Ворончихин Михаил Тимофеевич

Материал из Воршуда
Перейти к: навигация, поиск

Тюрагай

М. Т. Ворончихин

Михаил Тимофеевич Ворончихинэз шаерамы тодӥсьтэмъёс ӧвӧл, малпасько. Со УАССР-ысь но РСФСР-ысь дано артист. Вордӥськемын 1947-тӥ арын Глазов районысь Качкашур гуртын. Ленинградысь Н. А. Римский-Корсаков нимо консерваториез йылпумъяса, Крезьгуръя но драмая удмурт театрын, пӧртэм ансамбльёсын ужамын. 1993-тӥ арысен кырӟа «Айкайын».

Артистэз асьмеос ӟечгес тодӥськом сцена вылын кырӟамезъя-эктэмезъя. Нош кыӵе меда со улонын? Со сярысь тодон вылысь ми Михаил Тимофеевичен ужан дораз пумиськыны вераським. Ӧтиз вазь ӵукна ик.

- Михаил Тимофеевич, тӥ монэ паймытӥды. Нырысьсэ адӟисько вазь ӵукна султӥсь артистэз.

- Сыӵе мон – о-о-о. Сямыя – тюрагай, ӵукна кема кӧлэме уг луы. Азьвыл мар карыны паймисько вал, али уж шеде тани.

- Кыӵе уж? Эшъёсты ӧвӧл на кадь – кырӟам куара уг кылӥськы.

- Али вань сыӵе модной уж – менеджер. Эктэм-кырӟам сяна, мон тӥни соин но вырисько – концертмес басьтӥсь утчасько. Соин ик вазь ӵукнаысен телефон пыр районъёсы жингыръясько – 9 час бере кивалтӥсьёсты уд шедьты ни.

- Пӧрме-а?

- Номыр ӧвӧл кадь. 7-тӥ числоысен тани толэзь пумозь котькуд нунал быдэн кык концерт чакламын. Июне котьку озьы луэ: гуртоос пумиськон ӝытъёс, гырон быдтон шулдыръяськонъёс ортчытъяло. Артистъёсмылы секыт йӧтэ: шутэтскытэк районысь районэ ветлоно луэ.

Огласянь «Айкайлэсь» концертсэ ӵектыны шугез ӧвӧл кадь – театрмес котькытын ярато, но калыклэн коньдонэз ӧвӧл. Соин хозяйствоослэн кивалтӥсьёсынызы вераськиськом.

- Нуналмысь нуналэ ялан кырӟа-экты, кырӟа-экты, отысь татчы кыстаськы. Тӥ тани 34 ар ни сцена вылын – ӧз акыльты на-а? Яке, дышыса, шуг уг пот ни-а?

- Оло, уд оске, но уг акыльты. Артистлэн ужез зэм но туж секыт – со учкыны гинэ капчи кадь - ветлы, тэтча, нош зэмзэ ке… Кӧня ми кыстаськиськом шалтрам автобусъёсын: толалтэ – кезьыт, гужем – ӝокыт. Клубъёс, асьтэос тодӥськоды, кыӵеесь. Куддыр нош воксё урамын: пӧсь шунды улын, тӧл шорын концерт сётоно луэ. Сиён-юон пӧртэм, ву урод, мисьтӥськыны нокытын… Озьы ке но мон аслэсьтым ужме сюлмысьтым яратӥсько. Дышыны луэ, дыр, котьмалы, но зэмос артист котькуд нунал номерез бордын ужа, сое выльдыны, уката чебер карыны тырше. Со улэп адямиосын ужа – нош учкисез уд алда.

