Ложкин Алексей

Материал из Воршуда
Перейти к: навигация, поиск

Мон ас интыям

А. Ложкин

Улонын ваньмыз ачид бордысь потэ шуо ке но, вань, дыр, кыӵе ке синтэм-пельтэм кужым. Со лушкем-а, шара-а тонэн кузёяське.

Кык пол чылкак одӥг выллем учыре-югдуре шедьылыса, Алексей Ложкин вамыштӥз артистлэн сюресэз кузя. Зэмен но, кыӵе ке кужым кыскыса сямен валтӥз сое отчы. Нош табере Удмурт театрысь егит актёр, «Мынам Удмуртие» телекомпаниысь «Шундыберган» передачаез одӥгез нуись но кырӟась Алексей меӵак шуэ: мон шедьтӥ аслэсьтым сюресме!


- Артистъёс сярысь кытӥяз олокыӵе но вераськонъёс ветло. Тани тон, шуо, чиган выжыысь удмурт. Со юнме кыл вӧлдон, яке…

- Выжыямы одӥг «сьӧдъёс» но ӧвӧл. Анай-атае, бускельёс – удмуртъёс. Но ваньзы шуо: тон, пе, удмуртлы пичи но уд кельшиськы. Соин ик буйгатон понна шуисько: ма, чиган уробоысь питраса кылиськем, удмуртъёс шедьтӥллям но асьсэлы кариллям.

Яке шуисько: Байгурезь котырын вордӥськи, соин ик гурезьёсын улӥсь адямилы, «горецлы» кельшисько. Дуннее нырысь куараме сётӥськем 16-тӥ феврале, 29 ар талэсь азьвыл. Вань пичи дыры ортчиз Дэбес ёросысь Тольён гуртын. Семьяямы вить нылпи пӧлысь мон ньылетӥез. Пичи сузэре вань на. Атае шуэ вал: «Четыре сыночка и лапочка-дочка». Но малы ке вить нылпи пӧлысь мон гинэ таӵе сьӧд луиськем. Атае колхозын тракторист луыса ужаз. Жаль, улонысь вазь кошкиз. Анае пенсиын ни, ужаз столовойын. Со мынам зарни. Ноку но «эн», «уг» уз шуы.

- Артист луон мылкыдыд ку вордӥськиз?

- Ньылетӥ классозь мон Тольён гуртын ик дышетски. Со вакытэ Ижевскын усьтӥськиз усточи пиналъёслы интернат. Та сярысь лыдӟи «Удмурт дунне» газетысь. Мама, шуисько, мон отчы мыно. Анае пумит ӧз улы. Лыктӥ Ижевске эскериськыны. Но берегес кылиськем, мынам ёзъёсы быдэс ар дышетскиллям ни. Соин ик мыным соосты сутоно луиз. Дышетским баянэн шудыны. Нырысь дышетӥсьёсы вал Владимир Степанович Дерендяев, Павел Евгеньевич Зубков. Соослы бадӟым тау карисько.

Школа-интернатэз йылпумъяса пыри Ижевскысь крезьгуръя училищее. Ӝыны ар дышетски но валай: та мынам сюресэ ӧвӧл. Пыри Дэбесысь педучилищее. Таиз но сюлмыя ӧз луы.

Шӧдтэк шорысь «Удмурт дунне» газетысь ялон адӟи: Москваысь М. С. Щепкин нимо театральной училищее удмурт актёръёсты дасясь группа люкало. Анай, шуисько, мон отчы мыно. Ма, пе, тон кытын гинэ ӧд дышетскы ни, тонэ, визьтэмез, малы отчы басьтозы?

Анае кошконэлы ӧз оскы. Ачим но асме нырысь ик эскероно кариськи Удмурт театрын. Репетициос вискын актёръёс шуо вал: «Я, Лёша, ойдо арганэн шуд». Соос шутэтско, серекъяло. Мон концерт пуктӥсько.

