Ефремов Дмитрий Анатольевич

Материал из Воршуда
Перейти к: навигация, поиск

Дмитрий Ефремов: Улон ачиз дышетэ

Ефремов Д.А.

Удмурт кун университетысь Удмурт кылосбуръя, финно-угроведениея но журналистикая институтысь журналистика кафедраен кивалтӥсь, кылосбур тодосъя кандидат Дмитрий Ефремов, удмурт кадръёсты будэтэм сяна, кылысь кылэ берыктӥсь но луэ. Йӧно воргорон усто кибашлы но.

— Дмитрий Анатольевич, тӥ асьтэдыз асьтэос будэтӥды, шуыны луэ…

— Семьяямы 5 пинал пӧлысь берпуметӥез вал ке но, монэ висъямзэс ӧй шӧдылы. Картошка мерттон, октон, турын дасян — номырлэсь ӧй кыльылы. Анай-атае колхозын ужазы. Коньдонмы туж ӧжыт вал. Соин ик маке басьтыны курон сярысь тодэ ик ӧз лыктылы. Ӟечгес улӥсьёслы вожъяськон сямы но ӧй вал. Зэм, выль куасэн нискыламзэс синйылтытэк ноку ӧй кельтылы. Мынамезлэн уго нырыз тӥяськемен, мукет куаслэсь йылзэ басьтыса кортӵогамын вал, выль куас, шоретӥ классъёсын дышетскыкум гинэ, сюриз. Но со кышъям куасэ ӟечгес вал ай! Мон кышкатэк котькыӵе гурезь бамысь нискылтыса васькыны быгатылӥ. Кияса ёросысь вордскем Выль Тӥгырмен гуртысьтым тубамтэ бамал ӧй вал. Уси ке, тӥяськиз ке, со понна нокин уз тышкаськы ни — сотэк но чигемын ук! Озьы буйгатылӥ асме. Соин но, дыр, гурезьлэсь кышкасьтэм будӥ. 41 аресам вуыса но, пӧртэм бамалысь куасэн ширтӥсько ке, ваньмыз паймыса учко. Удмурт кун университетын котькуд ар пыриськисько куасэн бызьылонъя ӵошатсконъёсы. Азвесь но туй медаль утӥ ни.

— Пичи дыръяды университетын дышетскоды, татын ужалоды шуыса малпалляды-а?

— Воксё еж дыръям инженер луэме потэ вал. Мон уг но тодӥськы вал, дыр, кин со сыӵе, но кыӵе чебер кылӥськылӥз! Отӥяз, коркамылы ваче пумит улӥсь бускельмы шоры учкыса, со кадь бухгалтер луэме потэ вал. Но отӥяз малпанэ воштӥськиз: вузын дышетскеме потӥз. Удмурт кун университетысь удмурт факультет со вакытэ туж модной луиз. Милям школаысь но татчы трос нылъёс-пиос дышетскыны пыризы. Кылӥ: татын кунгожсьӧр кылэз дышетыны луонлык вань. Немец кылэз яратӥсько вал.

Дядяе но нэнэе улэпесь ӧвӧл ни. Но али но соослы музъемозь йыбырттӥсько вань нылпиоссылы тодон-валан сётыны быгатэмзылы. Нэнэ котьку шуэ вал: дышетскем адями уз быры.

Университетын мон тодматски вуоно кузпалыным, Ларисаен. Со географияя, мон филологияя факультетын дышетскиськом, одӥг общежитиын улӥськом вал. Улон милемыз огшоры гинэ ӵош ӧз кары, дыр, малы ке шуоно со туж яратэ кылэз, туж трос лыдӟиське. Та но бордаз кыскиз, лэся. Но улонзэ дышетонэн ӧз герӟа — Кадастръя палатае интыяськиз. Семьяын кык дышетӥсь луысал ке, секыт йӧтысал. Мынам, университетысь бертыса но уже уг быры на. Школаын кадь тетрадь эскерыса но, пукылоно луэ. 1-тӥ курсын венгер кыллы дышетскисьёсты уго вань доре ужъёссэс тетраде быдэстыны косӥсько. Чылкыт гожъяны курисько. Венгер кылын гожъяськон уго туж секыт: шара вераку, кылӥське одӥг, гожтӥське мукет сямен. Монэ университет уг косы студентъёсын озьы ужаны. Но студентъёслы озьы каньылгес валаны-дышыны. Мукет но уж люкаське: наукаен выроно, статья гожтоно, программа дасяно. Берло аръёсы уйшорлэсь вазь изьыны выдыны уг пӧрмы, куддыръя уйин кыкозь но, куинёзь но ужаса пуконо луэ.

