Кардапольцев Алексей Юрьевич

Материал из Воршуда
Перейти к навигацииПерейти к поиску

Ужын - ожын кадь[править]

А.Ю. Кардапольцев

Адӟылэмды вань-а, ёросысь школа книга-газет поттонэн мед выроз шуыса? Алнаш районысь Вуж Утчан шор ёзо школа та ужез мытэм ни. Визь-нод сётӥсь юртъёс пӧлын ӵошатсконын, 2007-тӥ арын, со 1 миллион манет утӥз. Ӵапак со коньдонысь оглюкетсэ висъязы аспӧртэм тӥрлык басьтыны. Табере вуж утчанъёс дорын печатласько методикая пособиос, Алнаш районлэн дышетонъя управлениезлэн «Вестникез». Али дасяське солэн 9-тӥ номерез. Школаын озьы ик лэсьтӥсько администрациысь куд-ог бичетъёс. Созэ но, тазэ но буёло поттыны луонлык вань.

Соин гинэ уг паймыты Вуж Утчан школа. Ма, директорез но, Алексей Юрьевич Кардапольцев, туж синмаськымон воргорон. Со но дышетӥсьёс пӧлын нюръяськонын утӥз 100 сюрс манет. Удмурт кун университетлэсь химия но биология люкетсэ быдтӥз ке но, педагогика наукаосъя кандидат луиз. Али дасяське доктор луыны.

Шутэтске но со абдрамон - эшъёсыныз-биологъёсын ӵош арлы быдэ пота странамылэн пӧртэм сэрегъёсаз. Пӧртэм интыосы вуылэмезлы быдэ школаяз вуттэ шер пумиськылӥсь минералъёслэсь, паймымон турын-куаръёслэсь но аспӧртэм нымы-кибыослэсь выль коллекция.


Кубиста шӧмо пичи дыр

Котыр дуннеез чакланы потон мылкыд кузьмаз, дыр, Алексей Кардапольцевлы анай-атаез. Евгения Анатольевна мумиз - Удмурт Элькунысь дано дышетӥсь, бубиз - агроном. Кыксэс но ӵемысь ыстылӥзы пӧртэм ёросъёсты ӝутыны. Пичи Алёша Дэри ёросысь Ожмос гуртын 1971-тӥ арын вордӥськиз. Соберегес ик семьязэс келязы Сюмси ёросысь Кильмезе. Отысен - Эгра ёросысь Зура черкогуртэ. Алёша татын ик вамыштӥз нырысетӥ классэ. Выль эшъёс шедьтӥз гинэ но, сюрес вуттӥз Алнаш ёросысь Байтэрек гуртэ. Ӵапак тазэ музъемез Кардапольцев лыдъя аслаз дореныз. Татын будӥз-кисьмаз со, татын дас ньыль аресъем дыръяз ик пияш луиз зэмос воргорон. Атайзэ берпуметӥ сюрес вылаз келямез бере уго юртъерез чаклан усиз экелэн пельпумъёсыз вылэ. Бубызэ ыштыса, Алёша ӧз усьы ас югдаз. Ас понназ малпаз: анае Байтэрек школаын завуч бере, мыным но асме умой возьматоно. Классы но юн вал - ог-огенызы ӵошатскыса дышетскизы. Оло, соин но басьяз «витьёс» гинэ. Тужгес зол кыстӥськиз биология котыре. Таиныз предметэн со бӧрсьысь ньыль ар пыриськылӥз элькун олимпиадае. Кык полаз потӥз куинетӥ интые, кыказ учыре - ньылетӥ. Быгатонлыкъёссэ лыдэ басьтыса, пияшез 1986-тӥ арын келязы Москвае, быдэс Россиысь визьмо нылпиосын нюръяськыны. Соку нырысьсэ адӟиз МГУ-эз. Весяклы лякиськиз сюлэмаз та дышетсконни. Алёша малпанъёсаз выльысь но выльысь берытскылӥз шуныт Москвае. Дышетскы вал отын!

