Марков Виктор Карпович

Материал из Воршуда
Перейти к: навигация, поиск

Валъёсы мынам – куасъёс

В.К. Марков

Берло дыре Россиысь ӵошатсконъёсын бадӟымесь вормонъёс басьто Можгаысь куасэн бызьылӥсьёс. Туннэ нуналлы ньыль мурт – Дмитрий Япаров, Александр Уткин, Елена Решетникова но Лилия Васильева – Россилэн сборнояз кутэмын. Та спортсменъёслы вылӥе ӝутскыны юрттэ тренерзы Виктор Марков.

Виктор Карпович – вылӥ категориен дышетӥсь, Можгаысь олимпиецъёсты дасянъя нылпи спортшколаын 25 ар ужа ни. Солэн дышетэм пиналъёсыз пӧлысь куать мурт – спортъя мастер, кызьлэсь ятырез спортъя мастере кандидатъёс луизы. Спортын вылӥ азинсконъёс басьтыны юрттэмез пусъемын «Россия Федерациысь физкультурая отличник» гадьпусэн, «Удмурт Республикаысь дано тренер» нимын. Нылпиосын ӟеч ужаны быгатэмез понна ик воргоронлэн туспуктэмез туэ пыртэмын шаерысьтымы Данъян пулэ.

Чебершур гурезьёс чилязы

- Котькуд адямилэн улонэз ас сяменыз радъяське. Кин ке ялан гурезе тубе, кин ке малпамтэ шорысь шуг-секытъёсын пумиське, нош мынам улонэ ялан огвыллем, – веранзэ мытэ Удмуртиысь одӥгез кужмо тренер Виктор Марков. – Вордски но будӥ Можга вӧзысь пичигес гинэ Чебершур гуртын. Вазенгес со нимаз гурт вал, нош табере городлэн вужераз шедиз.

Пичи дырысен синмаськи тол куазьлы. Адямиос кынмо, биняськыса ветло, нош ми, эшъёсыным, ӵошатскыса куасэн нискыламы, гурт котырысь вань гурезьёсты волятыса возимы. Куд-ог дыръя куспамы ӵошатсконъёс но радъяллямы. Нош кӧня куас чигылӥмы! Ярано коть, куас поттон завод – «Красная звезда» – бордамы вал (серекъя).

Куасэн нискыланы, пе, усьылытэк уд дышы, гурезьёсты яратэме ик бадӟым спортэ вуттӥз кадь. Школаын дышетскыкум, пӧртэм ӵошатсконъёсы пыриськылӥ, город но ёрос ужрадъёсын вормисе потай. Бадӟым классъёсысен нырысетӥ разрядлэсь куронзэ быдэстӥ. Соин лэся, школаез йылпумъякум, тодӥ ни кин луонме. Чайковский городысь мугорез кыдатон культурая институтэ вамыштӥ. Студент дыръям но куасъёслэсь ӧй люкиськылы. Урал зонаысь спортсменъёс пӧлын вить кужмоез пӧлын ветлӥ.

Институтын дышетсконме йылпумъяй гинэ, армие басьтӥзы, Германие келязы. Малпай вал, спортэн эшъяськемме тодыса, бордам зол тэбинёзы шуыса. Янгышаськем, спортъя ӵошатсконъёс отын чик ӧй вал, шуыны луоз.

Кык ар сурон сапег нуллытозям, спортлэсь чылкак мӧзми. Армиысь бертыса, тренер-преподавательлэсь ужзэ ӵектӥзы. Озьы мон вуи Можгаысь «Элеконд» заводэ. Ужась калыкен огкыл шедьтыны секытгес вал. Пичи дыръязы спортэз яратон мылкыд пыӵатӥллямтэ бере, быдэ вуэмъёсты бадӟым ӵошатсконэ уд кыскы. Соин ик бадӟымъёсын ужан мӧзмытгес потӥз. Нылпиос доры вамыштӥ.

