Михайлов Василий

Материал из Воршуда
Перейти к: навигация, поиск

Василий Михайлович Михайлов (1923-тӥ ар 23-тӥ гудырикошкон, Пичи Пурга ёрос Выль Монья гурт – 2015-тӥ ар 5-тӥ южтолэзь, Ижкар) - удмурт кылбурчи, публицист.

Mihaylov.png

Улон сюресэз

Михайлов Василий Михайлович вордӥськиз Пичи Пурга ёросысь Выль Монья гуртын 1923-тӥ арын 23-тӥ гудырикошконэ (августэ) огшоры крестьян семьяын. [1]

Вася Михайлов, Улын Юриысь семилеткаез йылпумъяса, 19381941-тӥ аръёсы Можга педучилищеын дышетскиз, ветлӥз литературной кружоке. Кружокен соку кивалтӥз поэт Филипп Александров. Дышетсконзэ йылпумъяса, Улын Юриысь школае ужаны пыриз гинэ, ӧз кылды: быдӟым тылож кутскиз. 1941-тӥ арын коньывуон толэзе сое армие басьтӥзы. [2]

Секыт йӧтӥз пинал муртлы. Вордскем шаерезлэсь палэнэ потамтэ егит пияш шедиз Брянск фронтэ. Орудилы командире юнматӥзы. Со ик луиз солэн оже пыремез. Ожын ваньмыз агай-вынъёс луизы. Расчётаз сизьым мурт. Со самой егитэз – 18 аресъем удмурт. Нырысь-валысь кӧбераз ик вал, но трос тыложъёс пыр потэм эшъёсыз котькызьы юрттыны турттӥзы, котьку ик командирзы понна дурбасьтылӥзы. Соин но, соослэн ӟеч коллективзы кылдӥз. [3]

1944-тӥ арын пӧсьтолэзе 1404-тӥ зенитно-артиллерийской полк Украиналэн шундыпуксён палаз ожмаськиз. Огпол В. Михайловез, взводлэсь командирзэ, штабе кенеше ӧтчазы. Отысь кошкыкуз ини, полклэн врачез дугдытӥз: "Лейтенант эш, ми тӥляд батареяды санинструктор ыстӥськом, сое сьӧрады басьтэ вал". Нош вӧзаз егит гинэ нылаш сылэ: пельпумаз санитар сумка ошемын, мугорыз веськрес, пилотка улысьтыз баблес йырсиосыз потэмын, синъёсыз чагыресь но либыт-либыт учко. Со синъёс командирлэн сюлэмаз шуныт тылгизьы пальккизы но сое небӟытӥзы. Командир Наташаез (нылашлэн нимыз сыӵе вылэм) машинаяз пуктӥз но, батареязы пала дыртыса ворттӥз. Тӥни озьы соос Наташаеныз нырысьсэ пумиськизы.

Нош ож сюреслэн пумыз-йылыз уг ик адӟиськы на вал. Львов карез басьтыкузы батыр ожмаськемез понна дивизизылы "Львовской" ним сётӥзы, нош Польшаысь эгыр поттон "Домбровской" бассейнэз мозмытэмез Богдан Хмельницкий орденэн пусъемын. Германиын но зол ожмаськемзы сярысь Вылӥ Главнокомандующийлэн И. В. Сталинлэн приказъёсаз уно пол вераллямын. 1944-тӥ арын В. М. Михайловлы Горд Кизили орден сётӥзы, нош Наталья Сергеевналы — "За боевые заслуги" медаль.

Лек ожъёс мыныку но, Василий Михайлов Наташаез син азьысьтыз ӧз ыштылы ни… Нош кузпалъяськизы Михайловъёс Австриысь туж чебер Вена карын. Тани ӝоген 70 ар тырмоз соослэн артысь артэ, ваче ки кутӥськыса, улонлэн сюресъёстӥз вамышъямзылы. [4]

1947-тӥ арысен, армиысь бертыса, В. Михайлов ужаз Пичи Пурга ёросысь Ильинск школаын. 1–3-классъёсын дышетскисьёсыз сётӥзы. Но дышетӥсьёс тырмымтэен, косӥзы на бадӟым классъёсын биология но физкультура урокъёсты нуыны. Татын одӥг ар гинэ ужаса вуттӥз. 1948-тӥ арын Пичи Пургала «Ударник» ёрос газетлы редакторе басьтӥзы. Отын но одӥг ар сяна ужаса ӧз вутты. [5]

1949-1951-тӥ аръёсы дышетскиз Свердловскысь партийной школаын.

