Гусев Петр Иванович

Материал из Воршуда
Перейти к: навигация, поиск

Ньыльдон ар – ож дӥсен

Гусев П. И.

Пётр Иванович Гусев – отставкаысь генерал-лейтенант. Вордӥськемын со Селта районысь Умедьгуртын. Али улэ Украинаын. Но палэнын улыса но Пётр Иванович уг вунэты вордӥськем палъёссэ, дырын-дырын вуылэ ас палъёсыныз адӟиськыны. Сыӵе дыръя со одно пумиськыны тырше егитъёсын. Соослы, шаермес утьыны дасяськисьёслы сӥзиз со аслэсьтыз тодэ ваёнъёсын книгазэ. «40 ар - ож дӥсен» нимын потӥз со 2001-тӥ арын «Удмуртия» издательствоын.

Атыкай музъеммес утисьёслэн нуналзы азьын телефон пыр ми герӟаськылӥм Пётр Ивановичен. Материалын озьы ик уже кутэмын П. Гусевлэн тодэ ваёнъёсын книгаысьтыз люкетъёс.


Пинал дыр

Мар бордысен кутскиз вал ваньмыз? Малпанысен… Военной луон сярысь гуртын соку нокин малпаськыны ик ӧз дӥсьтылы. Атаймы вань улонзэ музъемын бугыръяськиз, анаймы трос нылпи будэтӥз. Соку соослы нырысетӥ пиды генерал луоз шуысалзы ке, серем каро шуыса ӝожомысалзы, дыр.

…Анай-атае ас вылазы шӧдӥзы граждан ожлэсь, коллективизацилэсь бервылъёссэ. Атайлэн кутсаськон станокез ӧжыт гинэ быдэс семьяез Сибире ӧз келя. Но колхозэ пырыны атай ӧз пумитъяськы. Сое счетоводэ пуктӥзы. Кӧня ке класс дышетскемез вал бере, со ӟеч гожъяськыны-лыдъяськыны быгатылӥз.

…Семьяын арлы быдэ нуны вордӥськылӥз. Мон азьын кык нылъёс вал, соин ик мынам вордӥськемелы атай пумтэм шумпотэм – выжыез азинтӥсь, пе, луоз. Мон бӧрсьы семьямы эшшо ньыль муртлы йылӥз на. Собыдӟа семьяез сюдон вылысь, анаен атаймы ӟардонысен ӟардонозь ужазы. Ужатъязы милемыз но.

Нылпиосты дышетон сярысь нокин но сокем ӧз сюлмаськы – лыдӟиськыны дышид – окмоз. Со понна пичиысен дышетъязы гырыны-кизьыны, тӥрен ужаны. Гурт улон егитъёслы ӧз кельшылы. Сизьым классэз быдтэмъёс гуртысь ури-бери кошкыны вырылӥзы. Кошкемъёсыз, валамон ини, ӧз берытскылэ ни – адямие потыны тыршылӥзы. Огвыллем гурт улон воштӥськылӥз праздникъёсы гинэ. Выль улон гуртэ ваиз, шуыны луоз, комсомол. 1939-тӥ—1941-тӥ аръёсы туж данъяллязы Горд Армиез. Нош офицеръёс инмаръёс чотын вал. Отпуске бертэм солдатэз гинэ но туж-туж данъяллязы, ӝыт корка тыр калык люкаськылӥз.

Тодӥсько на, 1939-тӥ арын отпуске бертӥз покчи командир Николай Шиляев. Анайя со милям ӵыжы-выжымы луэ вал бере, солдатэз куное ӧтизы. Тямыс аресъем пияш понна со бадӟым праздник вал. Мон возьмай сое вазь ӵукнаысен – лумбыт шудыны но ӧй пота. Лыктӥз со военной дӥсен. Ӝужыт, веськрес солдатэз адӟыса, мон интыям ик пуми. Со дырысен мон пыраклы синмаськи военной дӥсьлы.