Зэм, ежгес дыръяз малпалляз: бадӟым машинаосты нуллӥсь луо. Байтэрек гурт пыртӥ азьвыл кошке вал уго Иж-Казань федерал трасса. Уен-нуналэн ширтылӥзы отӥ машинаос. Дуннеез адӟо таос, малпалляз эке ас понназ. Бӧрысь тодӥз: кызь аресысен руль сьӧры пуксем егитъёс, ньыльдон аресозязы вуыса, инвалид кылё. Нош Алёшалэн тазалыкез так но ляб, озьыен, солэсь нокыӵе дальнобойщик уз пӧрмы. Кардапольцевлы ӧз кылды визь люканы Москваын но. Анаез кыкетӥзэ ӧз бызьы ни. Юртъер кутӥсь кулэ. Уксё вылэ уг вуо. Таӵе дыръя льӧль малпанъёсты вунэтытэк уг луы. Йыгаськиз Удмурт кун университетысь химия но биология люкетэ.

Адӟонэдлэсь уд пегӟы

Алексей, группаысьтыз тросэз эшъёсыз музэн ик, уйбыртэ вал, заповедникын я эшшо кытын ке тыршоз, наукаен выроз шуыса. Школаын дышетон сярысь ноку ӧз малпалля.

Адӟонэдлэсь уд пегӟы, шуо калыкын. Котьма ке но Алексей Юрьевич уг жаля школае вуэмез пумысен. Адямилэн ужез но тунсыкъяськонэз (хоббиез) огазе пунӥсько ке, озьыен, талэсь бадӟым шуд ӧвӧл, шуэ со. Ӵапак пиналъёсты визьноданы кутскемез ик юрттӥз солы Дышетӥсьёслэсь тодон-валанзэс будэтонъя институтысь аспирантурае пырыны, отын кандидат диссертацизэ утьыны. Паймоно кадь: биологлэсь тодон-валанзэ басьтэм мурт шонскиз лыдъян-чотан пала. Зэм, зэм, диссертациезлэн темаез таӵе: педагогикалэсь дышетон амалъёссэ мертан.

- Эн абдралэ, - шуэ Алексей Кардапольцев. - Биология наукаосъя кандидат луэме туж потэ вал. Жаляса верано, гуртын улӥсь муртлы та вормонтэмгес. Вить-куать ар ӵоже ортчытоно аспӧртэм эскеронъёс, со понна висъяно нимысьтыз бусы. Урокъёс нуон, семьялы саклык висъян, пудо сюдон ӧй луысал ке, нокыӵе пыкъет ӧй кылдысал. Соин ик, мукетгес удысэз «шӧмъятэк», амалы ӧй вал ни.

Таиз но вормонэз Алексей Юрьевичлы туж капчиен ӧз сётӥськы. Гуртъёсын со вакытэ компьютеръёс чиньыен лыдъямон вал. Соосыз но Интернет вотэсэн герӟамтэ. Нош дышетӥсьёс куспын тестъёс лэсьтоно, соосты Иже келяно. Нялтас вераса, Алнаш ёросысь огаз но школаын кандидатъёс уг дышето на.

Кык кузё умойгес

Ассэ дыраз возьматэмез ик юрттӥз Алексей Юрьевичлы директорозь ӝутӥськыны. Со вал 2005-тӥ арын. Кивалтӥсь луэмды потылӥз-а юанлы меӵак вера:

- Быдӟым ож вакытэ частьлы командире котьку сямен юнматъязы дышетӥсьёсты. Татын вал кӧня ке мугез: визьмо муртъёслэн, офицеръёслэн тырмымтэзы, быремзы но мукет. Таӵе учырын дышетӥсь азе пуктылӥзы одӥг валтӥсь курон: котькыӵе югдуре мед шедёд - сазь лу, адямиосты уть. Нуналмысь улонын но визь-нод сётӥсьлэн пельпумъёсыз вылысь сыӵе курон палэнтэмын ӧвӧл. Уката ик - кузё вылысь. Мон котьку тодӥ: директор луон - туж секыт уж. Котькызьы пырскы, но тау карыны уз валалэ. Кивалтӥсь - со дышетскись но дышетӥсь, дышетӥсь но вылӥ кивалтӥсь куспын аспӧртэм амортизатор кадь. Котькуд нуналы ортче ожын выллем. Вылаз ик - кыл кутон бадӟым. Таӵе югдурын нокызьы уг тэры йырам: малы адямиос дырто кузё луыны?

