Михеева Анжелика Семеновна

Материал из Воршуда
Перейти к: навигация, поиск

Шуддэ сандыкысь эн утча

Михеева А. С.

Россия Федерациысь огъя тодон-валанъя дано ужась.

Вордӥськемын: Дэри ёросысь Подшивал гуртын дышетӥсьлэн семьяяз.

Гороскопъя: Водолей.

Дышетскемез: Подшивал шор ёзо школа, Удмурт кун университетысь, филологияя факультет.

Ужан тубатъёсыз: Завьял ёросысь Постол шор ёзо школа - дышетӥсь, Ижысь 159 номеро нылпи сад - воспитатель, 1988-тӥ арысен - Ижысь 56 номеро гимназия, ӟуч кылъя но литературая дышетӥсь, 1990-тӥ арысен - директорлэн воштӥсез, 2006-тӥ арысен - Кузебай Герд нимо кун гимназилэн директорез.

Семьяез: кузпалыз Леонид Витальевич, заводысь валтӥсь мастер, пиосыз Павел - УдГУ-ысь историяя факультетысь 4-тӥ курсысь студент, Миша - 56 номеро гимназиысь 9-тӥ классын дышетскись.

- Анжелика Семёновна, тӥ 18 ар ужады городысь азьмынӥсь гимназиын, берло аръёссэ кивалтӥсьлэн нырысетӥ воштӥсез вал. Нош выль интыын асьтэды шедьтӥды-а ни?

- Куддыр со пумысен малпаськыны кутскисько ке, аслым ачим паймисько - мон татын ик ужалляй кадь. Нош лыктыны туж секыт вал - аръёсын дасяськи. 56 номеро гимназиын ужаны мыным туж кельшиз. Сыӵе тунсыко, визьмо коллектив нокытын овӧл кадь потылӥз - отын котькуд дышетӥсь, дышетскись творчествоен выре, маке ялан малпа-берга-лэсьтэ. Тунсыко ӵектонъёс «калыкысь» вуылӥзы. Мукет коллективъёсын кызьы: директор косӥз ке, лэсьтом, завуч малпаз ке, ми но малпаськом… Нош директор вашкала манеръя улэ, приказ гожъян сяна, мукет ужез уг вала ке? Ӵемысь бордаз со сыӵегес ик завучъёсты возе. Соку мар? Милям коллективын улон пӧзиз, дышетӥсьёс нылпиосты ас предметсылы дышетон понна гинэ ӧз сюлмаське, соос тыршылӥзы яркыт, визьмо, лулпуш ласянь кужмо адямиосты будэтыны. 56 номеро школамы гимназия луэм бере мыным ӵектӥзы наукая но методикая ужен кивалтӥсь луыны. Мон огдыре шум но потӥ, куалектӥ но: дунъямзы умой кадь, но кызьы ужалом, та дырозь учёнойёсын вераськылэме но ӧвӧл ке? Но тани кыӵе ке семинар ортчытоно луиз. Телефон бордын оло час куалекъяса пуки, тодмо-дано адямиослы вазиськыны ик уг дӥсьтӥськы. Мырдэм-мырдэм асме ворми. Нош кӧня ке улыса, мон Москваысь профессоръёсын но каньылак вераськылӥ ни. Гимназимы федерациысь выль амалъёсты эскерон инты луиз бере, шоркарысь адямиосын меӵак ужаны ӧдъям, отчы семинаръёсы потам.

- Собыдӟа ужан опытты вань вылысь малы кема малпаськиды удмурт гимназие выжон пумысен - шуг-секытъёс кышкатӥзы-а?

- Шонергес, дыр - пыкылонъёс. Нырысьсэ мыным гимназилы директор луыны ӵектӥзы вал ай бугыръяськонъёс кутскемлэсь азьло. Соку мынам ӧз поты азьвылзэ директорез вӧсь кареме - со ужа на вал ай. Мон О. К. Шиловаез, зэмзэ но, туж дунъясько та проектэз - удмурт гимназиез - малпамез-кылдытэмез понна.