- Но артист но улэп ук – солэн но шутэтскемез, висемез потэ дыр…

- Потэ, но кытчы пырод? Мон тани «тюрагай» луэмысьтым туж курадӟисько: концерт бер ӝыт йылпумъяське, ай ӝыны уйзэ автобусын зуркано на. Умме но усьылыса вуттӥськод, оло, уд - султоно ни. Конечно, ваньмыз уг чида. Ачим сярысь ке, 34 ар ужатозям, кык пол больничное потаме вань. Кылем арын куалектылӥ ик - 9-тӥ мае «Металлург» дворецын Вормонлы сӥзем концертын мырдэм кырӟай. Пограло ни кожасько вал. Номерме йылпумъяме бере соку ик больницае келязы. Шырвисён кожазы вал, но тау Инмарлы, ваньмыз ортчиз.Нош пыэдэн висьылыса, ӟырдаса концерт сётъямъёслэн йылыз-пумыз ӧвӧл.

- Кызьы бен озьы ветлӥськоды – сьӧрады эмъясьты луэ-а?

- Кыӵе эмъясь? Нокинмы но милям ӧвӧл. Кулэ вылэм, конечно, медик но, дӥсь вошъясь но, йырси тупатъясь-буясь но, аппаратура пуктылӥсь но – Москваысь асьсэды кизили нимасьёс озьы ик ветло, но ваньмыз со коньдон вылэ пыкиське ук. Ми, асьме вылын шыръяса, ӟечгес номеръёс пуктыны тыршиськом, дӥсьёсмес выльдӥськом. Учке ай, «Айкайлэн» кыӵе костюмъёсыз – шаерысьтымы одӥг ансамбльлэн но сыӵе дӥсез ӧвӧл. Сое кылдытӥсь эшмы – театрысьтымы кырӟась Пётр Данилов кун премилы ӵектэмын.

- «Айкае» вуытозь, тӥ ужамын «Италмасын», «Шулдыр ӝытын», «Арганчиын». Маин герӟаськемын ужан интыостэс вошъян: маиз ке асьтэлы ӧз кельшылы-а, туж-туж кураллязы-а?

- Соиныз но, таиныз но, дыр. «Италмас» – укыр бадӟым ансамбль. Нош котькудӥз артист аслэсьтыз дунзэ тодэ, висъяськемез потэ. Собере, со вакытэ отын туж пичи уждунэз вал. Чылкак выль тулкым луыса вуиз «Шулдыр ӝыт». Удмурт эстрадаез учкисьёс яратӥзы. Уждунэ отын туж ӟеч вал. Но аръёс ортчемъя отын но маиз ке ӧз кельшы ни, выльзэ утчам потӥз.

Вуи «Арганчие». Таиз туж мылкыдыя вал. Нырысь ик – куараос. Чылкак пайми Света Ермаковалы – вот куара ке куара. Сцена вылын но туж умой возиське. Синмаськымон – Надя Уткина. Город романсэн со нырысетӥосыз пӧлын сцена вылэ потӥз. Туж аспӧртэмлыко кырӟась.

- Но та фолк-группа кема ик ӧз улы…

- Жаляса верано луэ, бен. Мугез – коньдон бордын. Спонсоръёстэк группалы улыны туж секыт. Тани «Айкай» но нырысь малпаз вал: ми – сыӵе устоесь, кызьы ум быгатэ? Но улыса-вылыса валазы: уг луы. Озьы Культурая министерство азьын йыбырттытэк ӧз луы, али ми солэн бурд улаз. Но данакезлы уксё асьмелы поттоно луэ.

- Дано ансамбльёсын тӥ быдэс дуннеез котыртэмын, дыр?

- Ой, кытчы но мон ӧй вуылы: Союзэз вератэк, Венгрие, Финляндие, Чехословакие, Швецие, Швейцарие, Италие… Венгрие ньыль пол вуылӥ, берло ветлэм но уг поты ни вал - Шарканэ мынэм кадь потылӥз.

- Пиналъёсты тӥлесьтыд сюрестэс бырйыны мылкыд ӧз каре-а?

- Туж каро вал, ачим ӧй лэзьы – мынам шӧйы вамен гинэ, шуи. Бадӟымез кылзӥськиз, нош пичиез лушкем Культурая училищее пырем. Али хореографияя факультетлэн ньылетӥ курсаз дышетске. Но, малпасько, визьмыз тырмоз ик улонзэ кыӵе ке мукет удысэн герӟаны.

