Куликов Пётр

Материал из Воршуда
Перейти к: навигация, поиск

Пётр Васильевич Куликов - удмурт прозаик, журналист, Россиысь писательёслэн огазеяськонзылэн ёзчиез, Удмурт Элькунысь но Россия Федерациысь лулчеберет удысысь дано ужась.

Петр Куликов

Улон сюресэз

Пётр Куликов вордӥськиз Кияса ёросысь Вылын Пичи Салья (Верхняя Малая Салья) гуртын 1952-тӥ арын 16 куарусёнэ. [1]

Починка гуртысьтыз ньыль классъем школаез йылпумъяса, эшъёсыныз ӵош Ермолаево черкогуртысь шор ёзо школае ветлӥз. [2]

Бадӟым удмурт крестьян семьяын тямыс нылпиc пӧлысь со вал сизьыметӥез. Улонзы секыт вал. Колхозын коньдон туж ичи сётъязы, номырлы ик ӧз тырмылы. Атайзы, базаре мыныса, вуж дӥськут басьтыса вайылӥз. Нянь, картош вылынгес будӥзы. Гужем губияса, толлы сылалтыса дасяллязы. Озьы картош вӧзы губи но куртчон луылӥз на. Ёрмысагес улэменызы пиналъёслы но вазь анай-атайзылы юрттоно луизы. Петя нырысь-валысь парсь возьмасьын ветлӥз, бӧрысь валъёсты, отӥяз скалъёсты утиз. Озьы ужамез понна кытӥ анай-атаезлэсь тросгес но коньдон дораз вайылӥз. Со туж бадӟым юрттэт вал семьялы. Капчиен-а, секытэн-а анай-атай бурд улын будо ни вал ай. Но ӝоген соос улонысь кошкизы. Нырысь атаез сюлмыз висьыса, нош Петя тямысэтӥ классын дышетскыку, анаез но кулӥз. Соку пичиоссэ пиналъёсты дораз басьтӥз бадӟымез агайзы, пыд йылазы ӝутӥз. Со председатель вал, улӥз Ермолаево ӟуч гуртын. [3]

П. Куликов нэнэеныз но выныныз

Пияшлэн туж потэ вал геолог луэмез. Но отчы дышетскыны Свердловске мыноно луысал. Агаезлэн лэземез ӧз поты: син азям, пе, мед луоз. Озьы Петя вуиз Иже. Агрономе-а, инженере-а мыноно шуса тунаса улонъяз вуиз университетэ. Приёмной комиссиын ужасьёс удмурт отделение пырыны лӧпкытӥзы: татын дышетсемъёсмы, пе, журналист но, писатель но луо. Озьы Петя Куликов бурдъяськиз, луиз удмурт университетысь филологияя факультетысь удмурт отделенилэн студентэз. Дышетскон солы яраз. Ма, гожъяськыны но яралляз. [3]

Татын дышетскыкуз литературно-творческой кружоке ветлӥз. Та огазеяськонэн соку кивалтӥз тодмо удмурт кылбурчи, удмурт литературая кафедраен кивалтӥсь Даниил Александрович Яшин. Со ик юрттӥз пинал пияшлы юнматскыны та удысын.

1974-тӥ арын университетэз йылпумъяса П. Куликовез Ува ёросысь Удугучин школае дышетыны ыстӥзы. Отын удмурт кылъя урокъёс нуиз. Ужан висказ гожъяськиз, литературно-творческой кружок кылдытӥз, тодмо удмурт писательёсыз пумиськылонъёсы ӧтчалляз. Со кружоказ ветлэм пиналъёс пӧлысь луэ али тодмо гожъяськись Гера Грязев.

1975-тӥ арын, Р. Валишин ӧтемъя, Пётр Куликов «Советской Удмуртия» газетэ лыктэ. Татын литература но искусство отделэ аслаз дышетӥсез вӧзы ужаны пуктӥзы. Со вакытэ газетын толэзяз кык пол «Италмас» бам потэ вал, сое но дасяно луылӥз. Бӧрысь иворъёсъя отделын тыршиз. Солы редакциын туж йӧно, сабырлы, визьмо муртъёсын ужаны шуд усиз.

1987-тӥ арын ӧтизы Удмуртиысь писательёслэн огазеяськонзылэн «Молот» журналазы. Татын нырысь валтӥсь редакторлы воштӥсе бырйизы, 1994-тӥ арын – валтӥсь редакторе. Та уж борды Пётр Васильевичлы историмылэн туж секыт вакытъёсаз басьтӥськоно луиз.

Но со ӧз куалекты, ас удыссэ куштыса ӧз пегӟы. Журналэз утён понна, бумага утчаса, авторъёсты ӝуткаса, уждунлы коньдон поттыны вырыса, кӧня бызьылоно луиз, дыр, солы. «Кенеш» ӧз ворсаськы, улэп кылиз. [4]

Гожъямъёсыз сярысь

Петя Куликов школаын дышетскыкуз ик «Советской Удмуртия» газетэн эшъяськиз, «Пинал куараос» сэреге кылбуръёс, иворъёс ысъялляны кутскиз, бӧрысь «Дась лу!» газетэн кусып тупатӥз. «Вунонтэм гужем» конкурсын ог ньыль пол вормисе потылӥз, кузьым но сётъяллязы. Эшъёсыз пӧлын Пети самой дано адями луылӥз соку. Гожъяськон мылкыдыз ӧз сӥя университетын дышетскыкуз но. Пётр Куликов «Советской Удмуртиен» кусыпъёссэ ӧз ышты ни. [2]

Литературной кружок, 1971

Литературной кружоказы студентъёс доры пӧртэм писательёс вуылӥзы; Семён Самсонов, Роман Валишин, Владимир Романов, Анатолий Уваров. Уката ик пинал студент матын луиз Роман Галяскарович Валишинэн. Соин берло аръёсы но кусыпсэс ӧз ыштэ ни. Творчество удысын но гожъяськыны кутскись пияшлы бадӟым эшез ӟеч индылонъёс сёткалляз.