Но бӧрысьгес кутскизы бугыръяськонъёс: анай-атайёс чутрак пумит луизы нылпиоссэс автозавод котыре интыяськем школае выжтыны. Паймоно кадь, со вакытэ администрация но, дышетӥсьёс но со югдур шоры палэнысен учкыса улӥзы - вань сюлмаськонъёсты анай-атайёс вылэ куштӥзы. Со шонер ӧвӧл. Тӥни соку монэ выльысь дышетонъя министерствое ӧтизы. Мон соку ик киме шонтӥ - кыӵе визьмо мурт йырзэ дуринчи каре донгоз. Но министерствоын ужасьёсын ӵош гимназие кожай ик. Отын монэ соку ик кымазы: мар-о, дасез вылэ лыктэмды потӥз-а? Мон пал кыл но вераны ӧй вормы. 1-тӥ сентябре шумпотыса ужаны мынӥ аслам школаям, нош ӝыт телевизор пыр адӟи, кызьы удмурт гимназиысь анай-атайёс но пиналъёс, дышетскон арлэн кутскемезлы шумпотэм интые, резиденция азьын плакатъёсын сыло. Сюлэм туж вӧсь луиз, удмуртъёс жаль потӥзы. Соку малпай: оло мыноно ик вал, оло мон быгатысал югдурез тупатыны. Табере гажалозы на-а со нылпиос, анай-атайёс удмурт кивалтӥсьёсты, потоз на-а соослэн удмурт луэмзы? Но школаез автозавод пала выжтӥзы ик, тросэз нылпиос пазьгиськизы. Кык ар удмурт гимназиен кивалтӥз 21 номеро школаысь директор, собере мон ӧй пумитъяськы ни.

- Кыӵе бен потӥз - ӟечгес луэм-а гимназия, сьӧрло выжтыса? Со кык ар ӵоже, шуо, нылпиос гинэ ӧвӧл, дышетӥсьёс но бӧрдылӥллям.

- Кыӵе ке дунъет сётыны мыным чебер ӧвӧл, но татчы лыктэме бере удмурт дышетӥсьёс бӧрдыса мадизы, мар пыр соослы потоно луиз. Мон малпасько, берло ваньмыз валазы, город пуме выжтон решение туж ик умой ӧвӧл шуыса, но бер вал ини. Вылаз ик директоре юнматӥзы удмурт кылэз тодӥсьтэм муртэ. Огазеямын вал кык коллектив: дышетӥсьёслэнэз но, нылпиослэнэз но. Улонын одӥг адямилы но секыт классысь классэ, школаысь школае выжыны, нош татын… Конечно, жаль - 10 ар ӵоже азинскем сюрес ышиз, шуыны луоз, но юскиськыны уг яра - ваньмыз асьме киын, асьме мылкыд бордын.

- Мар бордысен выль интыын уждэс кутскиды?

- Школа юртъерез эскери. Кыӵезэ адӟеме бере ӧжыт гинэ берлань ӧй чигна: борддоръёс саптамын, туалетъёс кӧшкемытэсь, кенер воксё куашкамын. Кыӵе ӟеч кузёлэн заборез пасё луоз, шуо вал гуртын. Соин мон нырысь ик со борды басьтӥськи. Собере школа пушез чеберъяны ӧдъям. Коридорын туж чебер садъёс сыло, но соос малы ке но корт решётка сьӧрын. Тӥялозы, пе. Сэрпалтытӥ. Дуно штора ошылыны малпай но - ало: изъянтозы, шуо. Кык ар ортчиз ни, нокин но уг йӧтылы - чеберез кин изъянтоз? Малы асьмеос пиналъёсмылы сокем ум оскиське?

- Тӥляд лыктэмдылы но ваньмыз ӧз шумпотэ, дыр.

- Ма, со валамон. 21 номеро школаын азьвыл ужамъёс мынэсьтым куалектӥзы. Вот, пе, табере асьмеды ваньмес уллялоз, бордаз удмуртъёсты гинэ люкалоз. Нырысетӥ кенешын ик мон шуи: кинлэн ужамез потэ, ужалэ, но ньӧмыз понна ветлӥсьёсын мынам кылы уз тупа. Со сяна, мон одно уг куриськы, тӥ ваньды удмурт кылын вераськыны кулэ шуыса, но Гердлэсь нимзэ нуллӥсь школаын дунъяны-гажаны кулэ удмурт кылэз, культураез, историез, котькуд дышетскисез. Уг ке кельшы - школаос трос. Туннэ нуналлы одӥг дышетӥсь но ӧз кошкы на.

- Но визьмо кивалтӥсь, пе, аслэсьтыз командазэ кылдытыны кулэ.

