Боткина Зинаида Яковлевна

Материал из Воршуда
Перейти к: навигация, поиск

Сямыз излэсь но юн

Боткина З. Я.

Котькуд адямилэн улон сюресэз аслаз: одӥгезлэн со ялан вылӥе тубе, нош мукетызлэн кӧня ке гинэ ӝутскыса дугдэ. Куд-ог эшъёс асьсэлэсь вылӥе тубыны быгатымтэзэс соку ик погыльтыны тыршо шуг-секытъёс вылэ. Но адямилэн будон сюресэз быдэсак сямен потэ ук ас бордысьтыз - солэн визьмыз но дышетскемез, котькыӵе шуг-секытъёсты вормемез но, пӧртэм тырмымтэосты палэнтыса, азьлань мыло-кыдо вамышъяны котьку дась луэмез бордысь.

1982-тӥ арын УАССР-ысь Министръёслэн Советсылэн тӧроезлы юрттӥсе юнматэмын вал удмурт кышномурт Зинаида Яковлевна Боткина. Та секыт ныпъетэз со нуиз тямыс ар ӵоже. Кин тодэ на компартия кивалтон вакытэз, со умой вала, Удмурт обкомлэн нырысетӥ секретарез луыса В. К. Марисов ужаку, вылӥ кивалтэтын возиськыны капчи ӧй вал. Зинаида Яковлевна быгатӥз.

Пичи дырысеныз общественной уже выйыса улыны дышем адями пенсие потыса но уг чида дораз пукыны. Соин мон пумиськылӥ ужан интыяз - Россиысь Историяя но культурая памятникъёсты утёнъя ёзэзлэн огазеяськонлэн удмурт отделениезлэн советаз (интыяськемын УдНИИ-лэн юртаз). Татын Зинаида Яковлевна тӧро луэ, со сяна, ветеранъёслэн советсылэн но Игра землячестволэн ужазы мылысь-кыдысь пыриське на.


Яратон яке уж?

Кинлы тодмо ӧвӧл таӵе югдур? Егит адями трос аръёссэ дышетскыны быдтэ, нош семья кылдытыны дыр уг шедьты. Собере котырак учке но: ёзъёсыз семьяосын уло, котыразы кык-куинь нылпиоссы бызьыло, пумен юрттӥськыны ярало ни, нош дышетскись мурт ялан огназ на. Комсомоллэн Удмурт обкомез партилэн ёросъёсысь райкомъёсызлы кадръёсты дурись инты вал бере, отын, инструктор луыса, куинь ар ӵоже ужам Зиналы 1965-тӥ арын Сюмси пала сюрес возьмато.

Кулэ ук озьы тупаны: ӵап та вакытэ нылаш пумитаз ас яратонзэ. Ачиз но чебер, яратонэз но сыӵе ик учкымон, визьмо. Но бызьымтэ нылашез келязы партилэн райкомаз секретаре, идеологе, шуыло вал соку.

Эй, шу! Мар карод меда та удмуртлэн возьдаськон сямыныз? Ӧз, ӧз вера соку комсомолка Зинаида комсомоллэн обкомаз но, партилэн райкомаз но, Ленинградысь Олег нимо ӟуч пиен кузпалъяськыны кенешиз ни вал шуыса.

- Зар-р! бӧрдыса мынӥ мон соку Сюмсие ёросысь калык пӧлын валэктон ужен кивалтыны. Мынӥ но ужай. Куинь ар ӵоже, - тодаз вае табере Зинаида Яковлевна. Удмуртъёс шуо: кылдэмлэсь уд ортчы. Кык сюлэмъёс ог-огзэс рос-прос ярато ке - соос люконтэмесь. Та учырын нырысетӥ интые пуктэмын вал уж. Нылаш возьматӥз аслэсьтыз юн луэмзэ. Пияш валаз: таӵе юн адямиос кивалтыку гинэ, аерын ӟеч улыны луоно, соин чидаз, соин возьмаз. Семья кылдӥз, юн кыдаса.


Театр пуктыны пӧрмытӥд ке...

Тазьы-а шуиз вал меда ас дыраз Марисов, яке мукет сямен-а, ужпум со бордын ӧвӧл, дыр. Но Ижевскысь шор площадьысь Музыкая театрез пуктонэн валче, Зинаида Яковлевна куинь ар ӵоже бызьылоно луиз.

- Тазьы вал со, - тодаз вае Боткина. - Мон партилэн Ижевскысь Индустриальной ёросысьтыз райкомаз секретарьын ужасько вал. Малпамтэ шорысь идеологысь лэсьтӥськон-тупатъян уже выжтон сярысь вераськыны кутскизы. Ыстоме, пе, Москвае партилэн ЦК-яз кенешыны. Но соку кулӥз Брежнев. Келязы ни бергес. Ижевске берытски но, ваньмыз монэ ӟечкылало, кельшиськем, пе. Соку ик юнматӥзы Удмурт АССР-ысь Министръёслэн Кенешсылэн тӧроезлы воштӥсе. Мынам валтӥсь удысэ, уже социальной ужпумъёсты син азьын возён вал ке но, нырысь ик сётӥзы театр лэсьтонэз.

Та ужен Зинаида Яковлевна уно пол ворттылоно луиз Москвае. Ӧй на вал проектно-сметной документация гинэ но. Россиысь Госплан, Госстрой но мукетъёсыз, лэсьтӥськонэз дунтэмгес но ӟечгес быдэстыны тыршон, та ласянь Совминлэн тӧроеныз Ю. П. Кудяшевен но тӧролэн лэсьтӥськонъя юрттӥсеныз В. М. Кочетовен но мукет кивалтӥсьёсын уно пол кенешонъёс - трос кужымез кулэ кариз театр пуктон.

