Михайлов Василий Михайлович

Материал из Воршуда
Перейти к: навигация, поиск

Вена Кузьмаз яратон

Михайлов В. М.

Мон лыдӟиськыны уг быгатӥськы на вал соку. Нӧш бускельмылэн Одон анайлэн верамез али но тодам улэ. Ми корказы вадьсытӥ ортчыку, со капкаетӥз ведраен-карнанэн потыны тупаз.

- Лиза, - вазиз мамаелы, - газетын нош ик Васядылэн веросэз потэм. Лыдӟид-а ни? Мыным туж кельшиз.

- Ай чик дыры ӧй вал, ӝытазе учко ини, - амалтӥз мамае кылзэ быдтыны дасяськем бускельмес. Ми кытчы ке дыртӥськом вал угось. Та учыр 1951-тӥ арын вал, дыр. Атаелэсь вынзэ Вася агаез но солэсь украин кышнозэ Наташа апаез мон ӟеч тодӥсько вал ини. Соос дорамы арлы быдэ кӧня ке пол берталлязы. Мон кыксылы но соослы туж синмаськемын, кыксэс но туж яратӥсько вал. Нош кытын мар ужамзэс ӧй тодылы. Но со нуналэ валай: дядя Васямы - журналист, «Советской Удмуртия» газетын ужа.

- «Вордӥськемын 1923-тӥ арын. Со аре вордскем котькуд сю адями пӧлысь войнаысь бертӥз одӥгез гинэ. 18 арес. 10-тӥ класс. 22-тӥ инвожое выжон арня уе школаен люкиськон ӝытъёс. Арлы-кыклы бадӟымъёс армиын вал. Соос ожмаськыны кӧня ке коть дышемын вал ини, нош таосызлэн ӝутскем мылкыдзы но чылкыт осконзы гинэ вал, ӵапак соос стройысь куинь вамышлы азьлань потыны кулэ шуыса». Та - Владимир Ерёменколэн «Вордскемын 1923-тӥ арын» очеркысьтыз люкет. Со поттэмын вал «Юность» журналын 1982-тӥ арын куартолэзе. Шонер-а гожтэм Ерёменко ёзъёстылэн войнаез пумитамзы сярысь? Асьме удмурт шаерамы но ваньмыз озьы-а вал?

- Война котькуд адямилэсь улон сюрессэ чутрак ӵогыса куштӥз. Тани ми но, Можга педучилищеез йылпумъямъёс, 1941-тӥ арын 22-тӥ июне ӵукна выпускной ӝытысьтымы бертӥськом вал. Мылкыд ӝутскемын, малпанъёс кыдёке нуо, котькудӥзлэн кияз школае ужаны мыныны направлениез вань. Тӥни озьы шумпотон мылкыдын бертыкумы, радио пыр кылӥм войналэн кутскемез сярысь. Кезьыт вуэн пылатыса кадь куштӥз милемыз со ивор. Йырын малпан сураськыса-пожаськыса кошкиз. Школае мынэм интые, война милемыз пӧртэм интыосы, пӧртэм фронтъёсы пазяз.

Мон кӧня ке ужаса вуттӥ на Улын Юри школаын. Собере 5-тӥ октябре армие басьтӥзы. Школаямы пиосмуртъёс пӧлысь одӥг директормы гинэ кылиз.

Мон шеди 42-тӥ запасной артиллерийской дивизионэ. Отын покчи командиръёсты дасязы. Кык толэзьлэсь кемагес дышетскыса, мылкыд карисьёсты косӥзы строе султыны. 768-тӥ артиллерийской полк, пе, ожысь потэмын, али шутэтске Ярославль областьысь Ростов городын, солы выль кужым кулэ. Милемыз, 90 муртэ, со полке келязы. Соин ӵош шеди Брянск фронтэ. Орудилы командире юнматӥзы. Дивизимы противотанковой вал. Тӥни со ик луиз мынам оже пыреме.

- Быдӟым Отечественной война Советской Союзысь вань калыкъёслэсь пиоссэс но нылъёссэс одӥг бадӟым ож лудэ люказ. Степан Парфёнович Зубарев лыдъямъя, асьме шаерысьтымы гинэ лек тылӝуэ ог 300 сюрс адями пыраз. Со пӧлысь ог 130 сюрсэз - яке 45 процентэз - бырыны шедиз. Пичи Пурга ёросъя та лыдпус 55 процент сьӧры ортче. Валамон ни, та быдӟа лыдпусъёсыз вераку, нимаз адями уг адӟиськы ни. Вералэ вал, секыт-а йӧтӥз сьӧрло потамтэ удмурт пияшлы ожмаськыны дышетскон? Ӧй вал-а сое ичи лыдъем калыкысь адями карыса ултӥясьёс?

