Мамонтов Анатолий Васильевич

Материал из Воршуда
Перейти к: навигация, поиск

Лудорвай но, Уругвай но чидатэк сое витё

А. В. Мамонтов

Туннэ асьме элькунын «Кин тужгес но тодмоез адями» шуыса юалляськон ортчытысалзы ке, малпасько, нырысетӥ вить мурт пӧлы одно ик шедьысал Анатолий Мамонтов. Сотэк кызьы? Россиысь но Удмуртиысь калык артист, искусствоосъя дано ужась, Ижевсклэн дано гражданинэз… Но, котьмалэсь азьло, со – «Италмас» ансамбльлэн йырыз но сюлмыз.

- Анатолий Васильевич, йырды ӧз поромы на-а? Тӥледлы 65 арес тырмемен ӟечкыласа, Владимир Путин телеграмма ыстӥз. Александр Волков, Москвае командировказэ куспетӥ карыса, юри тӥледыз ӟечкыланы Ижевске бертӥз. Вань газетъёс тӥ сярысь гожто. Туннэ тани (ми вераським 10-тӥ апреле – И. Л.) Удмурт радиое меӵак эфире ӧтё…

- Уг, йыры уг берга. Егит ӧвӧл ни ук. Данъян – мон понна дышем уж. Улон сцена вылын ортче ни бере, котькуд концерт дыръя калык кизэ чабе. Юбилеелы сӥзем ӝыт но концерт выллем вал ук. Адямиос отчы коньдонзэс сётыса лыктӥзы. Со дыре ик, мар ватонэз, вылӥ кивалтӥсьёслэн сокем дунъямзы шумпоттӥз. Но чебер, шуныт кылъёс мыным гинэ верамын ӧй вал, учкись тау кариз быдэс коллективлы.

- Озьы ик малпай, тӥ нош ансамбльды вылэ чӧлскоды шуыса. Котьма вералэ но, Мамонтов – «Италмаслэн» шорсюлмыз ук. Мон шугъясьскисько тодэ вайыны, шаерысьтымы кинэ меда нимысьтыз ӟечкылалляз та дырозь Россилэн Президентэз? Ну, валамон, Калашниковез ум вераське.

- Путинлэн телеграммаез сярысь азьло ӧй тоды. Пайми.

- Ма, калык но абдраз кадь. Уката ик созэ лыдэ басьтоно ке: азьло вакытэ 65 аресэз юбилей чотын ик ӧз лыдъяллялэ.

- Туж оскем потэ ни, Россиын искусство шоры власть ласянь учкон умояз шуыса. Озьы мед луысал. Нош арлыд сярысь ке верано, улонам озьы луиз: мон «Италмаслэсь» ӝыны арлы гинэ пинал. Нырысь солэсь юбилейзэ пусйиськом, отӥяз мынамез вуэ.

- Анатолий Васильевич, 40 ар ӵоже ни весь ог интыын, одӥг должностьын ужаськоды, эктонъя но кырӟанъя ансамбльлэн кивалтӥсез луиськоды. Неужто ӧз акыльты на? Кызьы чиданды тырме? Тани психологъёс но шуо ук, адями вить-дас арлы быдэ ужзэ воштыны кулэ.

- Тодӥськод-а, ачим но куддыр та пумысен малпаськонэ усисько. Уг но оскиськы кадь, сомында ар ортчиз ни шуыса. Со дыре ик асме буйгатӥсько. Аръёслэсь ортчемзэс шӧдыса уг вуттӥськы бере, мон шудо, мон аслам интыям.

Музыкалы дас ар дышетски. Котыр ласянь тодӥсько хормейстерлэсь но, аранжировщиклэсь но, дирижёрлэсь но, композиторлэсь но, режиссёрлэсь но ужзэ.

