Ельцов Алексей Алексеевич

Материал из Воршуда
Перейти к: навигация, поиск

Бурдъясе мынам - инкуазь

Ельцов А. А.

Россиысь Писательёслэн огазеяськоназы пыртэм муртэн, «Кизили» журналлэн валтӥсь редакторезлэн воштӥсеныз Алексей Алексеевич Ельцовен ми улоннияз пумиськыны кенешимы. Огшоры улон юртлэн квартираысьтыз ӧс усьтэмын вал. Ӧс куспын монэ витьыса кадь сылэ муспотон пуны. Ӵапак гуртын сямен ик, со уте кузёезлэсь ваньбурзэ. Алексей Алексеевич ньыль пыдо эшеныз вераське адямиен кадь. Соиз ваньзэ вала, шӧдске – монэ но пырыны лэзиз, ӧз кышкаты. Коӵышеныз но кузё озьы ик мылысь-кыдысь кенешиз, аквариумысь турлы чорыгъёсыныз но пияла борды тэшкылляса ӟечбуръяськиз. Вань инкуазь лулосъёсын огкыл шедьтэ, лэся, та кылбурчи. Ма, вордскем палъёсыз солы сыӵе юртто, луоз. Угось Яр ёросысь Тум гурт интыяськемын Ватка шурлэн кутсконаз. Отын тайга шаугетон гурзэ мытэ ини. Матын гинэ Чупчи шур вӧл-вӧл вуоссэ нуэ. Шуръёсын – чорыгез, тэльёсын – пӧйшурез. Эмезё но, палэзё но, узыё-борыё инкуазь. Соин ик со Алексеез туж кыскиз бордаз. Ас гуртаз покчи классэз йылпумъяса, Баяран школае ветлыкуз но ӧз ӵыдылы тылобурдо кырӟанъёслэсь.

- Малпасько вал пичиысен ик нюлэсчи яке охотовед луыны. Но валэктӥсь ӧвӧлэн, со удысэ сюрес ӧй шедьты. Гуртысьтымы эшъёсыным ӵош мынӥмы Глазовысь совхоз-техникуме. Сое быдэстыса, монэ келязы Иже, «Удмуртсельпроект» институтэ. Куинь толэзь чертёж лэсьтэм бере, армие мынон дыр вуиз. Со гужеме гинэ анаймес ватӥм вал. Бадӟымез сузэре Сергей выныным ӵош одӥг ӝӧк сьӧрын милемыз армие келян ӝыт ортчытӥз. Шеди мон Сахалинэ, телеграфист вал. Кык ар ӝог лобиз. Армие но кыльыны дэмлазы вал, отысь милицие но инты шедьтӥзы – но дор пал сюлэмез кыскиз.

- Со дырысен тӥ улондэс удмурт журналистикаен герӟады-а?

- Бен, шуркынмон толэзьлэн кутсконаз вуи солдат дӥськутэн, пыри «Советской Удмуртилэн» редакторез Василий Михайлович Михайлов доры. Учкиз со мынэсьтым гожъямъёсме (газетъёсын потэм ужъёсме котьку люкалляй). Тросэз ӟуч кылын «Суворовский натиск» армейской газетын, дивизионной газетын печатласькылӥзы. Кельши, лэся, редакторлы. Гуртад бертыса, шутэтскы кӧня ке, ми тонэ ӧтёмы шуыса келяз.

Бертӥ Тум гуртам, 24-тӥ ноябре выль паспортме киям кутӥ. Иже кошкыны дасяськон вакытэ бускель кышномурт пыре, картэз, пе, эрказъяське, дорысьтыз пиналэн ӵош гольык пыд улляса лэзиз. Солдат сямен мынӥ доразы: огкыл, пӧй, шедьтом, буйгато. Буйгатӥ… Тюк гинэ йырам тӥрен васькытӥз. Озьы куинь арнязэ больницаын кыллёно луиз. Но выль 1978-тӥ арез мон «Советской Удмуртия» газетлэн корреспондентэз луыса пусйи ини. 12 арлэсь кема ужай мон та дано но дуно редакциын. Со вакыт ик заочно дышетски Удмурт кун университетлэн кылтодон факультетаз. Собере Удмурт радиоын тырши. Али нылпиослэн «Кизили» журналзылэн валтӥсь редакторезлэн воштӥсез луисько.

- Журналистикае вамыштонлэн вал, дыр, ук кыӵе ке но кутсконэз. Мар тӥледыз отчы кыскиз?