- Ожын ваньмыз ик агай-вынъёс луизы. Мынам орудийной расчётам 7 мурт вал. Соос пӧлын мон, самой егитэз, 18 аресъем удмурт пи. Кык наводчикъёсы ӟучъёс вал. Соос тылӝу пыр потэмын вал ини, ожлэсь котькыӵе шимес интызэ шӧмъямын. Со сяна, вал чуваш, таджик, бигер, украинец. Ноку но, нокинлэн но йыраз малпан ӧй вал кинэ ке мукет калыкысь адями шуыса ултӥяны.

Нырысь-валысь малпаськылӥ, кызьы мон, ваньмызлэсь егит мурт, таосын кивалтыны быгато шуыса. Но фронт пыр ортчем эшъёсы котькызьы юрттыны турттӥзы, котьку ик мыным дурбасьтылӥзы. Соин валче ик кылдӥз милям туж ӟеч, эшлыко мылкыдо коллективмы. Полкмылэн командирез умой ыбылыны быгатэммы понна олоконя пол милемлы благодарность ялылӥз.

- Василий Михайлович, тӥляд нимды улэп дыръяды ик пыртэмын элькунысьтымы Буре ваён книгалэн 7-тӥ томаз. Отын тазьы гожтэмын: «1944-тӥ арын мартэ но апреле асьмелэн улосчиосмы пыриськизы Правобережной Украинаын бадӟым ожмаськонлэн 2-тӥ люкетаз... Выль Монья гуртын вордскем мурт, 1404-тӥ зенитно-артиллерийской полкысь взводлэн командирез лейтенант В. М. Михайлов советской ожгарчиосты омырысь тушмонлэсь утиз. 29-тӥ но 31-тӥ мартэ солэн взводэз тушмонлэсь 2 самолётсэ уськытӥз». Мар ожмаськон вал со? Мынам тодэмея, атакае мынымтэ дыръяз, пехотинец окопе, блиндаже я мукет интые ватскыны быгатэ. Нош зенитчик? Со вылэ омырысь узвесь зор кисьтӥське, бомбаос усьыло, нош ватскыны уг яра - вылӥысь тушмон шоры ыбылоно. Туж шимес суред, дыр, ук со?

- Мон верай ини, милям полкмы противотанковой вал шуыса. 1942-тӥ арын гужем монэ, полкысьтымы самой егит командирез, дышетскыны ыстӥзы Севастопольысь зенитно-артиллерийской училищее. Соку со интыяськемын вал Уфа городын. Отын куинь арлы чаклам программаез 10 толэзьскын ортчыса, мон вуи зенитной дивизие. Дивизимы соку сылӥз Москва дорысь Красногорск городын. Собере ми, Киевез басьтэмзы бере, Украинае вуим ини.

Со вакытэ асьме войскоос туж ӝог азьлань мынӥзы. Одӥг интые вуыса, гудӥськыса гинэ вуттӥськод, нош ик азьлань мыноно. Кытӥяз, кӧлыны гинэ ӧвӧл, сиськыны но дыр уг тырмы вал.

Зенитчикъёслэн ужзы сыӵе: самолётъёс бомбаос куяку, ватскыны уг луы - соос шоры ыбылыны кулэ. Нош со вакытэ, гужем 1944-тӥ арын, немецъёслэн самолётъёссы трос на вал. Кытӥяз асьме войскоос вадьсын соос уй но нунал лобаллязы. Вал тани одӥг учыр. Ми пичи гинэ хутор доры интыяськимы. Уин вуим, ӵукнаозь гудӥськыса быдтӥм. Сылӥськом, котыр эскериськыса. Со виын разведчикмы ялӥз: инмын 50 немец самолётъёс! Малпаськом, кытчы таос кулон ваись бомбаоссэс нуо меда шуыса? Шунды шоры вуыса, соос чутрак берытскизы но ми вылэ бомбаос куяны кутскизы. Милям йырмес но ӝутэмы уг луы, шуыны луоз. Озьы ке но, ваньмыз ик орудиосмы ыбыло самолетъес шоры. Соку батареямы кык немец самолётъёсты уськытӥз.