1953-тӥ арын Василий Михайловичез юнматӥзы «Советской Удмуртия» газетлэн редакторезлы воштӥсе. Солы, егит журналистлы, со туж бадӟым ныпъет вал. Трос ужано луиз журналистикая тодон-валанзэ будэтон бордын. [3]

1955-1958-тӥ аръёсы Москваысь Вылӥ партийной школаез йылпумъяз. Дораз бертыса, В. Михайлов выльысь ас редакцияз ик берытскиз, кыл кутӥсь секретарь луыса ужаз.

1959-тӥ арын сое юнмато Удмурт АССР-ысь культурая министрлы воштӥсе, ар ортчыса – министре (1960-1965). 1965-тӥ арын со луиз «Советской Удмуртия» но «Удмуртская правда» огазеям газетъёслэн редакторлэн воштӥсез. Нош 1967-тӥ арысен, 20 ар ӵоже, Василий Михайлович кивалтӥз «Советской Удмуртия» газетлэн редакциеныз. [2]

Василий Михайловичез трос аръёс ӵоже бырйылӥзы общественной ужъёсы: 29 ар ӵоже Удмурт АССР-ысь Вылӥ Кенешлэн куать созываз депутатэ, 20 ар ӵоже КПСС-лэн Удмурт обкомезлэн бюроезлы членэ, элькун Центральной быръён комиссие председателе. Трос аръёс ӵоже кивалтӥз Удмуртиысь Журналистъёслэн огазеяськонэнызы, «Знание» обществоен.

Кузь улон сюрессэ Василий Михайлович Михайлов дано ортчиз. Со улонэз яратӥсь адями вал. Улӥз Ижкарын, но ӵемысь вуылӥз вордскем палъёсаз. Сое отын тодӥзы но гажазы. [2]

Василий Михайловичлэн батыр ожмаськемез но усто ужамез пусъемын орденъёсын но медальёсын, элькунысь Вылӥ Советлэн но Правительстволэн Почёт грамотаосыныз, РСФСР-ысь культура удысысь дано ужась ним сётэмын.

В. М. Михайлов улонысь кошкиз 2015-тӥ арын 5-тӥ южтолэзе. [6]

Гожъямъёсыз сярысь

Василий Михайлович Михайлов нырысетӥ кылбуръёссэ гожъяны кутскиз Можга педучилищеын дышетскыкуз. Печатласькиз «Дась лу!» газетын. Война бере гожъям кылбуръёсыз сӥземын вал тыложысь батыръёслэн-солдатъёслэн подвигзылы, нылкышноослэн тыложлэн мышказ ужамзылы, яратонлы но эшъяськонлы. Бӧрысь В. Михайловлэн произведениосыз печатласькизы «Кизили» альманахын, «Молот» журналын, «Советской Удмуртия» но ёрос газетъёсын, пыртэмын вал «Егитъёслэн куаразы» (1950), «Ӟардон» (1951), «Молодые голоса» (1954), «Поэты Советской Удмуртии» (1955) но «Стихи удмуртских поэтов» (1957) огъя бичетъёсы. 1955-тӥ арын нимысьтыз бичетэн «Натӥ» поэмаез потӥз. [1] Удмурт поэзилэн азинскем сюресэз сярысь 80-тӥ аръёсы поттэм статьяяз Александр Белоногов но гожтӥз, 50-тӥ аръёсысь егит кылбурчиос пӧлын Василий Михайлов тужгес кужмоез вал шуыса. «Натӥ» поэма, нимаз кылбуръёс... Нош собере?

