Кузьмина Юлия Ильинична

Материал из Воршуда
Перейти к: навигация, поиск

Вордскоз нунал, вордскоз кырӟан

Кузьмина Ю. И.

Кӧс кырӟанэз сюлэме уд лякы. Ӟеченыз шумпотондэ но ӧръялод, куректондэ но буйгатод. Ӵапак тазьы шуыны луоз Юлия Кузьминалэн кырӟанъёсыз сярысь. Шулдыръяськыку, вордӥськем нуналэз пусйыку, ма, мукет дыръя но чузъяське «Анаелы». Сое котькуд нэнэ мыным гинэ сӥземын шуыса малпа, кылъёссэ но, крезьгурзэ но лул-сюлэмаз ветта. Со бордын ик, дыр, кырӟанлэн кужымез, калык пӧлын вӧлмемез.

1989-тӥ арын Кузьмин кузпалъёс кыкназы сцена вылэ потӥзы. Егит семья кыдаз, будӥз, ӧз безды – эшшо но яркытгес усьтӥськиз. Табере соос ньыль кузя – Виталий но Юлия, соослэн нылъёссы Света но Люба.

Кышномурт – ӝыны юрт, шуо. Юлия КУЗЬМИНА – семьяезлэн лул-сюлэмыз.

Юля-пуля

- Гольык пыд бызьылон дырды маин герӟаськемын? Мар тунсыкоез тодэ лыктэ?

- Туж узыр фантазие вал. Асьмелэн телевизормы ӧвӧлэн бускельёсмы яке ӵыжы-выжыосмы доры ветлылӥ. Тунсыко фильмъёсты, выжыкылъёсты, мультфильмъёсты огзэ но ӧй кельтылы – коть ӟырт кезьыт куазь, коть дас кык час уй мед луоз. Собере гужгетӥсь малпанъёсылы эрик сётылӥ.

Огпол мунчо йылысь «парашютэн» васькай. Ма, нырысь ваньзэ писэй вылын эскери. Простыняез ньыль сэрегтӥз ик думылыса, парашют нерге лэсьтӥ: липет йылысен коӵышез лэзи. Умой кадь. Собере ачим но тэтчи – кельшиз.

- Семьяяды концерт но дасяськоды вылэм.

- Дорын гинэ ӧвӧл – асьме гуртамы но, бускельёсаз но милемыз тодо вал. Сузэр-вынъёсме, эшъёсме люкаса, сценка пуктӥськом, кырӟаськом-эктӥськом. Пиос арганэн шудо, соос бере мон гитара кутӥсько.

Актриса луэме потэ вал, асме театрлэн сцена вылысьтыз адӟылӥ. Собере малпай: сыӵе удысэ вамыштон понна мугорын но, ымнырын но тупась – шекъёстэм – луоно.

- Асьтэлы осконды пичи вал-а?

- «Р» куараез небыт вералляй. 10-тӥ классын гинэ дыши. Но кепыранэз ӧй тодылы, школаысь но, районысь но уно ужрадъёсы пыриськылӥ: кырӟасько, шулдыръяськон ӝытъёсыз нуисько, сценарий дасясько.

Огпол, ёросысь сцена вылын огнам кырӟаме бере, комсомоллэн райкомезлэн нырысетӥ секретарез Николай Трофимович Михайлов юаз:

- Юля, школаез йылпумъяса кырӟасе мынод, дыр?

Мынектӥ гинэ: нотаосын грамотаез уг тодӥськы. Вамыштӥ Культурно-просветительной училищелэн дирижёрско-хоровой люкетаз.

- Тӥледлы Пермьысь Культурая институтэ сюрес сӥзё вылэм ук?

