Берёзкина Валентина Анатольевна

Материал из Воршуда
Перейти к: навигация, поиск

Дуннеез катар каре

Берёзкина В. А.

Можга ёросысь Куатчи гуртысь Валентина Берёзкиналэн котькуд выросаз, котькуд кылаз удмурт луэмез шӧдӥське. Ар талэсь азьло со гуртаз усьтӥз удмурт дэремлы сӥзем «Катар» студия. Али студиын ог 200 удмурт дэрем люкамын. «Катарысь» нылъёс ялан пӧртэм ужрадъёсы вуыло, нош туэ апрель толэзе Чебоксары карын ортчем «Золотая россыпь веков» фестивальын «катаръёс» «Этнографической костюм» номинациын лауреатъёс луизы. Улон-вылонэз, будэмез, семьяез но ужез сярысь Валентина Анатольевна мадиз калыклы Ижысь Национальной библиотекаын ортчем пумиськонын.

Семья — зарни шыкыс

— Вордӥськи мон Можга ёросысь Быдӟымсурд гуртын бадӟым семьяын, — вера Валентина. — Анае Нина Фёдоровна Кутасова удмурт кылъя но литературая дышетӥсь луыса ужаз, быдэс улонзэ школалы сӥзиз. Атае Анатолий Васильевич колхозын сварщикын ужаз. Ми 5 кузя будӥм, мон шоретӥез вал. Шулдыр будӥм, Лена апае но Саша агае ӵошенгес вал, нош мон кыкто вынъёсыным — Мишаен но Федяен — дырме тросгес ортчытӥ. Пиосын шудыса, соос кадь ик йӧнтэм, шаплы вал. Пыр заборъёс кузя, липетъёс вылтӥ, юбка кесяса, ветлэмын. Собере коркамес воштӥм но, котырам нылъёс тросгес луизы ини. Нылъёсын шудыкумы, мон наряд пуктӥсько вал: туннэ тазьы яке озьы шудӥськом. Кылзӥсько вал мынэсьтым.

Зэмзэ ке, мон песиосынгес будӥ — анай-атай весь ужын вал. Но песянайёсын будон ведь алама ӧвӧл, соос улонэз адӟемын, мар гинэ уг тодо. Керттӥськыны но монэ ӵужанаймы дышетӥз. Нырысь туж чурыт керттӥськылӥ — кӧня-кӧня со шорам черекъяз, толыкед уг тырмы шуыса. Али солэсь но усто керттӥськыны быгатӥсько кадь.

Папаелэн анай-атаез армиын дыръяз ик кулӥзы. Со мынам 11 нылпи пӧлысь берпуметӥез вал. Солэн апайёсыз но монэ будэтӥзы. Соос ик монэ Инмарез гажаны, кылызлы, кырӟанъёсызлы дышетӥзы. Семья со семья — отысь ваньмыз пыӵа. Котькуд семья — зарни шыкыс. Али но нылме ӵукна сайкатӥсько озьы, кызьы монэ анае сайкатылӥз: «Нылы, султы ини… Тани ачим азьтэмдэ улляло. Кузи-кузи-кузи… Вань акакез Вало шур кузя мед кошкоз. вань чеберез-мусоез-дуноез нылылы мед кылёз. Кузи-кузи-кузи… » Мар со «кузи-кузи» шуэм кадь? Со анайлэн пеллян кылыз луэ. Ӵукна ик аламазэ улляськод нылпиед бордысь. Быдэ вуыса гинэ, куке ачид анай луиськод, валаны кутскиськод, мар со калык веран.

Город оло бӧрдод

— Школаын дышетскон вакыт сётӥз мыным ваньзэ, мае мон туннэ тодӥсько но быгатӥсько. Школаын туж золэсь дышетӥсьёсмы вал. Ог-огенызы тупаса, пиналъёсты валаса ужазы. Тыршизы, котькуд нылпи адямилы, личностьлы мед пӧрмоз. Соос адӟизы, мыным творчество кулэ шуыса, со доры ик монэ нуизы, усьтӥськыны юрттӥзы.

