Головков Леонид Платонович

Материал из Воршуда
Перейти к: навигация, поиск

Улоно законъя но возьытлыкъя

Головков Л.П.

Леонид Платонович ГОЛОВКОВ - Удмурт Республикаысь Вылӥ судысь судья, Вылӥ судлэн президиумезлэн муртэз. 28 ар ужа суд удысын. Удмурт Республикаысь дано юрист. Россия Федерациысь судъя системаын вормонъёсыз понна медален дунъямын. Пусъемын Удмурт Республикаысь Правительстволэн Данъян грамотаеныз. - Сьӧлта районысь Тальян гуртын вордски. Гуртмы бадӟым вал, но бӧрысь, неперспективной лыдъяса, быдтӥзы. Мумы-бубые – крестьянъёс. Тятяе Платон Афанасьевич, дышетскемез ньыль класс, но котькыӵе ужын кибашлы. Гуртысь машинно-тракторной станциын дурисьын ужаз. Киыз мынӥз уробоосты, дӧдьыосты тупатъяны. Дӥсь но вуриз, гур но пуктӥз.

Нэнэмылэн дышетскемез 1 класс сяна ӧй вал, но паймытъяз визьмыныз, сак йырсазеныз. Семьяямы 6 нылпи будӥз – 3 пи но 3 ныл. Мон витетӥез вал. Но покчиос радын шуыса мумы-бубы вӧзын кема ӧй улы. 16 аресэ тырмемын ӧй вал на, комсомол путёвкая Казахстанэ кошки. Отысь строительной училищеез йылпумъяй. Армие но ветлыса вуттӥ. Собере Темиртауысь заводэ лыктӥ. Электросварщикын, газосварщикын но ужаса вуттӥ. Та удысъёсты тодэме улонын ноку ӧз люкеты.

Но палэнын улыса, вордскем палъёсы бертэм потӥз. 1975-тӥ арын вуи Ува районэ. Татын пуктӥзы райсоветлэн исполкомезлы инструкторе. Сельсоветъёсын кусып вози, пӧртэм юанъёсты сэрттон-пертчон понна бызьылӥ, интыысь депутатъёслы сессиос радъяны юрттылӥ. Но та ужын кема ӧй ӝега, исполкомлэн тӧроезлэн воштӥсез Василий Фёдорович Шушпанов шуэ: тырмоз, пе, сыӵе векчи ужын бызьылыны, калык хозяйствоез ӝутон понна, пе, тыршоно.

Соку районэ газ вуттыны чаклазы. Ӵектӥзы участокысь мастерлэсь ужзэ. Нырысь ик чагыр эстӥськон вуиз Ува посёлоке. Но посёлоке газ вуэмен, уж но йылпумъяськиз. Ӵектӥзы ёросысь ДОСААФ-ен кивалтыны. Коммунист вал бере, ӧй пумитъяськы, котькытын асме эскерыса вуттӥ. Лэсьтӥськон организациын мастерын но ужай на, ньыль районын – Ува, Сьӧлта, Сюмси но Вавож палъёсын – лэсьтӥським. Отысен ини ӧтизы партилэн Ува райкомаз инструкторе. Уж вошъян вискам дышетски институтын.

- Лэсьтӥськон удысэз бырйиллямтэды ни. Малы одно юридическое вамыштӥды?

- Милицилэн ужезлы синмаськи, вылды. Но мукетыз бадӟым малпанэ вал: калыклы юрттоно. Диплом басьтэме бере Ува районысь судын ужаны кутски. Соку судьяосты калык быръе вал, депутатъёсты сямен ик. Соин адямиослэсь осконзэс юнматыны кулэ. 1984-тӥ-1987-тӥ аръёсы судьяын ужай.


- Тодады вайыны быгатоды-а, кыӵе ужез нырысь ик эскериды?

- Егитъёслы шуг уж ӧз сётылэ, капчиосызгес вылын дышетским. Мыным люкиськись кузпалъёс шедизы. Кышноен карт сокем егитэсь ӧвӧл ни, но пиналъёссы пичиесь на. Лыктӥзы заседание. Ог-огзылэсь палэнэ пуксизы. Кышномурт люкыны куре, картэз, пе, алимент мед тыроз. Со вакытъёсы кузпалъёслы малпаськыны дыр сётылӥзы. Мон но кык толэзь тупатӥ. Вуиз пусъем нунал. Куспазы номыр воштӥськымтэ. Кышноез озьы ик нимаз улыны турттэ. Ваньмыз азьло сямен ик, шуэ. Кельтӥ нимаз вераськыны. Нылкышно ӝожтӥське: картэз доре бер вуэ, нылпиосты визьман-будэтон сярысь уг сюлмаськы.