- Кызьы нош тӥ, гуртысь пияш, со быдӟа городэ дышетскыны шедиды вал? Ленинград – со Иж но Глазов но ӧвӧл ук, отчы мыныны, мылкыд но быгатэм сяна, дӥсьтон но кулэ.

- Пинал дыръя шузи луоно ук ай, соин дӥсьтон но бадӟым, лэся. Ӵап школаме быдтон аре Культурая министерство Ленинградэ группа люказ. Мон пичи дырысеным концертъёсын кырӟалляй бере, дышетӥсьёсмы конкурсэ пыриськыны ӵектӥзы. 250 мурт люкаськиз. Мон соку ӧй но тодылы, кызьы, кӧнязэ быръёзы, кырӟай но тӥни. 250 пӧлысь дышетскыны мыныны 15-сэ гинэ бырйизы, пӧлазы мон но шеди. Гожтӥзы вокальной отделение. Ну тунасько ук: мар меда со? Хорын ке кырӟано – хореография луыны кулэ кадь… Тодӥ но – ваньмыз мыддорин вылэм.

- Анай-атайды шумпотӥзы, дыр?

- Ӧйтӧд, золгес куалектӥзы кадь. Со вакыт школа бере соку ик ужаны кутско ке, золгес шумпото вал уго. Нош мон – мар-о? Дышет ай сомында! Атай куаретӥз но: мынод ке, мын но, ӧйтӧд, пе, кызьы-маин улод. Анай лушкем шумпотылӥз кадь – со ачиз кырӟаны туж яратылӥз. Тау агаелы – со мыным котькуд гожтэтаз я куинь, я вить манет ыстылӥз. Ян соку колхозамы киномеханик луыса ужаз.

Коньдонлы нырысь-валысь ёрмылӥ. Но нырысетӥ курсэз йылпумъяку ик, ужаны кутски ни: я вокзалэ ӝоктӥськыны ветлылӥ, я почта нуллӥ, я эшшо маке. Нош куке кырӟаса 43 манет гонорар басьтӥ, мынэсьтым шудо мурт ик ӧй вал кадь. Зэм, сыӵе шуд шер усьылӥз. Вокалъя дышетӥсьмы палэнын кырӟаны ӧз лэзьылы: мон, пе, вырисько-турттӥсько куарадэс пуктыны, нош тӥ сое выльысь олокытын оломар кырӟаса сӧриськоды. Соин ик «Ленфильме» массовкаосын кырӟаны ми лушкем пегаллям. Куд-огзэ со понна училищеысь но уллязы. Мыным сое йылпумъяны шуд усиз.

- Мукет артистъёс пӧлысь тӥ куараеныды гинэ ӧвӧл, йӧно тусыныды но висъяськиськоды: котьку чебер, чылкыт, ӟеч дӥсяськемын. Кытысь сыӵе шӧдон, астэ возьыны быгатон – оло, Ленинград юрттӥз?

- Оло, со но юрттӥз. Гуртысь бадӟым городэ вуыса, ваньзэ синйылтыны-валаны тыршоно уго. Собере, артист гинэ ӧвӧл, котькуд адями ассэ ӝикыт возьыны, чебер луыны тыршыны кулэ. Нош куке нимо-дано артист сцена вылэ вуж, утюгамтэ штаниен потэ, мон сое воксё уг валаськы. Со, вождэс эн вае, пудо возьмась ӧвӧл ук – адямиос сое адӟон понна коньдон тыро. Сыӵе мурт учкисез гинэ ӧвӧл, ассэ но ултӥя.

Удмурт артистъёслы туж кулэ вылэм туслыксэс пуктӥсьёс (имиджмейкеръёс). Учке ай, кыӵе асьмелэн куараосмы, нош тусмы? Не дэрем, не мугор, не вырос – кин кызьы быгатэ – чылкак гуртысь клубын кадь. Ӵошатон понна учке ай Лариса Долинаез. Кин солы аслэсьтыз арессэ сётоз? Быгатэ адями учкисез гочатыны: веськрес но луэ, йырсизэ но воштэ, вакчи юбка но дӥся – молодец. Кызьы сыӵе мурт шоры учкем уз поты?