- Соглаш. Но малпасько, та коллективысь ик адямиосын огкыл шедьто, тросэныз учконъёсмы-малпанъёсмы тупало. Та дырозь одӥг гинэ специалистэз кутӥ. Со ваньмызлы тодмо, визьмо, шаплы удмурт нылмурт Татьяна Ишматова. Сыӵе шедьтосэлы ачим но шумпотӥсько. Татьяна Витальевна ватсаса тодон-валан сётонъя воштӥсе луэ. Со кемалась ик уг ужа ай, но вань дышетӥсьёсмес «улӟытӥз» ни: ар ӵоже ми сомында ужрадъёс ортчытӥм. Огшоры шулдыръяськонъёс гинэ ӧвӧл, «котырес ӝӧк» сьӧрын вераськонъёс но, мукет но. Татьяна Витальевна туала амалъёсын ужа, дышетӥсьёсмес проектъёс гожъяны дышетэ. Сыӵе адямиос тросгес ке луысалзы, улонмы пӧзьысал.

Туж ӟеч ужаны быгато «вуж» гимназиысь выжем дышетӥсьёс, али соос дасясько нылпиослы Кияса ёросын этнолагерь ортчытыны. Отчы, Удмуртиысь сяна, мукет улосъёсысь но нылпиос вуозы.

- Удмурт гимназиын кӧня нылпи удмурт кылэз тодэ?

- Лыктэм бӧрсям мон ачим но дышетӥсьёсылы сыӵе юан сётӥ. Ӝыныез, пе. Ӧй оскы. Соку малы мон коридоръёсын удмурт кылэз уг кылӥськы? Малы пиналъёс, монэн ӟечбуръяськыкузы гинэ но, ӟуч сямен вазё? Синпӧет интые кылдытъямын ӧвӧл-а удмурт классъёс? Кури аттестация ортчытыны. Зэм но, эскерон возьматӥз: чылкыт вераськисьёсыз ӧжыт - «вуж» гимназиысь выжемъёс но гуртысь лыктэм пиналъёс гинэ. (Соос али милям 11 кузя). Но со ужрад удмурт кылэз дышетонлэсь куштӥськон понна лэсьтэмын ӧй вал. Дышетӥсьёсын пуксьыса, ми рос-прос кенешим: кӧня пиналэз анай кылызлы муромытэм программая дышетоно, кӧнязэ капчиятэмъя, кӧнязэ - тодмотэм кыллы сямен… Али школаямы 667 пинал ке, 181-эз удмурт кылэз дышетэ. Котькуд параллельын быдэн одӥг удмурт класс возиськом.

Зэм, буйгатӥз монэ нылпиос но анай-атайёс пӧлын ортчытэм юалляськон. Пиналъёс ваньзы сямен мылкыдзэс веразы удмурт кылэз дышетон пумысен. Шугъяськемзэс веразы кӧняез ке гинэ. Сыӵеослы ӵектӥм школаез воштыны, но ӧз кошке. Анай-атайёс куризы соослы но кыллы дышетскон курсъёс радъяны. Озьы школаямы вань мылкыд карисьёс - дышетӥсьёс но, анай-атайёс но - дунтэк быгато удмурт кылэз дышетыны. Мон валасько, вакчи дыр куспын азинсконъёс басьтыны уз луы, но со уж вормонтэм ӧвӧл.

- Тӥляд осконды герӟаськемын, дыр, гимназия борды интернат усьтонэн - соку гуртъёсысь нылпиос лыктозы но, школа син куспын удмуртомоз…