Уг ваты: Вуж Утчан школаын ужан амалъёс радъямын ни вал анаеным. Мыным кылиз одӥгез - азьланьтыны но узырмытыны солэсь сюрессэ. Алексей Кардапольцевлы таиз пумысен гордэктоно уг луы - ныпъетсэ ворме. Школазы 1 миллион манет утэм бере котькуд классэ компьютер пуктӥзы, вань спорт тӥрлыкез воштӥзы. Табере татын, ёросысь сяна, элькунысь дышетӥсьёс понна но конференциос радъялляло. Бичетъёс поттыны юрттӥсь машиназы но дугдылытэк ужа. Али отын малпало печатланы районысь школаослэсь огъя газетсэс. Журналистъёс чот луозы асьсэос дышетскисьёс но дышетӥсьёс. Зэм, со ужез рос-прос берыктон понна бызьылонэз вань: куд-ог юридической ужпумъёсты сэрттоно-пертчоно. Но Алексей Юрьевич талэсь уг кышка. Кин но со серектэ: Алнашысь газетэз вужере кельтоды ай. Солы пумит Кардапольцев шумпотыса вазе: милям асьмелэн удысмы, «Алнаш колхозниклэн» - аслаз. Йыраз нуллэ музон льӧль малпанзэ но: школаез кыдёке мед чузъяськоз. Ма, палэнысь дышетӥсьёс сотэк но вожъясько вуж утчанъёслы, куд-огез отчы уже но куриське. Музон гуртъёсысь дышетскисьёс но учкыло Вуж Утчан пала. Чыртызэс золъяны мугез вань - татын огазеям урокъёс ортчо. Одӥг предметлы, ньыльдон вить минут интые, кык час висъям пайда вае. Берло дыре медалистъёссы но йылӥзы.

- Зэм, медалез суреданы но луэ, - пальпотэ Алексей Кардапольцев. - Но «золтэм» аттестат ассэ бӧрысь одно возьматэ ук. Вераме потэ: милесьтым выпускникъёсмес уже кутон понна вожмасько. Кылсярысь, Ижысь медакадемиын берпуметӥ курсын дышетскись Евгений Черновмес Ижысь но, ёросысьтымы но больницаосы ӧтё. Адӟом ни, кудзэ быръёз.

Таӵе вормонъёс басьтыса но, ачиз пыд йылаз юн-юн султыса но, Алексей Кардапольцев ялан кенеше анаеныз. Тодон-валанзэ будэтыны я эшшо кыӵе ке мукет муген палэнэ кошкыкуз, удыссэ кельтэ Евгения Анатольевна вылэ. Та дано кышномурт туннэ ке но тырше Вуж Утчанысь школаын. Кин тодэ, мукетыз кивалтӥсь муминыз ӵош ужаны, со азьын янгышъёс лэсьтыны, куаразэ поттыны, оло, кепырасал но. Нош Алексей Юрьевич меӵак вера: кык кузё, одӥг сярысь, котьку умойгес.

Асме тодмамысь дугдӥ

Кивалтыны кутскемез бере Алексей Юрьевич ассэ ик тодмамысь дугдӥз. Ас мылкыдъёссэ сокем шара вераны дӥсьтӥсьтэм воргорон туннэ кылзэ нокинлы но уз сёты. Таӵе дӥсьтӥсь сое кариз политикае пыриськемез.

