Комаров Анатолий

Материал из Воршуда
Перейти к: навигация, поиск

Анатолий Ермолаевич Комаров - удмурт поэт, прозаик но публицист.

Komarov0.jpg


Улон сюресэз

Комаров Анатолий Ермолаевич вордӥськиз Можга ёросысь Сардан каргуртын 1941-тӥ арын 1-тӥ куарусёнэ. [1] Анаез но атаез Вавож ёросын вордскемын. Войналэсь азьвыл улон секытэн егит кузпалъёс Сардан гуртэ кошкиллям. Отын ужам понна уксё тыро вылэм ини. Атаез солэн Сарданын ожгарчиосты дышетӥз, нош анаез санитарка луыса ужаз. Собере Толя, семьяын нырысетӥ пиналзы, вордӥськем. Кема ик Сарданын улытэк, быдӟым ож бере семьязы берен Вавож пала, тятязылэн вордскем Кион гуртаз, берытскем. Атайзы тушмонэн ожмаськыса, Белорусиозь вуэм. Со дыр куспын мамазы кык похоронка басьтэм. Тятязы войнаысь сӧсырмыса пал суй ке но, дораз вуиз ик. «Со шоры учкыны ик жаль вал, – тодаз вае Анатолий Ермолаевич, – войнае ветлэм бервылъёсыз адскылӥзы. Мугорысьтыз векчиесь осколокъёсыз пырак кулытозяз потылӥзы». Висемезлы чидатэк, атайзы улонысь вазь кошкиз. Семьяын тямыс нылпи. Сизьым кузя жильк-жильк пиос но одӥг сузэрзы. [2] Дышетскыкуз Анатолийлы, литература сяна, юн кельше вылэм биология. Та предметъя учебниксэ школае мынон азяз котькуд аре кутсконысеныз пумозяз лыдӟыса потэ вылэм. Нош урокъёс дыръя шыпытак книга лыдӟыса пуке ини.

Толялэн пичи дырысеныз мылкыдыз суредаськон борды но кыстӥськылӥз. Витетӥ-куатетӥ классын дышетскыкуз, аспӧртэмлыко адӟытонъёс но радъялляз. Суредъёссэ ошылыны доразы борддоръёс ӧз тырмылэ. Дояркаос, фермаысь бертыкузы, юри учкыны пыро ини. Нош школаын та быгатонлыкез бордгазет поттонын юрттӥз. Та мылкыдыз али но кысымтэ на. [3]

Толяез классазы старостае но бырйылӥзы. Концертъёс, спектакльёс пуктылыкузы, картофка мерттыны-бичаны, тэле пу дасяны ветлыкузы, со эшъёссэ огазеяны, сьӧраз валтыны быгатылӥз угось. [4]

Кион гуртысь сизьым классъем школаез йылпумъяса, пияш шор ёзояз Вавоже вамыштӥз. Со вискын тэль кораны ветлоно луиз. Угось дышетсконзэ ке азьланьтоно, уксё тыроно вал. Егит пиез нюлэс коранэ ыстӥзы. Нюр интые. Коръёсыз отысь поттылыны туж шуг. Но егит муртлэн йырыз ужа вылэм: зӧкгес улвайёсты пыд улаз куя но коръёсты соос вылтӥ питыръя. Мукетъёсыз но адӟем кариллям. Коръёсты валъёсын кыскано, соослы секыт йӧтэ, тужгес но — кызьпуосты поттылыку. Капчигес мед луоз шуыса, Анатолийлэн валлэн азьтӥз лымыез лёгаса ветлон дыръёсыз но вал. Пудо жаль потэмен, озьы сюрес лэсьтылӥм, пе. Ӵапак со аре дышетскон понна коньдон тыронэз воштӥзы, но Толя тямысэтӥ классэ мынӥз. [3]

Озьы Толя шор ёзо школае сюриз ик. Со вакытэ удмурт кыллы но литературалы дышетӥз Яков Фёдорович Меньшиков. Туж умой адями вал со. Лек ожын ожмаськемын. Бӧрысь Анатолий Ермолаевич со сярысь очерк гожтӥз. Дышетскись дышетӥсез сярысь гожтӥз шуыса, соиз туж шумпотӥз. [2]