Куддыр поттӥсько студент дыръям лэсьтэм композициосме, гожъямъёсме. Соку ик син азям пуксе со вакыт. Макем мур пыӵамын вал сюлэмам чебер вожъяськон! Кыӵе золэсь коллективъёс ужазы со аръёсы асьме бадӟым странаын! Молдавиысь «Жок», Литваысь «Литува», Латвилэн «Дайнаез»… Нош ӟуч хоръёс кыӵе шумпоттылӥзы учкисез! Соосты адӟылыса, туж кужмо мылкыд ӝужаз сыӵегес ик адӟем карымон ансамбль кылдытыны.

- Сыӵе малпан юнме шорысь уг вордскы. Кидыс ӟеч музъем вылын гинэ уда.

- Чеберлыкез пичи дырысеным яратӥ. Дуннеез валаны кутскон вакытэ война аръёсын укшаз бере, курадӟонэз но тодӥськиз. Но соку но адямиос улӥзы ук. Туж тодӥсько на Изгуртысьтымы (Завьял ёросысь Каменное гурт – И.Л.) коркась корка кырӟаса ветлӥсь нылкышноослэсь паймымон чебер дэремъёссэс, арганчиослэсь сюлэмез вырӟытымон шудэмзэс. Соосты учкыса-чакласа, уд оскы, ӵукнаозь ветлӥсько вал.

Соин ик, дас куинь аресме тырмытыса, Иже шонтӥ, отысь крезьгуръя училищее донгиськоно кожай. (Ялонэз газетысь шедьтӥ.) Полина Исаковна Кац, туж умой дышетӥсь, кырӟаны куриз. Нош мон одӥг гинэ кырӟанэз кутсконысеныз пумозяз тодӥсько вал. Соиз но – СССР-лэн гимнэз. Уго сое школаын кужмысь дышетыны косылӥзы. У-у-у,кырӟасько ук! Куарае кельшиз. Рита Борисовна Кронер пианиноен шудыны дышетӥз. Туж турттэ вал монэ та удысэ кельтыны: чиньыосыд, пе, туж тупало пианинолы.

- Тӥ, Анатолий Васильевич, пичи дырысеныды ик туж лачмыт, кылзӥськись вал, дыр. Мыным озьы потэ.

- Э-э, тон янгышаськод. Монэ училищеысь кык пол улляны туртто ни вал. Футболэн йырин. Туж яратӥсько вал туп ӵыжаны, куддыр дышетсконэз чылкак вунэтылӥ. Кӧня ке пол экзаменэ но мынӥськымтэ. Директор апайме (мон со дорын улӥ) кабинетаз ӧтчаз, зол гинэ куаретэм, лэся. Анайлы но чагиськем. Ӵошен монэ миськизы, ява. Тау соослы, нош соку йыры кур луиз вал.

- Мон тодӥсько, тӥледлы туж удалтэ сюрес вылады пумиськись адямиосын. Тани Марина Бартэз ик басьтом.

- О-о-о, зол кышномурт. Солэсь лулчеберзэ возьматыны нокыӵе кыл уз окмы. 70-тӥ аръёслэн кутсконазы соин тодматски. Марина йылпумъяз текстилья институтэз, отын Слава Зайцевен, мукет тодмо художникъёсын огдыре дышетскиз. Ваи асьме доры, нуи Ижысь музее, возьматӥ удмурт дӥсез. (Соку со Советской урамысь пу коркан вал ай.) Суредась отын кык нунал пукиз, ачиз корт гурез эстыса. Пыр-поч тодматскиз люкам ваньбурен. Кошкыкуз шуиз: удмурт дӥсь быдэс Европаын тужгес чеберез луэ: басмаезъя но, вурон манерезъя но. Татын люкам эскизъёс улытозямлы тырмозы, пе. Озьы ик луиз ук. Бартлэсь азьло сцена вылэ потон ӟеч костюмъёс чик ӧй вал. Со быгатӥз асьме калыклэсь вашкала мылкыдзэ шӧдыны, учкись дорозь чеберлыкез вуттыны. Марина Андреевнаез нырысь-валысь пыкылыны но выризы, лэсьтэм ужъёсаз удмурт шӧмыз ӧвӧлгес шуыса. Тодӥсько на таӵе учырез. Дасяз со кык пӧртэм костюм. Огзэ возьматӥз – дунъясьёслы кельшиз. Кыкетӥзэ урод каризы. Табере, шуэ суредась, ойдолэ соосты сцена вылысен учком, прожекторъёслэн яркыт пиштэмзы улсын. Люкаськемъёс асьсэос но паймизы: шӧтэм потэм костюм син азьын улӟиз, ворекъяны ӧдъяз, нош кельшемезлэн чеберлыкез тыл азьын бездӥз. Вот кыӵе шӧдонэз адямилэн!