— Палэнысен учкыса, кузпалды тӥлесьтыд кужмогес адӟиське…

— Сыӵе юан кылдылэ, дыр, котькуд семьяын. Нылпиос шуо: конечно, мама кузё, кин луоз на? Отпускын дорын нылпиосыным пукисько, 9 аресъем пие юа: урамын кезьыт-а, мар дӥсяно, мамалэсь жингыртыса юалом-а? Эн, шуисько, тазэ ачим но вераны быгатӥсько.

Семьяын одӥг мурт гинэ кузё луыны уг быгаты. Сиён пӧзьтонын, нылпиосты будэтонын валтӥсь луыны кулэ кышномурт, юртъер, машина понна кыл кутыны — воргорон. Но ваньзэ лэсьтыны тыршиськомы кенешыса.

Семьяын ваньзылы умой медло шуыса, ог-огдэ кылоно но кылзӥськоно. Куддыръя нылпиос ёрто, ӵош кенешыса пукыны уг сёто. Соин соослы вераме но вань: мамаен папа вераськыны кулэ, соос уг верасько ке, семья сӧриськыны но быгатэ. Лариса кылзыны но валаны быгатэ. Кузпалъяськеммы дырысен туж трос шуг-секытъёс пыр ӵош ортчим. Семьяен улыны кутскыкумы, коньдонмы воксё ӧй вал. Пиналлы одӥг яблок басьтӥськом вал… Со чидаз мынэсьтым Финляндие но Венгрие быдэс арлы стажировкае кошкылэмъёсме но. Солэсь куддыр юало: кызьы тон дӥсьтӥськод карттэ огназэ лэзьыны? Али но куддыр кӧня ке толэзьёслы кошкылоно луэ уго. Нош солэн валэктонэз одӥг: кулэ бере, мед мыноз.

Кузпалылы луыса но мон быгатӥ филология наукаосъя кандидат луыны. Азьвыл, аспирантураын дышетскыку, ужаны алэмын вал. Нош мынам семья соку гинэ кылдӥз. Мон наукаосъя кандидат луон вылысь диссертация гожтыны, удмурт кылысь тодметнимъёсты (прилагательнойёсты) эскерон борды басьтӥськи. Соку нырысьсэ Финляндие стажировкае мыныны ӝутӥськи. Отын уго стипендия улыны но, доре келяны но тырмымон сёто, шуизы. Ас поннам созэ но малпай: фин кылэз но дышето. Берлозэ туж вормеме, аслым ачим возьматэме потылӥз, быгато шуыса.

Книга басьтыса, Финляндие кошкемелэсь азьло дышетыны кутски фин кылэз. 3 толэзь озьы курадӟеме бере университетысь лекторъёсын, студентъёсын лабыртыны пӧрмытӥсько ни вал.

Финляндиысь Хельсинкие вуи. Вӧзтӥм кошкись пияшлэсь капчи мылкыдын юасько: кызьы Туркуэ сюроно, автобусэ-а, поездэ-а билет басьтыны умойгес луоз. Со монэ валаз, нош мон солэсь одӥг кылзэ но ӧй вала. Билет басьтыны быгатӥ ик.

Бератаз гинэ валай: мукет студентъёс сямен ик, мон дышетэмын литературной фин кылэз, нош финъёслэн литературной но вераськон кылзы воксё пӧртэмесь. Удмуртъёслэн но со висъяське, нош финъёслэн — кӧшкемыт зол. Собере, ваньзы тодо: финъёс котькуд ужзэс малпаса-малпаса, кема лэсьто, нош верасько пулемёт кадь тачыртыса.