Школаын дышетскыкум, тодам ваньзэ капчиен возисько вал. Огпол школаысь библиотекае анекдотъёсын книга вайизы. Мон сяна сое лыдӟись ӧй вал, малы ке шуоно огпол лыдӟыса, вань серем веранъёсты тодам кельтылӥ. Котькуд ӵукна, переменаос вискын, пиналъёс дорам анекдот кылзӥськыны ветло вал. Ма, мон улонысь бӧрдон учырез но серемес карыса вераны пӧрмытъяй. Огпол Саша агае ышиз. 7-тӥ классын дышетске вал соку, кытысь ке фотоаппарат шедьтӥз но, туж кельшиз солы туспуктылыны. «Простоквашино» мульфильмысь Шарик кадь, милям Шурикмы фотокорреспондентлы пӧрмиз. Со вань пытьыосты тодма вал: лосьлэн-а, лудкечлэн-а. Огпол выль лымы усиз но, мунчо эстон висказ паймымон пытьыез адӟем. Сокем тунсыко потэм — со пытьыя Саша Александрово гуртозь мынэм, нюлэс пыр потыса. Нош ми сое ыштӥм, сотовой телефонъёс соку ӧй вал на. Мама бӧрдэ, быдэс гурт калык агайме утчаны потӥз, нюлэсэз эскеризы. Саша мукет нуналаз бертӥз. Мон соку начальной классъёсын дышетскисько вал. Быдэс школа дорам вуылӥз та учырез кылзыны. Асьсэ куспын верасько, лэся, классъёс: таяз переменае ми Валя доры мыном, таязэ тӥ мыноды… Кӧня котыр верай та учырез — уг тодӥськы. Тунсыко потӥз, лэся, кызьы милям Сашикмы, пӧйшураны ветлыса, Алнашозь вуиз. Оло город, оло бӧрдод.

Кин гожтӥз кылбур?

— 7-тӥ классъёсын дышетскыкум, фольклорной коллективе ветлыны кутски. Кивалтӥсьмы Любовь Васильевна Чукарева быгатӥз милемыз, пиналъёсты, ӵош карыны. Пиос но, нылъёс но — ваньмы — песяйёсмылэсь вашкала дэремъёссэс дӥсяллямы. Мӧйыос но люкасько вал кружокамы, вашкала кырӟанъёссэс кырӟаллязы. Нырысетӥ куара жингыртэмен ик, калык кырӟанъёс сюлмам пыризы. Мынам вирам маке но улӟиз кадь потэ. Эшъёсы туж секытэн нёръянъёсты, удмурт гуръёсты дышетӥзы. Нош мон кылӥ но — мукет дуннее вуи кадь. Со дырысен калыкен кылдытэм дуннеез весь чебергес кареме, узырмытэме потэ. Кӧты весь уг тыры. Инмар но, дунне кылдытыкуз, весь мае ке чебергес карыны турттӥз ук. Адямилэн улонэз — Шундылэн системаез кадь. Соку мынам калык сямъёслы сӥзем планетае вордӥськиз.

Бӧрысь мон гожъяськон дуннеез аслым усьтӥ. Школаын дышетскыкум, мамае литературной кружок нуиз. Пиналъёс кыстӥськизы со доры, анай но ваньзэсты дораз кутӥз. Мамалэсь урокъёссэ шуо вал: наконец, пе, удмурт кылъя урок, шутэтском али. Но со синпӧет вал. Нокин но ӧз йылпумъя школаез, удмурт книгаез лыдӟытэк но тодытэк, ваньмы удмурт кылын чебер вераським, гожъяським. Мамае озьы быгатэ вал пуктыны уроксэ: ваньзы шутэтскиськом кожало, но со дыре ик визь, тодон-валан басьто.