Нуныямез котькин яратэ

- Нылпи спортшколаын 1986-тӥ арысен ужасько. Пиналъёсын ужан понна соосты валаны быгатоно, яратоно. Азьвыл аръёсы куасэн нискыланъя секцие 5-тӥ классысен гинэ кутӥськомы вал, табере 1-тӥ классын дышетскисьёс но дорамы шумпотыса ветло. Туала нылпиослэн пыдын я куасэн бызьылэмзы уггес поты бере, ӵем дыръя анай-атайёсынызы кенешоно луэ. Жаляса верано, тросэз мумы-бубыос мода сьӧры уйиськыны выро. Школае мынэмзылэсь азьло ик пиналъёссэс тренажёр залъёсы валто. Бен, липет улын бызьылон-тэтчан трослы капчи тӧл шорын ветлонлэсь.

Можгаысь спортсменъёс бадӟымесь азинсконъёс басьтыны кутскизы ни Совето Союзысь но Россиысь дано тренер Сергей Яковлевич Плеханов ужан аръёсы ик. Пудо эмъянъя техникумын дышетскисьёс дуннеысь ӵошатсконъёсы пыриськылӥзы. Нимо-дано тренер бордын мыным но ужаны кылдӥз. Ас удыссэ ӟеч тодӥсь адями бордын котьку капчи вал, кулэ интыяз визьнодаз но, индылӥз но. Солэсь верамъёссэ, визь-кенеш сётэмзэ туннэ но тодам вайисько.

Тренерлэн ужез психологлэн выллем. Котькуд пиналэн огкыл шедьтыны кулэ. Бадӟым нылпиос азе чурытгес куронъёс пуктӥськомы ке, тэшкылиослэн кузязы гинэ ветлӥськомы. 6-7 аресъемъёслы куасэн нискылан мед кельшоз. Одӥг пол тышкаськид ке, куас вылэ кужмысь уд султыты ни, та амалэз пыраклы адӟемпотостэм карозы.

Спортзалъёсын ортчись секциосы куд-ог пиналъёс ӧтьытэк но мыно, нош куасэн бызьылӥсьёсты асьмелы – тренеръёслы – утчано луэ. Ар куспын куамын пол но, дыр, школае ветлӥськомы, дышетскисьёсын, анай-атайёсын кенешиськомы. Ужаны кутскон аръёсме тодам вайисько ке, вань шуг-секытъёс пыкъяськылӥзы инвентарь борды. Кезьыт вуж пыдкукъёс нокинэ бордазы ӧз кыске, куас сюресъёсты но ӵем дыръя асьсэос спортсменъёс лёгылӥзы.

Туала вакытэ югдур умой пала воштӥськиз ке но, дорамы бызьыса уг лыкто. Ярам коть, спортэз яратӥсь семьяос быриллямтэ на. Анай-атайёссылэсь адӟем каро нылпиоссы. Сыӵе семьяосты тренеръёс синйылто. Пиналъёссылэсь куас вылын возиськыны быгатэмзэс шӧдыса, дорамы ӧтиськомы. Нырысь ик эскериськомы нылпиослэсь тазалыксэс, вормонъёс сярысь кылпум но ум поттылӥське. Куасэн бызьылонъя секцие лыктэмъёс пӧлын кузёяськыны кулэ эшъяськон, ог-огдэ валан. Лябъёссэ обидьыны ум лэзиське, нош кужмооссэ – йӧнъяськыны.

Туннэ кадь ик тодам вайисько куд-ог пиналъёслэсь дорам лыктэмзэс. Саша Уткин, 4-тӥ классын дышетскыкуз, куас вылэ султӥз, Дима Япаров – 6-тӥ классысен. Та пиос нырысетӥ занятиысен ик мыным кельшизы. Азязы пуктэм ужпумез котьку быдэстыны тыршизы, анай-атайёссы но нылпиоссылэн вормонъёссы понна сюлмаськылӥзы. Та вакытэ эшшо кыкез – Ильшат Нигматуллин но Евгений Байбородов – Россиысь сборное шедён понна нюръясько. Шумпотӥсько Елена Решетникова но Лилия Васильева понна, кылем арын соос Россиысь егит нылъёс пӧлын тужгес кужмоосыз луизы.

Вуж дӧдьыен кыдёке уд нискылты

- Аръёс ортчемъя куас базамы вужмыны ӧдъяз, пичигес пу юртын ӟоскыт луиз. Озьы ке но куасэн бызьылыны мылкыд карисьёсмы 60 адями пала возиськизы, нош берло дыре соослэн лыдзы 82-озь вуиз. Кылем арын Гурт тол шудонъёс Можга городын ортчизы. Бадӟым ужрадлы сӥзьыса, милемлы выль база пуктӥзы. Чебер юртмы усьтӥськыса ӧз вутты, нош мугорзэс кыдатыны мылкыд карисьёс тачак люкаськизы. Выль база пиналъёслэсь мылкыдзэс эшшо но лӧпкытӥз.

