Завалин Владимир Николаевич

Материал из Воршуда
Перейти к: навигация, поиск

Выжыосмы медаз чиге

Завалин В. Н.

Дэриез коласа, лымыетӥ гушъяса но кионъёслэсь пегаса, кыдёкысь гуртысь школае ветлӥсь пияш ӧз ик вӧталля министр луон сярысь. Семьяязы вить пинал пӧлысь Володя бадӟымез вал. Атайзы туж вазь кулӥз. Пияш, куинетӥ классын дышетскыкуз ик, колхозын валэн ужаз ни. Ортчизы аръёс… Табере Володя – Удмурт Республикаысь нациосын ужан политикая министр Владимир Николаевич Завалин. Асьсэ кылзэс, культуразэс утён, азинтон ужпумъёсын со доры вазисько шаерысьтымы ваньмыз сямен калыкъёс. Котькудзэ валаны быгатоно.

- Владимир Николаевич, пичи дыръяды колхозын ужамды ик гурт хозяйствоя институтэ вуттӥз, дыр.

- Озьы. Агрономияя факультетэз йылпумъяй. Ветлӥ армие. Малпасько вал: колхозын ик ужало. Но партилэн обкомезлэн нырысетӥ секретарез ӧтиз. Ӵектӥзы комсомоллэн райкомезлэн нырысетӥ секретарез луыны. Мон соку ик ӧй мыны - кышкыт потӥз.

- Нош малы тӥледыз ӵектӥллям?

- Общественной ужен вырылӥ. Школаын пионер дружиналэн советэзлэн тӧроез вал, собере – комсорг. Комсомоллэн райкомезлэн нырысетӥ секретарез луыны туж пумитъяськи. Мугъёс но шедьылӥзы. Со понна партие но пыроно на вал. Но азьвыл трос ик ӧз юаллялэ. Пуктоно ке пуктоно. Ӝог гинэ партие но кутӥзы.

Комсомоллэн райкомаз вить ар ужай. Яралляз. Кылмес но зол юаллязы. Собере ӵектӥзы эшшо дышетскыны. Кык ар ӵоже дышетски Свердловскысь вылӥ партийной школаын. Соку пичи пиналъёсы вал ни. Кузпалы монэ валаз, ачиз ик индылӥз но: ойдо, дышетскы.

Собере келязы колхозэ парткомлэн секретарез луыны. Ар ӵоже ужаса вуттӥ, уноез калык куараоссэ мон понна сётыса луи колхозлэн тӧроез. 10 ар ӵоже та интыям ужай. Азьвыл уждун ӟеч сётӥськом вал, пудо вордӥмы, скал кыскимы.

Кыӵе ке вакытэ дорам эшъёсы вуизы. Ойдо, шуо, ёрос администрацилы йыр луод. Мон ноку но соку ик соглаш уг луиськы. Валалляй: капчи уз йӧт. Но эшъёсы ялан ветлӥзы ёртыса. Яр ёрос администрацилэн йырыз луыса, кык но ӝыны ар ужай.

- Собере нош ик эшъёсты «ёртыны» ӧдъязы-а?

- Таяз учыре нациосын ужан политикая министр луыны ӵекто. Малы мон? Кызьы ужалом? Ай со понна городэ улыны выжоно. Уг, шуисько. Дорам вуылӥз Владимир Невоструев, али Правительстволэн тӧроезлэн воштӥсез, мукет тодмо адямиос. Кема пукимы. Ветлӥзы аслам матысь эшъёсы но.

- Правительстволэн Тӧроез Юрий Питкевич но, оло, вить пол вераськем, шуо.