Школазэ йылпумъяса, Анатолийлы нош ик малпаськоно луиз: дышетскыны ке мыноно, коньдон сярысь сюлмаськоно, собере анай-атаезлы но пичияк ке но юрттыны кутсконо ини. Кӧня ке но уксё поттоно шуыса, «Итчи» колхозазы ужаз. Нырысь рядовой, собере трактористлэн но шофёрлэн юрттӥсез луыса. Но колхозын ужам понна соку уксё ӧз тырылэ. Соин егит пияш вуиз Вавожысь леспромхозэ. Нунал потэмлы быдэ сопала но тапала дас кык иськемез пыдын ветлӥз. [2]

Но улон сюресэз вуттылӥз Анатолий Комаровез Урал палъёсы но. Коньдон поттон понна со Нижний Тагилэ мумизлэн выныз доры вуиз. Андан ӵыжатонэ интыяськиз. Нырысь-валысь ӟеч ужась вӧзы пуктӥзы: мед, пе, учкоз, тодон-валан люкалоз. Дышетскисьын толэзь гинэ ветлӥз. Цехе андан кисьтӥсе (заливщике) пуктыкузы, мастерзы пумитъяське вылэм: мугорыд, пе, пичи. Но ужасьёс дурбасьтӥллям: пыд улаз маке пуктом но, пӧрмытоз. Зэмзэ но, кобыез ӝуткамон кужымез вал ини. Озьы со заливщик луиз. Пияш заводын мылысь-кыдысь тыршиз, коньдон люказ. Угось вылӥ дышетсконние пырон сярысь малпанэз йырысьтыз ӧз кошкылы. [3]

Komarov.jpg

Дораз бертыса, одӥг малпанзэ быдэстӥз ик: мединститутлэн студентэз луиз. Дышетскон аръёс туж тунсыкоесь вал. Куинетӥ курсэ потӥз но… Пединститутысь биологияя факультетэ заочно дышетскыны пыриз. Мугез – пинал дыр, семья кылдытон вакыт. [2]

Ужаны кутскиз Вавож ёросысь ик Гурезь-Пудга школаын. Со вакытэ ик 1966-тӥ арын сое ӧтё «Авангард» ёрос газетын литсотрудник луыса ужаны. Кузпалэныз кыкназы ик отчы интыяськизы. Татын со огшоры корреспондентысен валтӥсь редакторозь будӥз.

1975-тӥ арын юатэк-вератэк шӧдтэк шорысь «Алнаш колхозник» газетэ редакторе юнматӥзы: отын, пе, газетсы куашкан калэ вуэмын. Партия косӥз – кылзӥськытэк ӧз луы. Татын но трос шуг-секытэз вормоно луиз. Ӟеч тыршемзэ адӟытэк ӧз кельтэ. Васильев Флор Иванович ӧтемен, 1979-тӥ арын Анатолий Ермолаевич «Молот» журналлэн редакцияз тыршыны ӧдъяз: нырысь кыл кутӥсь секретарь, собере – валтӥсь редактор. [2]

Туж шунытэн тодаз вае А. Комаров радиоын ужан аръёссэ но. Писательёслэн союзазы чеберлыко литератураез вӧлмытонъя бюроен кӧня ке кивалтэмез бере, сое нош ик шӧдтэк шорысь УАССР-ысь телевидениея но радиовещаниея комитетлэн тӧроезлы воштӥсе юнматӥзы. Кык арзэ ужаса вуэмез бере, 19871994-тӥ аръёсы «Советской Удмуртия» газетэ валтӥсь редакторе пуктӥзы, 19951999-тӥ аръёсы – Удмуртиысь Писательёслэн огазеяськоназы тӧролэн воштӥсез луыса ужаз. Бӧрысьгес гожъяськон вылэ быдэскын выжиз. [5]