1939-тӥ арын мынӥ школае. Мултэс ӧй пычкиськы – ваньмыз каньыл сётӥськиз. Куинь классозь дышетӥзы удмурт кылын, ньылетӥысен –ӟуч сямен. Гуртмы ӟучъёсын суро вал бере, кыксэ но кылэз ӟеч тодылӥ, соин дышетскыны ӧй шугъяськы.


Война

1940-тӥ арын атаймес кыӵе ке военной сборъёсы басьтӥзы. Гуртын со пумысен нокин ӧз кушетскы, ваньмыз сюлмаськизы тросгес трудодень поттон сярысь. Тямысам арай ни. Войналэсь кутскемзэ ноку уг вунэты. 24-тӥ июле атаймес Селталась сборной пунктэ келям. Соку мон нырысьсэ сомынды калыкез адӟи. Уваысь чугун сюрес станцие - 40. Воргоронъёс 40 иськем пудэн вамыштӥзы. Кӧня ке иськем бӧрсязы келяськыса мынӥзы кышнооссы, анайёссы, нылпиоссы. Ми анаеным атаймес келям Мадьярозь. Со вис карытэк бӧрдӥз. Озьы мон пумитай войнаез.

1942-тӥ арын ми басьтӥм атаймылэн Гусев Иван Егоровичлэн ивортэк быремез сярысь гожтэт. Анаймы чир! кесяськыса киоссэ валлань ӝутыса бӧрдӥз. Соин ӵош ик бӧрдӥм ми. Малпан

1946-тӥ арын мон 7-тӥ классэз йылпумъяй. Со вакыт со тырмымон вал. Но мынам туж потылӥз военной луэме, соин мынӥ 8-тӥ классэ. Школаын нуиськиз «военной уж» урок. Со мыным туж кельшылӥз. Та урокъёс мыныку, мон вунэтылӥ кадь ваньмыз сярысь. Соку уката зол шӧдӥ сюлэмылэсь кытчы кыстӥськемзэ.

Дышетсконме куштӥ. Арез секыт вал, анаймы ревматизмен пограз. Со монэ буйгатъяз, 7 класс гуртын тырмымон ни шуыса. Эх, тод вал со мынэсьтым зэмос мылкыдъёсме. Дас сизьым арескам мон «бадӟым кивалтӥсь» - кладовщик луи – мыным оскемын вал вань колхозникъёслэн ужам ваньбурзы. Луи правленилэн членэз. Монэ куное ӧтчаны, утялтыны выризы, но йырме ноку ӧй ыштылы – анаймы лек вал.

Егит муртлэн мылкыд уртчылӥз. Озьы мон эшъёс пӧлын пӧртэм ужрадъёс, ӵошатсконъёс ортчытъяй. 1949-тӥ арын районын куасэн бызьылонъя ӵошатсконъёс радъязы. Колхозысьтымы ми отчы куинь кузя дасяським. Асьме киын лусъем куасэн, гын сапеген… Нош районысь интеллигенция – базар куасъёсын, ботинкаосын, бамбук бодыосын. Костюмъёссы но шукресэсь. Пӧлазы вал Ижысь пединститутысь физкультурая факультетын дышетскись Виталий Шаклеин. Малы ке со мыным соку ик син шорам йӧтӥз. Мукетъёсыз но со шоры долкаллям – школа сьӧрын маин ке куасъёссэс ну зырало ук. Соку мон ӧй ик тодылы куасэз зыран нимысьтыз мазьёс сярысь. Я, ялӥзы дас иськеме старт. Ортчоно вал Сибирь тракт кузя. Котькуд 30 секунд ортчыса, спортсменъёс сюрес вылэ пото. Дасэтӥ кошкиз районлэн чемпионэз И. Беляев, дас одӥгетӥ – самой со В. Шаклеин, дас кыкетӥ – мон. Мынӥсько дышем сямъя, укыр кылёнтэм вылысь гинэ. Ӝыны сюресэз ортчыса, кельтӥсько И. Беляевез, матэктӥсько В. Шаклеин дорозь. Жадемме уг шӧдӥськы. Эшшо кык иськемзэ йыртышказ шокаса мынӥ, собере азьпалтыны дӥсьтӥ ик. Финише мон нырысетӥ вуи. Тазьы луонэз нокин ӧз возьма: судьяос паймизы, ортчем сюресме эскерыны, юалляськыны кутскизы. Та ӵошатсконъёс бере монэ районлэн сборнояз пыртӥзы.