- Маринаен али но кусып возиськоды кадь?

- Та дыре Барт ужа Кремльын, геральдикаен (герб но мукет пус кылдытонэн) выре. Со туж юрттӥз ассамбльмылы костюм ласянь. Кӧня ке ар талэсь азьло но ӵектэ на вал выль программалы дӥсь дасяны – ми коньдон ӧм шедьтэ. Жаль, но кытчы пырод ни. Сыӵе, лэся, адӟонмы.

- «Италмас» – вылӥ быгатонлыкен коллектив. Юнме шат быдэс дунне тӥледыз шумпотыса пумита? Совершенству нет предела, шуо ӟучъёс. Тӥ сямен, мар лэсьтыны луоно на, ансамблез эшшо вылэгес ӝутон понна?

- Созэ валано, «Италмас» – со одӥг Мамонтов гинэ ӧвӧл ук. Мынам йыры, шуом, «вӧлдэтэ» пыкиськиз ке, коллектив гурезе тубемысь уз дугды. Ужасьёс уз сётэ. Туж визьмо, туж быгатӥсь адямиос люкаськемын «Италмасэ». Соос ог-огзэс весь бышко: ойдо тазьы карыса эскером, ойдо таӵе эктонэз чаклалом.

Ансамбльлэн данэз тани ма бордын. Ми котьку учкиськом концертъёсамы ветлӥсьёс шоры. Ог ласянь, калыклы медам акыльты шуыса, весь тыршиськом выльзэ пыӵатыны, мукет ласянь - котькызьы но утиськом тужгес но зол номеръёсмес. Капчиен уг сётӥськы со. Но та куронэз одно ик чакланы кулэ. Али Леонора Викторовна (Мамонтовлэн кузпалыз – И. Л.) пуктэ выль эктон – «Трочин». Тройча праздниклы сӥземын. Туж чебер луоно. Вить ныл потэ сцена вылэ, отын ик кызьпу, льӧмпу. Малпаськиськом костюм, декорациос сярысь. Уксё тросгес луысал ке, олома но лэсьтысалмы, дыр. Вот «ке» люкетэ. Кызьы малпаськод, кӧня сылэ туала баян?

- Ма, 50-60 сюрс манет, вылды.

- К-хм, озьы ке луысал. 200 сюрс котыр. Нош кыӵе потэ вылэм ӟеч залын концерт возьматэммы! «Союзконцерт», «Росконцерт» куашкамен, гастрольёс шальтразы. Калыке ветлыны шуг луиз. Нош азьло… Алигес лыдъяй, 40 ар ӵоже Москваысь Чайковский нимо залын ог 40 концерт пуктӥм. Выль лыктэм артистъёсмы уг оско, ява. Нош ми огаз гужем отын бӧрсьысь бӧрсьы 12 концерт ортчытӥм. Нуналлы быдэ зал тыр калык люкаськылӥз. «Интурист» пыр лыктэм куноос но ветло вал.

Владивостокен шуныт кусыпъёсмес весь тодам ваисько. Нош кӧня пол «Италмас» потамын кунгож сьӧры! Социализм вакытэ арлы быдэ фестиваль ортчылэ вал. Кема дыр ӵоже отысь вормыса бертылӥм. Кивалтӥсьёс но, обкомъёсты верасько мон, солы дышизы, лэся – нырысетӥ интымы нокыӵе но уг поты ни вал кадь. Нош огаз аре кыкетӥ луим, Союзысь дас коллектив вал соку. Монэ тышкаськыны кутскизы: кызьы, пе, озьы? Шуисько: асьмелэн консерваторимы но искусствоя институтмы но ӧвӧл, озьы ке но, сыӵе ансамбль возиськом. Хоккеистъёсмы, пӧй, странаын кыкетӥ луысалзы ке, тӥ соосты ки вылады нуллысалды ни. Чалмизы. Но удысэз азинтон сярысь кулэезъя ӧз сюлмаське.

