Гоголев Валерий Петрович

Материал из Воршуда
Перейти к навигацииПерейти к поиску

Крезьгурен шокась[править]

Алнаш районысь Асан техникум гурт доры вуиськод ке, шулдыр крезьгур кылӥське. Пӧртэм гуръёсты чеберъяса, усто крезьчи гинэ озьы шудыны быгатоз. Угось «Юность» культура центр гуртэ пырон сюрес дурын ик. Вӧзтӥз ортчыку, кожытэк уд чида. Пыри но - абдрай! Юртлэн вылтусыз сокем синмаськымон ӧвӧл ке но, пушкыз мальдытэ. Кыказ борддорын туж ӝикытэсь яркыт буёло фотостендъёс тыремын. Отысь адӟисько коллективъёслэн пӧртэм пумо ужрадъёссы. Котькуд стенд вылын карта суредамын, артистъёслэн вуылэм интыоссы пусйылэмын.

Туспуктэмъёс шоры учкыса ик валамон: татын самодеятельность туж вылӥын. Ма, ӟеч шутэтскон сэрегтэк, дискотекаостэк, концертъёстэк кызьы улозы гуртоос? Туала вакытэ мӧйыос гинэ ӧвӧл, егитъёс но, пиналъёс но кыстӥсько ини концертъёс учкыны. Тае ӟеч вала татысь хормейстер но аккомпаниатор Валерий Гоголев. Али дыре Валерий Петровичлэн таӵе аслаз кылдытэм коллективъёсыз вань: калык хор, ветеранъёслэн «Сударушка» но «Капчи мылкыд», нылкышноослэн «Купанча» ансамбльзы, пинал нылъёслэн но пиослэн ансамбльёссы. Со озьы ик арганэн шудонъя но оген кырӟанъя кружокъёсты нуэ.

Карасин лампа вӧзын

Кыдёкысь витьтонэтӥ аръёс. Пётр Степанович Гоголев Можгаысь педучилище бере Лялиысь покчи школаен кивалтэ но, дышетэ но отын. Соку тросэз дышетӥсьёс аспӧртэм кочевник шуонъёс кадесь вал. 1959-тӥ арын Гоголевъёслэн семьязы Актэмыр гуртэ выже. Татын но Пётр Степанович школа кузё луэ. Радъя нылпиосты пӧсь сиёнэн сюдонэз. Соку Актэмырын тыл ӧй вал на. Улӥзы карасин лампаен. Валерий тодаз вае:

- Ми доры ӵем вуылӥз гурт калык, кин кенешыны, кин гожтэт гожтытыны. Атае котьку юрттылӥз. Газетъёсысь но журналъёсысь тунсыкоесь иворъёсты шара лыдӟылӥз. Ми уно кузя кылзылӥм, радио но телевизор ӧй вал на бере.

Актэмырын куинь ар улӥм. 1960-тӥ арын куать аресысен нырысетӥ классэ мынӥ. Соку вань букваосты тодӥсько вал ини, ма но со гожъяны быгатылӥ. Атае но песятае Вылӥ Асангуртын вордскемын. Кык ар ортчыса, отчы кошкимы. Туж секытэн выль корка пуктоно луиз. Атаелэн бур киыз ӧй вал уга. Дас ньыль арескысен суйзэ кутсаськон машина ишкалтэм. Анае Феодосья Александровна Можга районысь Комак гуртысь. Тазалыкез лябӟемын вал ини. Тямыс аресын сирота кыльыса, куинетӥ классын дыръяз школаез куштэ но дас кык аресысен плуг сьӧрын ужа. Собере нюлэс дасянын, вал сюдонын, пӧрасьын, рядовойын - пенсие потытозяз. Со туж усто вуриське вал, ческыт пӧра, вакытаз милемыз сюдэ. Йырвизезлы паймылӥ.