Ог 8 коркаем хутор вылэ сомында немец самолётъёс вуэм мугез ми бӧрысь тодӥм ини. Татын штабъёс, трос техника интыямын вал. Одӥг пленной немецез асьмелэнъёс лэзиллям. Мукет эшъёсме но ваё шуыса оскытэм со. Тӥни со ик ивортэм, луоз, хуторын сомында асьме войскоос люкаськемын шуыса. Соин ик самолётъёс отчы вуизы.

Украинаын ожмаськыку, вал трос шимес учыръёс. Милям орудийной расчётмы полкамы нырысьсэ уськытӥз немецъёслэсь Юнкерс-87 самолёт-разведчиксэс. Сое «рама» шуо вал. Эскериськыса гинэ лобалляз, бомбаос ӧз куялля. Со тӥледыз адӟе ке, кӧня ке улыса возьма ини тушмонъёслэсь лыктэмзэс яке орудиосын ыбылэмзэс. Одӥг пол эскериськыса лобакуз, ми со самолётэз уськытыны быгатӥм. Со понна мыным Горд Кизили орден сётӥзы.

Мон верай ни 50 самолётъёслэсь бомбаос куямзэс. Соку милям трос эшъёсмы быризы. Расчётысь воинъёс сяна, куинез шофёрмы но фельдшер. Соос ватскиллям автомашинаос улэ, нош бомба ӵапак соослэн ватскем интыязы усем. Соку милям куд-огез орудиосмы но ярантэм луизы. Огвакыт ми взводын, куинь орудие интые, одӥг орудиен гинэ ожмаськоно луимы. Батареялэн командирез но сӧсыртэмын вал. Сыӵе учыръёс, лек ожъёс мыныку, ӵем гинэ луыло вал. Мон, кылсярысь, солэсь азьло но командирме ыштӥ, суйзэ вандоно луизы, бӧрысь ӧй адӟылы ни. Тани Воткинскысь Сюткин вал. Со но сӧсырмыны шедиз. Чувашиысь удмурт пияш вал расчётам. Со бырыны шедиз. Эшъёсыз ыштонъёс войнаын трос вал.

- Борис Васильевлэн «А зори здесь тихие» повестез но соя пуктэм кинофильм возьматӥзы, зенитчикъёс пӧлын туж трос нылкышноос вылӥллям шуыса. Войнаын пӧртэм югдуре но учыре шедем нылкышноосты озьы ик быгатыса суредазы Юрий Бондарев, Виктор Астафьев, Василь Быков, Алесь Адамович, Эммануил Казакевич, асьмелэн Игнатий Гаврилов, Трофим Архипов но мукет писательёс. Вакчияк вераса, соос ваньзы таӵе суред кылдытӥзы: улонэз азьланьтыны вордӥськем нылкышно но пиосмурт сыло эзелен турнано возь вылын. Тани-тани соос асьсэды быдтӥсь кусо улэ шедёзы. Нош соос лэчыт шерем кортлэсь жичкетэмзэ уг шӧдо кадь, ог-огзэс ярато. Улонысь басьтэмын-а, малпаса кылдытэмын-а тодмо писательёслэн войнаысь нылкышно образъёссы? Тани тӥ но Наталья Сергеевнаен фронтын кузпалъяськемын.

- Война вакытэ пиосъёсын оградэ султӥзы трос нылкышноос. Соос вал связистъёс, разведчикъёс, радистъёс, зенитчикъёс. Милям полкамы орудийной расчётъёсын нылкышноос ӧй вал. Соос медицинской сестраос, фельшеръёс луыса ужазы. Мукетъёсызлы сямен ик, соослы но секыт йӧтылӥз ожын. Медсестраослы, лек ожъёс мыныку но, ватскыса улыны дыр ӧй вал. Я отчы ӧтё соосты, я мукет интые. Отын кинэ ке сӧсыртйз, мукетызлы маке но луиз. Ӧтё - солы котькыӵе дыре бызьыса мыноно юрттэт сётыны. Тани ми мынӥськом вал выль интые. Немец самолётъёс вадьсамы вуизы. Ми соку ыбылыны ӧм кутске, но соос бомбаос куямысь, пулемётъёсысь ыбылэмен, куд-огез сӧсырмыны шедьылӥз. Тӥни соку, машинаосыз дугдытытэк ик, медсестраос, кузовысь тэтчаса, сӧсырмемъёс доры бызьыса мынӥзы. Озьы соос, асьсэды жалятэк, котькыӵе учыре тыршизы боецъёслы юрттыны.

- Вералэ вал Наталья Сергеевнаен пумиськемды сярысь.