Иське, татын воргоронэн чурытгес вераськоно, малпасько. Пиосмуртлы семьяеныз люкиськон чик уг кельшы. Но югдурез кудласянь небӟытыны со уг ни вала. Воргорон мынэсьтым бадӟымгес, но мон дӥсьтӥ сое визьманы.

Юасько:

- Ӝыт бертыкуд, кышноед кытын луэ?

- Кухняын, – валэктэ со.

- Вот, ужысь вуид ке, капчияк вазь солы, бамаз чупа, – верасько.

- Кызьы? Нош бамам сализ ке? – пайме таиз.


Тазьы вераськеммы бере эшшо кык толэзь дыр сётӥ на кусыпъёссэс тупатыны. Но кузпалъёс дорам азьло ик вуизы – заявленизэс берен курыса. Соос ӧз люкиське. Ма, солы пумит – эшшо нылпи вайизы. Ог ньыль ар талэсь азьло пумиськыны кылдӥз – али но, пе, ӵош улӥськом.

Али судъёсын ужъёсты нимаз учко: таиз уголовной, таиз гражданской. Азьвыл ваньзэ тодоно, аслыд нуоно вал. Но судья огзэ но ньӧмыз понна яке вылтӥз уг учкы. Котькуд уж – со адямилэн адӟонэз. Но аръёс та удысэ пырто трос воштӥськонъёс. Мон судын 28 ар ужасько ни. Эскероно ужъёс но арысь аре паймыто.

Кин малпаз, куке-соку акционеръёс луозы, соос куспазы зэмлыкез утчалозы шуыса? Яке выт тыронэн герӟаськем йыртэманъёс – али соос вылысьтыз вылаз. Наркотик вӧлмытон-вузан – таиз но йырвисён. Таӵе законэз тӥян учыръёс кылдозы шуыса, азьвыл малпаны но уг луы вал. Соин судъёсы вуись ужъёс туж пӧртэмесь, паймытъясесь. Со понна судьялы но огинтыяз лёгаськоно ӧвӧл. Бугыръяно трос законъёсты, актъёсты, кодексъёсты, постановлениосты но мукетсэ.

- Якшур-Бӧдья судлэн историяз тӥ сярысь гожтэмын ӟеч кылъёс. «1987-тӥ арын судлы тӧрое пуктӥзы Л. П. Головковез. Со кивалтон аръёсы районысь калык суд адӟем карымон луиз быдэс республикалы». Кызьы тӥ, егит мурт, быгатӥды коллективез огазеяны, ужез рос-прос радъяны?

- Мыным туж юрттӥз Казахстанын кыдаме. Отын комсомол огазеяськонлэн секретарез вал, калык контролен кивалтӥ. Со кутскон сётӥз калыкен ужаны. Котькыӵе коллективлы кулэ дисциплина. Бӧрысь со ӟечен берытскоз.

Якшур-Бӧдьяын ужакум, коллективмес кык пол пуктылӥзы республикаысь Данъян пул вылэ. Ужын басьтэм вормонъёсмы адскымонэсь вал, вань кутэм решениосмы 100 процентэз ик вошъяськытэк кыльылӥзы. Ӵошатон вылысь: али ог 20 процентэз кассационной коллегиез ортчо.

Ӟеч радъямын вал валэктон уж нуон но. Со вакытъёсы фермаосын, клубъёсын, бусыосын ортчытъямы судлэсь заседанизэ. Огшоры адями мед адӟоз, йыруж яке йыртэман понна кызьы кыл кутытыны луэ. 25 процентэз заседаниос таӵе амалъя радъяськылӥзы. Ортчылӥз зэмос процесс. Солэн соку пайдаез но вал. Законэз тӥян учыръёс ӧжытгес луизы.

Судлэн тӧроез луыны капчи ӧй вал. Трос шуг-секытъёс кылдылӥзы инты ласянь. Судлы нимаз юрт ӧз висъялэ, кыӵе ке сэреге интыяськиськод ке, ярам ни. Собере тулыс ву пыре, тупатъяно, выльдоно. Судьялэн юрттӥсьёсыз но, администраторъёсыз но соку чакламтэ вал. Судъя приставъёслэсь ужзэс но асьмеос ик быдэсъямы. Кылсярысь, кыӵе ке ужъя решение кутэмын: адямилы тыроно тамында яке берыктоно сомында, со пумысен судьялы ик йылзэ-пумзэ утчано.