Нырысетӥ арган

Пичи дыръяз ай Валера ас понназ пӧртэм гуръёсты мытылӥз. Арганчиосты кылзыса, лулпушкыз вожъяськонэн тырмылӥз: озьы шуд вылэм, но арган ӧвӧл. Миша агаез но сое шӧдылӥз. Магазинысь арганэз весь син шораз возиз. Аслаз но дышетскемез потэ ук. Колхозын Миша нырысетӥ уждунзэ басьтӥз но соку ик лавкае бызиз. Кыӵе лӧптӥз Валера! Шумпотэмзэ кызьы возьматыны ик уг тоды. Эсьмаса, мунчое но уг мыны. Ӝытбыт «Подмосковные вечера» но «Яблочко» гуръёсты бичаны йӧндыриз.

- Сизьыметӥ классысен школаын но клубысь сцена вылын шудылӥ ни, - шуэ со. - Агай-вынъёсы арганэз кысказы-маразы но, сюлэмзы со борды ӧз лякиськы кадь.


Мугор пичи, нота валантэм.

Тямыс классэз пияш «витьёсын» гинэ йылпумъяз.

Крезьгуръя школаын дышетскон сярысь малпанзэ быдэстон йырысьтыз уг кошкы. Анай-атаезлэн Можга педучилищее лэземзы потэ вал. Музыкая училищее нотаосты тодӥсьтэмзэ уг басьто. Валера соку шуак тодэ: Ижысь культпросветучилищеын оркестръя люкет пе, вань. Нокыӵе клубын ужан сярысь малпаськытэк, баянэн тодматскон понна отчы пыре.

Дышетскон пияшлы капчиен сётске. Баянэз кысканы валэктэ тодмо композитор Геннадий Шаклеин.

Куинь ар ортчыса, сое Асангуртаз лэзё. Куать толэзь ӵоже практикаез ортчоно луэ. Ужамезлы «5» пукто. Дипломен специалистлы ас клубазы ик чеберлыкъя кивалтӥсьлэсь удыссэ оско. Со сяна, школаын кырӟанъя но суреданъя урокъёс нуэ. Нялтас вераса, клублэн кивалтӥсез Михаил Кузьмич но усто суредась. Нош кырӟась коллективъёссы ӧвӧл.

Валералы пичи дырысеныз ни кельшо хор, кырӟан, классика, улэп крезьгур. Син азяз пуктэ ассэ арганэн, мышказ – бадӟым-бадӟым хор. Егит мылкыд - задор мылкыд. Коркаысь коркае ветлыса, крезьчи люка егитъёсты. Вуж баян вӧзы выльзэ басьтэ.

Асангуртысь - Алнаше

1971-тӥ арын хор концертэн поталля ини котыр гуртъёсы. Клубъёсы пачылак ик калык люкаськылӥз. Валерий Петрович вера:

- Нырысетӥ араз ик районысь смотрын коллективмылы нырысетӥ инты сётӥзы. Шумпотон вал. Райисполкомысь культурая отделлэн кивалтӥсез, усто кырӟась Людмила Посадова приказ гожтэ: Гоголевез, пе, юнматоно Алнаш культура юртысь калык хорлы концертмейстере. Ӧй мыны, жаляй аслэсьтым артистъёсме. Соослы дӥськут но ачим вурытӥ вал ук. Собере гуртысь культураез ӝутоно. Ӝыны ар ортчыса, монэ эшшо золгес пачкатӥзы. Ӝыны уждунлы гинэ соглаш луи. Озьы арнялы кык пол Асангуртысен Алнаше велосипедэн ветлылӥ. Ай сюресэд ке асфальт луысал.

1973-тӥ арын Алнаш калык хорлы шуд усе Россиысь самодеятельностья смотре пыриськыны. Пермь городын интыяло тужгес умоесь гостиницаосы, сюдо ресторанын. Арня ӵоже коллектив устоосаз культура дворецъёсын концертъёс возьматэ. Ӵошатскон йылпумъяськиз операя театрын. Алнаш хор лауреат ним утӥз. Сыӵе вормон 1970-тӥ аръёсы умой инъет луиз культураез азинтонын.

Ньыль пӧртэм куара

Али гинэ йӧн-йӧн ужаны кутскись воргоронэз шуак армие басьто. Германиын службаез бере Гоголев вуэ Асангуртаз ик.