Газетэ ужаны выжеменыз, трос ужано луиз журналистикая тодон-валанзэ будэтон бордын. Литературая произведениос гожъяны дырыз ичи кыльылӥз. Тодмо писатель Михаил Петрович Петров со вакытэ редакциын литературая объединениен кивалтӥз. Василий Михайлов «Натӥ» поэмазэ но со юрттэмъя ик гожтӥз. М. Петров егит авторлы шуиз: тон редакциын кивалтон уже выжид бере, литературае секыт луоз вамыштыны. Озьы ик луиз со. [4]

В. М. Михайлов «Советской Удмуртия» газетын валтӥсь редакторын ужан вакытаз ик, культурая но бытъя ёзэтын ужаз Геннадий Дмитриевич Красильников. Соос туж юн эшъяськизы. Литератураын но ог-огзылэсь адӟем каризы. [5] Дышетскон но ужан аръёсаз Василий Михайлов мылысь-кыдысь пыриськиз литературае. Солэн трос гожъямъёсыз газетъёсын, журналъёсын но огъя бичетъёсын печатласько. Нимаз книгиаосын озьы ик поттэмын «Гуртэ сюрес» (1962), «Сюлэм ӧте» (1983) веросъёсын сборникъёсыз. Берло аръёсы данак публицистической статьяос гожъя. 2003-тӥ арын, авторлэн 80 арес тырмонэзлы сӥзьыса, «Туриос дор пала лобо» книгаез потӥз. Татчы люкамын веросъёсыз, очеркъёсыз но пьесаез. Очеркъёсаз егитъёс но туала улон сярысь сюлмаськонъёссэ вера, азьло пӧртэм адямиосын пумиськылэмъёсыз сярысь ивортэ.

Премиосыз

Орден Отечественной войны II степени.

Орден Красной звезды.

Орден Трудового Красного знамени.

Россия Федерациысь лулчеберет удысысь сӥё-дано ужась, 1968 [7]

Библиография

Книгаосыз

Гуртэ сюрес. – Ижевск : Удмуртское книжное издательство, 1962. – 56 с.

Натӥ : поэма. – Ижевск : Удмуртское книжное издательство, 1955. – 28 с.

Сюлэм ӧте : веросъёс. – Ижевск : Удмуртия, 1983. – 80 с.

Туриос дор пала лобо : веросъёс, пьеса, очеркъёс. – Ижевск : Удмуртия, 2003. – 111 с.

Статьяосыз

Кузьым : одӥг ёзэн драма // Кенеш. - 2013. - № 9. - С. 3-18.

Тылӝуын – уӵы кырӟан : о супругах Михайловых – участниках Великой Отечеств. войны // Кенеш. – 2006. – N 4. – С. 46-50.

Уже кутэм литература

  1. 1,0 1,1 Яшина Р. Василий Михайлов (1923) // Писатели и литературоведы Удмуртии : биобиблиогр. справ. / сост. А. Н. Уваров. – Ижевск, 2006. – С. 164.
  2. 2,0 2,1 2,2 Василий Михайлов // Малопургинская земля – моя родина / сост. В. С. Зорина. – Ижевск, 2002. – С.324-325.
  3. 3,0 3,1 Михайлов В. Вена кузьмаз яратон / Вячеслав Михайлов // Удмурт кизилиос : очерки, зарисовки, интервью (2001-2007). – Ижевск, 2007. – С. 70-71.
  4. 4,0 4,1 Михайлов В. Тылӝуын – уӵы кырӟан / Василий Михайлов // Кенеш. – 2006. – № 4. – С. 46-50.
  5. 5,0 5,1 Хайдаров Р. «Ӵуказе нунал – егитъёс киын» // Инвожо. – 1998. – № 8-9. – С.50-53.
  6. Мур кайгыриськом [Электронный ресурс] // Удмурт дунне. – Режим доступа: http://udmdunne.ru/2015/03/14343/
  7. Михайлов Василий Михайлович // Удмуртская Республика : энцикл. – Изд. 2-е, испр. и доп. – Ижевск, 2008. – С. 475-476.