Кузнецов Виктор Николаевич

Материал из Воршуда
Перейти к: навигация, поиск

Ӧй ке усьысал, ӧй но ӝутскысал

Кузнецов В.Н.

Футболъя кыӵе ке чемпионат ортчон азьын вал со. Виктор, ас ужъёсыз сярысь малпаськыса, трамвайын мынэ. Вадьсаз кык воргорон пуке, маке но спорт сярысь ченгешо. Одӥгез шуэ: со тренеръёс огпалмылэмын ни, толон телевизор пыр пал пыд вылазы футболэн шудӥсьёсыз возьматӥзы. Мар озьы адямиосты мыскыл каро?

Викторлы сыӵе верамзы ӧз кельшы, но ӧз куареты. Трамвай тыр уд ушъяськы ук, ӧлексы кылем адямиослы спорт улон кужым сётэ, нош трамвайын таосын артэ ӵапак со - Удмуртиысь ампутантъёслэн футбол клубзылэн президентэз, футболъя калыккуспо классъем спортъя мастер мынэ шуыса. (Нялтас вераса, В. Кузнецов сяна, сыӵе мастеръёс шаерамы ӧвӧл тазаосыз пӧлын но.)

1995-тӥ арын Россилэн нырысетӥ Президентэз Б. Ельцин юн, кужмо удмурт воргоронлэн Виктор Николаевич Кузнецовлэн гадь вылаз бырттӥз «За заслуги перед Отечеством» орденлэсь 2-тӥ степенё медальзэ. Нош кылем ар пумын Президент В. Путин гожтӥз В. Кузнецовез Александр Невский святой князьлэн 2-тӥ степенё орденэныз пусъён сярысь указ.

- Виктор Николаевич, бадӟым дунъет басьтэмды бере вожъяськисьёсты-тушмонасьёсты ӧз йылэ-а?

- О, кызьы сотэк? Тужгес тунсыкоез тодӥськоды-а мар - вожъясько таза адямиос! Вот-вот, серем. Соос уго адӟо наградаез гинэ, нош кызьы со сётӥськиз, кӧня нюлам ву кисьтӥськиз, кӧня вӧсез чидаськиз - нокин уг лыдъя. Азьвыл мон сыӵеослы пумит киыным шонтылӥ, нош али куаӵак карисько: вожъяськиськод ке, пыддэ коралтыса кушты но султы ук пӧламы. Шып карисько. Оло, куд-огез малпа, дыр, ми кадьёслы дано нимъёс жаляса сёто шуыса. Но со озьы ӧвӧл. Мон синазькыль карисько жалясьёсты. Тани 3-тӥ декабре, пе, инвалидъёслэн нуналзы. Мар нунал со, малы со кулэ? Ну, куд-огез берло дыре мон кадьёслэсь мылкыдзэс куашкатонтэм вылысь, лэся, инвалид кылэз кулэсмем (ограниченной) луонлыкъёсын адямиос шуыны кутскизы. А мон котьку аслам эшъёсы азьын но, Кремльын вераськыкум но шуисько: кулэсмем ӧвӧл - пумтэм луонлыкъёсмы! Адямилы Инмар туж трос чидан но, быгатонлык но, луонлык но сётэ, сое кутыны гинэ быгатоно.

- Но ваньмыз уг быгато…

- Малы ке шуоно, со понна укыр улонэз яратоно. Нош курадӟылымтэ адями сое ноку уз дунъя. Зэм, монэ курадӟемын шуыны уг луы, мон шудо адями. Сямы пичиысен кыдамын.

Будӥ мон Ижын. Но вордскемын Грахын. Дорен лыдъясько анаелэсь но атаелэсь гуртъёссэс - Яги-Каксиез но Вылӥ Эграез. Школаын дышетскыкумы, котькуд гужем песянай доры бертӥськом вал, соин удмурт кылын гуртоос кадь ик вераськыны быгатӥсько. Отысь эшъёсы тодо ни вал: турнаса-мажсаськыса жадёд-а, уд-а - ӝытазе Витя сёровно футболэн шудыны поттоз. Туп борды ноку йӧтскылымтэосыз но гужем ӵоже шудыны кутскылӥзы, ляб пиёкъёс тужгес азьветлӥсьёсыныз акар-акар нюръяськылӥзы.

Спортэз гажан атаелэсь Николай Антоновичлэсь выжемын. Со дышетӥсь вал. Огвакыт Грах ёросысь спорткомитетэн кивалтэмын. Но одно спортсмен луон сярысь ӧй малпалля. Со вакыт футболъя нимысьтыз школаос но Ижын ӧй вал ай. Мыным удалтӥз: дышетски 69-тӥ школаын. Отын физкультурая дышетӥсьёс устоесь вал, та школаысь трос спортсменъёс потэмын. Тау «пӧсятъямез» понна Геннадий Акимович Солодовниковлы.