Искусствоын котькудӥз ужась - ненег маке, солэн куэз векчи, шуод-а, мар-а. Со конкурсэз ик тодэ ваёно ке, кӧняез коллегаос, секытэз чидатэк, улонысь но кошкизы. Мыно соос ӵошатсконэ, ӟеч инты уг басьто, доразы кузёос со понна лычсузьымоназы мисько ни. Тодӥсьтэм мурт гинэ малпа, артистлэн улонэз ялан мыньпотыса ортче шуыса.

- Асьмеос мукет эшъёсын ӵош вить-куать ар талэсь азьло ветлӥм вал Венгрие, финн-угор конгрессэ. Соку мон кӧня ке пол тӥ борды одӥг пӧртэм юанэн тэбиньылӥ: кинэ маэстро Мамонтов кельтоз ас интыяз? Тӥ вераськонэз лекъяськыса сямен уретылӥды: Толстой но, Достоевский но со сярысь ӧз малпаське, мон но со пумысен йырме уг тӥяськы. Ӧз воштӥськы-а та дыр ӵоже малпанды?

- Тодам ваисько кенешеммес. Только уг валаськы: мар-о, мон сокем пересь ни шат?

- Ну-у, шуом, эктон удысысь быдӟым усточилэсь Игорь Моисеевлэсь адӟем кароно ке, ичизэ куамын ар ӵоже ансамблен кивалтоно луоды на. Солы тани ӝоген сю арес тырмоз ни. Нош весь егит нылъёсты эктыны дышетэ на. Озьы ке но, Анатолий Васильевич

- Кин кылёз мон бӧрсьы? Дугды ай, одӥг учырез верало. Партия кивалтон вакытэ ваньзэ планъя ужаны косо вал ук. Мон но сыӵе ужен выроно луылӥ. Горкомын-а, обкомын-а шуизы: дася 15-20 арлы план, ку, мар, кыӵе номер пуктоды, кытчы мыноды. Серекъяса юасько: оло, эктӥсьёслэсь-кырӟасьёслэсь нимтулъёссэс но пусъёно? Одно ик, пе. Нош малпамтэ шорысь адями кулӥз ке? Соиз, шуо, тынад ужед ӧвӧл. Ас интыяд но, пе, одно ик кинэ ке гожты. Кытчы ке кошкид-мар ке, ми мед тодом кинэ юнматыны. Серекъялод но ни табере. Тодӥсько на, огпол вуоно кивалтӥсь интые Владимир Вауйкинлэсь но (вал сыӵе аспӧртэмлыко, таза мугоро кырӟасьмы) фамилизэ пуктылӥ.

Я, табере серьёзно верало. Котькуд адями мукетызлэсь маин ке но висъяське. Мамонтов кошкиз ке, лыктоз музон мурт. Но солэн нимыз мынам кадь уз луы. Озьыен, ужаз но, коллективаз но маке воштӥськоз. Со озьы ик луыны но кулэ.Оскыса шуисько: «Италмас» монэн но, монтэк но улоз, калыкез шумпоттоз.

- Огаз интервьюады тӥ шуиды: «Нота «ля» во всем мире звучит одинаково». Озьы вераны тыршиды, искусствоез валан понна, кылэз тодон кулэ ӧвӧл. Соиз шонер. Шуом, скрипкаен яке мукет инструментэн коть ӟуч Спиваков, коть еврей Ростропович, коть удмурт Корепанов мед шудоз, бадӟымез курон одӥг - крезьгур сюлэмез буйгатыны, мылкыдэз ӝутыны кулэ. Озьы ке но, юатэк уг чидаськы тӥляд пӧртэм нациен адямиосын кызьы ужамды сярысь. Тани тӥледыз одӥг-ог пыкыло, «Италмасэз» чылкак ӟучомытӥды ни шуыса. Оло, зэм но, удмурт ансамбльын удмуртъёс ӧвӧл ни?