Табере ини со культурая юртлэн директорез но, хормейстер но, аккомпониатор но. Крезьчи тодаз вае:

- Алнаш хорлы туж синмаськи. Соин, армиысь вуыса, азям ужпум пуктӥ: Асангуртын но сыӵе ик ӟеч-ӟеч коллектив люкано, трос куараен хор кылдытоно. Ӵапак 1975-тӥ арын «Удмуртия» издательствоын потӥз «Удмуртские песни» антология. Со туж бадӟым юрттэт луиз коллективез дышетыны. Отысь ваньзэ сямен кырӟанъёсты асэстӥм. Вакчи дыр куспын пӧрмытӥм ньыль куараен хор.

1979-тӥ арын уно ужрадъёс, бадӟым концертъёс ортчытъямзы, республикаын вылӥ интыос басьямзы понна коллективлы калык хор ним сёто. Ар ортчыса, отысь дас мурт мынэ Болгарие, калыккуспо фестивале. Кунгож сьӧрысь алнашъёс берто лауреатлэн медаленыз, дипломен но грамотаен.


Калык пӧлын

Ас вакытаз Валерийлэн атаез Пётр Степанович Гоголев «Молодая гвардия» колхозын парторганизациен кивалтӥз. Культура удысэз компартия котьку аслаз юрттӥсеныз лыдъялляз бере, пизэ но политикае кыскыны ӧдъяз. Сое бырйизы комсомоллэн Алнаш райкомаз. Отӥяз - КПСС-лэн обкомезлы членэ. Кема аръёс вал партийной организацилэн секретарезлэн воштӥсез, Асан сельсоветлэн депутатэз, «Молодая гвардия» колхозысь калык контролья группалэн тӧроез. Быдэс улытозяз суредалляз, лэсьтылӥз агитматериалъёс. Чеберъяз клублэсь пушсэ, фермаосысь шутэтсконъя серегъёсты, гожъялляз лозунгъёс, кылдытъяз фотостендъёс, школаосын но музон интыосын фотоальбомъёс. Ӵемысь та ужен уйёсы выриз.


Учыръёс

Бусы ужъёс вакытэ, вазь ӵукна ик вить час котырын, клублэн кузёез дыртэ колхоз амбаре, комбайнеръёслэн толло ужамзылэсь лыдпусъёссэ басьтыны. Собере дася «молниос», ӵошатсконъёсъя листовкаос. Нуназеозь агитбригадаез дасяське бусые, нянь будэтӥсьёс доры.

Огпол куазь шаян кемдӥз. Сыӵе зоро вакытэ автобуссы сӧриськиз, но амал шедьтӥзы - кузовен машина вуттӥзы. Комбайнеръёс доры вуытозь, крезьчи но, артистъёс но тяп-тяп котмизы. Нюлэс кушын, ужасьёс сиськыку, нокыӵе кариськытэк, мыняса но кырӟаса, артистъёс ваньмызлэсь мылкыдзэс ӝутӥзы. Бертыса фермаысь горд сереге но вутскизы. Кивалтӥсьлы ӝытазе клубын хорен ужано на.

- Лыдъяно ке, ар куспын витьтон пала концерт сётъямы, - азьланьтэ веранзэ крезьчи. - Серемес учыръёс но вал. Кизекгуртын хор кырӟа, мон азязы баянэн шудӥсько. Пыдме кин ке маялля, биче потыны кутскиз, серемме нокызьы воземе уг луы ни. Баян сьӧртӥ нокинзэ уг адӟиськы. Бератаз мырдэм мыкырски. Куинь аресъем пияш чилясь катаосылы синмаськем но маялля вылэм. Мукет дыръя Ӟуння гуртын спектакль возьматӥськом. Кышномурт сизьдэ картсэ: коркаед но погра ини! Ӵапак соку декорацимы усьыны кутскиз, быжтӥз кутыса вуим ик.

Улон азинскемъя культура удысын пӧртэм амалъёс утчано луэ. Егитъёслэн куронъёссы пумен воштӥсько. Тае шӧдыса, Валерий Петрович тодон-валанзэ йылэтэ Пермьысь культурая институтлэн оркестрен шудонъя люкетаз.


Выль вамыш

Ужа но ужа вылэм гурт клубын. 1990-тӥ арын Валерий Петровичез вожмаськыса ӧтё Можга педучилищее но Асан техникумысь культурая юртэ крезьчие.

