Ботникова Елена Аркадьевна

Материал из Воршуда
Перейти к навигацииПерейти к поиску

Кезьыт дыръя шунтэ…сяська[править]

E. А. Ботникова

Туннэ «кизилимы» – Елена Аркадьевна Ботникова, медицина наукаосъя кандидат, Ижысь медициная кун академиысь нылпи висёнъёсъя кафедраысь ассистент. Аслаз эмъян но дышетон уженыз сяна, Елена Аркадьевна паймытъя бадӟым ужрадъёсын, конференциосын яркыт, дӥсьтыса вераськеменыз. Уг вала асьсэ выжызылэсь возьдаськисьёсты, уг яраты токма зулисьёсты. Шумпотэ, туннэ огшоры медсестраос солэсь, наукая кандидатлэсь, трос уждун басьто шуыса. Ӵуказе та чебер, тунсыко нылкышно зарни вордскем нуналзэ пусъе. Ӟечкылалэ!


Эмъюм зынэ зымон


- Елена Аркадьевна, пичи дыр туспуктэмъёстэс учкыса, амалтэк юан кылдэ: тӥ куиньмоос овӧл-а?

- О-о-о шуи ке, ваньмыз оскозы, бен-а? Чылкак озьы шуыны уг луы, но ми асьмелы зэмзэ но куиньмоос кадь потӥськом – оскоды оло уд, но милям анаймы – героиня: со кык арскын куинь нуны ваем! Висъёсмы туж пичи - кыктоос но, куиньмоос но ӧвӧл. Куспамы туж тупаса, эшъяськыса будӥм.

- Тӥ городской, шуо, но кызьы ке но удмурт луыса будӥллям. Со вакытэ удмуртъёс кужмысь ӟучъёслы адӟем карыны выризы, нылпиоссэс анай кылзылы ӧз дышетылэ.

- Атае мынам Ува ёросысь, Нылга палась, анае – Пичи Пурга ёросысь Баграш-Бигралась. Городын заводын ужакузы тодматскиллям, Бигер базаре улыны интыяськиллям. Тӥни отын ик ми ваньмы вордскемын ни. Зэмзэ вераса, ми но удмурт кылэз тодытэк будысалмы, дыр, но милемын ӵош улӥз анайлэн солэсь 26 ареслы бадӟымгес апаез. Солэн аслаз нылпиосыз ӧй вал, соин ик милемыз утиз-будэтӥз. Нылпи садэ ӧм ветлэ, соин ик удмурт кылимы. Нош шудылӥм бигер пиналъёсын, Бигер базаре ик школае ветлӥм, соин ик монэ бигеръёс алданы уз быгатэ – маке-маке валасько. Асме ноку но, нокинлэсь но лябгес, дӥсьтӥсьтэмен ӧй шӧдылы, школаын умой дышетски, комсомол ужъёсы пыриськылӥ.

- Кин визьмаз мединститутэ пырыны?

- Кенакмы. Визьмо вылэм – шӧдэм мылкыдъёсме. Али туспуктэмъёсме учкисько но – 1-тӥ классын ик мон санитар вылӥськем, бӧрысьгес но туж кельшылӥз асме эмъясен шӧдыны, ӵем ӧй висьылы ке но, больницаостӥ ветлыны, эмъюм зынэн шоканы.

Школа бере нырысетӥ араз ик институтэ пырыны ӧй быгаты – физикаме «3»-лы сётӥ. Вань мон кадь шудтэмъёсын ӵош заводэ кошки. Пуктӥзы монэ кыӵе ке станок сьӧры. Сылӥсько, ужасько, мар косо, лэсьтӥсько, но сюлэмыя чик ӧвӧл. Мастер валаз, лэся, мылкыдме – лабораторие выжыны ӵектӥз. Ай кӧня мон асме тӥясал на. Ар ӵоже институтэ пырыны рос-прос дасяськи ни, курсъёсы ветлӥ. Таяз учыре экзаменъёсме усто сётыса, студент луи.

- Мединститутын кадь секыт дышетскыны нокытын ӧвӧл, шуо.