Оскоды я уд, но нырысетӥ кылбурме гожтӥз мама. Та чуръёсты газетэ печатлам мынам нимыным:

Чорыган ветлэ агай,

Тыметын чорыг ымгай:

Чукырна, карась, чабак

Визнанын сюре тачак.

Бон мон гожтысал-а, мар-а озьы? Мон одӥг чорыг нимез но уг тодӥськы вал. Но куке мон аслэсьтым нимме газетысь адӟи, ачим но оски, гожъяськыны быгатӥсько шуыса. Кыӵе ке кузьым но сётӥзы вал. Газетын нимы, эшшо кузьым! Ой, малпасько, али гожъясько! Озьы ик пичиен-пичиен гожъяськыны кутски. Милемын кружокамы Анатолий Кузьмич Леонтьев, Удмуртиысь калык поэт, ужаз на, кылбуръёсмес тупатъяз, гожъямъёсмылы дунъет сётъялляз.

Сыӵе кельшиз мыным гожъяськыны. Тон азьын кыӵе ке суредъёс, паймымон учыръёс кылдо но, гожтӥськод соосты бумага вылэ. Озьы тӥнь со гожъяськон планетаез я кылбурен, я веросэн тырмытӥськод. Нош ик кыллэн пелляськон кужмыз шӧдӥське. Мон уг яратӥськы кыӵе ке секыт кылъёсты, огшоры гинэ, мар сюлмам лыктӥз, гожтӥсько.

Ӟеч кыл бурдъя

— Гожъяськонэ выйыса, малпасько вал: школа бере одно ик журналистикае мыно. 11-тӥ классын гижысь-пиньысь дышетски, одӥг гинэ «4» оценкае потэ вал — физкультураен. Физрукмы Виктор Филлиппович шуэ: давай, Валя, ӝыт тренироваться карыны ветлы. Кызьы но озьы физкультураен «5» басьтӥ. Олимпиадаосы но монэ гинэ лэзьяло вал. Туж зол турттӥ-турттӥ но, УдГУ-ысь вступительной экзаменысь «2»-ен бертӥ. Укыр визьмо сочинение гожтӥськем, валаллямтэ монэ.

Озьы одӥг ар дорам пуки но, мамае монэ педколледже дышетскыны нуиз. Нош мынам уг поты дышетӥсь луэме. Дышетсконме куштӥсько, мама нош монэ гыж нуэ. Но али валасько, педколледж мыным трос сётӥз. 2003-тӥ арын мон журналистикая фалькутетэ пыри ик, сыӵе огшоры сочинение гожтыса. Заочно дышетсконо луиз, малы ке шуоно коньдонмы трос ӧй вал, ужано луи. Соберезэ бызи ини, картэ вӧзам вал, со монэ дышетӥз, шуыны луоз.

Журналистикая факультетын но туж кужмо коллектив вал, удалтӥз мыным. Ми, заочникъёс, часта сессиосы лыктӥськом но, мон сомында басьтӥсько со вакчи дыр ӵоже. Дышетскыны туж кельше вал. Бертӥсько но Сергеелы, картэлы, верасько ини, мар выльзэ тодӥ, кыӵе югдур али политикаын. Александр Григорьевич Шкляев дышетӥсьмы одӥг пол милемлы, студентъёслы, шуиз: учкисько но, пе, тӥ шоры, йыре малпан лыктэ, заочникъёс очникъёслэсь но кужмогес кадь. Ми соку тросэз журналистика удысын ик ужаськом вал ини. Кин ке но гожъяське, кин ке но телевидениын. Милемыз со кылъёс бурдъязы, эшшо золгес тыршыны кутским. Ӟеч кыл сюре ке улонад, кин ке визь кыл вера ке, умой улыны.