- Училищеез йылпумъякум, сыӵе дэмланъёс кылӥськизы, мылкыды но вал. сольфеджиоен но дасяськи. Со вакытэ Азамат клубе ужась кулэ луиз, нош мон ӵапак тупась адями, малы ке шуоно училищее пыреме бере ӝыны ар ортчыса, мон колхоз ыстэмъя тодон-валан люкай. Куинь арзэ ужатэк, вузысь очной люкетэ выльысь дышетскыны пыреме уг луы. Кылзӥськи, кыли гуртэ. Али ке но уг жаляськы. Отын мон бурдъёстэк лобасько вал. Клубысь хоре кӧня адями ветлӥз: колхозысь кивалтӥсьёс, нылпи садын ужасьёс, дышетӥсьёс, дояркаос, пиналъёс. Районысь одӥг ужрадэ но пыриськытэк ӧм кыльылэ. Ӵуказелы сценарий кулэ – пожалуйста, уй куспын гожто, концертлы дӥсь дасяно –ӵукнаозь вурисько. Кытысь сомында кужым шедьылӥз? А мыным соку 19 арес гинэ вал ай. Республикаысь культура удысын егит ужасьёс пӧлын ӵошатсконын вормисе потыса, Азербайджанысь егитъёслэн калыккуспо «Гянджлик» центразы шутэтски.

Клубын куинетӥ арзэ ужакум, Удмурт кун университетлэн кунсьӧр кылъёсъя факультетаз пыри. Соин сэрен Иже лыктоно кариськи. Азаматысь сыӵе лэземзы уг поты вал! Берпуметӥ арзэ ужакум, выль клуб но, егит специалистъёслы коркаос но ӝутӥзы. Мыным куинь комнатаен квартира но сёто – кыль гинэ. Нош отчыозь кыӵе кынмыса ужай: клубын кезьыт, улон инты вуж, гурез эстӥськод, нош шуныт луыса уг вутты, коркан тӧл поръя. Оло, кӧты ӝож луиз сомында чидамелы, бӧрдыса ик куриськи – ишкалски.

- Удмурт телевидение ёртыса возе вал, дыр: ку ни, ку вуод?

- Городэ мон дышетскыны лыктӥ, но телевидение ӧтён вал ни, угось клубысь коллективме возьматӥзы «Пумиськонъёс» передачаын. Сое ми Семён Карповен ӵошен нуимы. Туж тунсыко но чебер пӧрмиз вал выжыкылэя дасям «Рос-прос» передача. Тӥни соку монэ Василий Михайлов но Семён Карпов синйылтӥллям. Режиссёрлэн юрттӥсез луыса тырши.

- Михайлов тӥледыз дикторе дасяны ӧдъя вал. Таиз сюрес кытчы кожиз?

- Арня ӵоже ужатозям Василий Фёдорович шуэ:

- Юля, ойдо тонэ ГИТИС-э лэзём: университетын дышетскиськод, кырӟаськод-эктӥськод, инты но вань.

- Мон малпасько ай, - вазисько пумитаз, аслым осконэ маке пичигес.

Ӵапак со малпаськон арня куспын ваньмыз воштӥськиз.

Ижын туж но туж мӧзмыт вал. Мон тодӥ, кытын кыӵе хоръёс вань. Одӥгез тодмое «Тюрагаез» дэмлаз, солэн кивалтӥсезлы Валерий Яковлевич Митрофановлы жингыртӥз: вань, пе, сыӵе шаплы нылаш… Нош соиз пумитаз вазе: чебер-а?

Озьыен, вамыштӥ «Ижмаш» культура двореце, «Тюрагай» калык хоре. Со нуналэ ик пумиськи вуоно кузпалэным. Уйшоре сайкало яратон но кырӟан

- Семьяяды кин кузё?

- Кузпалэ.

- Ваньзэ солэсь кылзӥськоды, быдэсак карттылы пыриськиськоды?

- Озьы. Телевидениын ужакум, доре бер вуисько вал. Виталие пумит луиз: кышномурт дорын возьманы кулэ. Собере семьядэ дунъяськод, карттэ яратӥськод ке, кылзӥськыны кулэ.