- Верасез мед шуоз. Кырӟасьёс пӧлын данакез (ог 90 процентэз) - асьме выжыысь. Фамилиоссы лыдӟисьёстылы тодмо. Вань удмуртъёс эктӥсьёс пӧлын но. Музыкантъёс – палэнысьгес. Татын ини шӧдӥське искусствоя инъетлэн ӧвӧлэз.

- Ма, Удмурт университетын усьтӥзы ни ук искусствоосъя факультет. Миым хореографияя группа но кылдытыны выро вал кадь. Собере пичи усточиосмылы школа-интернат но далай гинэ ужа кадь.

- Уд оскы, но университет малы ке но интыысь луонлыкъёсты кулэ уг кары. Со студентъёс но лыктэ вал татчы, учке-дышетске –ӧвӧл. Ми но пумит ӧй луысалмы мыныны, маке коть возьматыны-вераны быгатысалмы, дыр.

Одӥг визьмо адямилэсь тазьы верамзэ кылэме вань. Зэмос артистлы пӧрмыны луэ синме учкыса ужаку гинэ. Тодон-валан уго син пыр йыре пыре но йырбере пыкиське, уг вуны. А пеле ке верано иворез, со огаз пыре, мукетысьтыз потэ. Соин ик дышетӥсь дышетскисен нуналмысь ужаны кулэ. Тужгес но - пичиосын.

Жаляса пусйыны кулэ: школа-интернатэн но кусыпёс сокем матынэсь ӧвӧл. Покчиосын мыло-кыдо выре Леонора Викторовна. Школа-студиез дано луэмын. Отысь потэмъёс табере ансамбльын но ужало ни.

- Нош отчы удмурт гуртъёсысь нылпиос шедьыны быгато-а? Яке, шуом, школа-интернатысь? Со филармонилэсь кыдёкын но ӧвӧл ук.

- Интеранат ласянь малпаськоно ай. Оло, быгатом отысь пиналъёсты эктон-кырӟанлы ватсаса дышетыны. Кин тодэ, оло, «Италмас» нимо стипендия тупатыны но луысал.

А-а-а, тодам лыктӥз тани ма. Огпол Леоноралэн студияз кин ке оло серекъяса, оло кыӵе ке мукет муген ялон лэсьтэм: нылпиосты, пе, кунгож сьӧры нуозы, но кутозы удмуртъёссэ гинэ. Коть оскы, коть эн но, ӵуказеяз ваньмыз сямен пиналъёс справкаос вуттӥзы. Огезлэн мумиз удмурт, мукетызлэн – песятаез, куинетӥезлэн – эшшо кинэз ке. Тазьы чакласьконо ке, Россиын ваньмыз сураськемын Умойлы-а, уродлы-а – уг тодӥськы.

- Тани ма сярысь кенешем потэ на. Азинскем удмурт воргоронъёсты чаклано ке, пӧлысьтызы данакез кышнояськемын музон выжыысь потэмъёсын. Ӧд шӧдылэ-а? Куликов, Митрофанов, Ермолаев, Шкляев… Ма, туж трос. Милям огез эшмы тае кемалась чакласа улэ ни. Кызьы лыдъяськоды, маин со герӟаськемын? Тӥ но, асьтэлы кузпал бырйыкуды, азьланьын ӝоггес будон сярысь тросгес ӧд малпаське меда? Чебер, визьмо, Игорь Моисеев дорын дышетскем нылаш. Артист семьяысь. Но котьмалэсь дуноез, карьера ласянь учконо ке – москвичка.

- Серекъяськод кадь. Кыӵе-мар расчёт луоз егит удмурт пилэн йыраз? Синмаськи но – тӥни.