- Мукет интыын дышетскеме ӧвӧл, но зэм, дыр. Татын мылпотэмъя гинэ улыса, номыр уд басьты. Зэм, ми вакытэ ваньмыз сюлмысь тыршизы, диплом басьтон понна гинэ ӧз выре, асьсэды зэмзэ но эмъян удыслы сӥзизы, соин ик сыӵе вераськонъёс, астэ жалянъёс ӧй вал.

- Юрттиз-а тӥледлы удмурт луэмды ординатурае пырыны?

- Аспирантурае соку 400 мурт пӧлысь 4-зэ ӵекто вал. Пӧламы – бадӟым кивалтӥсьёслэн гинэ нылпиоссы, мон огнам – пролетар семьяысь. Витьчи ӧй вал, но специализацие туж но туж кельшылӥз, вылаз ик, комсомол огазеяськонлэн секретарез, староста вал, огкылын вераса, партия мыным чебер ӵектон гожтӥз. Мон валай, мар верамды потэ, данъяськыса валэктӥсько: юрттӥз. Котьку тау каро профессорлы И. Г. Гришкинлы, мукет удмурт дышетӥсьёслы.

- Висисез нырысьсэ эскерыкуды, зол-а куалекъяды?

- Малы ке ӧй. Аслым туж оскись вал-а, мар-а. Соку милемлы, студентъёслы, быдэс участокъёсты оскылӥзы. Тодӥсько на, 1980-тӥ арын быдэс город гриппен висиз, шимес эпидемия вал. Мон Бигер базарын будэмын бере, отысь ик 3 номеро нылпи больницае юнматӥзы. Ӵукнаысен бер ӝытозь пыдын лымы коласа коркась корка ветлӥськиз, доре 9 часлэсь вазь уд вуиськы вал. Пуксиськод но султыны ӟигар уг тырмы ни, нош ӵукназэ нош ик со сюрестӥ. Али паймисько, сомында висисьёс пӧлти ветлыса, ачим чик ӧй висьы, азьло вакцинаос-мар ӧй вал ук ай. Туала студентъёсылы верасько но йырынызы шонало.

Зэм, одӥг учыре понна али но асме тышкаськисько. Ӧтизы пичи пинал доры. Шораз учкыса ик валай – вучача (ветрянка). Мон нокыче ӧй кариськы - огшоры нылпи висён, сыӵе учыръёс тачак. Нош егит анай бӧрдэ: пиналы, пе, тыл кадь ӟырдамын ук! Мон шуисько, озьы луыны кулэ. Ӵуказеяз нош ик ӧтё, температураез уг усьы. Мон нокыӵе уг кариськиськы. Бӧрысь ини учыръёсты сэрттыку-пертчыку валай, мон янгышай – пиналлы кышкыт ӧвӧл пичи температура (37 градус), нош со 39 ке, кышкыт ни: косканы быгатоз. Нош мукет учыре мырдэм утим 10 аресъем нылашез. Менингитлэсь ӧжыт ӧз кулы – котыраз оло 10 кузя бергам. Кин ке капельница лэсьтэ, кин ке сюлэмзэ эскере, кин ке пумен отӥяз мар карон сярысь книга лыдӟе...

- Эмъясьёс, пе, висисьёсты ноку уг жаляло, соос понна со – огшоры уж. Тӥ нылпи врач, но со дыре ик анай - асьтэос кык нылпи будэтӥды, ваньзэ ас вылады шӧдэмын. Малы егит анайёс сокем ӵем ӝожтӥсько нылпи врачъёс вылэ?

- Пӧламы котькыӵеез вань, дыр. Мон гажасько нылпизы сярысь сюлмаськись визьмо анайёсты. Кудӥз, зэмзэ но, нимысьтыз дышетскемез ӧвӧл ке но, нылпиезлэсь тазалыксэ сыӵе ӟеч шӧдэ-вала, врачлы диагноз но пуктыны юрттэ, эмъюмын но бырйиське. Нош кудӥз больницаостӥ ветлыны мылыз уг поты но, пиналзэ нуналмысь антибиотикен сюдэ - сыӵе анайёс кышкытэсь. Куд-огез юало, тӥ асьтэ пиналъёстэс поликлиникае нуллылэмды но ӧвӧл, дыр. Вань. Вож дыръязы озьы ик дорамы врач ветлӥз, собере ачим нуллӥ.