Вашкала дэремлы — туала утюг

— Журналистикая факультетэз йылпумъяме бере сельсоветын, культурая юртын, ёросысьтымы культурая управлениын ужай. Бӧрысь берытски Куатчиысь культурая юртэ. Ёросысьтымы кивалтӥсьёс кылем арын вазиськизы: ойдо, куатчиос, маин ке но паймытэ. Маин бон паймытоно? Тодам лыктӥз: папаелэн сузэрезлэсь, Юляпайлэсь, тачак удмурт дэремъёс кылемын. Со бордысь ик «Катар» кылдӥз. Озьы мынам эшшо одӥг планетае вордскиз — удмурт дэремлы сӥземез.

Студиез кылдытыны культура юртысь ужасьёс, гурт калык, Надежда Сапожникова кибашлы юрттӥзы. Гурт калык милемлы сомында дэремъёс вайиз, ачим но коркась корка ветлӥ утчаськыса. Собере веме карим, вань мӧйыосмы лыктӥзы. Ву шунтыса, клуб азямы люкам дӥськутэз миським. Собере утюгъёсын, умой-умой парить карыса, утюгам дэремъёсты. Кузёоссы лыкто но чабкисько: зэм ик-а та со вуж дэреммы? Вашкала дэремлы туала утюг кулэ вылэм выльысен улӟыны.

Та дыре студиямы ог 200 удмурт дэремъёс люкамын. Калык паймыса учке, малы ке шуоно котькуд дэрем йӧспӧртэм луэ, маин ке висъяське. Гуртоос валазы удмурт дэремлэсь чеберзэ. Кин ке быдэс сумкаен вайиз вал дӥсьёссэ, озьы ик быдэс сумкаен берен нуиз. Асьмелэн нылъёсмы, пе, дӥсялозы ай, чебер вылэм. Студия ӧй ке усьтӥськысал, ӧйтӧд, валасалзы-а дӥськутлэсь чеберзэ. Нырысь малпаським: музей-а, студия-а усьтоно? Музей шуиськод ке, дӥськутэз ведь йӧтылыны уг яра, со экспонат ини. Со аслаз улонэныз шып гинэ шкафын улэ. Нош мынам потӥз, вашкала дӥськутъёслэн, арбериослэн кыкетӥ улонзы мед луоз кадь. Студиямы дэремъёсты мертаны луэ. Калык уг бырылы, кунгож сьӧрысь вуэмъёс но туж паймо. Кин ке но огшоры дорамы пыре, яра-а тӥ дорын пукыны, тӥляд татын туж умой шуыса. Пересьёсмы, анаймы доры бертӥськом кадь, пе. Вашкала дэремез котькӧня миськы — солэн аспӧртэм зыныз кыле ук. Со ик калыкез но кыске. Со Юляпаймы, гуртын бадӟым юмшанъёс ортчылыку, пыр укно дорын сылэ вал, чакла, кин кыӵе дӥсен шулдыръяськонэ мынэ. Куке кошке чебер, бай дӥсяськем, уксётӥрлыкъёсын, чигвесьёсын, пеллюгыосын, суйпосъёсын нылкышно, со шуэ вал: «Вот таиз беда, катар дӥсяськем!». Ачиз бӧрысь юмшанэ самой чебер дӥсяськыса мынэ вал. Мон пичи дыръям малпасько вал: мар со катар шуэм? Нош Юляпай озьы вера вал ваньзэ, мар герӟаськемын нылкышнолэн чеберлыкеныз. Соин ик студимес но «Катар» нимам. Таяз толэзе студиямы «Катар бар» антикафе усьтӥмы на. Толэзь ӵоже гуртысьтымы пиналъёсын ӵош нимысьтыз чай юон сэрег дасямы.