- Ми пумиським 1944-тӥ арын, Украинаын ожъёс мыныку. Сое лэзизы батареямы. Полкмы ӵапак дасяське вал мукет интые выжыны. Со интыяськиз мынам взводам. Тӥни озьы тодматским, ог-огмес яратӥм.

Война бере ми кык ар ӵоже служить каримы на Австриын но Венгриын. Соку ик малпамы кузпалъяськыны. Нырысь огазеяськимы офицеръёслэн собранизылэн решениезъя. ЗАГС-ёс армиын ӧй вал. Собере 1946-тӥ арын ветлӥмы гожтӥськыны Вена городэ, Австрилэн столицаяз. Отын вал союзной контрольной комиссилэн советской люкетэз. Бӧрысь со пӧрмиз асьме государстволэн Австриын представительствоезлы. Эшшо бӧрысьгес - посольствоезлы. Тӥни отын ми Наталья Сергеевнаен гожтӥськимы.

Со дырысен ортчиз ини 56 ар. Улӥськом, али но ог-огмес гажаса.

Будэтӥм одӥг пи. Со али ужа покчи ужбергатонын. Внукмы йылпумъяз 11-тӥ классэз. Малпасько, соос но асьме шудбурмес утисьёс; асьме улонмес азьланьтӥсьёс луозы шуыса.

* * *

Война бере Ильинск школаын ар дышетыса, Василий Михайлович вань улонзэ сӥзиз журналистикалы. Ньыль но ӝыны арлы сое басьязы Культурая министерствое. Отын со культурая министрлэн воштӥсез но, министр но вал. Отӥяз выльысь - редакция. 20 ар ӵоже кивалтӥз «Советской Удмуртия» газетэн. Удмурт поэзилэн азинскем сюресэз сярысь 80-тӥ аръёсы поттэм статьяяз Александр Белоногов гожтӥз, 50-тӥ аръёсысь егит кылбурчиос пӧлын Василий Михайлов тужгес кужмоез вал шуыса. 3эмзэ но «Натӥ» поэма, нимаз кылбуръёс... Нош собере?

- 1953-тӥ арын монэ юнматӥзы «Советской Удмуртия» газетлэн редакторезлы воштӥсе. Мыным, егит журналистлы, со туж бадӟым ныпъет вал. Трос ужано луиз журналистикая тодон-валанъёсме, быгатонме будэтон бордын. Литературной произведениос гожъяны дыры ичи кыльылӥз. Тодмо писательмы Михаил Петрович Петров, со редакциямы литературной объединениен кивалтэ вал, юрттылӥз мыным литература удысын но. «Натӥ» поэмаме но солэн юрттэмезъя ик гожтӥ. Со мыным шуиз: тон редакциын кивалтон уже выжид бере, литературае секыт луоз вамыштыны. Озьы ик луиз со. Бӧрысь тӥни редакторын ужаны кутски. Зэм, куд-огез кытын ке ужаса но романъёс но гожъяны быгато, литературае йыгмытгес вамыштыны тыршо, мынам озьы ӧз пӧрмы, шуод-а, мар-а. Журналистикае сюрес лёгыны кутски пионер газет бордысен, соин ик йылпумъяй, шуод ини, ужан сюресме.

* * *

Н. С. Хрущёвлэн ас кожазъя кивалтон вакытэз пумын, 1963-тӥ арын, «Советской Удмуртия» газет «Удмурт правда» нимын потыны ӧдъяз, быдэсак ӟуч кылысь берыктэм газет луиз. Валамон ни, редакцилэн коллективез пичиятэмын вал, газетлэн кыл тӥрлыкез куанермиз, лыдӟисьёсыз унолы кулэсмизы. Бӧрысьгес удмурт газетлы азьло нимыз ик берыктэмын вал, редакциез но выльысь ас кожаз ужаны кутскиз. Нош редактор ӟучезлы но, удмуртэзлы но элькун газетъёслы одӥг возизы на. Солы воштӥсе 1965-тӥ арын юнматэмын вал Василий Михайлович. 1967-тӥ арын ини огазеям редакциосты нош ик висъязы, «Советской Удмуртилэн» аслаз редакторез луиз. Та ужез оскизы Василий Михайловичлы.

- Со аръёсы Хрущёв ваньзэ общественной организациос вылэ пыкиськыса лэсьтыны турттэ вал, - тодаз вае Василий Михайлович. - Министерствоосыз но я быдто, я мукетыныз огазеяло вал. Озьы ик выризы театръёсын. Ми партилэн Сарапул горкомезлэн секретареныз В. П. Макаровен соку утьыны быгатӥм отысь драмая театрез. Сое город чотын возьыны соглаш луизы. Ёросъёсын кылдытэмын вал культурая общественной кенешъёс. Соос номыре радъяны уг быгато вал. Тӥни соин но мон асме культурая министрысь мозмытыны но редакцие берыктыны кури.