- Городэ мынэме ӧз поты. Техникум матынгес, татын крезьгуръя школа но вань. Крезьгуръя школаын луэ на баянэн, арганэн, балалайкаен дышетыны. Селоын крезьчиез пумитало шуныт. Соку ик «Юность» культура юртэ кивалтӥсе юнмато. Нырысетӥ араз районысь смотрын хор но татысь мукет коллективъёс нырысетӥ инты басьто, хор ассэ усто возьматэ Ижын но Татариысь Менделеевск городъёсын. Ӝоген хорлы калык ним сёто. Нош шутэтскыны вуттэ меда кивалтӥсь? Маде:

- Шутэтскисько ужын ик. Зэмзэ ке верано, сюрес выл адями мон. Вуылӥ ни Эстоние, Латвие, Сочие, Украинае, Читае, Волгоградэ. Туэ семьяеным Урал гурезе тубамы.


Лымы тӧдьы - Франциын

Усто арганчилы маза ӧвӧл. Удмуртилэн нимыныз сое ыстыло Москва но Тула городъёсы празднике, ӵошатсконэ. 2004-тӥ арын июне «Играй, гармонь» тямысэтӥ фестивале Иваново городэ ветлэ но отын куинетӥ степенё диплом утэ. Бертыса гинэ вуттэ, Асангуртысь «Тугоко» ансамбльлэн кивалтӥсез Нина Михайловна Миронова калыккуспо «Балтика–2004» фольклор фестивале нуэ, отчы дас странаысь коллективъёс пырисько. 2006-тӥ арын Ижысь «Эктон корка» студилэн кивалтӥсез Андрей Николаевич Прокопьев ӧте усто крезьчиез Францие, Страсбург городэ, финн-угор культуралы сӥзем «Тылобурдоослэн сюрессы» фестивале.

Ансамбльёслэн кивалтӥсьёссы ӟеч тодо уго, удмурт калык кырӟанъёсты но эктонъёсты Валерий Гоголёв тужгес усто шудыны быгатэ шуыса. Гуртысь культурая центрысь крезьчи мылкыд карисьёсты арганэн, баянэн шудыны дышетэ. Вань-а меда сьӧраз мынэм егитъёс?

Со тазьы валэктэ:

- Соосты крезьчи луон вылысь юри ӧй дасялля. Котькуд адями аслаз визьмызъя, быгатонлыкезъя профессия быръе. Мон сямен, клубын ужасьёслы нырысь ик будӥсь егитъёслэсь, калыклэсь шутэтскон дырзэс пайдаё радъяны быгатыны кулэ. Творчество, крезьгур пыр культураез валаны, ужез яратыны дышетоно. Асьсэлэсь быгатонлыкъёссэс адӟыса, ог-огзылы адӟымон луыса, соослэн асваланзы будэ. Соку ини шонер удыс но бырйыны луэ.

Валерий Гоголевлэн пумтэм-йылтэм веранэз:

- Гуртъёсы ӵемысь концертъёсын потаны луэ вал. Али транспорт туж дуно усе. Соин спонсоръёсты утчаськом, тыршиськомы данак конкурсъёсы пыриськыны. Туж кулэ инструментъёс. Егит специалистъёслы коньдон ӧжыт тыро бере, соос но уггес тырмо. Учкелэ ай, национальной проектъёс малпазы, нош культура отчы пыртэмын ӧвӧл на.

Куамын вить ар ӵоже культура удысын ужаса, котькыӵе вакытъёсыз адӟем адями шонер вера.

Сыӵе со – Алнаш ёросысь дано мурт, Россиысь калыкез дышетонысь отличник, Удмурт Республикаысь культура удысысь дано ужась, Удмурт АССР-ысь 1978-тӥ ар понна клубысь устоез ужась, республикаын но улосъёс куспын «Играй, гармонь» конкурсъёсы пыриськылыса, трос пол лауреат луэм мурт, Франциын концерт возьматонын дано луэм адями.


Источник:

Гоголев В. П. Крезьгурен шокась / В. П. Гоголев ; записала Ю. Кузьмина // Удмурт дунне. - 2007. - 26 окт. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"