Театрын монэн ужазы, визь-кенеш сётӥзы. Тужгес но зол юрттӥз Фаина Будина. Кӧня ке улыса, Москвае кошки. Удмуртиысь группа отын быдэс ар ӵоже дышетскем ни. Монэ кыкетӥ курсэ басьтӥзы. Тӥни озьы улонын сюрес утчанъям кык пол одӥг кадь учыр луиз.

- Мынам тодэмея, Москвае тонэ «чебер синъёсыд понна», нокыӵе экзаменъёстэк кутӥзы. Кызьы озьы луиз ай?

- Удмурт театре Москваысь адямиос вуылӥзы вал. Соос эскеризы. Но дышетскыны мыноно-а, ӧвӧл-а, укыр кема малпаськи, ас кужымелы сокем ӧй оскы. Москвае мынӥ но – нокыӵе экзаменъёстэк кутӥзы. Шуизы, али, пе, татчы профессор вуоз. Мынам ноку но улэп профессорез адӟеме, соин вераськеме ӧй вал. Учкисько но – ӝужыт, паськыт пельпумо воргорон лыктэ. Монэ адӟиз но, чиньыеныз куасалляса, дораз ӧте: лык ай татчы. Мон лыктӥ. Ну-ко отӥе мын ай, шуэ. Мынӥ. Табере, пе, берытскы. Берытски. Ачим воксё шальтрай ни. Чаль ай, пе, татчы. Лыктӥ. Мынам йырсие кузь вал, нош йырберам - векчи-векчи гинэ йырси пунэтэ. Профессор со пунэтэз кыскиз но шуэ: ӵуказе ик тӥнь та медаз луы ни, а так – «принят». Со ик луиз Москваысь училищее пыреме.

Нырысь араз дышетскыны туж-туж секыт вал. Малы? Эшъёсы быдэс ар ӵоже тодон-валан люказы ни, нош мон… Нырысь инъетсэ ӧд ке вала, азьланяз номыр карыны. Мыным кык курс понна вань экзаменъёсме сётоно луиз. Курадӟи. Уйин миндэрез коттыса бӧрдыса но улэме вань. Озьы ке но быгатӥ.

Бӧрысь дышетсконэ капчигес но капчигес кошкиз ни. Вал сыӵеез но: одӥгез дышетӥсь туж ушъя, мукетыз тышкаське но тышкаське. Кызьы шуо, улонэд эмезь кадь медаз поты. Дышетӥсьёсылы бадӟым тау шуисько. Соослэн ӟеченызы мон аслэсьтым ужме шедьтӥ, мон - ас интыям.

- Кыӵе рольёсыд тужгес но зол сюлэмад кылизы?

- Котькуд актёрлэн нырысьсэ шудэм ролез тужгес бадӟым пытьы кельтэ, дыр. Мынам со – Островскийлэн «Свои люди, сочтемся» пьесаысьтыз Подхалюзинэз шудон. Удмурт театрын та пьеса мынӥз «Серекъялод но, бӧрдод но» нимын. Туж кельшиз «Ой тӥ, чебер нылъёс» спектакльын Дорогоез шудыны. Ӟуч кылын «Беда от нежного сердца» спектакль пуктӥм вал. Таиз – Сологублэн. Мон отын шудӥ Александрез. Туж яра та роле. Ӵош шудоно адямиос но умоесь. Тани Пётр Романовез ик басьтоно ке, мон сое котьку выль сямен усьтӥсько.

Али басьтӥськимы Гогольлэн «Ревизорез» борды. Туж умой пьеса. Шудӥсько Хлестаковез. «Ревизор» пьесаын «сылалэз» вань, мур ватэм малпанэз. Соин ик котькуд верам кылыд бордын туж-туж зол ужано.