«Одӥг пол Толя Григорьевен, тӧл ӵыжаса ветлытозь шуыса, горд сэреге мынӥм: вай шуиськом, мар ке но гожтом. Мон верос борды кутски», – тодаз вае П. Куликов. Озьы «Буран бере» веросэз кылдӥз. Со печатламын вал «Советской Удмуртия» газетын. [3]

П. Куликовлэн нимысь книгаез кык: «Буран бере» (1982) но «Зарни чорыг» (1992) повестьёсын но веросъёсын бичетъёс. Озьы ик печатласькиз «Кенеш», «Инвожо», «Луч» журналъёсын, дэмен бичетъёсын «Йыр вадьсын инбам» (1984), «Быльырам синкыли» (1997), «Горизонт-82» (1982). Нимысьтыз произведениосыз берыктэмын мокша, чуваш но мукет кылъёсы. [1]

Пётр Куликовлэн геройёсыз луо туала гуртын улӥсь но ужась калык. Соос чупресэсь, пуктэм ужрадзэс быдэстӥсесь, янгышало, но со янгышсэс валаны но тупатыны тыршисесь.

Нырысетӥ книгаез потэм бере филология тодосъя кандидат, писатель Александр Григорьевич Шкляев «Араны егит муртъёс лыктозы» статьяяз гожтэ: «Пётр Куликовлэн «Буран бере» книгаез – туала егит удмурт прозаик понна, мон сямен, одӥгез самой яркыт но синйылтымон факт. Лач-лач пуктэм предложениос, образной кылыз, оскымон суредан характеръёсыз но аслаз темаез. Лыдӟись сое соку ик шӧдӥз». [5]

Аспӧртэмлыко инты басьтэ туала удмурт литератураын П. Куликовлэн «Зарни чорыг» повестез. Ас вакытэзлэн тодметъёсыз пӧртэм сямен пӧлэстӥськемын отчы. Но тужгес висъяське лушкаськон ужпум. Со герӟаськемын выльдӥськон югдурен но туала улонлэн уката но валантэм луэменыз. [6]

Пётр Васильевичлэн «Пилиськем музъем» повестез туж ӟеч возьматэ удмурт традиционной прозалэсь туннэ нуналэ кыӵе луэмзэ, кыӵе ӧретӥ азинскемзэ. Вылтӥз учкыса, сое реализм амалэн гожтэм произведение шуыны луоз. Автор пыр-поч эскерыса-чакласа возьматэ Перевозчиковъёслэсь (произведениысь валтӥсь геройёс) семьязэс. Соос ваньзы ик котырысьтымы басьтэмын кожалод, тодмоосмы кадь суредамын, лыдӟись соосты, улэп муртъёсты кадь, син шораз пуктыны быгатэ… Таин ӵош ик произведениын чильпыра символъёсын шудон амал но. [4]

Аръёс ӧз воштэ Пётр Васильевичез. Чеберлыко литератураын солы азьло сямен ик тунсыко луэ адямилэсь пуш дуннезэ возьматон. Нош туала сюжетъёс ке? Соос вань – улон выльдӥське, воштӥське. П. В. Куликов но та улонысь, туннэ нуналлэсь трос выльзэ но тунсыкозэ басьтэ.

Библиография

Книгаосыз

Буран бере: веросъёс. – Ижевск : Удмуртия, 1982. – 56 с.

Зарни чорыг : повестьёс, веросъёс. – Ижевск : Удмуртия, 1992. – 221 с.

Статьяосыз

Кузьым : верос / иллюстрациез Галина Ивановалэн // Кизили. – 2012. – № 9. – С. 6-7 : ил.

Ошмес // Азвесь кышетэн толэзь : веросъёс : семьяын лыдӟон книга / люказ но радъяз В. Н. Ившин. – Ижевск, 2007. – С. 70.

Семьямы бадӟым // Кенеш. – 2011. – № 2. – С. 10–11.


Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.

Уже кутэм литература

  1. 1,0 1,1 Уваров А. Пётр Куликов (1952) // Писатели и литературоведы Удмуртии : биобиблиогр. справ. / сост. А. Н. Уваров. – Ижевск, 2006. – С. 73–74.
  2. 2,0 2,1 Петрова Т. П. Куликов – прозаик, журналист, редактор // Вордскем кыл. – 2008. - № 2. – С. 25–27.
  3. 3,0 3,1 3,2 Возняков В. Зарни чорыг шедьылэ буран бере но // Удмурт дунне. – 2002. – 11 сент. – С. 6, 11. - (Удмурт кизилиос).
  4. 4,0 4,1 Айтуганова Л. Дырлэсь тодметъёссэ шонер синйылтэ // Кенеш. – 2002. – № 9-10. – С. 99–102.
  5. Шкляев А. Араны егит муртъёс лыктозы // Араны егит муртъёс лыктозы / А. Г. Шкляев. – Устинов, 1986. – С. 128–157.
  6. Шибанов В. Толэзьлэн мышпалыз // Кенеш. – 1994. – № 10. – С. 55–60.