- Озьы. Но мон ялан пумитъяськи. Валалляй: ужез капчи ӧвӧл. Кылӥське гинэ зол – Нациосын ужан политикая министерство. Соку «Удмурт кенеш» огазеяськон котырын секыт югдур вал. Финн-угор калыкъёслэн конгрессазы Финляндие ветлэме бере машинаям пуксисько но, Юрий Питкевич жингыртэ, малпад-а ни, шуэ. Уг, пӧй, уг мыны. Дораз ӧтчаз, малпаськыны эшшо кык нунал сётӥз на. Мон соку отпускын вал. Кык нунал ортчиз гинэ – жингыртэ. Мар-о ни, малпад-а? Кема вераськиз на. Таӵе ужез, пе, котькуд нуналэ уг дэмлало… Со дырысен ньыль ар ортчиз. Мар тужгес сюлмаськытэ? Тросэз малпало, министерствомы удмуртъёсын гинэ ужа. Но со озьы ӧвӧл. Ми ужаськомы ӟучъёсын но, бигеръёсын но, кунгож сьӧрысь лыктэм калыкен но. Тросгес саклык висъяськом удмурт огазеяськонъёслы. Одӥг кыл шедьтӥм Валентин Тубыловен. «Удмурт кенешен» югдур азьвыл кадь секыт ӧвӧл ни.

- Но Нациосын ужан политикая министерствоез курласьёс но тырмыт. Тӥ сое шӧдӥськоды-а?

- Куарето трос. Валаськом. Азьвыл пыкылӥзы: кылъёс сярысь закон уг кутӥськы. Табере со вань ини. Собере куаретыны ӧдъязы: программа дась ӧвӧл. Таиз но вань ини. Табере куарето, ваньмыз со уже уг пыӵатӥськы шуыса. Но уж мынэ. Али, оло, со сокем уг но адӟиськы. Пусъеме потэ, законэз но, программаез но кутон номыр уз сёты, калык ачиз удмурт кылын ӧз ке вераськы. Малы кылмес ляб дышетӥськом?

Мон трос ветлӥсько бускель республикаосы. Отын удмуртъёс уло башкиръёс но бигеръёс пӧлын. Отын удмурт кылъя программазы но, законзы но ӧвӧл. Но калык юн возе аслэсьтыз удмуртлыксэ. Пиналъёс ас кылынызы шалтыр верасько. Бигеръёс гинэ но удмурт сямен вазё. Отын удмурт кылэз кужмысь дышетыны нокин уг косы ук. Соос пичиысен ик куинь кыл тодыса будо.

Удмуртиысь удмуртъёс ялан мае ке витё: тани тазэ кутозы, тани соиз луоз. Но асьмеос йырвизьмес пичияк ӧм ке ужатэ, удмурт кылмы борды ӟан-ӟан ӧм ке кутске, нокин но уз ни юртты. Куд-ог дыръя трамваен ветлылӥсько. Шӧдӥське: удмурт кылын али ӵемгес верасько. Яр ёросын дас ар талэсь азьло удмурт кылзэс уг ик поттыло вал. Али кенешъёссэс анай кылынызы нуыны выро ни.

- Озьы ке но удмурт кыл малы секыт югдуре шедиз? Асваланмы сыӵеен гинэ-а?

- Правительство но, Кун Кенеш но удмурт кылэз дышетыны лэзисьтэм законъёс ӧз кутылэ. Ваньмыз потэ анай-атайёс бордысь. Анай кыллэсь кулэлыксэ, дунлыксэ ум адӟиське, пиналъёсмес но озьы индылӥськом.

Кудӥз-огез законэз но уг витё, ужало. Гурт нимъёсты удмурт сямен гожъямез гинэ но басьтоно ке. Мукетыз витьыса улэ, ай эшшо вить-дас ар ӵоже изьыны дась.

- Удмуртия трос калыклы «эрико» интылы пӧрмиз. Татчы кунгож сьӧрысь адямиос трос лыкто. Малы?

- Ваньмыз со удмурт сяммы бордысь потэмын, дыр. Асьмеос сюлмоесь, куноятыны яратӥсесь, жалясесь. Республикаямы ог 140 пӧртэм калык улэ. Бускельёсмес басьтоно ке, отын сомында выжыысь калык ӧвӧл. Нош асьмеос нырысь ваньзэ лэзиськом, собере улляно шуыса вераськиськом. Тросэз вуэмъёс Россия Федерацилэн гражданъёсыз ни. Улляны уг луы. Нош базарын вуз карисьёсты ке басьтоно, асьмеос та удысын сокем ӟеч азинскыны ум но быгатэ, дыр. Куд-ог калыкъёслэн со виразы пыӵамын. Гуртоосмы асьсэ будэтэм емышъёссэс вузаны уг быгато – инты ӧвӧл, шуо. Со муг гинэ, дыр. Но кӧня ке зэмлыкез татын вань, вылды.