Мон али куд-огзэ паймыто, дыр, но будыкуз пинал … висьыны кулэ. Озьы солэн мугорыз, тазалыкез нюръяськыны дасяське, иммунитетсэ кыдатэ. Но мон уг вераськы секыт висёнъёс сярысь.

- Елена Аркадьевна, тӥ гожтӥды темаезъя туала вакытлы туж тупась диссертация. Но малы ке со туж кема кисьманы выриз…

- Мон азьын одӥг гинэ ужпум сылысал ке – кандидат луон, со, зэмзэ но, ӝоггес кисьмасал, дыр, но егит дыръям мон нырысь интые пуктӥ пиналъёсме будэтонэз. Собере институтын воштӥськонъёс луизы, кылдӥз поликлиникаын нылпиосты эскеронъя кафедра, мон отчы выжи. Соин сэрен удысэ но, кивалтӥсе но воштӥськизы (нырысь профессор И. Г. Гришкин вал, бӧрысь – доцент Е. П. Перевощикова). Озьы мон институтэз быдтэме бере, 22 ар ортчыса гинэ, кандидат луи. Но мон уг куректӥськы.

- Шуо, тӥ понна сое эшъёсты гожтӥллям…

- Бен. Оскиды-а? Конечно, ӵош ужась эшъёсы мыным туж зол юрттӥзы. Мон котьку тау карисько, ми туж тупаса, ог-огмес валаса ужам, ӵош эскеронъёс ортчытъям, но кызьы тон понна мурт гожтоз? Мыным аслам уже туж дуно, тани весь утисько ай (Елена Аркадьевна бадӟым шкафысь бумага гурезез возьматэ. Отын – эскерем нылпиослэн медицинской картаоссы. Авт.)

- Тӥ ӵошатӥды огшоры школаосын но лицейёсын-гимназиосын дышетскись нылпиослэсь тазалыксэс. Валамон ини, кыкетӥосызлэн со лябгес шуыса адӟиськиз, но котькуд анай-атайлэн аслэсьтыз пиналзэ визьмоен адӟемез потэ, сое одно ик ӟеч школае интыяны тырше. Мар кароно: яке визь, яке тазалык?

- Меӵак озьы учкыны уг яра. Котькуд учырез, пиналэз нимаз эскероно. Шуом, пиналлэн пичиысен тазалыкез ляб ни, нош сое муромытыса тодон-валан сётӥсь школае келяло – соку солы секыт луоз, тазалыкез уката лябӟоз. Яке пинал визьызъя шоро-куспо, но солэсь кужмысь вундеркинд карыны туртто… Сыӵе учыре со дышетсконзэ но адӟонтэм кароз, тазалыксэ но быдтоз. Гимназиосын дышетскись пиналъёслэн анай-атайёссы сюлмаськыны кулэ ӟеч сюдон, инкуазьын шутэтскытон сярысь. Пиналэз лумбытэн ӝӧк сьӧрын пукетон йыружлы укша. Юалляськыса тодӥм, куд-огез дышетскон вакытэ урамез адӟылэ школае мыныкуз-бертыкуз гинэ! Пинал кык час ке но омырен шоканы кулэ. Пиналлэн лулсэрез лябӟе керетӥсь семьяын будыса, анаезлэсь, атаезлэсь тэрымтэзэс со сюлэмызлы туж матэ басьтэ, куректэ.

- Калык амалъёсын, тунаськон-пелляськонъёсын уд тунсыкъяськиське-а – тусты туж тупа: огдыре туж небыт но туж кескич.

- Утчаме ӧвӧл. Дышетсконо шат? Но пелляськыны быгатӥсьёслы оскисько, зэм, соос туж ӧжыт. Тросэз огшоры пӧясько...

- Кафедрады поликлиникаын. Тазалыкез утёнлы сӥзем нацпроект тӥ борды меӵак йӧтэ. Сюлэмады уг йӧт-а, табере медсестра наукая кандидатлэсь трос коньдон басьтэ шуыса?

