Лебедева Серафима Христофоровна

Материал из Воршуда
Перейти к: навигация, поиск

Ойдо ӵош пуком

Лебедева С. Х.

Кузебай Герд нимо Национальной музей та нуналъёсы пусйиз 85 ар тырмонзэ. Та дано юбилейлы музейын ужасьёс бадӟым адӟытон радъязы. «Асьме эралэсь азьвыл 8-тӥ даурысен 20-тӥ даурозь Удмуртилэн историез но культураез» экспозиция пусъемын Удмурт Республикалэн кун премиеныз. Сое кылдытон бордын ужаз Национальной музейысь наукая валтӥсь ужась, Удмурт Республикаысь культура удысысь дано ужась, Кузебай Герд нимо премилэн лауреатэз Серафима Христофоровна Лебедева но.

- Серафима Христофоровна, Удмурт Республикалэсь кун премизэ басьтон капчиен ӧз сётӥськы, малпасько.

- Зэмзэ но, та экспозициез кылдытон понна музейын тыршисьёслы бадӟым ужез вырӟытоно луиз. Нырысь возьматэмын вал Ижевск городлэн историез, нош гурт улонэз син азе пуктон понна кема гинэ пӧсяно луиз. Экспозицилэсь та люкетсэ кылдытыны музейлэн уксёез но ӧй вал, кивалтӥсьмылы пунэмаськоно луиз. Конкурсын вормеммы юрттӥз на.

2003-тӥ арын Финляндиысь Музейёсъя ведомство ялӥз национальной концепциен выставкалы конкурс. Отчы ми ыстӥмы «Ӟечесь-а, ми удмуртъёс» нимын проектмес. Солэсь азьло вазиськи Владимир Емельянович Владыкинлы, шуисько, адӟытонлы книгадылэсь нимзэ сётыны малпаськом. Со пумит ӧз луы. Финляндие дас укмыс проект ыстэмын вал, милемлы нырысетӥ инты сётӥзы. 1 сюрс 500 евроен пусйизы - асьме коньдонэ берыктыса, со 45 сюрс манет луэ.

- Кунгож сьӧрысь дунъясьёсты маин синмаськытыны быгатӥды?

- Кыӵе ке но адӟытонэз радъян понна лэсьтӥське научной концепция, ваньзэ радызъя валэктыны, возьматыны кулэ. Проектмы син шоры йӧтымон пӧрмем, табере со ужмес калык но адӟыны быгатэ. Экспозиция интыяськемын 200 квадрат метре, 900 пала экспонат возьматэмын: пӧртэм дӥськутъёс, юрт котырын но гурт ужъёсын кутӥськись арбериос, туспуктэмъёс. Экспозициын озьы ик бадӟым инты басьто мадиськонъёс, легендаос, выжыкылъёс. Нырысьсэ таӵе бадӟым инты висъямын удмурт калыклы, адӟытонъёс азьвыл пичи азьын ортчылӥзы.

Экспозициын возьматэмын удмурт калыклэн XVI даурысен XX даурозь улэм-вылэмез. Адӟытӥське со пичи гуртлэн вылтусызъя. Одӥгаз корка интыяськемын куиськон арбериос, мукетаз тодматскиськом сюанлэн оглюкетэныз, куинетӥяз син азе пуксе ын вурон…

- Зэмзэ но, учкыса синъёс ик палёмо та адӟытонлэсь. Табыдӟа ужез вырӟытон понна трос кужым кулэ.

- Экспозициез быдэс коллективен лэсьтӥм, шуыны луоз. Мон проектлэн авторез, кивалтӥсез. Адӟытонэз дасян бордын ужазы этнографияя отделын ужасьёс но, наукая кивалтӥсьмы вал Марина Борисовна Рупасова. Милемын ӵош ужаз Удмурт кун университетысь дизайнъя кафедраысь тодосчи Иван Васильевич Сорокин. Та заллэсь вылтуссэ пуктыны со юрттӥз. Ачиз ӟуч ке но, малпанме туж умой валаз. Экспозициын туж трос манекенъёс возьматэмын, лэсьтӥз соосты суредась Николай Иванович Кумаев. Манекенъёс вылын удмурт калык дӥськут: лымшор удмуртъёслэн но, уйпал удмуртъёслэн но пӧртэм-пӧртэм улосъёсысь. Тросэз со дӥськутъёс татчыозь возьматъямын но ӧй вал.

