Давыдов Пётр Владимирович

Материал из Воршуда
Перейти к: навигация, поиск

Гурт калыкелы синмаськемын

Давыдов П. В.

Дэри ёросысь Юськи шор ёзо школаын шыпыт гинэ тырше удмурт кылъя но литературая дышетӥсь Пётр Владимирович Давыдов. Данъяськонэз уг вала. Но вормонъёсыз асьсэос кыре-буре пото: данъян грамотаосыз уно люкаськемын. Со – Россия Федерациысь огъя тодон-валан сётон удысысь дано ужась, «Дышетон» нацпроектъя устоез дышетӥсь, Герман Ходырев нимо национальной премилэн лауреатэз.

- Пётр Владимирович, кызьы меда дышетӥсьёс дасясько 1-тӥ сентябрьлы?

- Малпасько, котькуд дышетӥсь понна та нунал – бадӟым праздник. Мукет нуналъёсын ӵошатыса, малы ке но со югытгес, чебергес потэ. Семьяямы нырысетӥ дышетскон нуналэз пусйытэк ноку ум кельтӥське. Нылпиосмы одно шулдырто корка пушмес, кузьымъёс дасяло. Кузпалы одно ческытсэ пӧраны тырше: торт, шаньги, перепеч…

Дышетӥсь луон сярысь пичи дыръям ик малпасько ни вал. Туж яратылӥ школаен шудыны. Урамысьтымы вань пиналъёс малы ке ми доры люкаськылӥзы. Озьы, партаос интые, пуконъёсты радэн пуктылӥм. Пӧлысьтымы одӥгзэ дышетӥсь кариськом вал. Диктантъёс но сочинениос гожъяллям, лыдӟиськылӥм. Ки улын котьку вал «Дась лу!» но «Советской Удмуртия». Мыным дышетӥсь луон одӥг-ог сяна ӧз донгиськылы – пичи карылӥзы. Семьяямы куать пинал пӧлысь мон берпуметӥез. Но соку уката вожомылӥ кадь: будӥ ке, возьмато ай!

Школаын сочинениосам но озьы ик гожъялляй: дышетӥсь луэме потэ, малы ке шуоно гуртын дышетӥсь – тужгес визьмо но дано, котьмае тодӥсь-валась, гажано адями, визь-кенеш сётӥсь, синъёсты усьтӥсь, бадӟым улонэ сюрес возьматӥсь.

- Озьы ке но школа бере тӥ вамыштӥды Асан совхоз-техникуме…

- Анае но, атае но быдэс улонзэс гуртын, музъем бордын ортчытэмын. Анае, Анастасия Васильевна, колхозын пӧртэм ужъёсты быдэсъяз – ужысь туж жадьыса бертэ вал. Атае, Владимир Семёнович, Быдӟым тыложе пыриськем мурт, мӧляяз корт пырыен берытскиз. Эмчиос операция ортчытыны дӥсьтӥллямтэ: сюлэмызлы укыр матын вылэм. Тодӥсько на, ас вылаз шӧдылӥз куазьлэсь воштӥськемзэ. Группае поттӥзы. Озьы ке но ужаз чугун сюрес вылын. Жаляса верано, анай-атае огзы но улэпесь ӧвӧл ни.

Малы ке но соослэн туж потэ вал, мон механик мед луом шуыса. Гуртын улӥсь муртлэн семьяяз трактор-машина нуллӥсез ӧвӧл ке, секыт ик йӧтылӥз, угось турын но пу ворттоно, бакча гыроно. Озьы тэльмырыса ветлоно луылӥз трактористъёс но кивалтӥсьёс котыртӥ. Техникаед котьку ки улад луоз шуыса, малпазы, вылды. Воргоронлы дышетӥсь луоно шат, куаретӥзы. Озьы, аслэсьтым мылкыдме юатэк но, ыстӥзы Асанэ. Отын 4 ар пала тодон-валан люкай.