- Нырысетӥ вормонды кыӵе вал?

- 14 арескам мон луи Индустриальной ёросысь устоез нападающий. Со туж бадӟым вормон кадь потӥз, нош со бӧрсьы - вылысьтыз вылаз - нокыӵе ӧз потылы ни. 9-тӥ классын бадӟымъёсын ӵош «Спартак» командаын шудылӥ Удмуртилэн первенствоез понна.

Университетын капчи атлетикаен выри. 100, 200, куддыр - 400 метре бызьылӥ. Вакчи дистанциосы бызьылыны дышетыны адямиез туж шуг - отын бадӟым ӝоглык кулэ. Нош со инкуазен сётэмын ке сётэмын, ӧвӧл ке ӧвӧл. Мугор ӝог вошъяськонъёсты чиданы кулэ.

- Спортфакын дышетскисьёслы, мукетъёсын ӵошатыса, туж секыт шуо со ласянь: татын дышетско яке зэмос кизилиос - чемпионъёс, яке огшоры школае огшоры пиналъёсты дышетыны мыныны дасяськись огшорыос… Тӥ асьтэды кудъёсыз пӧлыгес пыртылӥды?

- Кытын ке висказ вал. Но мынам кызьы ке, малы ке ноку комплекс шуонъёсы ӧй вал, соин каньылэн эшъяськылӥ соосыныз но, таосыныз но. Но отын зэмлыкез вань, берлоосызлы секытгес - вужерын кинлы кельше? Мукет ласянь - кин будэтэ кизилиосты? Школаысь дышетӥсь ке ӧй сюлмаськысал, ас кожаз огез-кыкез сяна ӧй воректысал.

Спортфакын дышетскисьёс сярысь мукетъёс шуыло: «кужым ке вань, визь мултэс». Но со озьы ӧвӧл, конечно. Тани мон олимпийской чемпионэн Валерий Медведцевен, спортфаклэн али деканэныз Александр Алабужевен одӥг группаын дышетски. Визьтэм муртъёс уг вормо. Аслам клубысьтым спортсменъёсы тодэм-валамзыя одӥг журналистлы но уз сётске. Ӵошатсконъёсы сьӧрло потаськомы бере, юри басьтӥ «Удмурт Республика» энциклопедия - шаермес тодэмзыя эшъёсы табере историкъёсын вожвылъяськыны быгатозы.

- Виктор Николаевич, кызьы йырады лыктӥз клуб кылдытон сярысь малпан?

- Кызьы-о ӟучъёс шуо: шудтэм учыр ке ӧй луысал, шуд но ӧй вуысал. Вот мынам но озьы ик. Улӥ-улӥ, семья кылдытӥ, школаын дышетӥ… Ваньмыз умой кадь, мар карод на? Ваньмон дыръя Василий Шукшинлэсь адӟем карылӥ. Верос ӧй гожъя, марым… Ну со шуылэ вал ук: ӧй ке юысал, улонэз ӧй валаллясал. Озьы ик луиз: огпол кыӵе ке тодмотэм интыын сайкасько. Реанимация вылэм. Йыры быдэс, визьмы бордам, но одӥгез пыды - ӧвӧл… Мар мон соку малпай? Кемыз! Кык пыд вылын улыны ӧд вала бере, табере тэтча-берга.

Огпол протез лэсьтонъя предприятиын пумиськи ачим кадьгес ик пиосын: кинлэн суйыз ӧвӧл, кинлэн пыдыз, кин ке Афганистанын сӧсырмемын, кин ке татын шудтэм учыре сюремын. Пӧлысьтызы тросэз спортсменъёс вылӥллям. Вот мон малпай - мар тазьы нырез ошыса улонэз, пинал вакытэз тодэ ваёно. Отчыозь кылылӥ ни вал, Узбекистанын ампутантъёслэн футболъя нимаз клубзы вань шуыса. Герӟаськи, спонсоръёс утчаны кутски. Паймоно кадь, дурбасьтӥсьёс сюризы, малпанме умоен лыдъязы спорткомитетын но. Озьы 1991-тӥ арын клубмы усьтӥськиз. Сыӵе клубъёс, нялтас вераса, али но Приволжск улосын кык гинэ: Ижын но Нижний Новгородын. Нырысь-валысь шуггес вал люканы асьсэды спортсменъёсты. Пиос ӧз оскылэ, соос - сӧсыр кылемъёс, маке карыны, спортэн вырыны быгатозы на шуыса. Маин но лӧпкытъяны ӧй выры: я Москвае дунтэк вуылонэн гочатӥсько, я эшшо маке… Клубмы нырысь туж пичи вал: Альберт Ижболдин, Александр Кушнеренко, Юрий Широбоков, Илгам Авзалов, Рафаил Марданов, Игорь Кузнецов, Сергей Кузнецов но мон - Виктор Кузнецов. Эн малпалэ, ми агай-вынъёс ӧвӧл, озьы тупаз - али клубамы воксё но вить Кузнецовъёс.