- Удмурт калыклэсь историзэ тазьы возьматон сярысь малпанды юнме шорысь ӧз кылды, дыр?

- Музейын ужан опытэ мынам бадӟым ни. Собере мон трос ветлыны быгатӥ асьме странаысь музейёстӥ но, кунгож сьӧры но потаса вуттӥ выльдӥськон вакыт кутсконлэсь азьло. Ӵош ужаны удалтӥз Эстониысь национальной музеен, кивалтӥз соин Алексей Юрьевич Петерсон. Со юрттэмен, тодматски музейын ужанъя азьмынӥсь опытэн: кызьы экспонатъёсын ужано, кызьы экспозиция лэсьтоно. Вуылӥ Финляндие. Озьы ик ӟечесь кусыпъёсы вал Венгриысь этнографияя музеен. Отын ужась Агнеш Кережи выль амалъёсты кутыны юрттӥз.

Мыным сизьымдон арес ини луоз, но али ке но тыршисько Национальной музейысь этнографияя отделын. Ужаськомы ньыль кузя, аслэсьтым тодон-валанъёсме эшъёсылы кельтыны тыршисько. Нош та экспозиция улонысьтым валтӥсь малпанэ вал, шуыны луоз. Туж бадӟым тау ӵош ужась эшъёсылы сое улӟытыны юрттэмзы понна.

- Серафима Христофоровна, музей уж борды тӥ кемаласен бурмемын-а?

- Музейын ужаны кутски 1970-тӥ арын. Этнографияя материал, экспонатъёс ӧжытгес вал соку. Бадӟым саклык висъяськылӥз промышленной предприятиосъя туспуктэмъёс, документальной материалъёс люканлы. Этнографияя пичигес экспозициос возьматъязы археологлэн Владимир Алексеевич Семёновлэн люкам экспонатъёсызъя. Нэлли Павловна Пугаева кӧня ке материал люказ. Нош тужгес тунсыко арбериос музее вуизы 1930-тӥ аръёсы, соку музеен кивалтӥз Герман Фёдорович Сидоров.

Музее ужаны лыктыса, мыным туж тунсыко потӥз дӥськутъёсын ужаны. Уката ик музейлэн фондаз со трос ӧй вал. Потамы шаерысьтымы но солэн палэнысьтыз гуртъёсы экспедициосы. Люкам арбериосмес почта пыр лэзьямы, котомкаосын нуллӥмы. 1977-тӥ арысен экспедициосы потамы ини автобусэн. 1977-тӥ арысен 1991-тӥ арозь гуртъёстӥ ветлӥм Эстониысь национальной музейын ужасьёсын ӵош. Трос гинэ арбериос соку Эстоние кошкизы. Куд-огез монэ соку тышкаськылӥз но со понна, но со арбериосты мон ӧй келя, отысь музейлэн кивалтӥсез Алексей Юрьевич ачиз экспедициосы потаз, ачиз люказ материал. Но одӥгез но историлы дуно арбери палэнэ ӧз кошкы. Собере, мар уродэз, Эстониысь Тарту городын удмуртъёслы сӥзем экспозиция луиз ке? Али со коллекциен ужа Эстоние бызем удмурт нылкышно Светлана Михайлова.

- Пинал дыр малпанды музеен герӟаськемын ӧй вал, дыр?

- Мон вордӥськи бадӟым семьяын, нэнэелэн-дядяелэн ми тямыс ныл но одӥг пи вал (али тямыс кузя кылемын ни). Семьяямы мон кыкетӥ нылпи. Война вакытэ улӥмы секытгес. 7 классэз йылпумъяса, бадӟымез сузэре ужаны кариськиз, луонлык сётӥз мыным дышетскыны. Завьял ёросысь Шаберды школаысь 7 классэз Похвальной грамотаен йылпумъяй. Школалэн директорез Михаил Хрисанфович Симаков шуиз: тыныд, пе, одно ик дышетскыны кулэ.