Со бӧрсьыгес ик Ижевскын ӵошатсконъёс ортчизы. Таӵезэ мон нырысьсэ адӟи – гостиница, ческыт сиён, культурной программа, ӵошатсконъёсты сӥё-дано усьтон, флаг ӝутон… Командамы луиз куинетӥ. Монэ пыртӥзы Удмуртилэн сборнояз. Россилэн ӵошатсконъёсыз ортчизы Пермьын. Удмуртия сюриз дас устоосыз пӧлы. Гуртын монэ героез сямен пумитазы. Со учыр бере гуртын улыны нокыӵе чиданэ ӧй вал ни. Потӥз калыке потэме, нош но нош выльзэ, тодмотэмзэ адӟеме, дышетскеме. Вамыштӥ военкоматэ. Но со вакыт 7 классъем дышетскемен военной училищее пырыны шуг луиз – кутыны ӧдъязы шор ёзо тодэм-валамен. Кылиз на одӥг оскон – армия. Со понна 1951-тӥ арын 4-тӥ мартэ мон армие повестка басьтӥ. Мон понна со верантэм шумпотон вал. Монэ келязы кырӟанъёсын-эктонъёсын. Нылъёс-пиос кунултыса валтӥзы монэ гурт урамъёс кузя. Анай капка азе бӧрдыса кылиз. Тодэ лыктӥз войналэн кутскемез. Сюлэмын маиз ке чигиськиз кадь – анай нош кылиз пиосмурт киостэк…


Армия

Шеди Чебаркуле. Кыкетӥ нуналаз строен нуизы мунчое. Сиён ӧз тырмылы, кӧт ялан сюмаса улӥз. Армилы кема дышыны ӧй выры. Туж кельшылӥз дышетскыны. Ӵошатсконъёсын мон котьку азьпала потылӥ. Милемды дасязы артиллерия полклэн школаяз. Экзаменъёсме ваньзэ «витьлы» сётӥ. Мыным соку ик сержант ним сётӥзы. Офицеръёс монэ гажаллязы. Вал милям полкамы комсомол огазеяськонлэн секретарез Михаил Нигрей. Огпол солы верай офицер луыны мылкыды сярысь. Со юртто, шуиз. Кӧня ке улыса нош, зэмзэ но, ивортӥз, Тюменьысь училище 7 классъем тодон-валанэн солдатъёсты кутэ шуыса.

Взводлэн командирез мыным усто характеристика гожтӥз. Документъёсме дасяса монэ училищее келязы. Училищее 100 интые 120 мурт куриське. Сюро-а мон пӧлазы? Туж оски аслам кужымелы – физподготовкая уго мынам разрядъёсы вал ини. Кышкайгес ӟуч кыллэсь но. Сержант Гусев Пётр Иванович сюриз Тюменьысь пехотной училищее! Со минутъёс улонысьтым, оло, тужгес шудоосыз вал, дыр. Мон лэсьтӥ малпанме быдэстонын нырысетӥзэ вамыш. Сыӵе потэ вал соку гуртэ бертыса, анайлы, ӵыжы-выжослы ивортэме. Но со учыр бере мон валай – табере мон соосты туж шер адӟыло.


Куинетӥ курсын монэ кутӥзы партие. Пинал пияш понна со бадӟым дан вал. Соку мон взводэн кивалтӥ. Выпускной экзаменъёсме, КПСС-лэсь историзэ сяна, «витьлы» сётӥ. Оркестр шудэм улсын милемлы сётӥзы погонъёс но диплом. Табере мон – егит офицер. Ӵыж-выль форма, ӟукыртӥсь е, чильк-вальк кисьтаськись сапегъёс… Табере мон – командир.