Можга пиналъёс шаерысьтымы ӵошатсконъёсын ялан 3 кужмо командаос пӧлын возисько. Удмуртиысь школаын дышетскись пиналъёслэн Президент шудонъёсазы Можгаысь команда 6 пол вормисе потаз, быдэн 2 пол азвесь но туй кубокъёс утӥз. Нош туэ толалтэ таӵе ӵошатсконъёс Можга городын ортчыны кулэ, озьы бере, куно пумитаны милемлы эшшо но зол дасяськоно.

Пиналъёслэн ӝыны вормонзы тренер бордысь потэ. Нылпиосты куасэн бызьылыны дышетэм сяна, куасъёссэс утялтыны валэктӥськомы. Куасъёс со валъёс выллем, кузязы ӧд ветлы ке, кыдёке уз нуэ. Соин ик дуно тӥрлык вӧзы умой мазьёс луыны кулэ. Туала вакытэ дунтэмгес куасъёсын Можга городын гинэ но вормисе уд поты ни. Шаерез паймытон понна эшшо но ӟечлыкогес, дуногес «валъёс» кулэ. Ярам коть, Президент шудонъёсын вормисе потэммес дунъяло Можга городысь кузёос. Арлы быдэ выль куасъёс кузьмало. Соос милемлы тренировкаос ортчытыны туж юртто.

Куасъёсмы ӟечесь шуиськомы ке но, анай-атайёстэк бадӟым вормонъёс ӧй басьтысалмы, дыр. Пиналъёслэн нырысетӥ юрттӥсьёссы луо соос. Кужмо луон понна нылпиоссылы дуно куасъёс (кык-куинь кузлэсь ӧжыт луыны кулэ ӧвӧл), ӟеч дӥськут басьто. Тау кареме потэ пиналъёссэс но милемыз валамзылы, юрттэмзылы. Оскем потэ, милям пиналъёсмы одно ик вылӥе ӝутскозы. Соку юрттӥсьёсмы но тросгес луозы. Данъяськисько, дышетэм пиналъёсы пӧлысь куд-огез туннэ но спортлэсь ӧз люкиське. Куасэн уг бызьыло ке но, ӵошатсконъёс ортчытыны коньдонэн юртто. Синмаськыса учкиськом Россиысь сборное шедем пиналъёс шоры. Кылсярысь, Елена Решетниковалы но Лилия Васильевалы куасъёс но дӥськут та вакытэ Россия ласянь висъяло. Валамон, можгаослэнэн соосты уд ӵошаты. Милямъёслэн одӥг чебер костюмзы вань, соосты бадӟым ӵошатсконъёс дыръя гинэ дӥсяськомы.

Жильыртӥсь «Ошмес»

- Одӥг ласянь учконо ке, Можга город бадӟым кадь: вокзалэз, училищеосыз, предприятиосыз вань. Нош мон мукетызлы шумпотӥсько – городлэн котькуд микрорайоназ школаос, спортзалъёс пуктэмын. Озьы бере, спортэз гажасьёс трос. Туж валаса радъямын спортъя пӧртэм секциос. Кылсярысь, 4-тӥ, 6-тӥ но 9-тӥ школаосын биатлонистъёсты кыдато, 3-тӥ школаын теннисэз гажало, нош куасэн бызьылӥсьёс ми доры, нылпи спортшколае, тросгес люкасько 1, 3 но 10 номеро школаосысь. Вань тренеръёс ог-огзылы юрттӥськыны тыршо. Бадӟым ӵошатсконъёс дыръя одӥг школаез но ум люкиське, можгаос котьку одӥг команда выллем. Огкылысь ужаммы ик юрттэ вылӥ вормонъёс басьтыны. Токма шорысь шат Можгаысь олимпиецъёсты дасянъя нылпи спортшкола комплексной лыдъяське. Куасэн бызьылэм сяна, биатлон но пыдын бызьылон пыро на школалэн бурд улаз.