Но Асан техникум вуттӥз монэ гожъяськон удысэ! Пиосмуртлы техникаез тодоно, дыр. Но техникаез дышетэм сяна, мон «Алнаш колхозникен» эшъяськи. Нырысетӥ гожтэме ик сӥземын вал милемыз, 1-тӥ курсэ лыктэмъёсты, студентъёс пӧлы пыртонлы. Сокем со мынам сюлмам йӧтӥз ни, сокем кельшиз – газетэ гожтытэк, ӧй чида. Отысь собере гожтэтъёс басьтылӥ, выль но выль материалъёсме курыны кутскизы. Толэзьлы быдэ ветлыны кутски «Алнаш колхозник» бордын ик кылдытэм «Ошмес син» литературной объединение, сое туж валаса нуэ вал кылбурчи но дышетӥсь Иосиф Бобров. Эшшо ке радъяськылӥзы селькоръёслы семинаръёс – таоссэ но ӧй кельтылы.

- Но берытскиды гуртэ механик луыса!

- Асан техникуме мон «Правда» совхозлэсь направлениен дышетскыны мынӥ вал. Соин отчы ик берытски – гаражын механик луи. Уг шуы, ӧз кельшы.

Но ӝыны ар пала сяна ужаса но ӧй вутты ведь. Июнь толэзе ужаны кутски ке, сӥзьылаз армие басьтӥзы ни. Дальний Востоке шеди, мотострелковой часте. Отын но гожъяськи! «Боевое знамя» газет потэ вал, отчы эшъёсы сярысь зарисовкаосме келялляй. Эсьма, армиысь монэ журналистикая факультетэ пырыны ӵектонэн лэзизы. Дэмлазы военной журналист луыны. Паймоно кадь, армиын кык ар ӵоже гожъям материалъёсы быдэс альбом люкаськиллям.

Берытски мон гуртам, нунал ортчыса, клубен кивалтыны кутски ни. Совхоз отчы кариськыны куриз – творчество борды кыстӥськемме шӧдытэк ӧз улэ, дыр.

Клубысь ӧс вылын соку бадӟым тунгон ошемын вал ужась ӧвӧлысь. Нош егитъёс гуртын трос, соослы ӝытъёссэс кытын ке ортчытъяно. Озьы эктон ӝытъёс, тунсыко адямиосын пумиськонъёс радъялляны, киноос возьматъяны кутским. Пумен ӧраз пырыны ӧдъяй но, кырӟанъя-веранъя коллектив но кылдытӥм. Одӥг праздник но митэк уг ортчы вал: Выль ар, 23-тӥ февраль, 8-тӥ Март, Вӧйдыр, Вормон нунал… Толэзьлы быдэ ик выль ужъёсмес поттылӥм сцена вылэ. Репетициосы клубе ог 15-20 адями ветлытӥз. Табере малпасько ни, мар меда соосты кезьыт клубе кыскылӥз? Монэ-а сӥлы карыса, кырӟаны-вераны мылкыдзы сокем бадӟым вал-а? Яке турын-куарен парем ческыт чае-а гурт калыкез огазеяны юрттылӥз?

Клубмылэсь со быдӟа юртсэ 4 гуръёс но шунтыны ӧзгес вормылэ. Соин ик басьтоно кариськи электроен пӧзьтӥсь 2 самовар. Озьы тӥни кырӟан вискын пӧсь чаен шунскылӥм. Концерт сётэммы бере но клубамы тылъёс кема пиштылозы на вал: нош ик кырӟам, азьланьлы быдэстоно ужпумъёсты чаклаллям, огшоры лабыртылӥм.

Зэмзэ но, клубе ветлӥсь кенакъёсылы луыса мон калыклы матэгес луи, адямиосын ужаны дышетски. Концертъёсын поталлям артэ гуртъёсы но. Озьы монэ тодыны ӧдъязы палэнын улӥсьёс но. Оло, соин но гуртоосы монэ бырйылӥзы Юськи сельсоветэ депутатэ. Кык созыв ужай.

- Малы ке но малпаллямды на УдГУ-ысь удмурт филологияя факультетэ пырыны…

- Университетэ, клубын ужакум ик, дышетскыны пыри. Тодӥсько вал ук: тросэз удмурт гожъяськисьёс сое йылпумъямын шуыса. Зэм-зэм, нош ик гожъяськон мылкыды монэ ӝутказ! Дышетсконме ӧй йылпумъя на вал, школаын удмурт кылъя но литературая урокъёсты нуись кулэ луиз. Мон соглаш кариськи. Кызьы школа монэ ньылӥз – ачим но валаса ӧй вутты, лэся: со дырысен 23 ар ортчем ни.