Огъя вераса, журналистика удысын Анатолий Ермолаевич 35 арлэсь кема ужаз. Со пӧлысь 20 арзэ со куинь газетьёсын валтӥсь редактор луыса тыршиз. Котькудӥз ик писательлэн улоназ кыӵе ке но тодметъёс кельтӥз. Секыт вал ужан удысэз, но со шуг-секытъёслэсь ноку но ӧз палэнскылы, со дыре ик котькинэн ӟеч кусыпъёс тупатыны турттӥз. [3]

Гожъямъёсыз сярысь

Анатолий Ермолаевич Комаровлы, Удмуртиысь но Россиысь писательёслэн огазеяськонзылэн ёзчиезлы, писатель луон сярысь малпан йыраз но ӧз лыктылы. Толялэн гожъяськон мылкыдыз тямысэтӥ классын дышетскыкуз кылдэм. Литературая одӥгаз урокын дышетӥсьсы тулыс сярысь гожтыны косэм. Анатолий сое быдэсак кылбурен пӧрмытэм. Оломалы сыӵе мылкыды кылдӥз, шуэ Анатолий Ермолаевич, дышетскон аръёссэ син азяз пуктыса. Дышетӥсез Пётр Фёдорович Попков, ас удыссэ ӟеч тодӥсь но удмурт литератураез гажась адями, со сочиненизэ али но утьыса, пе, возе. [3]

Гурезь-Пудга школаын ужакуз, пичиен-пичиен «Авангард» ёрос газетазы гожъяны ӧдъяз. Кык бадӟымесь гожтосъёсыз потэм бере газетлэн валтӥсь редакторез тау карыса жингыртӥз но доразы пыраны куриз. Егит дышетӥсез со редакциын ужаны ӧтиз. Трос адямиосын пумиськылыса, уката ик пересьёслэсь кылзыса, гожъямъёсаз калык кылэз пыртыны сюлмаськылӥз. Анайзэ кылзыны яратылӥз, солэсь кырӟамъёссэ, верамъёссэ пеляз понылӥз. Нырысетӥ кылбур бичетэзлы «Выль бугро мон ӵупи» (1981) ним сётыны со тодэмъёсыз ик юрттӥзы. Отын удмурт гурт, удмурт семья,удмурт сямъёс огазе пӧлэстӥсько. [4]

А. Е. Комаров кужымзэ удмурт но ӟуч кылъёсын гожъяськыса эскериз. Заметкаосыз но очеркъёсыз «Советской Удмуртиын» потаны кутскизы. Та ласянь солы трос юрттӥзы В. Е. Смирнов но Г. А. Ходырев. Соос ик ӵектэмъя «Молотэ» но сюрес лёгиз. [3]

1970-тӥ арысен кутскыса, Анатолий Комаровлэн очеркъёсыз, веросъёсыз, кылбуръёсыз газет-журналъёсын ӵемгес но ӵемгес потаны ӧдъязы. 1974-тӥ арын революциысь но кык войнаосысь ветеранлэн З. И. Тороховлэн верамъёсызъя «Рядовой революции» книга поттӥзы. Но бадӟым малпанзэ ялан сюлэмаз нуллӥз: Кузебай Герд сярысь маке но гожтоно. 1989-тӥ арын нылпиослы «Лызгырлыос-шыркунъёс» пичи повестез потӥз. Отын 19211922-тӥ сютэм аръёсы Гердлэн нылпи юртын тыршемез, пиналъёс сярысь сюлмаськемез но та удысын выль ужан амалъёсты кутэмез сярысь гожтэмын. Сое кылдытыны пуксемезлэсь азьло писательлы Гердэн ӵош ужам муртэн А. К. Кирилловаен пумиськыны шуд усиз. Та кышномуртлэн улон сюресэз туж узыр вылэм, нош Герд сярысь тодэ ваёнъёссэ Анатолий Ермолаевич шокатэк кадь кылзӥз. Повестез ӟеч пӧрмиз, нош Леонид Прозоровлэн суредъёсыз пуштроссэ эшшо но умойгес усьтыны юрттӥзы. [4]