Нырысетӥ толэзьзэ одӥг лекторлэсь гинэ верамзэ валасько вал. Дыртытэк, лад-лад, котькуд кылзэ висъяса валэктылӥз. Кылыса-валаса вуттоно. Мукетыз шуиз: дышетэ зэмос кылэз, кин тӥледын каллен вераськоз. Пӧрмиз ик. 50 адямиен быдэс группа пӧлысь ар пумын монэ нимысьтыз висъязы, кылэз вольыт тодӥсько шуыса. Фин кылэз дышетэм сяна, диссертациме но гожтӥ. Озьы кык кечез кутӥ.

— Фин кылэз сяна, венгерзэ но тодӥськоды — тазэ дышетыны Венгрие стажировкае вуылӥды. Малы тӥледлы сомында кылэз тодэм кулэ?

— Адямиослы юрттон вылысь. Туала вакытэ кылысь кылэ берыктӥсь туж кулэ луэ. Мон Россиысь пӧртэм каръёсы бизнес-семинаръёсын переводчик луыса вуылӥсько: венгер кылысь ӟуче верамъёссэс берыктӥсько. Али тани дасяськисько Челябинске, огпол Сочие вуылӥ, адямиос отчы шутэтскыны ветло, нош мон — ужаны. Куд-ог дыръя аттестат, диплом но мукет документъёсты венгер я фин кылысь берыктоно, нотариус дорын ваньзэ сое юнматоно луэ. Алигес жингыртӥзы Иркутскысь. Удмуртиын вордӥськем, татын ужам адями сопала улыны кошкем. Пенсиосъя фондазы документъёссэ уг куто: ужъя книжкаысьтыз ӝыныез удмурт, ӝыныез ӟуч кылын гожъямын уго. 1970-тӥ-1980-тӥ аръёсы сыӵе сям вал уго. Нош Пенсиосъя фондын документэз ӟуч кылэ берыктыны косӥллям. Юрттӥ. Собере кӧня пол мыным со адями, тау карыса, жингыръяз на.

Со сяна, судын но юрттэме кулэ луылэ. Огпол Венгрие бызьылэм, отысь люкиськыса бертэм нылкышнолы юрттоно вал — судэ документъёсты венгер кылэ берыктыны, пиналзэ анайлы мед сётозы шуыса.

Ярам, фин но венгер кылысь гинэ берыктоно луысал ке. Та нуналъёсы эшшо одӥг суд мынэ. Удмурт Элькунысь огысьтыз ёросысь воргорон кышкыт йыруж лэсьтэм. Судын ӟуч кылэз уг валаськы каре. Судьялэсь вань верамзэ удмуртэ берыктыны куре. Удмуртиысь Следствиея управление но куддыр ӧтчало. Огпол йыруж лэсьтӥсьёслэсь телефон пыр вераськемзэс гожтыса кельтӥллям. Ӝыныё удмурт, ӝыныё ӟуч вераськемын. Куддыр таӵе ужъёсын вырыку, юзыр-кезьыр луылоно. Но со улон, куро бере, лэсьтоно.

Со сяна, мон кунгож сьӧрысь студентъёс понна гужем курсъёсты 2005-тӥ арысен радъясь но нуись луисько. Палэнысь вуэмъёсты удмурт кыллы дышетӥсько. Зэм, нырысетӥ араз дуннелэн пӧртэм сэрегъёсысьтыз 13 адями люкаськиз вал ке, берло дыре кризис но санкциос шӧдӥсько — ичигес калык вуэ. Но удмурт кыллы но калыклы тунсыкъяськонзы палэнын уг кулэсмы.

— Мар адямиосты шаерамы кыске удмурт кылэз дышетыны?

— Кинлы ке но со кулэ ужезъя. Кин ке Финляндиын, Германиын, Венгриын удмурт кылэз дышетэ, сое волятыны, удмурт калыкен вераськыны-тодматскыны вуэ. Гужем курсъёсы 4 пол пыриськисез но вань. Огез — Кристиан Пишлёгер. Со удмуртлыкез кунгож сьӧрын туж зол азинтэ. Али Интернет пыр удмурт кылэз дышетон радъяны медэ.