Кемалась ик ӧвӧл лыдъяй: 37 пала роле вылэм ни. Тросэз - валтӥсь рольёс. Выжыкылъёсысь шузи Ваняосты но шудӥ.

- Нош кинэ шудэмед потэ вылэм?

- Достоевскийлэсь «Братья Карамазовы» произведениысьтыз Митяез. Со Митялэн пуштросэз, лул дуннеез… кызьы вераны но мон сое уг тодӥськы.

Мыным туж кельше Достоевский. Нош Толстоез адӟемпотостэм карисько. Уг тодӥськы малы. Ӵошатоно ке, Достоевский туж зол психолог, ваньзэ ас пушкытӥз поттӥсь писатель. Мон учкисько, кызьы солэсь гожтэм геройёссэ шудысал, аслам сюлэм пыртӥм поттысал. Нош Толстой укыр трос чебер суредъёс, инкуазь сярысь вера. Жадисько мон солэсь.

- Рольёсты дышетыку, кытӥяз со дуннеын улыны кутсконо, дыр. Таин валче тунсыко учыръёсы шедьылэмед ӧвӧл-а?

- Вань. Одӥгзэ гинэ верало. Транспортын мынӥсько, рольме йырам бергатӥсько, шудӥсько. Сыӵе дыръя тон астэ уд ни шӧдӥськы, киосыныд но шонаны кутскиськод, ас поннад лабыртыны ӧдъяськод. Шуак кыӵе ке кыл шара потэ ни… Учкисько но - вӧзысьтым кышномурт султӥз но мукет азе пуксиз. Э-э, малпасько, та монэ шузи кожа ук. Сыӵе кыстаськыса пук ай. Мыжго кожа, дыр. Мон шуисько: пуксе, пуксе, мон ӟеч адями.

Та выллем учыръёс мынам улонам гинэ уг луыло, дыр.

- Москвае кылён мылкыдыд ӧй вал-а?

- Берпуметӥ курсын дышетскыкум, пие вордӥськиз. Соку Москвае кылён малпанэлэсь но куштӥськи. Нырысетӥ интыын семья луыны кулэ. Бертӥ Удмурт шаерам.

- Тросэз гажало но ярато кузпалдэ, Светлана Ложкина егит актрисаез…

- Ӵош луонмес мон валаса но ӧй вутты. Кызьы озьы луиз? Валэктыны уг быгаты, дыр. Луиз но луиз. Москваын дышетскыкумы, со юрттылӥз мыным экзаменъёслы дасяськыны. Ачиз туж ӟеч дышетскиз, горд диплом басьтӥз.

Светике мынам Шаркан ёросысь Ляльшур гуртысь. Со монэ аслаз аспӧртэмлыкеныз бордаз кыскиз, дыр. Сюлмыз котьку усьтэмын. Уродзэ нокинлы но уз сӥзьы. Мар малпа – одно ик лэсьтыны тырше, визь-кенеш сётэ, тазьы уг яра, озьы узгес тупа, шуэ. Улонын но со котьку мыным юрттэт сётэ. Мар ке секыт ке – валэктэ. Кыкнамы но театрын бере, рольёсмес дышетонын ог-огмылы юрттӥськом.

- Мукет ласянь, семьяын кык артистлы туж секыт, дыр. Мар пумысенгес ваче вуиськоды?

- Секытэз со гинэ: кыкнамы но гастроле кошкиськом, кинэн кельтоно пимес? А так, ваньмыз ачид бордысь потэ.

Артистъёс пӧлын зол семьяос ӧжыт ӧвӧл. Синмаськыса учкисько Пётр Михайлович Романов но Раиса Геннадьевна Нефёдова дано артистъёс-кузпалъёс шоры. Соос но ӵош шудо, ӵош уло.

- Артистъёс, пе, пиналзылы артистлэсь сюрессэ уг сӥзё. Тӥляд кызьы?