Шудэ вылэм Байкал сьӧрын

Шеди мон Забайкальеысь военной округе. Ӟеч интыен со ноку но ӧз лыдъяськы, но мон малы ке малпасько, удалтӥз шуыса. Нырысь ик, Читае ке ӧй шедьысал, мон ӧй пумитасал яратоно кузпалме. Собере мыным котьку кельшылӥз асме эскерыны. Сыӵе муртъёс понна та инты ӵап тупа – 50 градус кезьытэз адями гинэ ӧвӧл, техника но уг чида… Управлениын мыным нырысь ӵектӥзы комсомол ужен вырыны. Но мон чутрак пумит кариськи – угось туж потэ вал командир луэме. Озьы монэ юнматӥзы 36-тӥ стрелковой дивизилэн 76-тӥ полкезлы командире.

Пинал офицеръёс ваньмыз сямен патерын улӥзы. Мон но ӵош дышетскем эшеным Володя Борисовен ӵош одӥг мӧйы кышномурт доры интыяськи. Татьяна Григорьевна милемыз нуназе но, ӝыт но сюдоз шуыса вераським. Кӧня ке улыса, ми та коркась ик чебер, егит нылашез синйылтӥм. Кузё кышномылэсь тодӥм кинзэ-марзэ. Галя туж востэм, ужез гажась вылэм. Улӥз со выныныз гинэ, анай-атаез кулӥллям. Со мыным туж жаль потӥз. Кӧня ке толэзь ортчыса, ми кузпалъяським. Служить карытозям, мон оломае но адӟоно-чидано луи, но улытозям тау каро Забайкальелы, собыдӟа кузьым лэсьтэмез понна. Кин тодэ, кызьы радъяськысал мынам службае, вӧзам ӧй ке луысал яратӥсь кузпалы. Трос аръёс ортчыса но, со кылиз сыӵе ик: чебер, котьмае валась-быгатӥсь.


Собере вал Германия. Мон нырысьсэ шеди мукет странае. Вылаз ик – азьвыл тушмонъёсмылэн странаязы. Котькуд немецез мон тушмон интыын адӟылӥ. Выльысь но выльысь лӧптылӥз бырем атае понна йыркур.

Кык ар ӵоже мынам взводэ тужгес устоез вал – со понна мыным дырызлэсь вазь старшой лейтенант ним сётӥзы. 1958-тӥ ар мыным эшшо одӥг бадӟым кузьым лэсьтӥз на – милям вордӥськиз нырысетӥез нылмы. 1961-тӥ арын монэ юнматӥзы 6-тӥ мотострелковой роталы командире. Полкысь ротаослэн командиръёссы пӧлын мон вал тужгес егитэз.

Али со сярысь малпасько ке, со бадӟым ик дан вылымтэ. Азьпалан уго монэ возьмало на вылэм данаклы бадӟымгес вормонъёс. Но со дырозь вал на кык академия – М. В. Фрунзе нимо но СССР-ысь Вооруженной Кужымъёслэн Генеральной штабзылэн академиез. Нош соос вискын – Дальний Восток. Отчы мон сюри СССР-ен Китаен куспазы тэронтэм вакытэ. Тросэн быризы асьме пограничникъёс.

Интыязы кыӵе ке сопкаос пӧлы – матысь посёлокозь 9 иськем. Пыртӥзы куашкан калэ вуэм вуж пу корка. Ӧй вал тыл но, шуныт но. Ву вайылӥзы вышкыосын. Кызьы сое Москваын улэм бере чидаз кышное, мон али но уг валаськы. Тӥ, оло, уд оске, но службаын котьку но золгес удалтэ кышно бырйыкуз янгышамтэ лейтенантлы. Командир кышно луыны туж секыт. Мон оскылӥ, мынам Галяе монэ ноку но уз алда, уз кушты шуыса. Со вань мукет солдат кышноослы адӟем карымон вал. Со быгатылӥз калыкез пумитаны, утялтыны, милемыз ческыт сюдыны. Магазинысь бакча сиён, курег пуз басьтыны туж шуг вал, соин ачиз утиз бакча, вордӥз чипы-курег. Ми ноку но, мукет офицер семьяос сямен, бакчаямы ӧм ужатъялэ солдатъёсты – возьыт вал. Галя ваньзэ ачиз лэсьтылӥз. Мон вань дырме но кужымме сӥзьылӥ яратоно службаелы. Олямы мукет нылпиосын ӵош 9 иськеме школае ветлӥз. Автобус тӥяськыку ветлӥзы яке БТР-ен, яке пудэн. Огпол но ӧз ӝожтӥськы, дышетскиз «витьёслы» гинэ.