- Палэнысь вуэм калыкъёсын кызьы ужаськоды?

- Люкалляськом национально-культурной огазеяськонъёслэсь кивалтӥсьёссэс. Куддыръя туж лек вераськонъёс но луо: тӥ Удмурт шаере вуиды бере, татысь культураез, сямъёсты тодыны тырше, эн йыртэмалэ.

Малы кылдо ваче вуонъёс? Палэнысь вуэм калыкъёс татын но асьсэ сямъёссыя улыны тыршо. Интыысь калык – ас сяменыз. Соос ог-огзэс уг валало. Огазеяськонъёсын ӵош люкаськыку но ваче вуонъёс луыло. Но ми сое туж ик шарае ум поттӥське, иворчиосты ум ӧтчаське. Малы калыкез юнме бугыръялод? Ужаськомы Россия Федерацилэн гражданъёсыныз гинэ. Соос сяна, туж трос нелегал шуонъёс. Соос ик «инкуазез» сӧро но. Таосыныз ужало Югдурез утёнъя министерство но миграцияя служба.

Кавказ сьӧрысь лыктэмъёслэн диаспораязы Удмуртиын 10 сюрс пала адями. Ог-огмес валаны ӧм ке тырше, югдур секыт луыны быгатоз. Удмуртилэн Президентэз но, Правительство но, Кун Кенеш но тае туж ӟеч валало. Азьпалан озьы-а, тазьы-а, но миграция луоз. Ужась киос али но уг тырмо ни. Пиналъёс трос уг вордско, мӧйыос куло.

- Россиын куд-ог калык огазеяськонъёс сьӧрын ватӥсько, пе, террористъёс яке мукет кыӵе ке лушкем ужен вырисьёс.

- Асьмелэн Удмуртиын сыӵеез ӧвӧл, дыр. Ми МВД-ен, ФСБ-ен ӵош ужаськомы. Лушкем ужъёс сярысь ӟечгес тодо югдурез утисьёс. Али ми выль ӵектонэн потӥм. Кин лыктэ кунгож сьӧрысь, шуом, Азербайджанысь, со понна кыл мед кутоз шаерысьтымы азербайджанъёслэн огазеяськонзы. Азербайджан калык огазеяськонлэн кивалтӥсез лыктэм адямилэн бумагаосыз вылэ кинюртэмзэ пуктэ: зэм, та ӟеч адями. Озьы, татын улӥськод бере, кинэ вайид, со понна кыл кут. Кыӵе ке урод учыр луэ ке, нырысь ик кылзэс юаськом огазеяськонлэн кивалтӥсезлэсь.

- Алигес республикаямы усьтӥськиз чеченъёслэн огазеяськонзы. Та калык шоры асьмеос берло дыре кышкасагес учкыны ӧдъям. Секыт ӧй вал-а чеченъёслэсь огазеяськонзэс бурд улады басьтыны?

- Чечен – Россия Федерацилэн сыӵе ик гражданинэз. Шаерамы соос 500 пала. Чечня – со Россилэн субъектэз. Азербайджан но Армения – кунгож сьӧрын. Зэм, чеченъёслэн огазеяськонзы пумысен кема малпаським. Но соос ваньзэ законъя лэсьтӥзы. Табере огазеяськонзэс ӧтчаломы пӧртэм ужрадъёсамы. Рос-просгес тодматском. Тодомы, кин отчы пыремын, кыӵе малпанъёсын уло.