«Асановская быль» (1985) – Асан совхоз-техникумлэн улэмез но ужамез сярысь очеркъёсын книга. [1] Писательлэн «Сандыр гырос» повестез но лыдӟисьёслэсь мылкыдзэс бугыртӥз. Нырысьсэ «Советской Удмуртия» газетын потыкуз ик, куд-огез сое вандылыса асьсэлы кельтылӥллям. Нош Владимир Романов кылбурчи таӵе дунъет сётӥз: «Нырысь ик пусъем потэ характер кылдытыны быгатэмзэ. Эпизодической геройёс но син азе пуксё. Соослэн дунне шоры но асьсэ сямен учконзы, яркыт кылзы но асьсэлэн. Пересь кышномурт Олёна-а, солэн нунокез-а, бускельёсыз-а — ваньзы син азе пуксё».

Анатолий Комаровлэн геройёсыз тросэз улонысь басьтэмын, тужгес но — нылкышноос. Соослэн сямъёссы, выросъёссы ӝикыт гожтэмын, нокудзэс но уд сура. «Юриськем музъем» (1998) повестьысь Даша, «Узьым лёлё» мадёсысь Анна но Горд Мани, «Кӧс гужем» веросысь Домна апай но Педотча, «Сандыр гырос» повестьысь Олёна но мукетъёсыз — ваньзы воргоронъёслэсь яркытгес адӟисько.

Чылкыт шурлэн ярдураз

Будосэз вож-вож сылэ.

Пож шурлэн котыраз

Шашыез но ӝож улэ,–

тазьы гожтэ одӥг кылбураз Анатолий Ермолаевич. Бен, чылкытэз но пожез артэ луо. [4] Али но писательлэн ӝӧказ кылбуръёсыз но, веросъёсыз но, повестьёсыз но, очеркъёсыз но одӥг книга гинэ поттымон люкаськемын ӧвӧл ини. Но нимысь книгаен потыны дыр ӧз ву на, лэся. Анатолий Ермолаевич шумпотэ куд-ог кылбуръёсыз кырӟанлы но пӧрмизы, шуыса. [2]

Премиосыз

Удмурт Элькунысь сӥё-дано ужась

«Ветеран труда» медаль

Россиысь писательёслэн огазеяськонзылэн ёзчиез, 1998.

Библиография

Книгаосыз

Выль бугро мон ӵупи : кылбуръёс. – Ижевск : Удмуртия, 1981. – 56 с.

Лызгырлыос–шыркунъёс : верос / суредъёсыз Леонид Прозоровлэн. – Ижевск : Удмуртия, 1989. – 46 с.

Юриськем музъем : повестьёс, веросъёс. – Ижевск : Удмуртия, 1998. – 246 с.

Статьяосыз

Йыды кыдлэсь ӝук : [ньыльчуръёс] // На переломе эпох : Союзу писателей Удмуртии 70 лет, 1934–2004 : ст., стихотворения, прозаич. произведения, док. – Ижевск, 2006. – С. 213.

Туннэ уг тӧла тӧл : кылбур // Кизили. – 2007. – № 3. – С. 3 обл.


Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.

Уже кутэм литература

  1. 1,0 1,1 Уваров А. Анатолий Уваров (1941) // Писатели и литературоведы Удмуртии : биобиблиогр. справ. / сост. А. Н. Уваров. – Ижевск, 2006. – С. 65.
  2. 2,0 2,1 2,2 2,3 2,4 2,5 Тихонова Л. Выль бугро ӵупо на // Удмурт дунне. – 2011. – 16 сент. – С. 6, 11.
  3. 3,0 3,1 3,2 3,3 3,4 3,5 Айтуганова Л. Литература гурезе сюрес : Анатолий Комаровлы – 60 // Кенеш. – 2001. – № 9. – С. 16–19.
  4. 4,0 4,1 4,2 4,3 Гаврилова-Решитько М. Ӟеч сюресчи : Анатолий Комаровлы – 70 // Кенеш. – 2011. – № 8. – С. 98–101.
  5. Возняков В. Жингырто шыркунъёс… // Удмурт дунне. – 2001. – 4 сент. – С. 2.