- Соиз но вань. Но, со сяна, бадӟым осконмы нылпи садмылы-прогимназимылы. Соин кивалтэ синмаськымон педагог Надежда Тихоновна Куртеева. Солы вань покчиос но, анай-атайёс но синмаськемын. Нылпи садамы трос тунсыко ужрадъёс ортчыло, нылъёс-воспитательёс проектъёсын ужало. Татын удмурт кылэз дышето творчество пыр. Ушъяськеммы потэ: туэ 9-эз выпускникъёсмы милям школае ик выжо. Отӥосыз но удмурт классъёсы гожтӥськизы. Нош интернат, малпасько, одно кулэ. Угось гуртъёсысь тросэз нылпиос луонлыкъёс ӧвӧлысь быгатонлыкъёссэс азинтытэк кылё, городэ вуыса ыштӥсько, ваньмыз институтэ пырыны уг быгато. Но та гимназия кыӵе ке «резервацилы» пӧрмыны кулэ ӧвӧл. Мыным потэ, ас калыкед пӧлын гинэ пӧзьыса, трос уд азинскы. Пинал мед дышоз пӧртэм адямиосын вераськыны, соослэсь аспӧртэмлыкъёссэс валаны, мукетъёсын ӵошатскыны, ӟеч палъёссэс асэстыны. Милям ужпуммы йылсаськыны кулэ ӧвӧл удмурт кыллы, культуралы дышетонэн гинэ, туала егит адями котыр ласянь азинскем мурт мед луоз: школаысь потыкуз мед вераськоз 3-4 кылын (удмурт, ӟуч, кыӵе ке финн-угор, англи), мед быгатоз компьютерен ужаны. Умой луысал, школаын дышетскытозяз, кыӵе ке профессилы дышысал на ке. Тӥни соку ӝутскысал гимназилэн данэз. Но со понна кулэ дыр. Мон оскисько, удмурт гимназия матысь аръёсы ик пыроз шоркарысь усто школаос пӧлы, соку нокинэ уз кышкаты солэн интыяськемез - нулло ук пиналъёссэс 14, 41 номеро лицейёсы (одӥгез - Зарекаын, мукетыз - Молодёжной урамын), бигер гимназие (Бигер базарын).

- Рейтинге сюрон понна туала арын медальёс тырмыт ӧвӧл, шуо. Озьы ке но, вань-а удмурт гимназиын «зарни визьёс»?

- Вань. Арлы быдэ 3-4 пинал школаысь зарни медален потэ. Туэ но сыӵеос вань. Но со одӥг дан. Со сяна, гимназилэсь азинсконзэ мон адӟисько выль амалъёсын ужан бордысь. Инновация, проект кылъёс троссэ дышетӥсьёсты но кышкато ай, но со туала улонлэн куронъёсыз. Мон дунъясько творчествоен вырись адямиосты. Мӧзмыт мурт пиналлы мар сётоз? Дырын-дырын мон анкетаосын ужасько, угось котькудӥз адями мылкыдзэ шара уг вера, нош бумагае кисьтэ. Отын со куалекъятэк вера, маиз аслаз ужаз уг яра, марзэ воштысал, мар ӵектысал. Озьы сомында тунсыко ӵектонъёс люкасько! Ваньзэ сое ми бӧрысь чакласьком-эскериськом но уже пыӵатӥськом.

- Тӥляд дышетон учрежденидылы, котыр ласянь бадӟым саклык висъяське. Кун Кенешлэн тӧроез Игорь Николаевич Семёнов но ӵем вуылэ кадь.

- Бен, вылӥ кивалтӥсьёс ласянь юрттэт ӧй луысал ке, туж секыт йӧтысал. Милемлы туж юртто Кун Кенеш но, Дышетонъя но наукая министерство но. Игорь Николаевич Семёнов тани милесьтым выпускникъёсмес нимысьтыз сӥлы каре - Кун Кенеше приёме ӧте. Школаямы вуылэ министрмы но. Андрей Леонидович Кузнецов лыктӥз анай-атайёслэн кенешазы но, ваньмыз паймизы. Со вуылэм бере анай-атайёслэн осконзы юнмаз. Эшшо ик: огшоры собраниысь министрез пумиталод шат? Трос кужымзэ сётэ Зоя Витальевна Суворова - дышетонъя но наукая министрлэн воштӥсез. Нош огаз «котырес ӝӧк» сьӧрамы» вуылӥзы шаерысьтымы вань удмурт калык огазеяськонъёслэн кивалтӥсьёссы, тодмо учёнойёс, политикъёс. Ми понна со бадӟым дан вал. Та гимназилэсь удмурт калык туж трос вите. Витё мукетъёс но… Соин ик асьмелэн аръёсын шонаськыны дырмы ӧвӧл, уж борды рос-прос басьтӥськоно али ик. Милям будэтэм пиналъёсмы удмурт калыклэн элитаезлы мед пӧрмоз, соос мед луозы культураын но искусствоын, наукаын но кивалтонын, бизнесын но политикаын. Узыр, ванё-буро улыны мед быгатысалзы - отын номыр уродэз ӧвӧл. угось адямилэн тросэз тырмымтэосыз пото ёрмыса улэмысьтыз - со кисыраны ӧдъя, палэнске, ӵуказе нуналлы осконзэ ыштэ. Мукет калыкъёс, шорамы учкыса, «ой, та удмуртъёс» медаз шуэ, «вот та удмуртъёс!» мед шуозы.