  • * *

Ӝоген майорез Гусевез таяз но интыен ушъяны ӧдъязы – ас азям пуктэм ужпумъёсты мон гижысь-пиньысь быдэсъяны выри. 1966-тӥ арын мынам батальонэ быдэс округын устоен лыдъямын вал. Ми уен-нунал юнматыны вырим Дальний Востокысь кунгожъёсты. Генеральной штаблэсь академизэ усто йылпумъяме бере монэн вераськиз генерал-лейтенант Язов. Со ялӥз, мон командир луыса Венгрие кошкисько шуыса. Мыным 42 арес – мон полковник. Мон нош ик азьпал радъёсын.


Мон генерал, анай!

Толэзь ортчыса, мон дивизиысь вань югдурез вить чиньыме кадь тодӥсько ни вал. Ваньзэ быдэстэм ужъёсты вераса уд быдты, но кык ар ӵоже мынам дивизие боевой подготовкая но дисциплиная азьпал радын вал. Нош одӥг ӵукна мыным ЮГУЗ-лэн командующиез жингыртӥз: дӥсялэ генераллэсь дӥсьсэ, ӟечкыласько! СССР-ысь Министръёслэн Советсылэн постановлениезъя мыным сётэмын генерал-майор ним. Мон кылме ыштӥ. Ӝамдэ улыса гинэ быгатӥ «Служу Советскому Союзу!» шуыны. Генерал-майор. Вазен дыръя – дворян ним. Син азям соку ик пуксиз гуртысьтымы пересь Педор. Ӵапак со пичи дыръям шорам учкыса мыным ба-адӟым военной начальник луыны сӥзьылӥз. Озьы мон таяз отпускам кыдёкысь Умедьгуртам генерал погонъёсын бертӥ. Партилэн Селталась райкомез туж сӥлы кариз – калыкен бадӟым пумиськон радъязы. Ваньмызлэн потӥз улэп генералэз адӟемез. Нош мынам син азям пуксьылӥз Селталан нырысьсэ сумбырес куасъёсын быземе. Мон-а та? Тон-а со? – бӧрдыса гадь вылам омырскылӥз пересьмем анае. Мон ас поннам вань улытозям керпотылӥ, сое кельтыса, гуртысь пыраклы кошкемысьтым. Но табере валай – солэн кӧтыз чик но ӝож ӧвӧл, со данъяське монэн, солы вожъясько гуртысь вань кышноос. - Петя, пие! – дугдылытэк вешаз со монэ. Сыӵе кема возьмай мон со вешамез – пичи дыръямы милемыз эркияны солэн дырыз ӧй вал уго.


Тросэз военнойёс паймо мынам ӝог будэмелы, угось генерал-майорын но мон кема ӧй ветлы, сётӥзы генерал-лейтенант ним. Учконо ке, зэмзэ но будӥ маял вылын кадь. Мар со – удалтон-а, уен-нуналэн ужед сярысь сюлмаськон-а? Соиз но, таиз но, дыр. Армилы мон, зэмзэ но, вань сюлэмме, кужымме, тодэм-валамме но дырме сётӥ. Яратоно семьяе но ӵемысь палэнэ кыльылӥз. Интыысь интые 15 пол кӧчылӥм – мон огпол но ӧй быгаты кышноелы котырез люканы юрттыны. Казахстан, Прикарпатье, нош ик Германия, нош ик Прикарпатье.