- Уг. Зэм. Мон малпасько, со туж шонер малпан. Уждунзэс будэтӥзы но ваньмыз вожъяськыны ӧдъязы. Нош азьвыл соослэсь ужзэс дунъяллязы шат? Малы ваньмыз участокын ужанлэсь палэнскылӥзы? Мон бен мар-о – студентъёсты гинэ дышетӥсько, коркась корка кемалась уг бызьылӥськы ни. Нош больницаен кивалтӥсьлы секыт, дыр, – со али медсестраезлэсь ичи уждун басьтэ.


Бигра дэремен Москватӥ мынко…


- Елена Аркадьевна, тӥ – удмурт движениез мытӥсьёс пӧлын вал, мыло-кыдо ужады калыкмес сайкатон понна. Со вакытэз тодамы вайытэ ай.

- Ой, со сыӵе секыт но сыӵе тунсыко вакытъёс вал. Ваньзэ уд вера, газетады уз тэры. Нош огкылын вераса, ваньмыз со удмурт движение потэмын… милям квартираысьтымы. Мынам картэ, Семён Федосеевич Ботников, ӵап со куинь воргоронъёс (удмурт клуб кылдытӥсьёс) пӧлын вал. Нырысь соос ми дорын ог-огзылы малпанъёссэс-мылкыдъёссэс кисьтылӥзы, собере ваньмыз со коркась «Ижмаш» двореце потӥз. Центрын улӥськом бере, отысь бертыкузы но ялан ми доры пыраллязы. Мон ӝӧк пуктыса, бордазы итӥськылӥ, амалтэк ачим но со ужпумъёсын тунсыкъяськыны кутски. Бӧрысь сыӵе ӧраз пыри – сотэк улэме уг лу ни вал - одӥг ужрадэз но ӧм келлялэ, асьмеос но кичӧлтӥсьёс луылӥм. 4 но 5 аресъем нылпиосмес учкыны анайме ӧтьылӥ. Ой, тодэ вайиськод ке… Тунсыко вакытъёс вылӥллям. Нош кивалтӥсьёс кыӵе куалектэмын вал! Малы удмуртъёслэн огазеяськыны карон мылкыдзэс мыдлань валазы, уг тодӥськы, милемыз националистъёс кожазы-а, мар-а.. Лыктӥз огаз пумиськонамы П. Грищенко. Тӧлпери кадь пыриз, соку ик кыманы ӧдъяз: «что вы тут напридумывали?» Мон, пе, ваньдэс интыяды пукто. Нош юан сётъямлы воксё паймиз: со дышемын ӧвӧл ук огшоры адямиослэн юанъёссылы валэктон сётъяны. Кызьы-озьы солэсь, кивалтӥсьлэсь, кылзэ юало? Но удмурт воргоронъёс пазяськытэк-маратэк югдурез валэктӥзы. Валаз кадь, ыбылӥськыны ум ӧдъяське шуыса, маке валэктӥз ик. Бӧрысь кивалтэт коньдонэн но туж юрттылӥз. Учке ай кыӵе шукрес ужрадъёс ортчытъяськом вал. Нош съездэ быдэс Россиысь удмуртъёсты люкам ук! Соосты ӧтчаса кытӥ но ӧм ветлэ, со понна командировочной коньдон тырыны быгатылӥзы. Мон, кылсярысь, Прибалтикае ветлӥ. Нялтас вераса, ӵап путч азьын. Солэсь азьвыл телевидение гожтӥзы, ӵуказеяз мыным одӥг удмурт воргорон жингыртӥз ни. Пумиським, милемды город сьӧры бакчаяз шутэтскыны ӧтиз. Рига сьӧры потӥськом но – танкъёс. Ой, куалектӥ. Но со учыр удмуртъёсты люканы ӧз люкеты, отысь кык мурт съездэ вуылӥз..