- Тодосчи, газетчи но кылбурчи Гергий Архипович Архипов, кылбур книгаез потэм бере, лыдӟисьёсын пумиськылӥз. Ачиз но со соку ужа вал Яр ёрос газетлэн редакторезлэн воштӥсез луыса. Баяран школаысен со монэ синйылтӥз, гожъяськыны ӝутъяз. Оген-кыкен заметкаос пӧралляй. Нырысьёсыз пӧлын вал КВН сярысь гожтэме. Учкисько но – «Омоним» но «Синоним» командаослэн нимъёссы газетэ сураськыса потӥллям: «Синоним» «Слаломлы» пӧрмем. Кибервылме валаллямтэ, лэся. Но со юмок бордысен ик гожъяськон монэ бордаз юнгес кыскиз. «Дась лу!» газет потыны кутскем бере мылкыд эшшо бугырскиз. Кылбуръёс но пӧраны шӧтай. Нырысетӥ очеркме туж тодам ваисько. 8 классын дышетскыкум, гожтӥ мон сое гуртысьтымы ожгарчи И. П. Ельцов сярысь. Кык тетрадь тыр. Ярысь «Сельской правда» газетлэн кык номераз потӥз. Паймиллям, военкоматысь но юалляськиллям: вань-а сыӵе фронтовик? Школае жингыртӥллям: вань-а сыӵе дышетскисьты? Георгий Архипов ачиз ӧз-а гожты со интые? Георгий Архипович киын гожъям тетрадьёсме возьматыса ик валэктоно луэм. Собере Г. Архипов юрттэмен ик, мон огпол гинэ ӧй ветлы егитъёслэн творческой семинаръёсазы Ижевске, тодматски уно егит гожъясьёсын но, тодмо писательёсын но.


Со дырысен Алексей Ельцовлэн кылбуръёсыз но, зарисовкаосыз, очеркъёсыз но газет-журнал бамъёсын туж уно потылӥзы, литератураез яратӥсьёс доры вуизы мӧйыослы но покчиослы кылбуръёсын бичетъёсыз, тросэз кылбуръёсыз кырӟан луыса калыке вӧлмизы.

- Жаляса верано луэ, мон ӧй вутты на печатласа сомында, кӧня луэ вал. Нырысетӥ бичетэ ик, книга поттонние сётэм маке, ышиз. Николай Васильевлэн но Владимир Романовлэн рецензиоссы кылизы, али но киям, нош кылбуръёсыз – ӧвӧл. Мон соосты малы ке аслым ӧй кельты вал. Соин ик нырысетӥ бичетэ – нимаз печатлано маке – потӥз 1989-тӥ арын куинь авторъёслэн «Егит дыр» книгаен. Собере пиналъёслы кылбур бичет дасяй. Тазэ но кематэк кияд уд куты шуыса, спонсор утчаны кутски. Егитъёслэн «Шунды» огазеяськонэнызы Светлана Смирнова кивалтэ вал. Юрттӥз, тау солы, «Кӧжыпог» сборнике нылпиос кие вуиз. Кунетӥзэ но, «Урт» бичетме, кун чотын поттонлы оскон ӧй вал. Вазиськи А. Поздеевлы, землякелы, кивалтӥсьлы. Книгалэсь ӝыны дунзэ сётӥз но – нош ик мыным гинэ ӧвӧл, асьме калыклы, литератураез яратӥсьёслы юрттӥз. Та сборникысь тросэз кылбуръёсы кырӟан луыса вӧлмизы ини калыке.

- Алексей Алексеевич, нош кыӵе кылбуръёсты кырӟанлы быръё?

- Котькуд кылбур кырӟанлы уз пӧрмы, дыр. Но котькуд кылбур кырӟан выллем луыны кулэ. Мое сое верасько аслам творчествоея. Азьвыл соос ритмиказыя но, рифмазыя но шуген сётисько вал. Г. А. Архипов ик валэктӥз: тон нёжъяса гожъя, соку уд янгыша. Мон озьы ик лэсьтӥсько али но, тросэз кылбуръёсы кырӟанэ курисько. Мынам соос асьсэ гурен кылдытэмын тросэз, но жаль, уг быгатӥськы мон кырӟан гурез бумага вылэ гожтыны.

- Нош дась гурлы кылбур гожтэмды вань-а?

- Вань. Радиоын ужакум ай огпол дорам Леонид Душников пыриз. Маке огинтыяз лёгаське, веранэз но вань, уг но дӥсьты кадь. Мар вералод? – юасько. Крезьгур, пе, кылдытӥ но, кылъёс уг шедьтӥськы. Магнитофонам гурзэ гожтӥ, ӝыт ужало, шуи. Час куспын кылъёсыз вуизы. Лёнялы гуртаз жингыртӥсько. Кӧня ке дыр ортчиз – со ачиз мыным жингыртэ ини: мон, пе, арганэн эскери, туж усто пӧрмем. Вот озьы милям кылдӥз «Гажаса малпан» кырӟанмы. Г. Платонова сое туж яратыса кырӟа.