Табере судъя приставъёслэн кылдытэмын нимысьтыз службазы. Но судьяослы но мукет куронъёс ватсаськизы. Россиын азьланьтӥське судъя реформа. Чакламын выль сямен уждун тырон, службаын чин басьтон.

- Судьяослэсь доходзыя декларация куро-а? Сое шара вераны лэзё-а?

- Арлы быдэ 30-тӥ апрелёзь аслад но семьяедлэн доходзыя декларация гожтӥськомы. Ваньмыз та али кыре поттэмын. Собере судлэн ужез мукет ласянь но шара луиз: котькуд решениез али Интернетысь шедьтыны луэ. Азьло сое ӧз вераллялэ, ӧжыт адями тодылӥз.

- Республикаысь судьяослэн квалификацияя коллегиязы берло кык ар ӵоже вуттэмын 650 пала ӝожтӥськон. Маин соос герӟаськемын? Вань-а асьме шаерамы ужзэс йӧнала быдэсъясьтэм судьяос?

- Процессын кутэм решениос уг кельшо ке, адямиос вазиськыны быгато квалификационной коллегие. Мон ачим та коллегие уг ке но пыриськы, югдурез тодӥсько. Милям удысамы кылзэс тужгес ӵем юало ужез тус-тас кыскась судьяослэсь. Адӟымтэ улсы уг кылё янгышъёс. Процесс мыныку, судья лек вазьылэ ке адямиослы, таиз но солы уг тупа. Кыӵе ке процесс толэзьысь толэзе выже ке, йырез та понна уг маялто. Кинлы ке дисциплина ласянь кыл кутон вуэ, мукетсэ уж интызэ но мозмытыны косо. Озьы визьмамын вал Ижысь одӥгысьтыз районысь, Вотка городысь судьяос. Миръясь судьяос но интызэс ыштыны быгато.

Малы трос ӝожтӥськонъёс вуо? Та герӟаськемын суд система одӥг луэмен. Азьло адямилэсь ӝожтӥськонзэ эскеро вал исполкомын, райкомын, калык контрольын, профсоюзын. Отын быгатӥзы калыклэсь правооссэ утьыны. Соин троссэ юанъёсты судъёстэк пертчыны пӧрмылӥз. Али вань мугъёсын лыктэ судэ.

- Леонид Платонович, тӥ луиськоды экзамен ортчытъянъя комиссилэн муртэз но. Озьыен, асьтэос адӟиськоды-тодӥськоды, кин туннэ судьяе куриське. Мылкыд карисьёс трос-а?

- Одӥг интые 6-7 мурт но куриське. Куддыръя эшшо тросгес. Кин ке судья луон понна туж тырше, дасяське. Уго куронъёс бадӟымесь, судысь практикаез, законъёсты ӟеч тодоно. Милям ужпуммы – тужгес визьмоосыз но ӟечъёсыз пӧлысь судья бырйыны мед кылдоз.

- Кин быгатэ судья луыны?

- Экзаменэ лыкто судьялэн юрттӥсьёсыз, прокуратураын ужасьёс, адвокатъёс, нотариусъёс, предприятиосысь но организациосысь юристъёс. Судья луон понна вылӥ тодэм-валам кулэ, юридической удысын ужамзы 5 арлэсь ӧжыт медаз луы, 25 арес тырмемын медло – соку экзаменэ лэзиськом ни.

- Прокуратураен яке полициен ӵошатоно ке, суд система туннэ ӧвӧл на саптамын кыӵе ке бадӟым коррупциен герӟаськем йыртэманъёсын.

- Мон шуысал, судлэн данэз вылӥын. Нимаз луэ, дыр, шедьтыны ньӧмыз понна ужась муртъёсты. Но одӥг киын чиньыос но пӧртэмесь луо ук. Судья сюлмыныз но, визьмыныз но, малпанъёсыныз но ужлы дась луыны кулэ. Мон шумпотӥсько, таӵе ӟеч ужась система вань на шуыса. Бадӟым ӝожтӥськонъёс ӧвӧл.

- Вань-а план: кӧня ужез эскероно судьялы?

- Кӧня мурт вазиськоз судэ, сомында ик уж но луоз. Судья ваньзэ эскерыны кулэ, котькуд ужез пумозяз вуттоно.