- Тӥ Москваетӥ туж шоголь ветлӥллям, шуо…

- Вал сыӵе учыр, о-о. 1991-тӥ арын вал кадь. Соку Москваын удмуртъёсты люкам, «Италмас» ансамбльмес «Останкиноын» гожтӥзы. Милемлы но Лидия Крестьяниноваен быдэс Москва пыр отчы мыноно. Удмурт дэремъёсмес сумкаын ке нуоно, погмаськоз, нош отын утюг шедез оло уз. Мар кароно? Ма, малпаськом, выламы ик дӥсяса мынӥм ке, кин ке урамын кылёз шат? Озьы ик кенешим. Мон лемлет дэремме дӥсяй ( со ай сюанын дӥсяллям маке, Бигралан вуремын), сьӧд айшет керттӥ, йырам кышет. Гостиницаысь потӥськом гинэ, вань пиосмуртъёс одолё. Метроын шорамы учко, но нокин мыскыл уг кары, ваньмыз юаллясько: кытысь тӥ? Огкылын вераса, озьы ми «кизилиос» луим. Куд-огез соку газетэ «интердыдыос» гожтӥз вал кадь.

- А малы Ижетӥ озьы уд ветлӥське?

- (Паймыса.) Ӧйтӧд. Сюанъёсы, ужрадъёсы ветлӥсько.

- Тӥ али но общественной ужлэсь уд палэнскиське, «Удмурт кенеш» огазеяськонлэн Ижысь Октябрь ёросысь ёзэзлэн правленияз, «Нылкышно кенеше» пыриськоды. Но сыӵе ӟырдыт мылкыдды уг шӧдӥськы ни…

- Вакытъёс вошъясько. Но ми ужаськом, Октябрь ёросын трос ужрадъёс ортчыло. Милям ёросамы мында нокытын первичной огазеяськонъёс но ӧвӧл.

- Но кырӟан-эктон, Гербер праздникъёсы пыриськон уж валтӥсь луыны кулэ ӧвӧл, дыр, ук? Мон, кылсярысь, тӥледыз миым ортчем конференциын туж ик ӧй вала – удмурт гимназия пумысен кылпум поттыку, трибуна сьӧрысен тӥ шуиды, «Удмурт кенеш» вырыны кулэ ӧвӧл нылпиосты дышетон ужъёсын… Мон малпамъя, со котькуд выжы калыклэн валтӥсь ужпумез луыны кулэ.

- Тӥ укыр меӵак валаллямды, но выльысь со пумысен вераськыны ӧдъям ке, ченгешытэк ум дугдэ.

Нош оглом ке, мон малпасько, нокыӵе сюлмаськонъёс, кӧтӝожъёс ӧй луысалзы, котькудӥз удмурт адями аслаз удысаз сюлмысь тыршысал, калыкез понна коть пичи ке но маке лэсьтысал ке. Бен, политикъёслэн, вылӥ кивалтӥсьёслэн юрттэмзы-валамзы кулэ, но асьмеос асьмеды ӟеч ласянь сыӵе зол возьматыны мед быгатом – удмуртъёстэк мар карыны мед паймозы.

Кин пыриське удмурт культураез азинтонэ? Творчествоен вырись интеллигенция: артистъёс, учёнойёс, писательёс, журналистъёс… Нош мукетъёсыз? Та ласянь мон ӟечен пусйысал медакадемимес. Милям трос удмурт профессоръёсмы, кандидатъёсмы, дышетӥсьёсмы, соос огез но уг палэнско ас выжызылэсь, мыло-кыдо пырисько удмуртлыкмес азинтонэн герӟаськем ужрадъёсы. Куд-огез пыкылыны но выро: тӥ отын ваньды огымысь… Вот котькытын ке озьы луысал! Ӵап со бордын ук идеялэн валтӥсь ужпумез: асьмеос ог-огмылы юрттыса, тупаса улыны мед быгатомы, соку асьмемыз нокин уз ултӥя. Тани тӥ но юады, удмурт луэме юрттӥз-а шуыса? Урод шат, удмурт удмуртэз дышетыны, ӝутыны выре ке? Калыкед понна сюлмаськыны котькыӵе удысын луэ. Кылсярысь, ми академиын бадӟым саклык висъяськом удмурт но финн-угор калыкъёслэсь тазалыксэс эскеронлы (асьмеос ке ӧм, кин?) Со понна ми шоры нокин кырыж уг учкы, оло вожъясько но ай ас выжыосмы понна сюлмаськемысь. Озьы ик котькытын луэ анай кылмес азинтыны. Мон, кылсярысь, тодӥсько ке, студентэ удмурт шуыса, соин удмурт сямен гинэ вераськисько, озьы ик висись нылпилэн анаеныз. Соос нырысь шуак луо, паймо вал, берло нош шумпотэмзэс вераны ӧдъязы. Туж леке потэ, куке ёросысь врач кыӵе ке пичи гуртысь лыктэм вашкала пересен одно ӟуч кылын вераськыны выре. Соиз куанер кыӵе курадӟе, нялтас вераса, куд-огез со муген ик врач доры но уг ветло, ас тодэмзыя йӧнатскыны выро.