Гурт тол шудонъёсты ас дораз ортчытӥсь ёросъёслы куас база кузьмало. Данъяськыса вераны быгатӥсько, милямез тужгес ӟечез луэ шуыса. Кылиськон-дӥсяськон интыез сяна, тренажёр залэз но гулбечез вань. Куд-ог ёросъёсын лэсьтӥськисьёс ас ужзэс шаплыгес йылпумъян вылысь суп-сап тыршизы шуыса веранъёссэс кылэм вань, нош милямъёсыз котькуд вамышсы пумысен кивалтӥсьёсын кенешизы, тренеръёслэсь мылкыдъёссэс но санэ басьтӥзы. Бадӟым гулбечаз куасэн бызьылыны мылкыд карисьёс понна но инты шеде. Асьсэлэн куасъёссы ӧвӧл ке, адямиос, прокатысь басьтыса, нискыланы быгато.

«Ошмес» куас базамы туж умой интые пуктэмын. Бен, Гурт шудонъёс дыръя куд-ог спортсменъёс курланы выризы ке но базамес, центрлэсь кыдёкегес интыяськемын шуыса, можгаослы со туж кельше. Школаын дышетскисьёс, студентъёс, гуртъёсысь лыктэм спортсменъёс мугорзэс кыдатыны быгато. Эркын бусыын ваньмызлы инты шеде. Нырысетӥ лымы усе гинэ, калык куас база пала кыстӥськыны кутске. Тани туэ но лымы ӧз люкаськы на, нош спортсменъёсмы дасо мында куасъёссэс чигизы. «Валъёсты» тупатъян но тренер вылэ усе.

Выль база усьтӥськемен, пельпум вылысь эшшо одӥг ужпум усиз на кадь. Та дырозь куас сюресъёс понна но тренер кыл кутылӥз. Нуналлы быдэ «Буранэн» ужай. Табере югдурмы ӧжытак тупатскиз, шуыны луоз. Куас сюресъёсты нимысьтыз адями волятэ. Гурт шудонъёс дыръя милемыз «Тайга» снегоходэн шумпоттӥзы. Солы луыса, куас сюресъёсмы эшшо но паськытазы. Бен, куд-ог дыръя бензинлы шугъяськонъёс кылдо ик, но шуг-секытысь потыны юртто ужбергатӥсьёс, ӟеч адямиос, азьвыл спортсменъёс.


Сётэм кылэз быдэстоно

- Нылпи тренеръёс будэтыны кулэ выль Кулаковаосты, Тихоноваосты. Сётэм кылмес быгатэммыя быдэстыны тыршиськомы. Валамон, спортшколае ветлӥсь пиналъёсты ваньзэсты чемпион уд кары. Трос аръёс ӵоже ужамме эскерыса потӥ но аслым йылпумъянъёс лэсьтӥ: котыр ласянь быгатонлыко пиналъёс ньыль арлы одӥг пол вордско. Соин, лэся, соос классэн-классэн луо. Кылсярысь, 11-тӥ классын дышетскисьёс пӧлысь тросэз пиналъёс, Россиысь ӵошатсконъёсы потаса, вормонъёсын бертӥзы, нош бӧрсязы мынӥсьёс лябесьгес. Отӥяз нош ик кужмо пиналъёс люкаськемын.

Та вакытэ монэ таӵе ужпум сюлмаськытэ: олимпиецъёсты дасянъя нылпи школа луиськомы бере, ӵем дыръя Россиысь ӵошатсконъёсы потаськомы, нош Иж палась «Югдон» спорткомплексэ шедьыны ум быгатӥське. Отын гурезьёсыз, роликен бызьылон сюресъёсыз спортсменъёслэн куронъёссылы тупало. Нош ми быдэс ар ӵоже мугормес кыдатӥськомы асьме базаямы гинэ. Гужемъёсы лагерь радъяськомы, питрано куасъёсын бызьылӥськом. Туннэ нуналлы дуно роликъёсмы кызь куз пала лыдъясько, соосты тужгес кужмоосызлы гинэ оскиськомы. Нош мукетъёсыз дунтэмъёсыныз бызьыло.