Со арын ик командамы пыриськиз ни Россиын ортчись «Рождество» турнире. Удалтӥз - ми сюрим турнир таблицалэн шораз. Кутскон понна со туж умой. Пиос бурдъяськизы, тренировкаосы мыло-кыдо ветлыны кутскизы, эшъёссэс кыскизы. Кӧня ке улыса, соосты тодманы уг луы ни вал - чылкак юскиськем адямиос ӧрӟиослы укшаны ӧдъязы, юонзэс куштӥзы, уж шедьтӥзы… Эшшо ӝыны ар ортчыса, Анапаын ортчем ӵошатсконъёсын ми куинетӥ луим ни. Вуоно араз - нырысетӥ! Ижын сыӵе клуб вань шуыса тодэм «Спецгазавтотранслэн» генеральной директорез Владимир Тумаев. Со дырысен со милям «киросатаймы» луиз: маин быгатэ, юрттэ. Со туж визьмо, мукетъёссэ валаны быгатӥсь адями. Мар бен, ми солэсь осконзэ ум саптаське. 2001-тӥ арын мон Россилэн сборноеныз странамылэсь данзэ ути Бразилиын. Дуннелэн чемпионатэз ортчиз Рио-де-Жанейроын. Вормим англичанъёсты, аргентинецъёсты, немецъёсты, келям кузёослы гинэ - кыкетӥ луим.

2004-тӥ арын Удмуртиысь «Газовик-Газпром» команда утӥз Россилэн Президентэзлэсь кубоксэ. Так что, мынам Россилэн кыкеныз ик Президентъёсыныз ӟыгыръяськеме вань.

- Юзырес-а?

- Малы? Мон отчы кужмысь ӧй куриськы ук, соос монэ асьсэос ӧтизы. Озьыен, монэ вань мар понна дунъяны - малы мон керпотом? Мон отын спортсменъёслэн нимынызы вераськи но.

Мынам туж трос тодмо-дано адямиосын - кивалтӥсьёсын, спортсменъёсын - пумиськылэме, вераськеме вань. Куд-огез монэ асьсэос тодмало. Горд - соин, дыр. (серекъя). Кудӥз воксё паймо - Виктор, кызьы дӥсьтӥськод? Одӥг полаз Москваын дыръямы командаысьтымы пиос шуо: эх, Поклонной гурезе ветлытэк бертӥськом… А пӧлазы Афганистанын ожмаськемъёс вань. Мар кароно? Вормонлы 60 ар тырмон азьын со комплекс тупатъяны ворсамын вал. Мон малпай-малпай но аспал адямимылы, С. Маев генераллы, жингыртӥ. Кӧня ке улыса, юромо милям командамы понна ворсам комплексэз усьтӥзы, экскурсия ортчытӥзы. Котыр охрана сылӥз.

- Асьтэос армия шоры кызьы учкиськоды?

- Монэ армия ӧз тӥя. Вал бен паймытъясь учыръёс. Нырысетӥ ӵошатсконъёсы поттӥзы но - ну, бызисько ук! Ваньзэс азьпалтӥ, а уг яра вылэм. Сержант йыртышкам сётъям бере валай, выльысь востэмгес кариськи. Но сыӵе учыръёслы али но кӧты уг веська. Кык арзэ ик служить кари Можга ёросысь Коля Семакинэн. Ас палъёсыд вань ке, капчигес. Туж умой пияш, али но эшъяськиськом. Ӝыны арзэ спортротаын вал - ялан ӵошатсконъёсы пыриськылыса, дырлэсь ортчемзэ но ӧй шӧдылы. Дивизиенымы генерал-майор Гусев кивалтӥз. Тани али гинэ тодӥ, со асьме адями, удмурт воргорон шуыса. Жаль, тодматскытэк кыли.

Пияшез пичиысен дышетоно шуг-секытъёсты вормыны. Пунэмзэ берыктыны но. Туала учыръёсты кылӥсько ке, юзыр-кезьыр луисько. Ултӥянлы сётӥськыны уг яра.

- Тӥ ӵошатыны быгатӥськоды таза но ӧлексы адямиослэсь шудэмзэс. Маин соос висъясько?