Трос-а кулэ милемлы?


- Ку арлыд сярысь малпаськыны кутскиды?

- Остэ, ма мыным туж вазь ук ай. Со сярысь малпаськыны дыры ик ӧвӧл. Пинал дыръям чебер вал, о-о. Ма али но синмаськемзэс вералляло. Йырсиме ӵышки но тани воксё пинал нылъёс кадь луи. Кызь вить арес бере мон аслэсьтым арлыдме шӧдэмысь дугдӥ – весь сомында кадь потэ, мылкыды соку сямен поръя.

- Синмаськемын, дыр…

- Ӧйтӧд...

- Кузпалды мар понна синмаськиз вал?

- Уг но тодӥськы. Милемыз соин тодматӥзы, ог-огмылы дэмлазы-а шуод. Мон туж шаплы вал кадь, пиосын эшъяськылӥ, нош туганэ ӧй вал. Ма мединститутын дышетскыса, соин йырин ӧй вал. Озьы, Сеняен тодматскыкум, мыным 24 арес ни вал. Золгес мон синмаськи, дыр: чылкыт, чебер, сяська кузьма, концертэ, кафее ӧте. Инженер, вылаз ик анайлэн гуртысьтыз, Бигралась… Озьы, куинь толэзь ортчыса, ми кузпалъяським ни. Собере вылысьтыз вылаз пи но ныл вайи. Ох, йӧтӥз ни - ачим ординатураын, Семен Казаньысь финансовой институтэ дышетскыны пыриз. Утиськыны анаймы юрттӥз ни.

- Нылпиосты куддылэсь удыстэс бырйизы?

- Огмылэсь но ӧз. Марина Семёновнамы УдГУ-ын кивалтӥсьлы дышетскиз вал, но вуз каронэ кошкиз (алдай – атаезъя луэ, бен-а?) Андрей Семёновичмы заводын ужа, заочно дышетске. Внукъёсмы ӧвӧл на, бызьымтэ-басьтымтэ ай.

- Вордскем нуналдылы кыӵе кузьым возьмаськоды?

- Сяська! Дунне вылын солэсь чебер номыр ӧвӧл ни кадь. Соос мынам котькытын: дорам но, ужын но, сад-бакчаын но. Шумпотыкум но, куректыкум но сяськаосыным вераськисько. Тодӥсько ай, бызён нуналы азьын сюлэмы туж сэрекъяз (ма вань выль кенъёс, дыр, озьы). Соку мотикме заводи но кошки возь вылэ ромашка бичаны. Зорыны кутскиз, нӧдӥ, берен мырдэм вуи, но мылкыды сыӵе лобась луиз.

Нош кӧня ке ар талэсь азьло гажан муртэ мыным туж-туж-туж чебер, бадӟым, яркыт розаос кузьмаз. Туэ но озьы ик ӟечкыласал ке…

- Яратон сыӵе висьытӥсь маке…

- Мед.

- А, тӥ врач ук…

- Бен. (серекъя).

Источник:

Ботникова Е. А. Кезьыт дыръя шунтэ ... сяська / Е. А. Ботникова ; записала З. Рябинина // Удмурт дунне. - 2006. - 24 марта. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"