Концерт дасяны но туж секыт: ваньмылэн пӧртэм сямъёсмы. Коллективен ужаськод ке, кивалтӥсь – йыр, солы нокыӵе пумитъяськон ӧвӧл. Нош семьяен…

- Мынам тазьы кырӟаме потэ, - шуэ нылы.

- Мама, мон тазьы карысал, - итӥське мукетыз.

Витальлы я таиз уг яра, я соиз: мон, пе, музонгес шудысал. Ваньмыз борды аслам мылкыды ватсаське на. Тӥни озьы «кисьма» концерт.

- Республикаямы тӥляд выллем семья ансамбльёс вань на-а? Культурая министерство ласянь кыӵе ке юрттэт вуэ-а?

- Гуртъёсын вань, тани Екатерина Антонова «Арганчи» ансамбль кылдытӥз. Но со клубын ужа, солы капчигес, дыр, кыӵе ке ужрадэ ас семьязэ одӥг-кык номерен пыртыны. Ми быдэс концерт дасяськомы, Ижысь сцена вылэ потӥськомы. Городын вань на Ханжинъёслэн семья дуэтсы, концертъёссы луыло, но соос –ӟучъёс.

Ми эрико ансамбль, кырӟанъёсмес быдэсто клубын ужасьёс, фольклор коллективъёс, калык артистъёс но мукет. Ваньмыз соос Культурая министерстволэн бурд улаз. Кырӟанъёсмес куто бере, милемлы но саклык висъяно, дыр, ӧжытак юрттоно. Собере культураез азинтонын ансамбльмы но тылгизьы сётэ ук. Семьяенымы нокытчы юнматӥськеммы уг луы, угось учреждениослэн планзы вань: сомында-сомында концертэн потано. Нош мынам картэ ужа, нылъёсы дышетско – сыӵе луонлыкмы ӧвӧл. Пумиськонъёсы мыныны, кыӵе ке ужрадэ пыриськыны – тазэ быгатӥськом. Учкисьёсмы табере вань. Адямиос юало: концерт луоз-а, лыктыны куро. Мон ӝуатскисько, программа утчасько, озьы выль кырӟанъёс кылдо. Оло, пӧртэм шуг-секытъёс тросгес кужым, уно малпан сёто.

- Юлия Кузьмина семьяезтэк син шоры йӧтысал-а? Оген кырӟаны секытгес-а?

- Капчигес. Соку сцена вылын ачид сярысь гинэ малпаськиськод, семьяен ке – ваньмыз понна сюлмаськоно. Огнам кырӟасал ке, оло, асме бадӟымгес, яркытгес возьматысал. Артистъёс ведь сыӵе кырӟан быръё, кудӥз куаразыя, мылкыдзыя луэ. Мынам гожъямъёсы – мӧзмыт шӧмо, Витальлы куддыр уггес тупало. Семьяме куштыса, мукет коллективе кошкысал ке, Кузьминъёс туннэ, оло, ӧй но луысалзы ни. Озьы ке но, тазьы ке но, мынам яратоно уже – сцена.

- Кырӟам сяна, кылбур гожъяськоды, газет-журналъёсын кусып возиськоды, мукет удысъёсы но вутскиськоды. Кытысь сомында кужым шедьтӥськоды?

- Дорын пукыса, туж мӧзмыт ук. Али куать выжыкылэн книга дасяй, со луоз удмурт но ӟуч кылын (берыктӥсе – Алла Кузнецова). Бичет узырмытэмын яркыт турлы суредъёсын. Ку со пиналъёс кие вуоз, уг тодӥськы: ваньмыз пыкиське коньдон вылэ. Черодзэ возьма выль кылбуръёсын но кырӟанъёсын рукописе. Ужлы уг ёрмиськы, картэлы но юрттӥськисько.

- Бадӟымез нылды Крезьгуръя училищеын дышетске. Быръем сюресэзлы дурбасьтӥськоды-а?

