин со дефектолог валатэк но, вуи Свердловске.


- Зэмзэ но паймымон быръён. Туала вакытэ визь люкъёсын но ужаны секыт, нош тӥ шекъёсын пиналъёсты бырйиллям…

- Милям факультетмы туж дано лыдъяськиз, нимысьтыз таӵе специалистъёсты туж ӧжыт дасяло. Собере, пиналъёс сыӵе вордӥськемзы понна янгыш ӧвӧл ук. Урод шат изъянэз тупатыны, пиналлы, анай-атайлы выль оскон пыӵатыны. Мон уг жаляськы, сыӵе профессия быръемысьтым. Тодам лыктэ Брянскысь институтлэн ректорезлэн верамез: ми азинскиськом туж каллен но кытчы кулэ ӧвӧл, но азинскиськом ук… Зэм, тросэз монэ малпало психолог. Тупатӥсько: ӧвӧл, мон – дефектолог. Ну соку уката усто, пе.

- Уждыя Тӥ туж шаплы будӥллямды. Мар Тӥ понна карьера?

- Ӧйтӧд, мон нимысьтыз карьера лэсьтон сярысь ӧй малпаськылы, кызьы ке ваньмыз ас кожаз пӧрмиз, улон озьы берытскиз. Кутски дышетӥсьлэн должностьысеныз, коррекционной педагогикая но специальной психологияя кафедраен кивалтӥ, 2006-тӥ арысен – учебно-методической ужъя проректор. Та дыре быдэсъясько на ректорлэсь ужзэ.

Вань, дыр, солы валэктон но: кивалтӥсьёс синйылтӥзы, луоз, уже понна висемме. Оскылӥзы. Угось котькуд тубатлы быдэ йылэ кыл кутон (кызьы ке кивалтӥсьёс азьын, озьы ик ӵош ужась эшъёсыд но ачид понна). Быгатоно решениос кутыны, котьмалы дась луыны. Зэмзэ вераса, кутскыкум мон рос-прос ӧй валалля кытчы сюремме.

Мукетъёслэсь но ужъя будэмзэс гажасько – данакез, котьма шуэ, кивалтонэ токма шорысь уг сюро, иське, соослэн вань быгатонлыксы. Ӧвӧл ке, туж ӝог адӟиськоз. Адями тыршыны кулэ ассэ ужаз шедьтыны, азинскыны. Озьы со визьмогес, тунсыкогес луэ.


- Дышетӥсьёсты дышетыны капчи ӧвӧл, дыр. Соос ваньзы асьсэды сотэк но визьмо кожало, дыр, тросэз арлыдоесь, асьсэлы оскисесь… Нош тӥ, пинал маке, соосты индылон борды басьтӥськиды, кышкыт ӧй вал-а?

- Усто юан, пырак монъя. Али институт бере ик номырись но та уж борды ӧй басьтӥськысал, нош соку пинал вал, дӥсьтӥсьгес… Ӵектӥзы но, мыноно кариськи. Горд дипломен бере, асме визьмо кожай, вылды. Но котькыӵе ӟеч тод теориез, практикатэк тон мукетъёслэсь тодон-валанзэс нокызьы но уд будэты. Соин мон дас ар ӵоже огдыре ялан ужай нылпи садын, школаын, реабилитацияя центрын, выри нимаз практикаен. Огкылын вераса, опыт люкай, со мыным верантэм зол юрттӥз.

Педагогъёсын ужан – туж тунсыко, сое одӥг кылын гинэ уд вера. Ялан утчаськоно, азьлань мыноно. Бен, соос огшоры калык ӧвӧл: быгато чурыт куронъёс пуктыны, кылэз юаны. Но мон соосты пумтэм гажасько, малы ке шуоно туала вакытэ та уж туж секыт, нош дунъясез ичи. Дышетӥсь ужа уй но нунал, ас ужезъя сяна, со кыл кутэ нылпиослэн тазалыксы, улонзы понна.

- Тунсыко, кызьы дышетско дышетӥсьёс: луо-а соос пӧлын зачёт сётыны шугъяськисьёс, асьсэды нылпиос кадь возисьёс?

- Ма, соос но сыӵе ик адямиос ук. Конечно, куддыр воксё пиналъёс кадь луо. Арнялы быдэ дорамы курсъёсы вуо ёросъёсысь дышетӥсьёс. Куд-огез лыктэ но паймыса сылэ, кытчы мыныны уг вала. Кыӵе курсъёс кулэ тӥледлы? – юаськом. Ум, пе, тодӥське, завуч ыстӥз но лыктӥм…

Нош кӧня ӝӧк дышетскытозязы сыскиськонэн няняське, уг вера ни.

- Мар тунсыкогес: дышетыны-а, кивалтыны-а?