УдГУ-эз йылпумъяме бере фин-угор кылъёсъя кафедраен соку кивалтӥсь Иван Васильевич Тараканов кафедрае кыльыны дэмла вал – кыкез преподавательёссы аспирантурае пырыны малпаллям соку. Малпаськи-малпаськи, но школаелэсь ӧй ӵыды. Кӧня ке ар ортчыса, Дэри ёрос газетмылэн соку редакторез Мария Дмитриевна Ишматова вазиськиз вал: интыям, пе, кыль. Улон интыдэ воштоно уд луы, шуиз, машинаен нуозы но, ваёзы но. Кин тодэ, оло, вырӟысал но. Но пересь анайме кельтыны ӧй быгаты, ӧй дӥсьты. Жалясько-а со сярысь? Уг, дыр. Аръёс ортчемъя уката валасько: дышетон удыс ик мынам вылэм!

- Анай-атайды но шуиллям вылэм ик: воргоронлы дышетӥсе мыноно шат?

- Филологъёс пӧлын уката но ӧжыт воргоронъёс, ёросамы ми кык кузя гинэ – Якшурын дышетэ Виталий Герасимович Морозов. Но нылпиосты визьноданы нылкышноос гинэ кулэ шат? Семьяын но атай кулэ ук! Собере, дышетӥсь нылпиос пӧлын гинэ ӧвӧл, мӧйыос пӧлын но гажамон луыны кулэ. Кулэ дыръя солы, визь-кенеш курыса, вазиськемзы мед потоз.

Мынам аслам ӟеч дышетӥсьёсы вал. Нырысетӥ уроке пырон азям ик визь-кенеш сётӥз школаысьтымы математикая дышетӥсь Людмила Дмитриевна Коробейникова. Со лад-лад валэктӥз, кызьы классэ вамыштоно, кызьы ӟечбуръяськоно. Кызьы астэ нырысетӥ урокын возьматод, озьы ик луоз мукетъёсаз но, шуиз со. Людмила Дмитриевналэн анаез, Раиса Васильевна Далкова, монэ но 5-тӥ классысен дышетӥз ай удмурт кыллы но литературалы. Со шоры туж синмаськыса учкылӥ, урокъёсаз вань примеръёсты улонысь, асьме гуртмы вылысь басьтэ вал – озьы валамонгес ук. Мон но та амалзэ ужам али но кутӥсько. Туж бадӟым тау кареме потэ ӟуч кылъя дышетӥсьёсылы – Елена Ивановна Христолюбовалы но Нина Афанасьевна Михайловалы, соос но монэ туж трослы дышетӥзы.

Сюлмаськытэ соиз: али покчи классъёсын дышетскисьёсмы выжо ни Н. Боталовалэн «Ӟеч-а, бур-а, удмурт кыл!» книгаез вылэ – со чакламын анай кылмес ляб тодӥсь нылпиослы. Ярано, шор но бадӟым классъёсын удмуртэз умой-умой ик дышетӥськом на. Ӟуч пиналъёс но урокъёсамы пуко. Таосыз пӧлын котькыӵеосыз вань ни: одӥгъёсыз ас ужъёсынызы выро ке, мукетъёсыз уроке пырисько, диктантъёс, сочинениос но гожъяло – та понна оценкаос ум пуктылӥське ке но.

Пиналъёс пӧлын коть ӧжыт ӧвӧл лыдӟиськыны яратӥсьёсыз – компьютер сьӧрын гинэ уг пуко. Нош кин уг лыдӟиськы, урокын кылзо мукетъёсызлэсь, соослэн но произведенилы тунсыксы кылдэ. Мынам вормонъёсы – со нырысь ик нылпиосылэн вормонъёссы. Тросэз дышетэм пиналъёсы пыриськыло олимпиадаосы, пӧртэм ӵошатсконъёсы – ӟечесь тодон-валанъёссэс возьмато, ёросын но, элькунын но вормисьёслэн радазы сюро. Школа бере удмурт факультетэ пырисьёс но шедё.


- Дышетэм нылпиосты пӧлын газет-журналъёсы гожъяськисьёс но вань.