Мукетыз кырӟан – «Синмаськид ке – яратод». Кылбурзэ мон сётӥ вал «Шӧкыче». Отын ӧз кельшытэ, нуи сое «Молот» журналэ. Серем пыр, пе, гожтэмын, поттоно. Со ик луиз мынам нырысетӥ кырӟанэ. Гурзэ гожтӥз кык мурт: Г. М. Корепанов-Камский но В. Шоркин. Уд но ведь тоды кылбурлэсь улон сюрессэ.

- Кырӟан луэм кӧня ке кылбуред ныл сюлэм пыр потыса, ныллэн нимыныз гожтэмын. Со мар-о, кышномурт психологиез ӟеч тодон-валан-а?

- Куд-огез юри кышномуртлы тупамон гожтэмын. Радиоын ужакум, Валера Тероковлэн нылкышноослы сӥзем проблемной программаез вал, солэн куремезъя кылбур гожтӥсько но, со кырӟанлы пӧрме.

- Тӥляд творчествояды бадӟым инты басьтэ военной тематика но…

- Малы мон сыӵе кылбуръёс гожъясько, ачим отын ӧй ке но вал? «Афганистан - мынам йырвисёнэ» кылбуре но вань. Отын элькунысьтымы тодмо адямиос быризы: Валерий Глезденев – удмурт офицер, военной журналист, Виктор Вахрушев – вертолётчик. Со сярысь мон радиоочерк но лэсьтылӥ. Собере мынам ӧй вал песятайёсы, малы ке шуоно кыкназы но быризы быдӟым оже. Со ӝож мылкыд мыным туж зол пыӵамын, бӧрдонэн кылемын.

- Университетын тон дипломной уждэ чорыг нимъёсыз эскеронлы сӥзид вал. Тыныд аспирантурае пырыны, улондэ наукаен герӟаны но ӵектӥзы соку.

- Зэм, луысал наука сюресэтӥ но вамышъяны. Но куинь кеч сьӧры уиськид ке – огзэ но уд куты. Мон верасько журналистика, литература но наука сярысь. Али мынам 6-7 книга поттымон кылбуре вань, проза но дасямын. Ӟуч кылэ берыктыса но бичет печатлам потэ вылэм. Но сое ваньзэ калык доры вуттыны коньдон кулэ. Нош ӝӧк пушкын возьыны гинэ кылдэм кылбуръёс–нылпиос туж жалесь. Озьы ик наука удысын ужамед но печатлатэк кыллёз. Соин одӥг сюресэтӥ ик мыноно, пазяськыса тыршемлэн пайдаез уз лу.

- Но ведь пӧртэм удысъёсын вырем улон сюресэз пӧртэматыны но юрттэ.

- Котькуд удыс мар ке но выльзэ сётэ. Газет тани мыным юрттӥз кылэз шӧдыны. «Советской Удмуртилэн» редакцияз соку тодмо журналистъёс ужазы. Радио мынэсьтым со кылме волятӥз, наш-наш удмурт кылын эркын вераськыны дышетӥз, нош «Кизили» журналын тыршон вакыт луонлык сётӥз творчество бордын вӧл-вӧл ужаны. Наука – тодос удысын диплом ужез гожтон – пукыны-чиданы, котькуд юанлы пыр-поч валэктон шедьтыны дышетӥз.

- Ялан уж сярысь вераськоды. Нош маин лычсузьымон вырыны яратӥськоды ваньмон дыръяды?

- Пичи дырысен ик мон яратӥсько пӧртэм ребусъёсын, кроссвордъёсын вырыны. Москваысь радио пыр сётъям юанъёслы но валэктонъёсын гожтэтъёс ысъялляй. Газетъёсы, журналъёсы поттылэм йырвизь сынанъёсы но пыриськылӥ школаын дышетскыкум ик. Тодмотэм, шуг юанлы валэктон утчаса, книгаосын бугыръяськон туж кельше. Али но со «висёнэ» монэн ӵош. «Удмуртия» ГТРК-лэн ӵукна передачаосаз юанъёслы валэктыса ма но ӧй утылы. Журналистика удысын ке конкурс яло, отчы но пыриськеме потэ. Элькунамы инкуазез утёнлы сӥзем конкурсын, тылпуэн нюръяськисьёслэн конкурсазы вормылӥ. Экологияя конкурсын мон Сорослэн фондысьтыз Грант но утӥ. «Чупчи – Удмуртилэсь уй пал ёросъёссэ сюдӥсь-сектась шур» темая. Кыӵе ёросъёс пыро Чупчилэн бассейназ, соослэсь инкуазен герӟаськем югдурзэс возьматӥ отын. Гожтэме «Удмурт дуннеын» кык бамын потӥз вал, Россиысь конкурсын кыкетӥ инты басьтӥз.


Источник:

Ельцов А. А. Бурдъясе мынам - инкуазь / А. А. Ельцов ; записал Вл. Михайлов // Удмурт дунне. - 2002. - 28 июня. - С. 6, 11. - (Удмурт дунне).


За предоставление материала выражаем огромную благодарность редакции газеты "Удмурт дунне"