- Тунсыкогес дышетскыны – дышетыны но кивалтыны. Туж кельше выль информационной технологиосын вырыны, выль литератураен тодматскыны, сое уж вылын эскерыны. Алигес вуи семинарысь. 25 улосысь специалистъёс ужазы школа директоръёслы методической юрттэт дасян бордын. Вот та уж туж тунсыко, угось со мыным гинэ ӧвӧл, быдэс удыслы кулэ.


- Тӥляд туж бадӟым институтты, солэн ужез дышетӥсьёслэсь тодон-валанзэс будэтон гинэ ӧвӧл…

- Шонер. Со сяна но институт туж трос уж лэсьтэ. Со выре эскерон ужъёсын, федерал проектъёсты улонэ пыӵатыны юрттэ (кылсярысь, «Дышетон» нацпроект), ортчытъя усто дышетӥсьёсты шараянъя ӵошатсконъёс («Арлэн дышетӥсез», «Сюлэмме сётӥсько нылпиослы», «Тазалыкъя дышетӥсь»), эскериськом «Милям выль школамы» проектэз, федерал стандартъёсты, поттӥськом «Педагогический родник» но «Профессиональное образование в Удмуртской Республике» журналъёс…

Удысъёсмы лачак. Ужасьёсмы туж тыршисесь, туала улонлэн куронъёсызъя ужало, выль малпанъёсын паймытъяло, сотэк номыр ӧй пӧрмысал. Нялтас вераса, милесьтым преподавательёсмес дышетыны ӧтчало Татарстанэ, Башкортостанэ, Перме, Кирове. Тросэз шуо, Москваысь специалистъёс но таӵе тодон-валан уг сёто.

- Берло дыре ваньмызлэсь йырзэс сурало выль стандартъёсын. Кыӵе соос пото Тӥледлы, витёно-а ӟечсэ?

- Милям институтамы, кык сюрсэтӥ аръёс кутскыку ай, ортчытъяны кутскемын выль дышетон амалъёсъя курсъёс. Данакез соос али тупало кутоно стандартъёслэн куронъёссылы. Отын номыр кышкытэз ӧвӧл. Малпаськыса лыдӟоно ке, воштӥське визьнодан амал гинэ: али пиналлы иворез йыраз дасяк «донго»: нырысь мадё, собере наизусть выллем юало. Нош выль куронъёсъя пинал дышетскыны кулэ ачиз сое утчаны-шедьтыны, ужаз кутыны. Кӧсын гинэ ӧвӧл, творчество пыр. Туала стандартъёс инмысь ӧз усе, соосты трос аръёс ӵоже ни эскеризы тросаз улосъёсын, эскеронъёс ӟеч дунъет басьтӥзы.

- Мынам малпамея, воштӥськонъёслэсь пиналъёслэсь зол кышкало… дышетӥсьёс.

- Жаляса верано, озьыгес луэ… Кӧня дасяськом ини дышетӥсьёсты, воштӥськемзы уг поты. Кызьы ужазы вашкала амалъёсын, озьы ик выро. Уката секыт арлыдоосызлы. Огласянь, мон валасько мугзэ: котькыӵе перестройка – со шуккет, кризис. Пушкысьтыд мазэ ке но воштоно, вылезлы инты бушатоно, трос лыдӟиськоно, дыр но кужым быдтоно. Уг ваты созэ но: курсъёсы данакез лыкто… удостоверение басьтон понна гинэ. Нош мон лыдъясько, адямилэн аслаз тунсыкез ӧз ке луы, номыр уз пӧрмы, коть тон дас курсэз ортчы. Асьмеос киборгъёс ӧвӧл ук: йыре кыӵе ке дась программа донгыны но сое быдэсъяны. Нош куке специалист зэмзэ но тырше тодон-валанэз шедьтыны, сое валаса, уж вылын кутыны – соку тӥни воректо асьсэос но, пиналъёссы но.

Но соин валче вань пӧлазы Инкуазен сётэм дышетӥсьёс! Соос, номыр шоры учкытэк, вань луонозэ но луонтэмзэ лэсьто нылпиослэсь улонзэс, дышетскон аръёссэс тунсыко карон понна. Тросэз соос луо «Выль тодон-валан» огазеяськонлэн ёзчиосыз, сое кылдытӥз милям институтысьтымы педагогической инновациосъя кафедраысь доцент Елена Рудольфовна Блинова.

- Кивалтӥсьёс но творческой адямиос ужвисёнэн (трудоголизмен) курадӟо, шуо: соос уг быгато шутэтскыны, котькуд ӝыт сьӧразы доре уж нуо… Тӥляд кыӵе югдурды? Ужлы сяна, малы ке мукетызлы дыр шедьтӥськоды на-а?