- Школаямы «Юнкор» литературно-творческой кружоклэсь ужзэ радъясько бере, толэзьлы кык пол пӧртэм ужъёсынымы «Вуюись» газет поттӥськом. Отчы нылпиос мыло-кыдо гожъясько. Газетмы киысь кие кошке, нылпиос потэм ужъёсынызы портфолиоссэс узырмыто, библиотекаын подшивка нуиське. Тужгес ӟеч ужъёссэс «Ӟечбуре!» келяны косӥсько. Куддыр ачим ик печатласько но, ачим ик келясько но. Сотэк уг луы, нылпиослы ведь сюрес возьматоно, собере соос асьсэос дышозы-быгатозы ни.

Огвакытэ туж мыло-кыдо нуи на шаертодонъя кружок. Солы луыса гуртмылэн ортчем сюресэзъя трос тунсыко материалъёс бичам, юалляськыса мӧйыос дортӥ ветлӥськом вал. Ачим кӧня ке пол юромо ветлӥ Иже, отын архивъёсын бугыръяськи. Ой, паймымон, мае но гуртмы чидамын-адӟемын ӧвӧл ни! 1807-тӥ арын Юсь волостьысь ужез яратӥсь крестьянъёс гожтэмын вылэм Иж корт ӵыжатон завод борды. Соос луизы заводлэн приписной яке непременной ужасьёсыз. Гуртоос кулэ вал вань секыт, сьӧд ужъёсты быдэсъяны, соин ик отчы мылкыдтэк мынӥзы, нылпиоссэс куштыса, кужмысь ыстылӥллям соосты отчы. Нош самой тунсыкоез, дыр, Емельян Пугачёвлэн 1774-тӥ арын инвожо толэзьлэн 28-тӥ нуналаз гуртамы вуылэмез. Калык сое сӥё-дано пумитам, сюдэм-сектам, ӝӧк вылэ тӧдьы ӝӧккышет вӧлдыса ик. Удмуртъёс чагиськизы, черк соосты пӧртэм тыриськонъёсын зӥбе, ултӥя шуыса. Озьы Пугачёв черкен герӟаськем вить муртэ ошыса кельтӥз. Соку тросэз удмуртъёс, Пугачёв пала кариськыса, черклэсь куронъёссэ быдэсъямысь дугдӥзы. Со кемалась учырез тодэ вайытэ гуртысьтымы Пугачёв нимо урам. Нош 1846-тӥ арын 15-тӥ июне Вятской епископлы Неофитлы Юсьын, вужмем пу черк интые, излэсь храм пуктыны лэземын вылэм. Гожтэмын: «Пуктоно умой но дано интые алтареныз шундыӝужан пала».

Тодӥсько на: пичи дыръям туж яратылӥ пересьёслэсь верамъёссэс кылзыса пукылыны. Капка азе люкасько но ну! оломар сярысь но лабырто вал. Гурт калыкелы со дырысен мон синмаськемын! Нош Юськимылэн историез сярысь быдэс музей усьтымон материалъёсмы люкаськемын. Жаляса верано, школамы ӟоскытгес, солы инты висъяны ум быгатӥське. Зэм, борддоре стендъёс ошылӥм ик, отысь тунсыко лыдпусъёсты адӟыны луэ. Ваньзэ сое ми пиналъёсын ӵош дасям.

- Пётр Владимирович, туж данъяськиськоды асьтэ пиналъёсыныды но!

- Тау нылпиосылы, соос понна кузпалэным одӥг пол но ӧм гордэктылэ. Вадиммы, Ижысь Кузебай Герд нимо гимназиез йылпумъяса, одӥг ар дышетскиз ни ИжГТУ-ын, программист луэмез потэ. Туж оскисько вал, УдГУ-ысь удмурт филологияя факультетэз быръёз шуыса, но мылкыдызлы пумит уд ӵогы ук. Школаын дышетскыкуз ик, кылбуръёс гожъяны йӧндыриз. Кылем арын Удмурт театрлэн сценаез вылын сое Герман Ходыревлэн премиеныз пусйизы. Кылем гужем ик «Ӟечбур!» газетэн ялэм «Вунонтэм гужем» конкурсын вормисе потӥз. Нош ачиз тужгес но данъяське Удмуртилэн Президентэзлэн «Таланто егитъёс» программаезъя сӥлы каременызы. 30 сюрс манет премиеныз ачиз но, кузпалы но праволы дышетскизы – пиелэн сыӵе мылкыдыз вал. Вовамы но, Настямы но озьы ик «4»-ёслы но «5»-ёслы дышетско. Огез 9-тӥ классэз йылпумъяз, кыкетӥез – 4-тӥ классэз. Ваньзы бон ачим кадь ик востэмесь, кыштырак гинэ, асьсэды возьматыны турттытэк, тыршо.