Куд-огез татчы сюан бере шутэтскыны лыктэ. Голландиысь сыӵе кузпалъёс вуылӥзы, удмурт сям-йылолъёсын тодматскизы.

— Удмуртилы кыӵе пайдаен берытско та курсъёс?

— Шаерамы улӥсьёс тодо, кунгожсьӧръёс удмурт кылэз дышето шуыса. Телевизор пыр но адӟо, радио пыр но кыло уго, газетъёсын но ми сярысь котьку гожто. Палэнысь лыктэмъёс гуртъёсы но потало. Собере Удмуртиын улӥсьёслэн но удмурт кылэз дышетэмзы потыны кутске. Кызьы озьы венгер пияш удмурт кылын умой вераське, нош мынам пиналы уг ик вала, паймытско. Куддыр воксё но шуо: венгеръёслы вожъяськыса, факультетлэсь луонлыкъёссэ адӟыса, пиналы тӥ доры дышетскыны мынэ, солэсь азьло мукет азе пырыны малпа вал.

— Кафедраен кивалтӥсез та уката но шумпоттэ, луоз. Кема малпаськиды-а кивалтӥсе пуксёно я ӧвӧл шуыса?

— Институтлэн директорез Наталья Кондратьева 2 ар талэсь азьло юан сётӥз: соглаш ӧд луысалыд-а кафедраен кивалтыны? Мынам нырысетӥ валэктонэ вал: конешно, уг, со мыным уг тупа. Со туж визьмо кышномурт, шуиз: мон валай, но малпаськы. Кузпалыным но кенеши. Ачид учкы, шуиз Лариса. Кафедраын ужасьёс пӧлын юалляськон ортчытӥллям, кинэ тӥ кивалтӥсен адӟиськоды. Соку Ефремов фамилия шарае потӥз. Биньгозыез кутонын та мон понна валтӥсь муг вал. Зэм, ваньмыз шумпотыса ӧз пумиталэ. Азьвыл уго журналистъёсты дасянъя 2 кафедра ужаз. Электронной СМИ-осты дасянъя кафедраен Александр Шейнин кивалтӥз, нош журналистикалэн историезъя но теориезъя кафедраен — Александр Шкляев. Огазеямлы пумитъяськисез но сюрылӥз. Соин но куд-огез меӵак шуылӥз: мар тӥ татын кариськоды, тӥ филолог, тӥ журналист ӧвӧл. Нэнэе котьку шуэ вал: уж ачиз дышетэ. Кафедраен кивалтыны но улон пумен дышетӥз. Журналистлы но дышетски, кыкетӥ диплом басьтӥ.

— Туэ журналистикая факультетэ пырисьёс туж трос, лэся, таӵеез ӧй вал на, шуо.

— Журналистикае одӥг интые 12,5 адями куриськиз. Ужез но быдэс ар ӵоже радъяны выримы уго. Пӧлазы тросгес удмуртъёсты кыскон, соослэсь тодон-валанъёссэс ӝутон вылысь журналистикая олимпиада ортчытӥмы, сӥзьылысен гужемозь журналистикая заочной школа ужаз. Удмурт кылын вераськись-гожъяськись нылпиос уногес мед луозы шуыса, тыршем потэ.

— Азьланяз кыӵе быдэстоно малпанъёсын улӥськоды?

— Удмурт кылэз удмурт луисьтэм нылпиослы дышетыны капчигес медло шуыса, кыллюкам дасясько. Удмурт каронкыллэн (глаголлэн управлениезъя) кылсузьет бордын тыршисько. Удмурт адямилы со туж валамон. Кылсярысь, кышкасько пунылэсь. Нокин уз шуы: кышкасько пуныез, кышкасько пеймытын шуо ке но. Нош ӟучъёслы яке кунгожсьӧръёслы со тросэз валантэм, аспӧртэмлыко, удмурт шӧмъем. Кыллюкам 90 процентлы дась ни. Со юрттоз глаголлэсь валтон учыръёссэ тодыны-валаны.