- Михаил Тимофеевич, кизилиос сярысь трос супыльтонъёс ветло. Артистъёс, пе, асьсэ сярысь кыл вӧлдо. Удмуртъёсыз сярысь озьы вераны уг луы. Малы: улонзы-а сокем мӧзмыт, калык-а сокем гажа-кышка?

- Оглом, мон отысь номыр уродзэ уг адӟиськы – супыльтонъёс - со туж бадӟым реклама. Потӥз выль кырӟась - нокин сое уг тоды. Мар кароно? Кыл вӧлдоно. Яке кырӟасез вунэтыны ӧдъяло. Калыклы астэ тодэ вайытон вылысь бадӟым тиражен газетэ выль туганэн кусыпъёсыд сярысь сипыртӥськод но, данэд нош будэ.Сыӵе амаллэсь пайдазэ мынам асьме вылын но шӧдэме вань. Со вал 1972-тӥ арын. «Италмасэн» Чехословакиын концертъёс сётӥм. Огезлы артистмылы отысь нылаш туж кельшем, шӧдске. Соиз пумитъяськем. Кунгож сьӧрысь туж «бадӟым данэн» бертӥм – ӵош ужась эшмес нылашез эриктэмамез понна пытсэт сьӧры келязы. Ӧйтӧд, кызьы сыӵе ЧП бере соку «Италмасэз» ӧз ворсалэ. Но, паймоно кадь – ӵап со учыр бере концертъёсы калык вожмаськыса лыктыны ӧдъяз – отчыозь ӝыныё заллы концерт возьматӥськом вал. Калыклэн адӟемез потӥз – кыӵе-сыӵе сьӧсьёс кырӟало отын?

- Куаратэк артист быроз. Кызьы утиськоды тӥ сое?

- Висьыкум уг золъяськы. Вокаллы дышетыку индыло вал, кызьы куараез жаляса кырӟано (школа пения нимаське). Профессионалъёс озьы кырӟамез соку ик валало. Чик уг сииськы курыт сиёнэз, кынмамлэсь утиськыны тыршисько.

- Тӥледыз котькытын возьмало, утялтыны тыршо.

- Бен, куддыр мултэс выро. Тужгес но лымшор удмуртъёс. Кужмысь сектаськисьёсты уг яратӥськы. Адямиос кудӟон понна пумисько шат – со чик чебер уг адӟиськы.

- Михаил Тимофеевич, тӥ тросгес кужымдэс сётӥськоды эстрадалы, фольклорлы. Малы сокем шер кырӟаськоды романсъёсты, опереттаосысь ариосты – калыклы со золгес кельше ук.

- Берлоез творческой ӝытэ дыръя но озьы шуизы. Мыным аслым но со туж кельше, но фольклор кырӟанъя театрын ужасько бере, соя кариськытэк уг луы.

- Малы нош тӥледлы огнады ужантэмез? Удмурт Кобзон луысалды.

- Кобзонлэн учкисез – быдэс Россия. Нош мынам? Удмуртъёс вень йыл быдӟа гинэ интыын уло ук – соос монэ ваньмыз быдэн дас пол адӟылэмын ни, дыр. Огпӧртэм учкемзы уз поты.

Собере коньдонтэк огнад кыдёке уд мыны – со сярысь вераським ни. Коньдон ке луысал, удмурт кырӟасьёс кемалась Россиысь телеканалъёсты басьтысалзы ни. Уксёё муртъёс тӥни мар туртто – куаратэм чипыоссэс но сцена вылэ потто. Но куке-соку со ваньмыз ышоз - калык выльысь дунъяны кутскоз зэмос искусствоез. Сцена вылэ кылёзы на туж-туж золъёсыз гинэ.

- Маке лэсьтон понна ӵем-а дан поттӥськоды асьтэлэн нимыныды?

- Уг. Мон туж огшоры адями. Уг яратӥськы вылтӥяськисьёсты. Яке монэ вылӥе пуктыны турттӥсьёсты.