Лораен ми Ижын тодматским. Казаньысь консерватория бере монэ косӥзы Удмурт театрын (1960-тӥ арын со музыкально-драматической вал на ай) «Наталь» операез пуктыны. Балет группаысь нылъёс пӧлысь синйылтӥ егит нылэз. Туж чебер, валаса эктэ. Озьы кылдӥз семьяе.

Москва сярысь ке верано, монэ отчы ӧтё вал. Огдыре соглаш но луисько ни вал кадь – Леонора пумит кариськиз.

Мыным кузпалэн удалтӥз. Котыр ласянь. Со сюлмыныз шӧдэ эктонлэсь пуштроссэ, тужгес но – удмуртэзлэсь. Азьло туж ӵем потаськомы вал гуртъёсы. Леонора удмурт ӧвӧл шуыса ӧз оскылы нокин но. Сокем учкымон эктэ, кызьы, пе, мукет выжыысь адями озьы багатоз?

- Тӥ кык пи будэтӥды…

- Бадӟымез, Виктор, Москваысь университетын дышетскиз, ужа ТВЦ телеканалын, спортэз возьматэ. Пӧрме кадь. Гажало сое. Кивалтӥсез – Сергей Ческидов, коми-пермяк. Оло, финн-угор выжыысь луэмзы но соосты герӟа. Викторлэн нылыз но пиез будо.

Константин пие Ижевскын улэ. Юрист. Вань концертъёсме учкыны семьяеныз ветлэ, котькуд номерез тодэ. Но шонерзэ верано ке, мыным возьыт нылпиосы азьын. Жаляса пусъёно луэ, пияшъёсы анай-атайзы адӟылытэк будӥзы. Тросгес улӥзы Москваын, песянайзы дорын.Гужем вылтӥ сьӧрамы костаськизы. Артист улонлэсь кыӵезэ адӟыса, мон шуг-секытъёсты верасько, улонзэс сценаен герӟамзы ӧз поты. Быгатонлыксы вал ке но.

- Ма, кызьы собере соос сокем визьмо будӥзы?

- Тазьы малпасько: адямиез будэтонэн, воспитание сётонэн, оло, нимысьтыз туж выронэз ик ӧвӧл. Котьмалэсь кулэез – пинал анай-атайлэсь адӟем карыны мед быгатоз.

Пиосынымы одӥг-ог адӟиськылыкумы но Лора соосты эркияса ӧз улы, юн куронъёс пуктылӥз.

- Тӥледыз урамысен пичи пуныен адӟылэме вань.

- Тойтерьер возиськом вал азьло. Табере – огшоры дворняжка. Нимыз Жучка. Но дорын мон сое Кикимора шуко. Аквариум чорыгъёсты яратӥсько. Базарысь вузкарисьёс ваньмыз тодмало.

- Кытын меда дачады – Докшаын-а, Каракулино палан-а?

- О-о, Канар шормуӵъёсын… (Серекъя.) Изгуртэ дорын сад-бакчае вань. Вить сотка. Ваньзэ ас киыным лэсьтӥ. Туж яратӥсько со сэрегме.

- Берпуметӥ юан. Мар пумысен висе туннэ Мамонтовлэн йырыз?

- Туж бадӟым мылкыды вань Удмуртиын бускель элькунъёсысь-улосъёсысь эктӥсь-кырӟась тодмо коллективъёсын фестиваль ортчытыны. Проч син азям пуктӥсько ни мон со ужрадэз. Нырысь, шуом, пото бигеръёс, соос бӧрсьы – Башкириысь академической ансамбль, отӥяз – Урал хор, концертэз йылса «Италмас». Кыӵе шулдыр праздник радъяны луоно. Мед пӧрмысал.

- Валай, валай… Анатолий Васильевичез коть сюдытэк возь, уж гинэ мед луоз. Шуд но задор мылкыд тӥледлы! Кужымды мед тырмоз на уно пол Лудорвае но, Уругвае но, мукет интыосы но вуылыны!

Источник:

Мамонтов А. В. Лудорвай но, Уругвай но чидатэк сое витё / А. В. Мамонтов ; записал Иван Лебедев // Удмурт дунне. - 2002. - 19 апр. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"