Студентъёслэн диалектологической практиказы дыръя, пӧртэм ёросъёсы, пӧртэм гуртъёсы, Удмуртилэн палэназ но потаса, студентъёсын пӧртэм вераськон йылолъёсъя материал люканы кутским вал. Нимын-тулын пусйылӥмы, кин вераз, ку, кыӵе учыре кутӥське. Ваньзэ сое аудио вылэ, цифровой форматэн гожтӥмы. Адямиослы но тунсыко луоз шуыса, сое Интернет вотэсэ поттыны малпаськомы вал. Но могӟет сюриз: ми ӧм тодылэ, сое ваньзэ вотэсэ поттон понна вераськем адямиослэсь соглаш луэмзэс басьтоно шуыса. Финляндиын та ласянь умой ужаллям, азьвыл ик материал люкакузы, ужкагазъёсы гожтӥськыны курылӥллям. Нош мынам киям сыӵе трос ӟеч материал люкамын! Та ужез йылаз-пумаз кызьы ке вуттэме потэ.

— Тӥ туж сабырлы адӟиськиськоды. Шекъёсты чик ӧвӧл шат?

— Арлыд будэмъя ӟечгес луыны тыршисько. Но пуштон сямы вань ик. Куддыр зэмос революционер кадь луисько. Огпол кузпалыным автобусэн мынӥськомы, куспамы удмурт кылын вераськиськомы, пал пельыным кышномуртлэсь вуӵыртэмзэ кылӥ, мар верамзэ ӧй вала, но удмурт кыллы пумит луэмзэ шӧдӥ. Выжыятоно кариськи. Удмурт кылын, пе, эн вераське. Мыным, удмурт кылын дышетӥсьлы, озьы мед вералозы ай! Кышное саестӥм кыска. Вуӵыртӥсь но уг буйга. Тӥ монэ кызьы улыны дышетоды-а шуыса, пуштӥ ук. Дышетӥсь бере, куарае потэ. Уг кельшы ке, пыдын ветлэ шуи но нылкышноез потон доры валтӥ. Со Ларисалы шуэм: карттэс йӧнатыны кулэ. Удмурт кыл но культура сярысь уродзэ вераку, лек луисько ик.

— Кытысь буйган шедьтӥськоды? Кызьы шутэтскиськоды?

— Аслам гуртам шергес вуылӥсько: вордскем юртэ буш кылемын. Алнаше варматае дӥне ӵем ветлӥсько. Варманай но варматай туж ужась адямиос. Соос котьку но маке лэсьто: я бугро ӵупо, я липисько. Мыным но юрттӥськыны кельше. Аслам дорам но ваньзэ киыным ужасько. Пиналъёсылы кык шкаф-купе, кык валес лэсьтӥ. Ваньзэ рос-прос, миллиметрен мертаса, ужаны яратӥсько. Ваннаын быдэсак ачим плитка тыри. Куное пырисьёс ушъяло ке, мылкыды уката ӝутӥське. Маке тӥяське ке, созэ но тыршисько лэсьтыны: кран, тыл. Тае тодыса, венгер кылъя огез лектор шуиз вал: табере кылиз на дӥсь миськон машинаез гинэ тупатыны. Созэ уг пӧрмыты шуи но, Инмар кылӥз, лэся. Машинамы тӥяськиз. Быгатӥ ачим лэсьтыны, нош мон выльзэ басьтоно луоз шуыса сюлмаськисько ни вал. Отпуске азьын аслым уж дасясько ни. Шутэтскисько, киын ужаса. Эшшо ке яратӥсько аудиокнига кылзыны.

Источник:

Улон ачиз дышетэ : [беседа] / Дмитрий Ефремов ; записала Елена Сараматова // Удмурт дунне. - 2017. - 10 авг. - С. 10, 15 : фот. - (Тӧр шорын).

За предоставление материала выражаем огромную благодарность редакции газеты "Удмурт дунне"