- Пиелы тямыс арес. Кырӟаны, кылбур лыдӟыны яратэ. Артист луо шуиз ке, мон пумит уг луы. Малпасько, со ӟеч уж. Но солэн мылкыдыз али ялан вошъяське на. Космонавт но, банкир но луо, пе.

- Театрын ужам сяна, «Моя Удмуртия» телекомпаниын передача нуиськод. Таиз ужед яра-а?

- Вазь-а, бер-а, но телевидение мон одно ик вуттӥськысал, дыр. Москваысь вуэме бере ик отчы ӧтьыны кутскизы. Но мыным соку театр сяна номыр кулэ ӧй вал.

Одӥг пол Татьяна Денисоваен ӵош Вавожын Герберез нуим. Со шуэ: Алёша, тон театрын но ужа, телевидениын но астэ эскеры. Озьы мон чагыр экранэ шеди. Бадӟым тау кареме потэ Лев Вахитов режиссёрлы, зол юрттӥз.

Иворъёсын «Шаер» передачаын диктор луыса ужай. Одӥг сюжет но лэсьтэме вань. Серекъяса ветлӥсько вал: келялэ, келялэ монэ фермае. Ыстӥзы ук… осеменаторъёслэн конкурсазы. Ма, сюжет гожтӥ. Но валай, журналистика – со мынам сюресэ ӧвӧл, мон дасез вылынгес ужаны яратӥсько. «Моя Удмуртия» телекомпаниын «Шундыберган» передачаез Светлана Кибардинаен ӵош нуиськом. Туж тунсыко: дорамы лыктэм котькуд выль куно сьӧраз вае аслэсьтыз дунневаланзэ, улон шоры учконзэ. Котькуд передачаын тон, нуись, ачид но мар ке выльзэ тодӥськод.

- Азьланяз астэ эстрадаын но рос-прос эскеремед уг поты-а?

- 1998-тӥ арын Выль арлы сӥзем концертын одӥг спектакльын шудӥ. Со бере монэ «Венец» ансамбльлэн кивалтӥсеныз Эдуард Князевен тодматӥзы. Пукиськом, чай юиськом. Со юа:

- Тон кырӟаськод-а?

- Ма, незнай, бӧксӥсько кӧня ке…

- Бен ойдо эскером.

- Ма, айда.

Мар кырӟамме но уг тодӥськы ни. Собере вал кырӟасьёслэн «Камали» конкурссы. Отчы пыриськи. Учкисьёс монэ синпель кузьымен нимысьтыз висъязы. Али одӥг-ог кырӟасько ке но, мон понна со валтӥсь инты уг басьты. Актёр мон, кырӟась ӧвӧл.

- Одӥг вакытэ Ижевскын тынэсьтыд фанклубдэ кылдытыны чаклало вал. пӧрмытӥзы-а, ӧз-а? Тодмо луон, калык син азьын возиськон уг акыльты-а?

- Фанатъёсы вань но, сыӵе зол уг ни ёрто. Пересьмисько ни, лэся (серекъя). Нош тодмо луэме сокем уг шӧдӥськы. Кавказысь вуэмъёс радэгес пукто, документъёсме чаклало. Шутэтскыны кафеосы ветлыкум но, гурезьёсысь вуэм адямиос монэн ас сяменызы вераськыны кутско. Ма, сэре мон но, артист бере, соосъя шудыны кутскисько.

- Кыӵе валтӥсь малпанъя улыны тыршиськоды?

- Ваньзэ лэсьты, быгатӥськод-а, уд-а – тыршы. Москваысь вуи гинэ - Геннадий Семёнович Корепанов шуиз: пока тон егит на, котькытчы мерскы, котькытын астэ эскеры, утча. Быгатод-а, уд-а – соиз мукет ужпум. Малпасько, кытын асме золгес возьмато - бӧрысь улон ачиз радъялоз.