Адямиосын кивалтон, пичи школаын но - политика. Кылсярысь, али Алексей Кардапольцев турттэ гурт школалэсь кулэяськонъёссэ быдэсъяны выль сямен, отын дышетскисьёслэсь но визь-нод сётӥсьёслэн лыдзэс санэ басьтыса. Город школаос музэн, ваньзэ тыро-пыдо чотаса. Та выль кивалтон амал нокинэ но вӧсь медаз кары шуыса, йырзэ тӥя на. Ачиз но нырзэ чатыртэмезлэсь кышка.

- Одӥг урод сямы вань: укыр небыт кивалтӥсь мон, - лулӟе со. - Тодӥсько: трос амалъёс вань адямиез ужатыны. Укылтэм муртлы огпол, кык пол выговор лякид ке, амалтэк йыр бордаз кырмиськоз. Но мыным сыӵе сюло ӧвӧл сюлэмыя. Турттӥсько адямиез небыт кылын позыртыны. Шӧдӥсько: тазьы ужамлэсь емышъёссэ кематэк уд адӟы. Ӟеч лэсьтэмез, жаляса пусъёно, валало бӧрысь гинэ. Но туннэ, тазьы сяна, мукет кивалтон амалэн аслам тэрытӥськеме уг поты. Малы ке шуоно мон Инмар ӧвӧл.

Нялтас вераса, оскон шоры но Алексей Юрьевичлэн аслаз учконэз.

- Мон атеист ноку ӧй вал, - шуэ со. - Йырам котьма ке но нокызьы уг пыры одӥг валан: черклы реклама лэсьтыны кутскизы. Телевизоръёс но, газетъёс но дугдылытэк верасько оскон сярысь. Собыдӟа ужпумез пась пытсан кышъет чот каро. Шонер шат та? «Дом-2» передачалэсь музэн, ӧскеме потыны кутске, ява. Простить каре тазьы ӵошатыны дӥсьтэме понна. Пусъеме потэ созэ но: котькудӥз доры оскон ачиз лыктыны кулэ. Малпаське ай: пиналлэн ымаз уен-нуналэн туйылӥд ке рис ӝук, куке но со одно сялӟоз. Осконлы реклама лэсьтон но туж акыльтэ.

Шонер вӧсяськыны, оброс азе сюсьтыл пуктыны дышетыны луэ на нодтэм калыкез, нош сое кужмысь Инмарлы оскытыны ноку уз пӧрмы. Оскон вордӥське улон сярысь мур-мур малпаськыны пӧрмытӥсь мурт пушкын гинэ. Куд-огез доры со уг кожа воксё но. Инмарен тэрытӥськись мурт гинэ - зэмос оскись. Со ноку уг малпа: сюсьтыл ӝуато, вӧсясько но сьӧлыкъёсме мисько. Оскись адями, янгыш лэсьтытэк, улыны тырше, аслэсьтыз гинэ куронъёссэ (эгоизмзэ) пушказ ик зӥбе. Солы уг люкеты ни наукаен выремез но, оломае но тодэмез но.

Алексей Кардапольцев аслаз тушмонэныз лыдъя иворъёсты вӧлмытӥсь ёзъёсты. Нырысь ик - телевидениез.

- Ми, дышетӥсьёс, вань сюлмысьтымы выриськомы пичи муртэ ӟеч ужъёслы дышетыны, чеберез валэктыны. Нош чагыр экран вань со секыт ужмес лёгаса куштэ. Алигес гинэ дугдӥзы тамаклы реклама лэсьтэмысь. Юонэз вӧлмытон олоку йылпумъяськоз. Озьы ик ялан возьмато адямиез курадӟытонэз, жугиськонэз. Собере асьмеос ик паймиськомы: малы пиналъёсмы сокем чурытэсь будо? Калыкез пушласянь сюпсё газет-журналъёс но.

Дас ар пуктӥськись юрт

Алексей Кардапольцевлэн кузпалыз но школаын ужа, дипломезъя со - биолог, али дышетэ экономика но технология предметъёсты. Соослэн ньыль пиналзы. Алексей Юрьевич пичи дыръяз лулӟылӥз ке но, анаезлэн, школа сяна, сюлмаськонъёсыз ӧвӧл шуыса, ачиз но сокем ик пӧртэм ӧвӧл, шӧдске. Нылпиосызлы нуналаз ӝыны часлэсь трос дырзэ висъяны уг пишмыты. Но таиз пумысен туж ик уг куректы, лэся. Мед адӟозы, шуэ со, ужамме, мед тодозы: азьтэмъяськон кыдёке уг вутты. Монэ, пе, анае ӵапак озьы дышетӥз.