Гуртысь пиналъёс понна тужгес но бадӟым адями – дышетӥсь. Соин ик дышетскыны мынӥ Ижевскысь педучилищее. Но сое расформировать каризы, дышетсконме йылпумъяй ни Глазовысь педучилищеын, собере берытски гуртам. Вить ар дышетӥсьын ужай. Бызи. Картэ но школаямы ик математикалы дышетӥз. Ӧжытгес потӥз дышетскеммы, тодон-валанмес ӵошен будэтоно кариським Казаньысь университетын. Бадӟым хозяйствомы вал ни. Бызем муртлы мумиз-бубиз скал сётылӥзы. Хозяйствомес кельтӥм, скалмес вузам но, 1960-тӥ арын Казане кошким. 1965-тӥ арын йылпумъяй историяя факультетэз, нош кузпалы арлы вазьгес дышетсконзэ быдтӥз, экстерн амалэн экзаменъёссэ сётӥз. Кошкиз Удмурт кун университетэ географияя факультете усьтӥськиз, со отчы ужаны интыяськиз.

Казаньын дышетскыкум, сюлэмыя луиз этнография, но бертэме бере музейын ужан инты ӧй вал, соку со интыяськиз Вадим Сивков урамысь пичи юртэ. Нош ик дышетӥсьын ужай кӧня ке арзэ.

Музейын ужаны кутскеме бере тужгес синмаськи удмурт дӥськутлы, но соос трос ӧй вал. Удмурт этнографиез но соку ӟеч ӧй тоды, дышетскыкум вань литература бигеръёсъя вал. Басьтӥськи удмуртъёс сярысь тодон-валанме будэтыны. Научной ужъёсты лыдӟоно, фондэн тодматсконо. Вашкала арбериосты люкан сяна, соосты валаны кулэ на – котькудӥзлы научной обработка лэсьтоно. Та ласянь бадӟым юрттэт сётэ научно-исследовательской литература. Азьвыл сыӵе ужъёс ичи вал, нош али та ужъёсын вырись тодосчиос трос ни: Татьяна Григорьевна но Владимир Емельянович Владыкинъёс, Людмила Степановна Христолюбова, Маргарита Григорьевна Иванова, Маргарита Владимировна Гришкина, Люция Аполлосовна Волкова, Галина Аркадьевна Никитина

- Серафима Христофоровна, тӥ туж трос дӥськутъёс, мукет арбериос люкады ни музейлэн фондаз. Капчи-а соосты шедьтыны? Ӵыжы-выжыосты но, оло, юрттӥсько?

- Вань татын дядяелэн мумизлэн но, ӵужанаелэн но дӥськутъёссы. 35 ар ӵоже ужатозям, котькыӵе дыръёс вал. Троссэ уксёен люкаськом, кузьмасьёс но шедё.

Экспедициысен кыӵе ке арбериез синйылтӥсько ке, дунтэк уг басьтӥськы. Но трос дун сётыны музеймылэн луонлыкез ӧвӧл.

- Вань улонды питранъёс вылын сямен ортче, арлыдды шоры учкытэк но сюрес вылэ потӥськоды. Тунсыко учыръёс трос вал, дыр, улонады?

- 1976-тӥ арын Оштормо-Юмья гуртэ потӥмы, мон куинетӥ нылпиме вайыны дасяськисько. Одӥг кышномурт шуэ, номыри но, пе, ӧвӧл. Учкемды потэ ке, бугыръяське ӟустари пӧлын. Кема кыллем дӥськут бордысь зын лыктэ, ӧскем потэ. Со понна туж аспӧртэм шортдэрем шедьтӥ, кузь саесо, выль кенлэн нуллоно дӥськутэз. Али со экспозициямы возьматӥське.

Тодам лыктэ таӵе но учыр. 1987-тӥ арын Люция Аполлосовнаен потӥм экспедицие. Шуо, артысь гуртын такъя кышет, пе, вань. Потоно Лобань шур вамен, нош отын кыйёсыз, пе, туж трос. Уйшор уйин ӵошен пеймыт нюлэскытӥ куалекъяса бертӥськом. Егит мылкыд вал, али но бен вань. Кык-куинь ар талэсь азьло егитъёсын ӵош Сибирь тракт кузя экспедициен ортчи.

1991-тӥ арын Сибирьысь удмуртъёс доры но ветлӥ, вить-куать кузя вал ми. Туж умой пумитазы. Красноярскысь валтӥсь библиотекаын удмурт калык искусствоя адӟытон радъям, документальной кино сьӧрамы нуллӥм. Вань со секыт арбериосын вагонъёс ултӥ но потано луиз. Нош Старая Козулька гуртын коркась корка сямен кырӟанъёсын ортчим. Сибирьын улӥсь удмуртъёслэсь узыр материал вайим.