- Палэнысен Алексей Ложкин капчи мылкыдо, котьку усьтэм сюлэмо адями кадь потэ. Нош тонэн вераськыса шӧдӥське: усьтӥськыны уд дыртӥськы. Вылтусыд-выросъёсыд - со бампӧет (маска) ӧвӧл-а?

- Озьы, маска. Малы адямилы возьматонэз, тыныд секыт шуыса. Адямилэн, тонэн вераськыса, мылкыдыз медаз усьы. Малы бӧрдыса ветлод? Со аслад сюлмаськонэд, аслад куректонэд. Сое тон ачид сэрттыны-пертчыны мед быгатод. Тӥни соин гинэ, бампӧет кулэ луэ.

- Нош со секытэз огнад вормемед ӧз ке луы?

- Вань мынам эшъёсы. Тодӥсько: соос юрттозы. Вань кузпалы.

- Актёръёс шутэтскыны зол быгато, шуо. Озьы-а?

- Вань ӟеч адямиос шутэтско праздникъёсы, нош вань артистъёс соку кык-куинь полэс ужало. Шуом, Выль ар вакытэ мон Тол бабаез шудылӥсько. Одӥг нунал ӵоже кык-куинь пол Тол бабай вал, ӵуказеяз – сомыда пол ик, куинетӥ нуналэ… Сэре со ваньмыз чырты выжыозь вуэ ни. Нош ми Выль ар кутскемлэсь ог арня азьвыл но собере 8-9 январёзь но ужано луиськом. Выль ар но ортчиз ни, ваньмыз валамон ни, нош пиналъёс ялан: «Тол бабай!» Потӥськод соос доры, кужмысь серекъяськод. Сыӵе дыръя шуэм потэ: «Ух, тӥ весь кесяськиськоды, бертэ вал ни дорады…»

Нош кытчы пырод - ужано. Рос-просгес шутэтскиськом гужем. Август толэзе гуртэ бертӥськом. Анайлы юрттӥськом, турнаны ветлӥськом. Асьмелэн но сад-бакчамы вань.

- Нош тон понна мар со – яратон?

- Шекспирлэн вань «Ромео но Джульетта» произведениез. Малы меда автор аслэсьтыз геройёссэ быдтэ? Шекспир шуэ кадь: зэмос яратон ӧвӧл, со – кулэ. Тани учком та Ромео но Джульетта шоры, ог 30-40 ар улыса. Мӧйы Ромео кылле диван вылын но шуэ: Джульеттае, вай ай мыным тапочкиме. Нош соиз кеське: ачид вай!

Мукет ласянь, таӵе веранэным ик мон соглаш уг луы. Малпасько, яратон пӧртэм пумо луэ: анайдэ, кузпалдэ, пиналдэ… Адями уг быгаты яратонтэк улыны. Яратон – со котькытын, со – улон.

Семьяын яратон - со ог-огедлы дышон но ӧвӧл меда. Уг валаськы мон. Тани гастроле мынӥськом, мон - одӥг ёросэ, кузпалы – мукетаз. Ог-огмес кӧня ке ум адӟиське, мӧзмыны кутскиськом. Бертӥськод но сыӵе шумпотӥськод, кучапи кылзэ ошыса сӥль шоры учкем кадь…

- Тонэ удмурт Казанова, удмурт Дон Жуан но шуисез вань. Йырыд кур уг луы-а?

- Кызьы калык малпалоз, озьы ик мед луоз. Та сярысь номыр но уг вера ни.

- Нош лыдӟисьёсмылы кыӵе яратон сӥзьысалыд?

- Кезьыт куазен пӧсь пельнянь кадь, лычсузьымон.


Источник:

Ложкин А. Мон ас интыям / А. Ложкин ; записала Елена Миннигараева // Удмурт дунне. - 2006. - 10 февр. - С. 6, 11. - (Удмурт кизилиос).



За предоставление материала выражаем огромную благодарность редакции газеты "Удмурт дунне"