Верало одӥг гинэ учырез. Пимес армие келяку, сборной пунктэ лыктӥ. Военком монэ, конечно, тодмаз. Пыра ай, пе, кабинетам. Ӵектэ вал Андреез Иже кельтыны. Татын ик, пе, штабысь канцеляриын ужалоз. Ми пумит луим. Маин ми калыклэсь пӧртэм?

Пиосы мынам юн сямоесь – ваньзэ асьсэос лэсьтыны тыршо, атайзы тодмо артист шуыса, нокинлы но уг поттыло.

- Тодмо артист пичи дыръяз шаян вал, дыр?

- Туж. Школаын мон умой дышетски. Но поведение урод вал. Олокызьы но йӧнтэмъяськылӥм. Одӥг пол химиен дышетӥсьмылэсь капка азяз сылӥсь уробозэ писпу вылэ ӝутӥм. Кытысь кужым но тырмиз? Туж кема утчаськем, собере кин ке верам ини.Мукетызлэсь капказэ зӧк кортӵоген шуккылӥм. Ӵукна, пе, усьтыны выре но уг быгаты.

- Вордӥськем гуртады бертылыны кылдылэ-а?

- Туж шер. Пиосы но тани Качкашуре курисько ай.

Анае-атае ӧвӧл ни. Кулӥз ини Ян агае но – со, пичи дыръяз курадӟыса будэменыз, ревматизмен туж курадӟиз. Собере со сюлэмаз йӧтӥз.Галя апае Глазовын улэ. Туж мӧзмиськом ог-огмылэсь. Пумиськиськом ке, часъёсын султылытэк вераськыса пукиськом, пичи дырмес, анай-атаймес тодэ ваиськом. Атай визьмо вал милям. Куинь класс гинэ дышетскем муртэ Глазовысь ревизоръёс сьӧразы нуллӥзы. Математикаез зол валалляз.

- Инмар тӥледлы зол зорем: анайдылэсь но, атайдылэсь но визьзэс-быгатэмзэс кузьмам.

- Озьы. Сямыя мон артист, визьыя – математик. Мыным кельше пӧртэм ужъёсын асме эскерыны.

- Михаил Тимофеевич, тӥляд туж дано паньтэмды вань. Тодмо-а тӥ соин? Ӧд тунсыкъяськылэ-а нимдылэн пуштросэныз?

- Мон туж данъяськисько сыӵе паньтэменым. Калашниковен мон далай тодмо – партилэн XXV съездаз ӵош ветлӥм вал. Поездэн мынон сямен кема вераським. Туж тунсыко адями вылэм – пайми. Со ӟеч тодэ культураез но, искусствоез но, литератураез но. Историез но политикаез уг вераськы ни. Монэн со туж мыло-кыдо кенешиз, творчествое сярысь юалляськиз.

Нош нимлэн пуштросэз сярысь ке - ӧй тунсыкъяськылы. Кин тодэ, китайёс нунызылы ним пононлы юнме со быдӟа саклык ӧй висъясалзы, дыр. Малпалом ни, Михаил Тимофеевичъёс тодмо адямиос луо шуыса.

- Тӥ съездэ ветлэмды пумысен поттылӥды. Озьыен, коммунист вал?

- Ӧй. Съездэз шулдыртыны гинэ ветлӥ. Коммунист, оло, луысал но, дыр, но артистъёсты со вакыт ӧз кутылэ, соос политикае пыриськыны кулэ ӧвӧл, шуылӥзы.

- Со понна али кужмысь политикае кыскыны выро. Тужгес но быръёнъёс вакыт. Со тӥледыз уг ултӥя-а?

- Тодӥськоды-а – уг. Собере, со котьку озьы вал: артистъёс но мугорзэс вузасьёс тужгес но кулэ луылӥзы государствоын воштӥськонъёс мыныку. Соос юрттылӥзы сыӵе вакытъёсты капчиенгес ортчыны.


Источник:

Ворончихин М. Т. Тюрагай / М. Т. Ворончихин ; записала З. Рябинина // Удмурт дунне. - 2002. - 14 июня. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"