- Шонерзэ верано ке, дышетскыны пыремезлы шумпотӥсько, но азьланез сярысь туж сюлмаськисько. Мон, оло, со удысэ ӧй поттысал – ачиз куриськиз. Света сьӧры Люба но вамыштэ. Бадӟымез шонерак уг но вера мылкыдзэ, но кырӟамез потэ. Фортепьяно люкетын дышетске бере, азьланяз со юрттоз гинэ. Кырӟаны туж юн тазалык медло. Урамын но, кезьыт клубын но концерт сётоно луэ. Ачиз тодоз ини.

Нылъёсы крезьгурез ярато – мон шумпотӥсько гинэ. Пианино кулэ луиз - басьтӥм. Светаен Люба вожмаськыса ӝытбыт шудо. Висказ туала эстрадаез кылзӥсько. Квартираямы шыпыт ноку но уг луы. Нош Виталь баянзэ кутэ ке, куараез – корка тыр. Мон сыӵе зол кырӟаны уг дӥсьтӥськы.

- Кузьминъёс концертъёсазы дась гожтэм кырӟанэн фонограммаез уже куто-а?

- Меӵак микрофонэ кырӟаськом, ми баянэн тросгес ужаськом. Эктон яке сценка луэ ке, дась кырӟанэн фонограммаез лэзиськомы ик: угось сыӵе учыре шокан пытсаське. Но быдэс концертын соос одӥг-кык гинэ луо.

Улэп куараен кырӟась – со зэмос профессионал. Учкись но соку ик шӧдэ, кызьы ужало сцена вылын. Куара – со артистлэн узырлыкез, коньдонэз. Тросэз, сое жаляса, фонограммаез уже куто. Али олокыӵе но техника вань: ляб куараез но, азьвыл ик гожтыса, быдэс зал тыр чузъяськытыны луэ. Одӥг сыӵе артист сярысь учкись шуиз: концерт бере, ӝӧк сьӧрын пукыкумы, милемын ӵош кырӟаны но ӧз пишмыты.

Мыным кельше улэп куараен сцена вылэ потыны, соку мон пуш мылкыдме усьтӥсько.

- Крезьгуръёсты уин лыкто ке, кузпалдэс али но сайкатӥськоды, дыр.

- Азьло сыӵе учыръёс луылӥзы, «Шуд» кырӟанме гожтыны Виталиез уин сайкатӥ. Картэ баянэн шудэ – выль крезьгур дась. Али уин шӧдӥсько ке, шыпытак кухняе бызисько, магнитофонэз лэзисько, мар йырам лыктэ – нёжъясько-гожъясько. Ӵукна кылзӥсько но, выль кадь уг поты: я соысьтыз, я таысьтыз маке лякиськем. Нокин дорын ке ӧвӧл, люкетӥсь ке уг луы – соку выль гуръёс ӧръясько.

- Семьяын шуд мар бордын возиське? Кыӵе лушкем ватосты вань?

- Кызьы уло мукетъёс, ми но – со выллем ик. Верало огзэ, ваньмызлы тодмозэ: ог-огдэ валаны тыршоно, ӧжытгес ченгешоно. Нош улонэ сярысь верано ке, со Даниил Яшинлэн кылъёсызъя гожтэм выль кырӟанэ.

Шуд

Вордскем дырме мон ӧй бырйы –

Со дыр ачиз бырйиз монэ.

Соин но, дыр, вожъяськымон

Куд-огезлы та улонэ.


Уг быгатскы валэктыны,

Кыӵе меда мынам шудэ.

Куддыр тырше со лобаны,

Куддыр бӧрдэ, куддыр шудэ.


Ӧд вала ке куректонэз,

Шумпотонэз уд тоды, уд.

Нош ворме ке улонам ӟечез,

Со мон понна ӧвӧл-а шуд?


Источник:

Кузьмина Ю. К. Вордскоз нунал, вордскоз кырӟан / Ю. К. Кузьмина ; записала Алёна Ионина // Удмурт дунне. - 2002. - 4 окт. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"