- Зэмен но, монэ тросэз «висисен» лыдъяло. Ваньзэ усто радъяны уг быгатӥськы, дыр. Соин ик уг тырмы дыры, весь маке бергаськод кадь, нош уж нокызьы но уг быры, озьы нош ик сьӧре нуоно луэ. Но аслым но матысь адямиосылы дыр мон котьку шедьтӥсько.

Лыдӟиськон сяна, бордаз туж кыске фотография. Ар талэсь азьло фотоен герӟаськем социальной сервисэ пыри, отысь данак эшъёс шедьтӥ ни.

Аслэсьтым улонме уг адӟиськы дуннеез котыръянтэк! Гужем кытчы ке огпол ветлон понна мон дась толбыт изьытэк ужаны! Малы ке азьвыл мон туж ӧй дунъялля сьӧрло потанэз, та ласянь эркиямын вал, дыр: школаын дышетскыку, вуылӥм Москвае, Ульяновске, Казане, Горькие, Кирове, Бакуэ. Студент аръёсы ортчизы Екатеринбургын. Ужея командировкае потай Новосибирске, Тюмене но трос мукет городъёсы. Ялан сюрес, поездын курадӟон… Соин отпускъёсме но гань-гань анай-атае дорын гуртын ортчытъяй. Но кӧня ке ар талэсь азьло дунне котыръян шоры мон мукет синмын учкыны кутски. Нырысь ветлӥм Санкт-Петербурге, собере вамыштӥм Европае. Вуылӥм Чехие, Венгрие, Польшае, Австрие. Туж синмаським та кунъёслы, кык пол но котырским ни. Туж ӧжыт адӟим ай Германиез но Словакиез. Эшшо вуылӥ на Израиле но Мальтае. Котькытын тросгес экскурсиосы потаны тыршисько, пляжын пыжон мӧзмыт потэ.

- Тӥ егит адями ай, нош азьпалан – быдэс улон. Кыӵеен асьтэды адӟиськоды азьланяз?

- Ой, мон сыӵе яратӥсько ас ужме, Инмар мед сётоз соин ик вырыны. Зэм, куд-ог дыръя лыктыло пӧртэм малпанъёс: а мар мон татын карисько? Но та ужелы луыса мон сомында тодӥ-валай ни, соин ик уг быгатӥськы сое дунъятэк улыны. Но улон сыӵе вошъяськись. Воштӥськозы кивалтӥсьёс, соин валче – куронъёс. Соин мон кыдёке азьпала ноку уг учкиськы, улӥсько «туннэ но татын». Нялтас вераса, мон туж паймисько, куке адямиос дась, ортчемзэ тодазы вайыса, часъёсын пукыны – нокыӵе уг поты, пичи дырылэсь гинэ но уг мӧзмиськы.

- Нош кин юрттӥз Тӥледлы «таӵе улонозь вуыны»?

- Кинэ ке меӵак вераме уг луы, китӥм кутыса, нокин ӧз валты. Но туж трос сётӥзы анай-атае. Соос милемыз нимысьтыз ӧз но дышетэ-маралэ кадь, огшоры… яратӥзы. Пиналлы мар кулэ на? Мамае куддыр шуэ: ми ведь тӥледыз йӧназ ӧм визьнодалэ. А ку соос милемын вырыны кулэ вал – гуртын ӵукнаысен бер ӝытозь ужез бергато. Озьы ке но со амал шедьтылӥз мыным саклык висъяны.

Улонам бадӟым инты басьтӥсь адямиос пӧлысь пусйысал на кивалтӥсьёсме (нош ик уж!) Рудольф Фёдорович Березинэз, Зоя Витальевна Сувороваез (ӵапак со доры мон, еж мурт, вуи), Надежда Анатольевна Шкляеваез, Тамара Ивановна Рябоваез, Нина Юрьевна Ерофееваез, Алексей Геннадьевич Красильниковез. Нокызьы но пусйытэк кельтэме уг луы кык синмаськымон психологъёсты: Александр Кальманович Байметовез но Елена Викторовна Осминаез. Ӟеч адямиосын мыным удалтэ. Огласянь, со ачид бордысь но потэ, дыр: визьнодась адӟе ке егит муртлэсь азинскыны мылкыдзэ, ноку сое уг палэнты.


- Котькуд адями улоназ одӥг ке но визькыл (афоризм) яке анекдот вордэ. Вералэ асьтэлэсьсэ.

- Ой, адямиос сомында визькылъёс малпазы ни, кышкасько, мае ке аслам кожаса верало но, лушкам, шуозы. Но кельше таӵе веран: «Вань гениальноез огшоры, но огшоры маке ваньмыз гениальной ӧвӧл».

Источник:

Мустаева Л. Г. Паймымонэз – огшоры… / Л. Г. Мустаева ; записала Зинаида Рябинина // Удмурт дунне. - 2011. - 9 дек. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"