Кин турттэ, со утча но шедьтэ. Музыкая театр умой пӧрмиз, со усьтӥськиз 1985-тӥ арын. З.Я. Боткиналэн аслыз осконэз юнмаз. Тани табере 17 ар ӵоже ни театр шумпотон вае отчы ветлӥсьёслы. Нош Зинаида Яковлевна, со вӧзтӥ ортчыку, одно ик тодаз вае Москвае ветлэмзэ но мукет сюлмаськонъёссэ.

- Лэсьтӥськон ужъёсты пӧлысь мар ӝогак син азяды пуксе на?

- Граховоын пуктӥмы выль культура юрт но нылпи сад. Ой, мамында ветлоно луиз мыным отчы со понна? Пӧртэм ужпумъёсты сэрттоно-пертчоно луылӥз. Кез ёросысь Кулига селоын ӝутӥмы выль школа но культура юрт. Мыным котьку шуылӥзы: ёросъёсы потакуд, номыре но синйылтытэк эн кельты. Мон тодыны вутскылӥ, шуом, кызьы ужа ёросын быдэ вуымтэослэн комиссизы яке кызьы тыршо бытовикъёс, дышетисьёс, калыкез эмъясьёс. Нош выль нунал вордске ке, нош ик выль лэсьтӥськонэ дыртӥськод вал. Тани 1990-тӥ арын быдэс дунне пусйиз быдӟым ӟуч композиторлэсь П.И. Чайковскийлэсь вордскем дырысеныз 150 ар тырмонзэ. Соин валче, солэсь кӧня ке ар азьло кутскемын вал Воткинскысь музей-усадьбаез тупатъяны-выльдыны. Та лэсьтӥськонэз но нуналмысь син азям вози. Озьы арысь аре, тямыс ар ӵоже. Театр пуктыны пӧрмытӥз бере, пӧрмылизы нылкышно «зампредсовминалэн» мукетъёсыз но ужъёсыз.

- Мынам вань улонэ удмурт газетъёсын, журналъёсын но книгаосын герӟаськемын бере, тодэм потэ вылэм, Зинаида Яковлевна, мар ӟечсэ лэсьтыса вуттӥды та ласянь?

- Мон ужан вакытэ вордскизы таӵе удмурт журналъёс: егитъёслы - «Инвожо», покчиослы - «Кизили», удмурт кылъя дышетӥсьёслы - «Вордскем кыл». Но, вордскем кылмес гажам но дышетэм сяна, мон котьку шуи но шуисько: одно дышетоно но ӟеч тодыны тыршоно кызьы ке ӟуч кылэз, озьы ик одиг ке но кунсьӧр кылэз.


Сюлэм мӧзме вордскем паллэсь

Зина вордскиз 1936-тӥ арын 28-тӥ январе, йылпумъяз Игра шор ёзо школаез но Глазовысь кун пединститутэз, озьы 1966-тӥ арын покчи классъёслы дышетӥсь но методист луиз. Нош со дырозь ужаны вуиз ни, шор ёзо школез йылпумъямез бере Бачкеевоын библиотекарь вал. 1956-тӥ-1962-тӥ аръёсы комсомоллэн Игра райкоменыз кивалтӥз, собере комсомоллэн обкомаз инструктор вал. Отысен ини келязы партилэн райкомаз.

Семья котьмалэсь дуно Сюмсиын гажанэзлэсь куинь ар мӧзмыса улэмез бере, Зинаида Яковлевналы семья кылдытон пала вож сюрес усьтӥськиз ик. Партилэн обкомысьтыз орготделэн кивалтӥсь И.А. Бердников сое дышетскыны ыстӥз вылӥ партшколае, Ленинградэ, гажанэзлэн вордскем но будэм городаз. Олег Иванович но со дырлы тупатӥз аспирантураын дышетсконзэ. Табере со - экономика наукаосъя доктор, профессор, Россиысь наукаосъя академилэн Экономикая Ижевскысь институтэзлэн директорез, кивалтэ диссертациосъя кенешен.

- Мынам семьяям кык докторъёс, - серектэ вераськон куспамы Зинаида Яковлевна.

- Кин на?

- Пие. Игорь Олегович. Нырысь со юридической наукаосъя кандидат луиз, собере экономика удысысь доктор. Куке Ижевскысь милици школазэ вылӥ дышетскон интылы пӧрмытӥзы, отчы мынӥз. Табере та Нижнегородской академилэн институтэз лыдъяське.

Вераськыса валаськод: кышномурт туж шудо аслаз семьяеныз - озьы ик со луыны кулэ - визьмо кышномурт шедьтэ аслыз визьмо кузпал, визьмо кышномурт будэтэ визьмо нылпи.

Нокин медаз вуны, номыр медаз вуны

Ортчемез - со асьмелэн историмы, нош историтэк ӧвол азьлане йӧнала сюрес. Памятникъёсты утёнын 12 ар ӵоже ни кивалтӥсь луыса, Зинаида Яковлевна мадиз мыным пӧртэм ужрад ортчытъямзы сярысь.Та общественной огазеяськонэ быръемын пӧртэм тодосчиос, соос эскеро памятникъёслэсь кырын кызьы чидамзэс, кулэ ке, тупатъяны-выльдыны куро, куд-огез борды возьмаськисьёсты пуктыны ӵекто. Памятникъёс луо туж пӧртэмесь, пӧлазы ик пыро: вуж дӥськут но, вуж арбериос но, вуж книгаос но. Таӵе валанэз лыдэ басьтыса, президиум книгаос поттэ но соосты калык пӧлы вӧлмытэ.

Источник:

Боткина З. Я. Сямыз излэсь но юн / З. Я. Боткина ; записал П. Кузнецов // Удмурт дунне. - 2002. - 7 июн. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"