Василий Михайлович 20 ар ӵоже компартилэн Удмурт обкомезлэн бюроезлэн членэз вал. 29 ар ӵоже Удмурт АССР-ысь Вылӥ Кенешлэн куать созываз сое депутатэ бырйылӥзы. Со озьы ик трос аръёс ӵоже кивалтӥз Удмуртиысь Журналистъёслэн огазеяськонэнызы, «Знание» обществоен. Мукет сямен вераса, со вань улонзэ калыкен ужаз-кивалтӥз. 60-тӥ-80-тӥ аръёсын ӵошатыса, берло дыре удмуртъёс кивалтон ужын ичи но ичи кылё. Озьы ик Кун Кенеше но соос калыкмылэсь правооссэ утьымон уг люкасько.

- Малы меда, Василий Михайлович, фронтын удмуртъёслы командир-кивалтӥсь луыны оско вал, нош вордскем шаерамы асьмеды нырк каро?

- Коммунистической партия кивалтон вакытэ Центральной Комитетлэн сыӵе вал политикаез: котькуд республикаысь, кыӵе калыклэн нимыныз со нимамын, со калыклы паськыт сюрес усьтоно котькыӵе удысэ, озьы ик - кивалтонэ но. Тани, шуом, асьме Удмуртиын но депутатэ республикалэн Вылӥ Кенешаз яке СССР-ысь Вылӥ Кенеше, РСФСР-ысяз верало вал: сомында удмуртъёсты быръёно, кӧня люкетсы вань соослэн калык пӧлын. Озьы ик тросаз министерствоосы но, тужгес но сыӵеосаз, кудъёсыз калыкен нуналмысь ужаны кулэ, министре юнмато вал удмуртэз. Тани, шуом, Культурая, Калыкез дышетонъя, Социальной юрттэт сётонъя, мукет министерствоосы, озьы ик - прокурорез, Вылӥ судэн кивалтӥсез. Тӥни сыӵе кивалтӥсь ёзъёсы одно ик пукто вал удмуртэз. Бӧрысь сыӵе курон интыысь кивалтӥсьёс азе пуктӥсь ӧз луы ни. Ваньмыз ас эрказ кошкиз. Нош асьмелэн общественной организациосмы, тани, шуом, «Удмурт кенеш» организацимы, сыӵе ужпумъёсты юн-юн пуктыны уг быгаты на. Соин ик берло быръёнъёсы Ижевскысь Думае кык гинэ удмурт быръемын. Азьвыл сое одно ик лэсьтысалзы озьы, кӧня городын удмуртъёс, сомында процентэз ик соос луысалзы депутатъёс пӧлын.

Татын, мон сямен, кин ке вылэ ӝожтӥськыса ужпумез уд быдэсты. Асьме удмурт калыкез огазеясь общественной организациослы, озьы ик кивалтӥсь органъёслы, Кун Кенешлы та ужпумез эскерыса лэсьтоно вылэм азьло сямен ик. Соку ӧй луысалыз ог-огед вылэ ӝожтӥськон, ог-огдэ ултӥяны тыршон. Асьме республикаын али дыре вань «Удмурт Кенеш», мукет калыкъёслэн культурая огазеяськонъёссы. Мон уг шуиськы, кин ке чотын, мукет калык чотын сое озьы лэсьтоно. Котькудӥзлы луонлык сётоно ас калыкезлэсь представительёссэ кивалтӥсь органъёсы ыстыны.

Пичи Пурга ёросысь Выль Моньялась клуб азе пуктэм синпелет вылын 78 нимтул гожтэмын, отын фронтын вань быремъёс пусъемын. Нош ваньзэ-ӧвӧлзэ дуннеез фашизмлэсь утёнэ татысь 117 ожгарчи пыриськемын. Вормонэн 39 бертэмъёс пӧлысь туннэлы огез гинэ быдэс войнаез пырпотэмез вань на. Со - Россия Федерациысь культура удысысь сӥё-дано ужась, элькунысьтымы уно журналистъёслы но писательёслы пыд йылазы султыны юрттэм адями В. М. Михайлов.


Источник:

Михайлов В. М. Вена кузьмаз яратон / В. М. Михайлов ; записал Вячеслав Михайлов // Удмурт дунне. - 2002. - 21 июня. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"