Инмарен сётэм кузьымъёс

— Котькуд нылпиез нуллэм-сюрем нылпи шуо. Инмар марзэ ке но сётэ, марзэ ке но басьтэ. Тау шуыны кулэ, 2 нылпие вань шуыса. Нырысетӥзэ олокӧня возьмам. Собере гуртысьтымы мӧйы нылкышно валэктӥз: ву вӧсяку, пе, ошмесэ мынэ но, ог-огдэс кисьтаса, Инмарлэсь нылпи куре. Озьы милям Давидмы вордӥськиз. Ваньзы паймо: ма кытысь сыӵе ним? Нош со мыным пичи дырысеным кельше вал, пыр вералляй, пияй ке — Давид ним поно. Маняпаен Юляпай, папаелэн сузэр-апайёсыз, Инмарез туж данъяса верало вал, монэ, пичи мае ке, пиналъёслы Библияез лыдӟыто вал. Соку мон Давид царьлы сыӵе пайми! Кыӵе со визьмо, «мудрый царь» шуэмын вал. Огшоры пичи пастукысь эксэёзь будӥз. Со мынам син азям кылем-а, мар-а. Озьы пиелы ним понӥ, уката Инмар сётӥз ук.

Нош Сандӥ нылмылы Саша агаелэсь нимзэ сётӥм. 5 ар ми 2-тӥ нылпи вайыны ӧм быгатэ, картэ весь куре-куре, мынам уг пӧрмы.

Улонысь малпамтэ шорысь Сашикмы кошкиз. Туж секыт вал со нуналъёсы. Доре но бертыны секыт вал. Мама шоры учкеме уг луы, копак пуш тӥрлыке бугыртӥське. Мамамы коркатӥ ветлылӥз, «Сашие, нуныкае» шуыса. Соку таӵе чуръёсы вордскизы:

«Сашие, нуныкае», —

Сюлворылэ анае,

Ӵукна ӵук гинэ султэ —

Нош пизэ анай ыштэ.

Уг на оскы со сюлэм,

Весяклы пиез кошкем.

Нош потэ со бакчае:

«Сашие, нуныкае,

Вакчи дыр улытозяд,

Урод кылме вералляй,

Часталы но бертакуд,

Яратонме жалялляй».

Синкыли нош из музэн

Усе анай сюлэме.

Ӵукна шундыен султэ,

Нош пизэ анай ыштэ:

«Адӟисько ке эшъёстэ,

Пушкы быдэсак тыре.

Нош кытын мынам пие,

Сашие, нуныкае?»

Тӥни сыӵе куректонмы вал семьяямы. Но кайгуэн валче шумпотон но вуиз… Саша кулон бӧрсяз трос вӧтатӥз. Огпол вӧтакум, чыртыям чупаз. Мон олокыӵе кариськи кадь уйвӧтам. Но собере валась муртъёс шуизы: со, пе, тонэ благословить кариз. Кӧня ке дыр ортче но — Александраен пияно луи.

Пиеным секытэн дыръям трос гожъяськи. Нылпи возьман бурдъя, шуо. Ну гожъяськисько, ну суредаськисько! Пие но али суредаське, гожъяськонзэ ватэгес ай-а, мар-а. Нош Сандӥен пияно луи но — ялан чильпаськисько вал. Соин, дыр, нылмы корка котырын берганы яратэ, гидын кыӵе тылобурдоос вань — ваньзэ тодэ.

Тӥни кыӵе вылэм со — семьяын кыӵе ке но ыштон вань ке но, улон ваньзэ тупатыны тырше. Нылпиосы — Инмарлэн бадӟым кузьымъёсыз. Таӵе нылпиосты вордыны быгатӥм шуыса, туж шумпотӥсько. Инмар улонзэс берекето мед кароз.

Источник:

Берёзкина В. А. Дуннеез катар каре / Валентина Берёзкина ; вераськиз Анастасия Шумилова // Удмурт дунне. - 2019. - 15 мая. - С. 10, 15 : фот. - (Тӧр шорын)

За предоставление материала выражаем огромную благодарность редакции газеты "Удмурт дунне"