Луысал-а, ӧй-а чеченъёслэн огазеяськонзы, соос татын улэмысь ӧй дугдысалзы. Татчыозь кытын ке люкаськылӥзы, мар ке ужазы ук. Нош ми табере соосты син азямы возём. Ӧвӧл малпано: чечен бере – урод. Пӧлазы вань юристъёс, сюрес лэсьтӥсьёс, огшоры ужасьёс. Котькыӵе калыкез басьтоно ке, 80-90 процентэз – ӟеч адямиос. Уродъёсыз но котькудӥзлэн тырмыт.

- Вань, пе, сыӵе теория: трос калыко интыын - вазь-а, бер-а – пуштоз. Оскиськоды-а солы?

- Бен, номыр ӧд ужа ке. Нош кун ласянь валан луиз ке, адӟонъёс но палэнтӥ ортчозы. Быдэс Россиын ӧвӧл нациосын ужан политикая рос-прос министерство. Удмуртиын – вань. Солы коньдон трос ик кулэ ӧвӧл. Арлы быдэ вань калык огазеяськонъёслэсь кивалтӥсьёссэс Президент Александр Волков ас дораз люкалля. Соос котькыӵе дыре Президентэн пумиськылыны быгато. Котькуд министрлы сыӵе «шуд» уг усьы.

- Одӥгез валамон: нациосын ужан политика – со лэчыт пурт вылтӥ ветлон выллем. Уд жаляське-а гурт хозяйствоын, администрациын ужан аръёсты сярысь?

- Секыт юан. Шедьтӥ-а, ӧй-а асме – калык вералоз, дыр. Тросэз уг валало нациосын ужан политикалэсь ужзэ. Соин но ужаны секыт.

- Нош К. Герд гимназия котырын малы сыӵе «ӝук пӧзиз»?

- Кыӵе школа сётыны туртто гимназилы – ми ӧм тодылэ. Озьы луиз. «Удмурт кенеш» но та уже кыскемын ӧй вал. Соин выриз Калыкез дышетонъя министерство. Тодӥм ужпум меӵак султэм бере ни.

Нош мургес ке учконо, уг быгаты удмурт гимназия нылпи садлэн юртаз улыны. Озьы уг яра. Соин ик та ужпумысь потон сюрес шедьтэмын вал: гимназилы ӟеч-ӟеч бадӟым юрт сётоно, мед отын луоз ёросъёсысь вуэм пиналъёслы интернатэз но. Школа пумен удмурт гимназилы пӧрмысал. Малпанэз ӟеч. Но анай-атайёсты талы азьлапал ик ӧз дасялэ. Одӥг ӝӧк сьӧры пуксьыса кенешоно вал.

Янгышъёс луо. Нош кудӥз-огез сое соку ик политикае выжтыны тырше. Вот милемлы тае уг сёто, отын пачкато. Укыр трос куатаськиськом, чагиськиськом но бӧрдӥськом. Али Валентин Тубылов но Ижевск городлэн мэрез Виктор Балакин куспын кенешонъёс мыно ни городысь удмурт пиналъёслы гимназия усьтон сярысь. Малпасько, пӧрмытозы.

- Семьяды сярысь ӧй ке юа, лыдӟись монэ уз вала.

- Кузпалме шедьтӥ институтын, нырысетӥ курсын дышетскыкум ик. Со Игра ёросысь, ӟуч. Армие ветлыкум, монэ возьмаз. Али ужа Гурт удысъя но сиён-юонъя министерствоын. Николай пие дышетске гурт хозяйствоя академиын. Нылы ужа Глазовын, шаертодонъя музейын.

- Льӧль малпанды?

- Ужея ке… Ньыль ар талэсь азьло мон но малпасько вал, ваньзэ капчияк воштыны луоно, вань калык ужпумъёс номыр кадь ик ӧвӧл шуыса, но… Котьма ке но, вань удмуртъёс одӥг ӧрын ӵош ужаны мед дышысалзы. Кылъёс сярысь закон улонэ ӟеч мед пыӵалоз. Удмуртъёс медаз аналске, та улонын йӧн-йӧн возиськыны мед быгатозы.


Источник:

Завалин В. Н. Выжыосмы медаз чиге / В. Н. Завалин ; записала Е. Миннигараева // Удмурт дунне. - 2004. - 10 дек. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"