Байсарова Ангелина Алексеевна

Материал из Воршуда
Перейти к: навигация, поиск

Кужым сёто нылпиос

Байсарова А. А.

Ангелина Алексеевна Байсарова котыраз биняны быгатэ нылпиосты но, дышетӥсьёсты но. Пӧртэм проектъёс кылдытэменыз, со Дэри шор ёзо школалэсь данзэ нуналлы быдэ ӝутэ. Пиналъёсты удмурт кыллы дышетэм сяна, татысь музеен кивалтэ. Удмуртлыкез азинтэмез понна кылем арын сое Эрик Батуев нимо ёрос премиен пусйизы. «Россиысь дышетон удысысь отличник», «Удмуртиысь калыкез дышетон удысысь дано ужась» нимъёсын но трос данъян грамотаосын пусъемын. Тужгес бадