Мусалимов Николай Николаевич

Материал из Воршуда
Перейти к навигацииПерейти к поиску

Ышыгысь яркыт тусбуй[править]

Мусалимов Н. Н.

Мусалимов Николай Николаевич, Удмурт Республикалэн Президентэзлэн секретариатэныз кивалтӥсь. Вордӥськемын 1953-тӥ арын 20-тӥ июле Сьӧлта районысь Каменный Ключ гуртын.

Зӥбыт, лачмыт, керетонъёслэсь палэнскыны выре. Пичи дырысеныз спортэн эшъяське. Студент вакытаз ик республикаысьтымы Министръёслэн Кенешазы ужаны кутске. Ассэ шудо адямиен лыдъя. Кышнояськемын. Нылыз Удмурт университетысь историяя факультетын дышетске, пиез – школаын ай.

- Николай Николаевич, тӥ огшоры гуртын, огшоры семьяын будэмын. Мар понна тӥледыз улон эркия, студент дыръя ик министръёсын артэ ужаны али но укыр бадӟым дан, дыр?

- Ужлэсь кышкамтэе понна, дыр. Мон, оло, тусыя востэм адскисько, но кужыме но быгатонлыке вань кадь – мон ёзъёс комсомолэн зол кыдатэмын уга. Ми ӧм валаллялэ, мар со ужлэсь, дышетсконлэсь, армилэсь пеган. Армиын подводник вал. Тросэз солэсь куалекто, нош монэ зэмос пиосмурт карыны ӵапак армия юрттӥз. Отын дыши шуг-секытъёсты вормыны, чиданы, ас азям пуктэм ужпумъёсты быдэсъяны.

Университетэ мон армия бере пыри ни. Дышетски историяя факультетын. Малы ке соку ик старостае бырйизы. Ӧжыт улыса – комсомоллэн комитетэзлэн кивалтӥсезлы воштӥсе.

Со вакыт туж паськыт вӧлмемын вал стройотрядъёслэн движенизы. Тӥни кытын мон нырысь ик асме шедьтӥ! Гуртысь потэм пияшлы гужемъёсы лэсьтӥськонын ужан лычсузьымон потылӥз. Ньыль гужем «Молодость» отрядэн Алнаш районын ужам – Варзи-Ятчие парсь гид но Кузёбае КЗС пуктӥм. Кибервылмы али но вань ай. Ужам зэмос стахановецъёс сямен. Нырысь арзэ отрядэн кивалтыны секытгес вал: косъяськем ӧз потылы, соин аслам уженым возьматыны вырылӥ. Валазы – отӥяз «Молодость» отрядмы шаерамы азьветлӥсь луиз. Монэ «За трудовое отличие» медален пусйизы. Нош витетӥ курсын дыръям Министръёслэн Кенешазы инструкторе ужаны ӧтизы. Дипломе ньылетӥ курсын ик дась вал, арлыды пичи ӧй вал ни – мон чик кӧбератэк мынӥ. Вылаз ик, улон инты сӥзизы на.

- Ӧз эрекчалэ?

- Ӧз. Мон со вакытлы ӝегатскытэк кышнояськи. Кышкай, Геляез (со филологияя факультетэз йылпумъя вал) гуртэ келялозы шуыса. Озьы кык толэзь гинэ общежитиын улыса, квартира сётӥзы. Юанды пумысен али малпасько ке, мыным зэм но зол удалтылэм – арысь аре монэ вылэгес ӝутъязы. Но Министръёслэн кенешазы нокыӵе «киросдядяе» (кызьы али шуо «протеже») ӧй вал – ваньмыз нюлам ву пыр потэмын. Мон укыр кылзӥськись вылӥськем-а, мар-а. Уж сёто ке, быдэстоно кожасько. Куд-огез туннэ ке уг вутто, киынызы шонто но ӵуказелы кельто, мон озьы уг быгатӥськы – кулэ бере, уйзэ но пуко.

- Но вылэгес ӝутскон, огинтыын пуконлэсь секытгес, дыр, ук. Сыӵе вамыш лэсьтыкуды, зол-а сюлмаськылӥды?

- Ӧй. Малы ке шуоно верай ини, мон ачим нокытчы но ӧй чуртнаськылы, монэ ӵектыса нокин ӧз ветлы. Озьыен, кивалтӥсьёс ужамме дунъяллязы, быгатэмелы оскылӥзы.

- 1999-тӥ арын тӥледыз, Кун Кенешлэн тӧроезлэсь юрттӥсьсэ, нациосын ужан политикая министре пукто. Соку но тӥ ӧд куалектэ. Мар верасалды али министрын ужам вакытты сярысь? Малы уждэс ӝыны кельтӥды?

- Со дырозь Нациосын ужан политикая кун комитет вал. Но улонлэн куронъёсызъя кулэ луиз министерство. Азьвыл кивалтӥсь Светлана Смирнова отысь будӥз. Валамон ини, кулэ луиз министр. Александр Александрович Волков та ужез мыным ӵектӥз. Куалекъяны мугез ӧй вал кадь – мон республикаысь югдурез ӟеч тодылӥ, удмурт кылме ӧй вунэты (удмурт шаерын та удысэз валтӥсь удмурт кылэз одно тодыны кулэ, малпасько).

Но ужаны потӥ но – алегми. Мар бордысен кутсконо – номырзэ уг валаськы. Азьвыл ужам мон вуын чорыг кадь уялляй, нош татын… Ярам, коллективмы умой вал – огезлы вазиськисько, мукетызлэсь юасько – валэкто. Озьы пумен дыши. Бӧрысь ог-огмылэсь визь-кенеш юан, валче ужан сяме пыӵаз. Со коллективме туж дунъясько, али ке но туж мӧзмисько. Отын ӧй вал вылтӥяськись, ог-огзэс пышкылӥсь адямиос. Оло, кинлэн ке кӧтыз ӝож кылиз, но мон турттӥ лачмыт, косъяськытэк ужаны – секретаре шоры, мылкыды туж урод дыръя но асме лек вазьыны ӧй лэзьылы – одно ик быдэсак нимтулызъя вазиськылӥ. Янгышан учыръёсы адямиосын нимаз кенешылӥ, ваньмыз азьын тышкаськонлэсь возиськылӥ. Министрын, зэм, кык ар сяна ужаса ӧй вутты. Республика Президент быръем бере, Александр Александрович монэ бордаз берытскыны куриз – дышем муртэн ужаны капчигес уго. Озьы 2001-тӥ арын 5-тӥ февральысен мон Президентлэн секретариатэзлэн кивалтӥсез луи.

- Со дырен ӵошатыса, алиез должностьты ышыгын кадь уг поты-а? Кыӵе инты басьтӥськоды политикаын?

- Уг, ышыгын кадь уг потӥськы – мон котькуд нунал Президент вӧзын, соин вань югдурез мукетъёслэсь ӟеч тодӥсько. Нуналлы быдэ солэн нимыныз ужасько, солэсь куронъёссэ быдэсъясько – озьыен, со политика ни.

Зэмзэ вераса, мынэсьтым тросэз та пумысен юалясько. Мылы потысал ке, конечно, капчиен пырысал политикае, но мон калык азьын шудыны уг яратӥськы, сямыя ас поннамгес улӥсь адями, шуод-а, мар-а. Вань сямзыя кичӧлтӥсьёс, вань – быдэсъясьёс. Мон кыкетӥосыз пӧлы пырисько. Нырысетӥослэн радазы астэ пурысен шӧдытозь, эсьма, рос-прос быдэсъялод ачидъя тупась ужез.

- Секыт-а вылӥ кивалтӥсьлэн оскымон адямиез луыны?

- Ӧйтӧд, ӧвӧл кадь – мон пазяськись мурт ӧвӧл ук. Оске бере, озьыен, оскымон. Но зол ужась мурт вӧзын ужаны котьку секыт. Доре кӧлыны сяна уг вуылӥськы.

- Должностьтэс верам ке но, лыдӟисьёсмы мар ужамдэс узгес валалэ, дыр. Кызьы радъяське ужан нуналды?

- Туж тросэзлэн сямен ик – уже сизьым час бере ик вуисько. Кофе юытозь, бумагаосты радъятозь, тямыс луэ. Со дыре Президент ас дораз юрттӥсьёссэ люка. Эскериськом нуналлы планэз. Туж трос совещаниос, пумиськонъёс луо – ваньмаз вуттӥськоно. Мон Президентлы материал дасясько, кулэ луись адямиосын вераськисько, гожтэтъёсын ужасько. Ӵем потано луэ ёросъёсы. Куддыр интыосын адямиос куатасько: возьмам-возьмам но, таманлы сяна ӧз вуылэ. Бен, ваньзэ ӝог лэсьтоно луэ, ужъёс туж трос уга. Ма, оло, уд но оске, но ӵемысь сиськыны но дыр уг сюры.

- Со тӥлесьтыд визь-кенеш юалля-а?

- Юа. Ӵемгес совещаниос бере – кыӵегес кадь калыклэн мылкыдыз кылиз, укыр чурыт ӧй вераськы-а? Мынам малпанэным тунсыкъяське адямиосты бадӟым уже пуктыку. Кӧня ӵектонъёс сётъяй, та дырозь ӧй янгыша на кадь.

- Шаерысьтымы вылӥ кивалтӥсьёсты куддыр футбол бусыысь но адӟыны луэ. Со команда зэмзэ ик вань-а яке синпӧет понна люкаськылӥськоды?

- Вань. Кивалтэтын, зэмзэ но, спортэз гажасьёс данак – со туж умой. Али футболэнгес выриськом, азьвыл волейбол командамы но вал. Команда ньӧмыз понна гинэ луысал ке, ӵошатсконъёсын ӧй вормысал – одӥг-ог гинэ шудылыса, шудон уг пӧрмы, котькудӥз ас понназ туп сьӧры уйылӥське, нош командаын шудонын радыз вань.

- Кин тӥ футбол бусыын?

- Азьвыл нападающий вал, али защитник.

- Нош улонын утиськоно луылэ-а?

- Ӧйтӧд, мон адямиослы урод уг лэсьтӥськы ук.

- Иське, тӥ «сьӧлыктэм» адями?

- Ӧвӧл. Мон ноку но асэным дан уг поттӥськы, тодӥсько кужмо но ляб интыосме. Тодӥсько, трос лэсьтыны быгатӥсько, но ушъяськыса уг ветлӥськы.

- Нош адямиос куронъёсын ёртыкузы, уд утиськиське шат? Яке ваньмызлэсь куронъёссэс быдэстыны быгатӥськоды-а?

- Уг. Мусалимов – шунды ӧвӧл ук, ваньзэс нокызьы уд шунты.

Президентэн артэ луэмме тодыса, зэм, тросэз акыльто: созэ лэсьты вал, тазэ… Быгатэмея турттӥсько, но эсэпсэ валаны курисько. Куд-огез тани квартира яке бадӟым должность куро. Мон-а со понна сюлмаськом – ужа, возьматы астэ – оскозы. Нош квартира туж тросэзлы кулэ, маин тон пӧртэм? Туж акылес дыр гужем, институтъёсы пырон вакыт. Нылпизэс пыртыны курыса, уллёен ветло. Ярам ай, конкурсъя гинэ уг ортчо ке, но «кыкчиез» кызьы пыртод?

Секыт учыръёсы шедем муртъёслы юрттыны тыршисько – но тросаз учыръёсы район администрациын ик сэрттыны-пертчыны луоно ужпумез Президент дорозь вутто. Со урод – озьыен, интыысь кивалтӥсьёслы уг оско, яке соос огшоры муртлэсь куронзэ вылтӥяськыса санэ уг басьто, яке уг быгато. Соку малпаськыны кулэ – интыяз-а пуке кивалтӥсь?

- Бадӟым ужын ужасьёслэсь калык пӧлын ӵем «лыоссэс мисько». Оло жаляса, оло шумпотыса верано луэ: Мусалимовез уг исало. Мӧзмыт уг поты-а?

- Уг – солы дыр ӧвӧл. Кышное но одӥг гинэ но, созэ но адӟыса уг вуттылӥськы. Серекъятэк верано ке, мынам кылылэме вань, куд-огез асьсэлэсь данзэс ӝутон понна, кыл вӧлдо шуыса. Мыным сыӵе дан кулэ ӧвӧл, соин ик муг уг сётӥськы. Мынам кӧты тыр соин, маи вань: уже, семьяе, ӵыжы-выжыосы…

- Нош узырлык?

- Ӧйтӧд. Укыр узыр луэме уг но поты кадь – малы со кулэ – куалекъясь улон понна-а? Нош калык рад ке учконо, мон куанер ӧвӧл: вань ӟеч квартирае, сад-бакчае, машинае. Но гуртысь потэмын бере, арлыд вуэмъя, музъем борды кыске, нимаз юртын улэм потэ. Соин али Завьял районысь Семёново гуртын корка пуктӥсько. Быдэс отпускме отын ортчытӥ – чальгес выль корка пырем потэ ни. Али со мынам тужгес бадӟым малпанэ, ӝоггес быдэстоно ужпуме.

- Дор палъёсады уд вуылӥське ни-а?

- Анай-атае но, гуртэ но кемалась ӧвӧл ни. Но отпуск дыръям, туж бадӟым лэсьтӥськонме ӝамдэлы келляса, ворттылӥ ик – сюлэм уг чида.

Ульчаостӥ азьло сямен бызьыса уд ортчы ни – люгы басьтэмын. Корка бервыламы сылӥ, шур дуре васькай. Отӥ ми куасэн нискыласьком вал. Но бакча берысь кызьпу сяна монэ тодмась ӧй вал кадь. Ми соин кема-кема ӟыгырскыса сылӥм – кӧтпуш ик тыриз. Кӧня солэсь сурсвузэ юэмын – азьвыл тау шуыны йыре но ӧз лыктылы.

Собере Рязанэ, Жикьяла пырай – гуртысьтымы семьяос отчы улыны выжизы. Отын пумитазы ке, пумитазы ни – вордэм нэнэед-дядяед сямен. Котькуд коркан кумышка ӵекто, губи потто... Си-ю шуо, нош мынам пумиськемлэсь, тодэ ваёнъёслэсь кӧты тыр ни. Тау тӥледлы, шуныт мылкыдды понна.

- Вордскем палъёсады тӥлесьтыд семьядэс умоен гинэ верало.

- Тау. Мон ачим но номыр уродзэ вераны уг быгатӥськы. Нэнэен дядяй, верай ини, огшоры муртъёс вал. Калыклэсь укыр ӧз висъяськылэ, весь ужаны, пи будэтыны выризы. Дядяе войнаысь сӧсырмыса берытскиз, колхозэн кивалтэмын. Нэнэе огвакыт сельсоветын гожъяськисьын ужамын – со вакытэ дано уж. Ми ньыль пиос: Веня, мон, Валера, Володя. Мар со тэрытэк, нимазъяськыса улон – ум тодӥське. Ми котьку ӵош. Пичи дыръямы Венямы гурт пиналъёсты люкаса, олокыӵе но ӵошатсконъёс ортчытъя вал. Милемыз азьвыл ик тышкаськылӥз: келялэ гинэ ай! Озьы сямамы пумен нюръяськон, секытэз вормыны быгатон сям пыӵаз. Школаын ми эшъёсмылэсь соку ик висъяськылӥм ни. Ма, районын но. Ӵошатсконъёс бере куддыр быдэс пьедесталэз Мусалимов вынъёс басьтылӥзы. Туж зол вал – со ик юрттӥз, дыр, котькыӵе учыре ог-огмылы пельпуммес пуктыны, шуг-секыт дыръя юрттыны, вормонъёс басьтыку, ваньмы понна шумпотыны, данъяськыны.

Спортэн али но эшъяськиськом. Но пӧлысьтымы тужгес бадӟым азинсконъёс басьтӥз Валериймы – 2000-тӥ арын со Россилэн куасэн бызьылонъя куинь пол чемпионэз луиз, 2001-тӥ арын – Европалэн чемпионатаз кык азвесь но одӥг ыргон медаль утӥз. Али И. Демидов нимо биатлон комплекслэн кивалтӥсезлэн воштӥсез.

Шумпотӥсько, мынэсьтым Олегме тренерез ушъя ке. Со футболъя классын дышетске, командалэн капитанэз луэ. Спортын уга быгатон гинэ тырмыт ӧвӧл, чиданэд, вормем потон мылкыдыд мед луоз. 9- Нош кыӵегес адямиосын эшъяськиськоды?

- Яра ке, мон фамилиосын ик верасал: матысь эшъёсын нимасал Андрей Ураськинлэсь, Пётр Фоминлэсь, Анатолий Максимовлэсь семьяоссэс. Кемалась эшъяськиськом Пургалась Мишанькинъёсын, Поповъёсын, Трофимовъёсын.

- Николай Николаевич, гужем тӥ зарни юбилейдэс пусйиды. Трос кузьымъёс вал, дыр. Кудӥз тужгес дуноез?

- Республикаямы мыным нырысетӥезлы сётӥзы «Кун службаысь дано ужась» ним. Тынэсьтыд уждэ дунъямлэсь маке дуноез вань шат?

Нош ӵукнаосы нылпиосылэн кузьмам чашкаысьтызы (аслам тусыным, нимыным) пӧсь чай юисько. Со ноку но уг сӥя.


Источник:

Мусалимов Н. Н. Ышыгысь яркыт тусбуй / Н. Н. Мусалимов ; записала Зинаида Рябинина // Удмурт дунне. - 2003. - 6 нояб. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"