- Тӥ асьтэлы туж востэм потӥськоды-а?

- Укыр ушъямзылэсь гинэ но кепыр вайисько, аслым инты уг шедьтӥськы кадь. Виры удмурт уга. Та сяммы куддыр люкетэ но. Нош куддыр чебергес но каре!


Но туж шумпотӥсько, анае-атае монэ кутскем ужме пумозяз, тыро-пыдо вуттыны дышетӥллям шуыса. Куараме будэтъяны чик уг быгатӥськы. Кузпалы куддыр шуэ: уд кесяськиськы ке но, кылыд лек луылэ.

Востэм ке но мон, шудо! Улонын шедьтӥ яратон удысме, монэ нуналмысь котырто яратоно семьяе, эшъёсы. Кема ке но выримы, ас коркамес ӝутӥмы ни. Зэм верало, улонзэ адями ачиз лэсьтэ-радъя. Туэ зарни лыдпусме пусйи ни. Но аслым 25 гинэ сётысал ай. Кузпалы но мынам, Людмила Кронидовна, трослы аслэсьтым егит ук! Солы луыса асме озьы шӧдӥсько, дыр! Шаркан ёросысь Порозысь со, йылпумъямын удмурт филологияя факультетэз ик. Но али удысэзъя уг ужа, ачиз руль сьӧры пуксе но Иже нуналлы быдэ ветлэ. Ужез вуз карон удысэн герӟаськемын. Туж яратӥсько Порозэ ветлыны. Кузпалылэн анаез но, атаез но улэпесь на, туж сабырлыесь. Монэ котьку но ӟыгыръяса-чупаса пумитало – талы кызьы уд шумпоты?

Но уката шумпотӥсько, дорамы куноос лыкто ке, семьямы быдэсак люкаське ке. Ӵошен ужаны но, шутэтскыны но шулдыргес, каньылгес. Таӵе дыръёсы кузпалы одно туж ческыт пӧраське. Ваньмон дыръёсмы озьыгес ортчо. Гужемзэ бакчаын бергаськом, кузпалы шуэ: механиклы дышетскем интые, агрономе коть мыноно, пе, вал тыныд – пайдаез тросгес луысал. Но котьмамы ик будэ кадь. Кузпалы туж яратэ сяськаосын вырыны, нош мон чеберзэс гинэ учкисько. Озьы но милям луылэ: Людмила бакча котырын берга, нош мон бумагаос пӧлын бугыръяськисько. Гужем но урокъёс сярысь сюлмаськонэн улӥсько! Зэмен но, дышетӥсьлы быдэс улоназ аслыз дышетсконо луэ, сотэк со пиналъёслы маке выльзэ сётыны быгатоз меда?

- Мае возьмаськоды туала дышетскон арлэсь?

- Нырысь ик, выль тодон-валан басьтыны тыршись, дышетскон борды гижысь-пиньысь кырмиськись нылпиосты. Ортчем дышетскон арын сямен ик, туэ но пӧртэм ӵошатсконъёсы пыриськыса, вормонъёс мед басьтылозы. Валамон, тыршытэк-утчаськытэк номыр ас кожаз уг лыкты. Но со понна туала арын вань луонлыкъёс кылдытэмын. Школае табере ма но уг вуы! Нокинэ уд паймыты ни компьютер классъёсын, электрон пособиосын но трос мукетыныз. Интернеттэк туала школаез син азе пуктыны уг луы. Выль стандартъёс улонэ пыӵамен, нылпиос темаосты дась кушаса сётэмез кулэ уг каро ни, асьсэос трос ужпумъёсты сэрттыны-пертчыны туртто. Пӧртэм проектъёс, исследованиос бордын ужаса, нылпилэн выль тодон-валан басьтыны мылкыдаз уката золгес луэ, солэн пӧртэм быгатонлыкъёсыз усьтӥсько-юнмало. Сыӵе мурт улонын уз йыромы.

Источник:

Давыдов П. В. Нюлэскы мон мынысал / П. В. Давыдов ; записал Э. Кумачева // Удмурт дунне. - 2013. - 30 августа. - С. 5,10. - (Тӧр шорын).

За предоставление материала выражаем огромную благодарность редакции газеты "Удмурт дунне"