- Вылтуссыя асьтэос адӟиськоды. Валамон ини, таза спортсменъёсты учкыны умой, чебер - со озьы ик луыны кулэ. Но тӥ сямзэс юаськоды ук? Таиз ласянь инвалидъёс дас поллы кужмоесь, зэм. Со инкуазьлэн законэз - шуккетъёс адямиез нюръяськись сямо каро, кыдато. Командаысьтым пиос понна спорт - со спорт гинэ ӧвӧл, со - астэ кулэен шӧдон, улон. Соин ик тыршо 100 процентлы улыны. Тренировкаын мон туж чурыт куронъёс пуктӥсько: бусые потӥд - вунэты, тон инвалид шуыса. Тон - спортсмен! Нялтас вераса, ми Сергей Кузнецовен но Альберт Ижболдинэн таза спортсменъёсын ӵош эшлыко матчъёсын шудылӥм. Куронъёс огкадесь вал, но ми ӧм сётске.

- Виктор Николаевич, тӥляд клубады 100 адями, нош ӧлексыос данаклы тросгес…

- Валамон, мон вань мылкыд карисьёсты огазеяны уг быгаты. Но быгатэмея тыршисько, тросгес адями кайгуысьтыз мед потоз шуыса. 2000-тӥ арын кылдытӥ на ляб адӟисьёслэсь но кылӥсьтэмъёслэсь командаоссэс. Ветлӥсько районъёстӥ, сӧсырмыны шедемъёсын вераськисько. Валамон ини, соку ик уз лыктэ, но мон соослы оскон кузьмасько, соин улон ӧз йылпумъяськы шуыса. Шуге-леке сюрем муртлы туж секыт нырысь вакытаз, нош юрттӥсь-валась шеде ке, адями уг юскиськы, выль кужымен улон борды ӝабырске. Али мон ӵемысь уг валаськы ни таза адямиосты: суйзы-пыдзы интыяз, дышетскемзы вань, а весь ӝожтӥсько - улон секыт…

- Тӥледды сыӵе малпанъёс уг одольыло шат?

- Мон соосты матэктыны ик уг лэзиськы. Больницаысь потыкум, кылсярысь, мон тодӥсько ни вал, мар мон каро, кытын ужало, маин семьяме сюдо. Матысь адямиосылы но, тодмоосылы но шуи: только жаляса утчалэ! Мар понна?

Туннэ мон сыӵе ик адями - тросэз уг но валало, протезэн шуыса. Спортэн, футболэн сяна, бизнесэн вырисько. Ачим руль сьӧрын ворттылӥсько - Москвае но, Сочие но аслам машинаеным ветлӥсько. Нылпиосме будэтӥсько.

- Улондэс берыктыны луысал ке…

- Ӧй берыктысал. Зэм. Мон малпасько, адямилы адӟон юнме уг сётӥськы. Озьы ке ӧй луысал, али мон кин луысал меда?.. Иське, мыным Инмарен озьы гожтэмын - ачим ке ӧй шуккиськысал, мынам тодам лыктысал шат мукет ӧлексыослы юрттыны? А тазьы мон кӧня пыдтэм муртэ «пыд вылазы» султытӥ ни. Кӧня дано адямиосын тодматски, пӧртэм дуннеосты адӟи. Кӧня пол вормонлэсь шӧмзэ шӧдӥ… Луысал-а мон азьвыл улон сямъёсыным футболъя калыккуспо мастер? Со туж бадӟым дун. Куд-огез монэ пыкыло: Виктор, тон данэз яратӥськод. Мон уг сеськиськы: а кыӵе спортсмен дан сярысь уг малпаськы? Соку выронэз но ӧвӧл. Ма мынам нимы озьы косэ! (Виктор - грек кылысь вормон)

- Али тӥ нош дасяськиськоды Россилэн чемпионатэзлы. Уй но нунал сюлмаськиськоды выль вормонъёс сярысь. Нош висказ мар сярысь малпаськылӥськоды?

- Мынам вань одӥг туж чебер малпанэ. Кемалась ни. Бразилие ветлыкум, пыраклы синмаськи Рио-де-Жанейролы. Со выжыкыл город. 10 миллион улӥсез, уд но вала - ваньмыз пальпото, ӟечъясько, маке кулэ ке, валэкто. Отын туж чебер адямиос. Кӧня отын улӥ, ялан шортыен ветлӥ. Одӥг адями но мон шоры долкаса ӧз учкы, пыдъёсы шоры чиньыеныз ӧз возьматы. Ижын озьы ульчае пот ай…

Отын туж шулдыр, чебер, каньыл, астэ ялан сяська пӧлын шӧдӥськод. Вот быгатысал ке, мон, вань родняосме самолётэ пуктыса, отчы нуллысал.

Источник:

Кузнецов В. Н. Ӧй ке усьысал, ӧй но ӝутскысал / В. Н. Кузнецов ; записала З. Рябинина // Удмурт дунне. - 2007. - 2 марта. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"