- Тӥ асьтэды лыдъяськоды-а сыӵеен?

- Кисыратэк верасько: бен, мон асме лыдъясько азинлыко адямиен, малы ке шуоно мынам улонам ваньмыз, мар кулэ адямилы ассэ шудо шӧдон понна - вань. Мынам вань ӟеч, тунсыко уже, вань калыкын данэ, вань ӟеч эшъёсы-тодмоосы, валась кузпалэ, визьмо пиосы… Мон ноку ӧй улы ёрмыса, ноку нокинлы ӧй йыбыртъя, монэ ноку ӧз ултӥяллялэ. Но со шудме мон сандыкысь ӧй потты, котьку лулысь-сюлмысь тырши. Ӟеч ужан - со кыӵе ке пӧрез, обязанностьёсты быдэсъян гинэ ӧвӧл. Адями ужаны кулэ ас бордаз: ляб сямъёсты вормон, котыр ласянь синмаськымон луыны тыршон, калыкен вераськыны дышетскон - со но туж бадӟым уж. Тросэз шуо, удмурт луыны шуг. Мынам сое шӧдэме ӧвӧл. Картэ ӟуч выжыысь, 18 ар ужай ӟучъёс пӧлын, но урод каремзэс шӧдылэме ӧвӧл. Адямилэн кышканъёсыз кылдо ӟеч улыны мылыз потымтэысь. Маке уг пӧрмы ке, выжызы вылэ чӧлско - озьы каньыл ук. Нош тон ачид тыршид-а выжыдэ ӟечомытон понна?

- Тӥ семьяяды но директор-а?

- Меӵак озьы уд шуы, но мынэсьтым юатэк, монэным кенешытэк, номыр уг лэсьтӥськы. Удмуртъёслэн котьку матриархат вал - со вирамы пыӵамын. Уг тодӥськы, умой-а со, но сыӵе кышномурт семьяез, коллективез понна сюлмаське ке, урод шат? Зэм, сыӵе дыръя пиосмуртлы эшшо кужмогес, визьмогес, шаплыгес луыны кулэ, сотэк воргорон ассэ лябен, ултӥямен шӧдоз но яке палэнскоз, яке аналскоз.

Мыным удалтӥз кадь потэ: куспамы тупаськом, мултэс косъяськыны уг лэзё. Картэ воксё мукет удысын тырше ке но, Есенинэз но, Лермонтовез но мынэсьтым ӟеч тодэ, мылкыды секыт дыръя кылбур лыдӟе. Пиосы но монэ дунъяло кадь.

- Тӥ дышетӥсь, анай. Кыӵе ӵектон сётоды анай-атайёслы, кызьы будэтоно ӟеч пинал?

- Шӧдэмъя, дыр. Куддыр асьмеос мултэс трос кылзӥськом тодмоосмес, бускельёсмес, дурбасьтӥськом пиналзэс юн кырмыса возисьёслы, еэн дышетӥсьёслы. Мон малпасько, пиналэз нырысь ик гажаны кулэ. Уг яра со шоры пичи адями шоры сямен учкыны - соин вераськоно озьы, кызьы тӥледын мед вераськысалзы кадь. Маке карыны косэм интые, куроно.

Туала пиналъёс мыным жаль пото - соос пичиысен ини маин ке ялан нюръясько. Автобусэ пуксё но, кондуктор улля, пересь мурт пыкылэ, атаез куаретэ. Школае мынон дырыз вуэ гинэ но - экзамен (тест) пыр потоно ни… Озьы нуналысь нуналэ. Тросгес сётоно, дыр, эрик но - пинал ачиз бырйыны мед быгатоз, маин со выроз, кыӵе удыс быръёз. Ато асьмелэн кызьы луэ: анай-атайёс пиналзэс кизили карыны выро, нош солэсь кин луэм потонзэ уг но юало. Но котькуд пинал пӧртэм, соин ик уг яра одӥг кабъя дышетыны. Вань сыӵе веран: урод, пе, сыӵе пастух, кин ыжъёсызлэсь нюре мынэмзэс адӟыса вылысь соосты уг берыкты. Огкылын вераса, эрик сётоно, но чаклано.

Источник:

Михеева А. С. Шуддэ сандыкысь эн утча / А. С. Михеева ; записала Зинаида Рябинина // Удмурт дунне. - 2007. - 22 июля. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"