- Тӥ трос ужаськоды удмурт дӥськутъёсын. Малпамдыя, солэн кыӵе ке но азинтӥськонэз вань-а? Яке егитъёс песянай-песятайёссылэн дӥськутэнызы ик мед ветлозы?

- Котькудӥз ачиз быръе кыӵе дӥськутэн ветлыны. Азьланьтонэз луиз ке но, вашкалаосмылэн дӥськут вурон манерзы кыльыны кулэ. Эстонъёс но тани вашкала дӥськутсэс улӟытыны туртто, азьвыл технологиез лыдэ басьтыса. Асьмелэн гурт калык азьвыл сямен вуремез (покрой) кельтыны турттэ. Пересьёслэсь верамзэс кылэме вань: удмурт дӥськутэн ветлыны капчи, вӧл-вӧл. Пиналъёс но соослэсь адӟем каро, удмурт дӥськутэн люкиськыны уг дырто.

Туала вакытэ уз люкеты кытчы ке потыны чебер вурем дӥськут но. Огшоры нуллыны со узгес тупа, нош кыӵе ке праздникын туж чебер адӟиськоз. Фольклор амалъёсты, вашкалаослэсь вуриськон манерзэс кельтыса кылдытоно соосты. Таиз бордын тросгес ужаны кулэ модельеръёс. Но таӵе дӥськут дуно сылэ, ваньмыз ик солы коньдон шедьтыны уз быгатэ.

Мон аслым вашкала амалъя ик вури дӥськут, нош тросэзлэн удмурт нылкышноослэн вань удмурт шӧмо дӥськутъёссы. Мыным туж кельшо Историяя, кылъя но литературая Удмурт институтын ужась кыкто сузэръёслэн Надежда Никитьевна Осиповалэн но Любовь Никитьевна Зубковалэн костюмъёссы. Татьяна Григорьевна Владыкиналэн но, Галина Аркадьевна Никитиналэн но дӥськутсы вашкала амалъя вуремын. Нош Елена Константиновна Александровалэн но Галина Николаевна Шушаковалэн дӥськутъёссы туала вакытлы матэгес каремын ни.

- Тӥледыз нылпиен узыр анай но шуыны луоз.

- Пичиез пие вордӥськиз ни 1976-тӥ арын, мыным соку ньыльдон арес вал ни. Йылпумъяз Удмурт кун университетысь экономикая факультетэз, Тартуысь магистратураез. Кусыпъёсыд ӧвӧл ке, асьме дорын ӟеч уж шедьтыны шугъяськоно. Ижевскысь одӥгаз фирмаын ужаз ик, собере выльысь Эстоние кошкиз, нылашез вал отын. Кышнояськизы, али уло Таллиннын. Нылпизы ӧвӧл на.

Бадӟымезлэн пимылэн куинь нылпиез, нылмылэн – кык. Таизлэн аслаз но нылыз бызиз ни, будэ кык аресъем Эмиль правнукмы. Солэн удмурт, ӟуч, бигер вирыз сураськемын. Внукъёсы но аслам нылпиосы кадь мусоесь потылӥзы, таиз эшшо но мусогес кадь.

Пиналъёсмы, внукъёсмы асьсэос но дорамы лыкто адӟиськыны, ми но куное ветлӥськом. Туж шумпотоно сыӵе шунытэсь кусыпъёслы, гажало, ярато, уг вунэто милемды, арлыдоос шуыса киынызы уг шонто. Нылпиосмы куиньназы вылӥ образование басьтӥзы.

- «Удмуртские женщины» книгае тӥ малы ке пыртэмын ӧвӧл.

- Ваньмыз сярысь гожтӥд ке, бумага но уз тырмы, нош нылкышноос пӧлын дано адямиос туж трос. Котькудӥз сярысь гожтыны но кулэ ӧвӧл.

- Нош «Учёные Удмуртии» книгаын нимды вань.

- Кандидат диссертациме утьыны ӧй ик туртты, ас азям мукет ужпумъёс пуктэмын вал. Табере малпанъёсы быдэсмизы, шуыны луоз. Нош этнография ужпумъёсъя дасо пала ужъёс гожтӥ.


Источник:

Лебедева С. Х. Ойдо ӵош пуком / С. Х. Лебедева ; записала Лия Малых // Удмурт дунне. - 2005. - 2 дек. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"