…Сямыя мон меӵак адями. Уг яратӥськы пыриськыны, чеберъяськыны. Маке малпасько, сое ик верасько. Мон котьку оскылӥ, адями вань сюлэмзэ поныса, алдаськытэк тырше ке, сое одно синйылтозы шуыса. Со озьы ик луэ, кивалтӥсед но сыӵе ке. Мыным шуд усиз генерал-полковникен Б. Ивановен, армиысь генералъёсын Н. Лященкоен, П. Лушевен служить карыны. Но пумиськыло В. Беликов но, кудъёсыз асьсэ сярысь гинэ сюлмасько. Асьсэдыз данэ поттон понна, адямиос вамен вамышъяло, кельшымтэ офицеръёсты службалэсь палэнто, нош должность сёто азязы пыд чиньы вылазы ветлӥсьёслы гинэ. Прикарпатской округе кыкетӥзэ вуэме бере, монэ штабен кивалтыны косӥзы. Мынам сямыным штабын пукон чидантэм потылӥз. Мон котьку жаляса учкылӥ штабын пукисьёс шоры, нош табере ачим сыӵе «комаклы» пӧрми. Но котькыӵе ужын астэ возьматыны луэ вылэм. Татын служить карыкум, Чернобыльын кышкыт кайгу луиз. Ми Вареников генералэн радионуклидъёсты эскерон ужъёсты радъяллям, тросэз офицеръёсмы пырак зонаяз ужазы. 1981-тӥ арын мыным кылдӥз КПСС-лэн 26-тӥ съездаз пыриськыны. Таӵе ужрадъёсын мон азьвыл ӧй вал. Паймытӥзы радъяны быгатэменызы – мыным потӥз, отын чабыны но командая кутскылӥзы шуыса. Армиын ке озьы луысал!


1987-тӥ ар. Мынам ӟеч мылкыды, ӟеч тазалыке, ӟеч мынэ службае. Но Генеральной штаблэн аслаз адӟонъёсыз. Монэ ысто Анголае отысь Обороная министрлэн советникез луыса. Мон понна сайкыт инбам шори пилиськиз кадь. Но пумитъяськыны уг луы – приказ. Остэ, кыӵе ке но Африка! Мар шуоз кышно? Котьку сямен ик – номыр уз. Кыштыр дасялоз чемоданъёсты.

Львовысь квартирамес ӧм вузалэ. Анголае кошким нылъёсмытэк, соослэн вал ни асьсэлэн семьяоссы. Анголаысь Президентэн, СССР-ысь посолэн но мукет бадӟым адямиосын пумиськылэм бере, мон аслэсьтым ужъёсме быдэсъяны ӧдъяй. Арня ӵоже вань фронтъёсы вуылӥ. Тужгес но йыре кылиз Лымшор фронтэ вуылэме. Таиз тужгес кышкытэз инты вал – дыры-дырын омырскылӥз ЮАР. Нош улӥзы асьмелэнъёс землянкаосын. Отын ик сиськылӥзы, шутэтскылӥзы. Ӝож. Кык ар землянкаын 800 доллар понна улыны чидалоз асьме офицер гинэ. Дун-а со, уйёссэ кӧлатэк потэм понна? Вал сыӵе учыръёс, куке УНИТА-ысь партизанъёс асьме советникъёсты, специалистъёсты пленэ кутылӥзы, виылӥзы. Нош одӥг пол землянказы дорын ик мина вылын пуштэм слон. Куинь нунал ортчыса, солэн лысьӧмыз гинэ кылем на – левъёс но шакалъёс слон шӧез чылк-чылк качаллям. Анголаын ужатозям дасо мында бадӟым операция ортчытэмын вал. Отын улыкум пумиськыны кылдӥз Удмуртиысь суредасен Пётр Ёлкинэн. Мар пумиськон вал со! Куинь но ӝыны ар Россилэсь палэнын ул, нош татын - воксё удмурт адями! Тужгес но шумпотӥз кышное – аслаз ӵыжы-выжыез котыртӥ кадь бергаз. Малы, пе, со кулэ. Мон ачим но уг тодӥськы, мар луоз ӵуказе, шуиз соку Язов.