Арысь аре тросгес луо гражданской ужъёс. Республикаямы судьяослы тросгес ужано луэ, Россиысь шоро-куспо лыдпусъёсын ӵошатыса. Кылсярысь, туэ Удмуртиысь миръясь судьяос эскеризы 172 сюрс ужез, федерал судьяос пыр потӥз 35 сюрс палаез. Уголовной ужъёс ваньмыз 13 сюрс палаез судэз ортчизы. Административной ужъёслэсь бадӟым люкетсэ нуо миръясь судьяос – 51 сюрсэз чакламын, 1 сюрс 602-сэ эскеризы федерал судьяос.

Вылӥ судын ужа 47 судья. Ми пыриськом уголовной но граждан коллегиосы. 2013-тӥ арысен луоз аппеляция но. Уж пумысен решение кутэмын ини ке, сое эскере кассационной инстанция. Аппеляция чаклалоз, макем ӟеч эскеро ужъёсты районысь судъёсын. Малы ке шуоно Вылӥ судэ вуисьёсыз пӧлысь 20 процентсэ берыктӥськом. Нош аппеляционной инстанция ужез уз берыкты, выльысь ачиз эскероз, кулэ луиз ке, свидетельёсты но ӧтьыса.

Судьялы бадӟымез курон – уж дыраз эскеремын мед луоз. Со понна трос радъяськыло дышетсконъёс: районысь судьяос Вылӥ судын стражировка ортчо, Вылӥ судын ужасьёс тодон-валан люкало Россиысь Вылӥ судын, Судьяослэн академиязы.

- Ужен герӟаськем кышкатонъёс улонады вал-а?

- Мон соосты сюлмам ӧй басья. Меӵак кышкатонъёс ӧй но вал, дыр. Тани адямилы ӧз кельшы мынам кутэм решение, валатэк-а, юромо-а со сӥзе: тыныд но сыӵе ик адӟон вуоз ай.

- Собере уж дуре пыдын ветлыны дӥсьтӥськоды-а? Кыӵе ке амалъёсын утемын-а судьяос?

- Кинлэн мылкыдыз вань, соос пистолет куто. Но тросэз судьяос мукет адямиос сямен ик номырин утемын ӧвӧл. Пистолет курон пумысен ноку ӧй малпаськылы. Со астэ утён арбери ӧвӧл. Адӟонэд луиз ке, нокыӵе пистолет уз утьы. Мон транспортэ но пуксисько, пыдын но вамышъясько.

- Нош бускельёсты тодо-а судьяен артэ улэмзэс?

- Одӥг площадкаын улӥсь бускельёсы тодо кин луэмме. Мукетъёсыз уг но тодо кытын ужамме. Мон шара вераса уг ветлӥськы.

- Семьяды сярысь тодэм потэ на…

- Кышное Александра Васильевна. Сое мон Казахстанысь вайи. Али ужа финансовой директор луыса. Кык пиосмес будэтӥм.

Бадӟымез – Вячеслав - миръясь судьяын ужаны ӧдъяз вал. Первомай ёросын тыршиз. Собере Октябрь ёросысь судэ выжиз. Отӥяз Удмуртиын ӝутскыны луонлыкез ӧй вал ни. Уго мон – атаез, Вылӥ судын ужасько, президиумлэн муртэз луисько. Милям удысамы лыдъяло: судьяос семьяен ужаны кулэ ӧвӧл. Тани военнойёс но, эмъясьёс но, полициын ужасьёс но ушъясько династиосынызы. Судын та шоры мукет сямен учко. Оло, ӵапак егит мурт, мӧйыез шоры учкыса, тыршысал, чакласькыса ужасал. Но одӥг улосын артэ тыршыны уг яра.

Озьы Вячеслав семьяеныз улыны но ужаны кошкиз Коми Республикае. Отысь Сосногорск городысь судын тыршиз. Кылем арын сое Комиысь Вылӥ судэ басьтӥзы. Табере ми соин одӥг тубатын сылӥськом.

Покчиез – Виталий – Ижысь Устинов ёросын судьяын тыршиз. Собере таизлы но Вячеславлы кадь ик йырвисён кылдӥз. Озьы Виталий Киров улосэ кошкиз. Отысь Фалёнки районысь судлэн тӧроез вал, али Зуевка городысь судэ тӧрое басьтӥзы. Но югдур тазьы берытскемлы мон шумпотӥсько: асьсэос ужаны быгато, атайзы юрттӥз шуыса, пыкылӥсьёс уз луэ.

- Иське, пиостылы улонэ сюрес асьтэос ик возьматӥды?