Иже потаны ум быгатӥське, роликен ворттылон сюресэз базамы котыре кылдытоно луиз. Жаляса верано, солэн кузьдалаез 600 метр гинэ, быдэсак ӵошкыт интыын. Сое 1 иськемозь ке но кузёмытоно вылэм, гурезьёсыз но мед луысалзы. Россилэн сборнояз соку эшшо но тросгес можгаос шедьысалзы.

Берло дыре трос верасько кужмо спортсменъёс понна нимысьтыз интернатъёс кылдытон пумысен. Таӵе малпанъёслы мон чутрак пумит луисько, пиналъёс будыны кулэ ас семьяосазы. Интернатэ тужгес кужмо нылпиосты гинэ интыяно. Соос ик улонзэс спортлы мед сӥзьысалзы. Нош асьмелэн кызьы луыса кошке? 60 мурт пӧлысь 10-эз но бадӟым спортэ уг вуы. Нош кӧня коньдон кисьтӥське! Ярано коть, берло дыре шаерысьтымы кивалтӥсьёс спортсменъёслэсь но тренеръёслэсь вормонъёссэс дунъяны кутскизы. Таӵе юрттэт вормонъёс вылын но шӧдӥськытэк уг кыльы.

Дуно вордскем палъёс

- Ас вакытаз Россиысь сборное ӧтьылӥзы, нош мон ялан вордскем палъёсам. Одӥг-кык нуналлы ӵошатсконэ потакум гинэ но, спортшколалэсь мӧзмыса вуисько, монтэк ваньмыз куашкалоз, кожасько, лэся. Ма веранэз арнялы-толэзьлы кошкон сярысь, вань мытэм уж шальтралоз. Асме буйгатӥсько, бадӟым спортсменозь будэм пиналъёсылэн нырысетӥ тренеренызы весяклы кылисько.

Елена Решетниковалэн но Лилия Васильевалэн та нуналъёсы бадӟым стартъёссы луыны кулэ. Сыктывкарын егитъёс нюръяськозы нырысетӥ нылпи Олимпиадае шедён понна, со толалтэ Австриын ортчыны кулэ. Нылъёсмылэн но отчы шедьыны луонлыксы вань, асьсэды эшшо но кужмогес мед шӧдозы шуыса, доразы ветлытэк уз луы. Куд-ог дыръя та нылъёс жаль но пото. Кыкназы но школаез йылпумъяло, та стартъёсын ваньмыз умой радъяськиз ке, апрель толэзь пумын гинэ вордскем палъёсазы вуозы. Дышетӥсьёс али ик сюлмасько, кызьы соос ЕГЭ-зэс сётозы шуыса. Кык кечез кутыны туж секыт.

Нылпиос гинэ ӧвӧл, тренеръёс но тодон-валанъёссэс будэтон сярысь сюлмасько. Куасъёс золгес мед нуозы шуыса, дуно мазьёсын ужаны дышетсконо, парафин сярысь уг ик вераськы. Нуналаз 100 грамм ум тырмытӥське. Озьы ик Интернетын бугыръяськоно, журнал-газетъёс лыдӟоно луэ.

Уд но оске, 25 ар ужатозям, одӥг пол гинэ быдэс отпускме семьяеным ортчытыны кылдӥз. Со сяна, арлы быдэ 1-тӥ январе шутэтскисько. Ярано коть, семьяе монэ вала. Кузпалэным Елена Анатольевнаен ӵош кык пинал будэтӥмы. Ваньзы ужамме дунъяло. Ас вакытаз спортын бадӟым вормонъёс басьтылӥз Вера нылмы. Гурт хозяйствоя академиын дышетскыкуз но, куасэн бызьылӥз на. Бадӟым курсъёсы вуыса, куд-ог преподавательёс куаретӥллям занятиоссэ трос келлямысь. Со кабен спортсэ аналтӥз. Владислав пимы 9-тӥ классын дышетске, школалэсь мозмытске гинэ, куас базае дыртэ. Куд-ог дыръя ас поннам малпасько: мытэм ужме нылпиосы мед азинтысалзы. Но спортсменлэн но, тренерлэн но ужзы капчи ӧвӧл. Олимп гурезьёс ваньмызлы уг йыбыртто.

Источник:

Марков В. К. Валъёсы мынам – куасъёс / В. К. Марков ; записала В. Емельянова // Удмурт дунне. - 2011. - 5 дек. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"