Воштӥзы монэ куинь но ӝыны ар улыса. Со вал валантэм выльдӥськон вакытэ. Приёмысен Обороная министр маршал Д. Язов ӵектӥз мыным шутэтскыны кошкыны. Тау, пе, тырмоз служить карыны. Мынам, валамон, служить кареме туж потэ на вал. Москваын квартира мыным ӧз сётэ. Берытским Львове.

Нош ар ортчыса куашка Союз. Язов путч бере сюре пытсэт сьӧры, Ахромеев ошиське аслаз кабинетаз, Беликов генералэз инфаркт шукке… Мыным 72 арес ни. Нош мон али ке но мӧзмисько армилэсь. Пинал эшъёсылы вераме потэ: эн кышкалэ армилэсь. Пиосмуртэз рос-прос кыдатоз со гинэ. Мон оскисько, асьме армия йӧнзэ одно шедьтоз.


Мӧзмон

Мыным 72 арес. Но мон мӧзмылӥсько на Умедьгуртэлэсь. Отысь вуэм гожтэтэз олокӧня пол кутскыса лыдӟисько. Сӥзьыл пал, оло, бертылэме луоз ай. Али гожъясько книгаелэсь кыкетӥ люкетсэ – таяз ини паськытгес усьтӥськоз армилэн катанчиез. Нырысетӥ книгаям мон улэме-вылэмме, служить каремме огшоры гинэ ке верай, таяз лэсьтӥсько анализ, йылпумъянъёс.

Улӥсько Львовын ик. Мыло-кыдо пыриськисько Генералъёслэн клубзылэн ужаз (таӵеез быдэс СНГ-ын одӥг гинэ). Вӧзам котьку сямен ик – яратоно кузпалэ. Гужем дырмы сад-бакчаын ортче. Бен, бен - кыӵе ке генерал дачаын ӧвӧл. Али отын коркамы но ӧвӧл ай, огшоры вагон сылэ. Тросэз уг оско. Но Украинаын югдур туж секыт, соин азьвыл военнойёс, Россиысь эшъёссылэсь начаргес уло. Но мон уг ӝожтӥськиськы. Косысалзы ке, али но службае потысал.

Огшоры адямиос военнойёсты уг валало, телевидениын ортчытъяськись ток-шоуослы оско. Со шонер ӧвӧл. Дан утчась журналистлэн копаса поттэм одӥг учырез сапта быдэс армиез. Но тӥ малпалэ ай, мар луысал, армия чик ӧй ке луысал. Пиосмес ке жаляськом, ойдолэ ыстом нылъёсмес.

Мынысал-а мон Чечняе? Ӧй ик малпаськысал – мынысал. Мон – военной, Атыкай музъеме азьын присяга сётӥ. Семьяе? Тодӥськоды-а, военнойлэн кышноез ас понназ озьы ик присяга сётэ кадь. Меӵак верано ке, нылъёсмурт тодэ, кинлы быземзэ. Тӥни кытын эскерыны луэ яратонлэсь юн луэмзэ.

Мынам ӧвӧл пиосы, но эмеспие – военной. Солэн атаеныз Приморьеын ӵош служить карим. Нылпиосмы тӥни ог-огзылы синмаськиллям, ӧм но тодылэ. Татьяналэн нылыз… Нош бадӟымезлэн, Ольгалэн, нылыз Львовысь университетэз йылпумъяз ни – туала куронъёслы туж тупась профессия басьтӥз – Светланамы статист. Нылпиосмы умой уло, милемыз уг вунэто.

Жалясько-а мон ортчись улонэ пумысь? Уг, данъяськисько. Туннэ ке улон сюрес быръёно луысал, мон бырйысал тазэ ик сюресэз. Али со сюресэз ортчыны дас поллы капчигес луысал, дыр, но шӧдысал-а мон соку улонлэсь зэмос шӧмзэ? Мыным туннэ возьыт ӧвӧл асэным данъяськыны, малы ке шуоно, монэным туж данъяськиз анай!

Источник:

Гусев П. И. Ньыльдон ар – ож дӥсен / П. И. Гусев ; записала З. Рябинина // Удмурт дунне. - 2003. - 21 февр. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"