- Мынэсьтым ужме соос адӟыса будӥзы, огзэсты но ӧй индылы. Нырысь мукет уж бырйизы вал. Вячеслав йылпумъяз Сарапулысь радиоэлектронной техникумез. Быдтӥз, собере юристэ дышетскыны пыриз. Берлогес наукаосъя кандидат но луиз.

Виталий нырысь дышетскиз Ижысь вуз каронъя техникумын, берло мынӥз на университетэ – юридическое. Тазэ горд дипломен йылпумъяз, тодон-валан люказ аспирантураын. Табере диссертацизэ утён пумысен но малпаське ни. Озьы улон соосты ачиз мынам удысам вуттӥз.

Удалтӥз внукъёсын. Бадӟымезлэн пиелэн куинь пиналэз, покчиезлэн – кык. Пиосы егитэсь ай. Но бадӟым семьялэсь но нылпиослэсь уг кышкало, таиз туж шумпоттэ.

- Кызьы малпаськоды, тӥледыз Вылӥ судэ басьтыкузы, чаклазы-а удмурт выжыдэс?

- Соку нырысь ик учкизы, луоз, адямилэсь ужамзэ. Судын уг чаклало кыӵе выжыысь луэмез, ужаны быгатэмез шоры учко. Возьматы астэ усто юрист сямен, судья сямен, соку ик азяд инвисъёс усьтӥськозы.

- Нош удмурт кыл суд удысын кулэ-а? Кылсярысь, 30-тӥ аръёсы областной судлэн тӧроез А. П. Иванов докладзэ но удмурт кылын лыдӟем вылэм. Со аръёсы ик удмурт кылэ берыктэмын вал уголовной, гражданской но музъем кодексъёс. Суд нуон радлыкез но удмурт кылэ берыктыны косэмын вылэм.

- Районын ужакум, удмурт кыллэн кулэлыкез шӧдӥськиз. Собере мӧйы калык мылкыдзэ ӟуч сямен тыро-пыдо вераны но ӧз быгатылы. Али югдур мукет. Судъя системаын туж трос нимкылъёс (терминъёс), соосты берыктыса, адямиослэсь йырзэс гинэ сураломы-пожаломы, дыр.

- Присяжнойёслэн судзы шоры кызьы учкиськоды?

- Огпорма гинэ мылкыд уг кылды. Огласянь, соослэн юридической тодон-валанзы но уг луы, но оскемын кыӵе ке секыт йыружез сэрттыны. Мукет ласянь, присяжнойёс йырынызы гинэ решение уг куто, татчы суралтӥсько на пӧртэм мылкыдъёссы. Удмуртиын таӵе судъёс туж шер луыло – куд-ог уголовной ужъёсты гинэ присяжнойёс эскерыны быгато. Зэмос судья аслэсьтыз мылкыдъёссэ кысыны кулэ, йыртэмасьлы кыл кутон сётэ, закон вылэ пыкиськыса. Мон улытозям одӥг малпанэз йырам возисько: судъяно возьытлыкъя (совестья) но законъя.

- Черке пыраськоды-а?

- Ӵемысь – бадӟым праздникъёсы но, анай-атайёсты, кулэмъёсты буре ваён нуналъёсы но. Зэм, ас вакытаз мон коммунист вал. Но оскон мыным пичи дыръям ик пыӵатӥзы мумы-бубые, соку ик пылатӥллям но. Озьы ке но шара оскон сярысь егит дыръям вераны но, малпаны но уг луы вал. Озьы ке но сюлмам котьку Инмарен улӥ.

- Леонид Платонович, тӥляд синмаськымон карьерады. Пиосты будэтэмын, писпуос мерттэмын, лэсьтӥськисьын ужакуды, коркаос но пуктыса, вуэмын. Кыӵе малпанъёстэс быдэстэмды потэ на?

- Дуннеез адӟеме. Тодэме потэ пӧртэм калыкъёслэсь культуразэс, улон-вылонзэс. Огвакытэ мылкыд ӵемгес кыскиз зарезь дуре. Озьы вуылӥ Прибалтикае, Турцие, Испание, Египетэ, Францие, Монакое. Нош табере уйпалэз но адӟыны тунсыко. Тани отпуске дыръя вуылӥ Коми шаере, пие доры. Пайми, макем эркын отын интыос, сюлэм ик шумпотэ. Табере дуннеез котыръям уката потэ.


Источник:

Головков Л. П. Улоно законъя но возьытлыкъя / Л. П. Головков ; записала А. Ионина // Удмурт дунне. - 2011. - 22 авг. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"