Дораз бертэ ке, одно ик юртъер котыраз берганы турттэ. Йырвизьмын гинэ ужаса, кыдёке уд вуы, шуэ. Мугорез ӧд кыдаты ке, пе, номырлы но толыкед уз тырмы ни. Ӵемгес кыстӥське ӝутӥськись коркаез котыре. Асьсэлы выль юрт со пуктыны выре ни дасэтӥ арзэ. Ӝытазе ялан пуке компьютер сьӧрын. Аслэсьтыз быгатонлыкъёссэ эскере пӧртэм сайтъёс кылдытонын. Матысь дыре малпа уго усьтыны методикая аспӧртэм сайт.

Шутэтскон нунал кемдыку ке шат, семьяеныз ӵош потэ палэнэ, дуннеез яратон мылкыд пыӵатыны выре пиналъёсызлы. Зэм, кузь сюрес вылэ огзэс но уг басьты. Соосыз черодэн курисько ке но, Алексей Юрьевич аслыз мукет эшъёс шедьтэ - ачиз кадь ик биологъёсты, группаысьтыз ӵош дышетскем муртъёсты. Соосын 2003-тӥ арын со эскериз Ватка шурез, вуиз солэн Каме усён вожаз. Куинь пол ветлӥзы ни Лымшор Уралэ. Туэ малпало Оренбург сьӧры потаны, отысь «Акбулака песокъёс» шуонэн тодматскыны.

- Зэм, Удмуртиын но туж абдрамон интыос вань, - шуэ со. - Но мынам эскереме потэ пӧртэм климатъёсты. Соосты ас вылам араз огпол ке но шӧдытэк кылисько ке, юнме улӥ кадь потӥсько.

Нялтас вераса, Карадапольцевлэн юлтошъёсыз но туж аспӧртэм муртъёс. Огез Аляскаын улэ, мукетыз Калифорниын стажировка ортчиз, куинетӥез быдэс семьяеныз Египетэ вуылӥз. Алексей Юрьевич шуэ: таослэсь бере кыльыны уг яра.

Вакчи юан - вакчи веран

- Кыӵе тужгес умой сямдэс пусйысалды?

- Вожъяськыны чик дышымтэ мурт мон. Уксё сьӧры но, машина сьӧры но, визь сьӧры но уг уйиськиськы. Талы туж зол шумпотӥсько.

- Быдэсмымтэ льӧль малпанды?

- Англи кылэз дышетэме потыса ик кылё, дыр.

- Кыӵе куронъёсъя улӥськоды?

- Владимир Соловьёв писательлэн «Ходжа Насретдин» книгаяз таӵе кылъёсыз вань: дорогу осилит идущий. Виктор Цой кырӟасьлэн но кылъёсыз тупало мынам улонэлы: «Если есть шаг, должен быть след. Если есть тьма, должен быть свет». Аслэсьтым пытьыме кельтыны вырисько дышетон но кивалтон удысъёсын.

- Мар сярысь жаляськоды?

- Туж умой атай ӧвӧл мон. Со пумысен куректӥсько.

- Тужгес дуноез улонын - со…

- Тазалык.

- Яратоно книгады?

- Антон Чеховлэсь ваньзэ сямен книгаоссэ тодӥсько. Кельше на Америкаысь фантаст Роберт Шекли. Соиз но, таиз но усьтыны выро адямилэсь лулпуш дуннезэ. Но тужгес яра «Наука и жизнь» журнал.

Источник:

Кардапольцев Ю. А. Ужын - ожын кадь / Ю. А. Кардапольцев ; записала Е. Сараматова // Удмурт дунне. - 2009. - 25 дек. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"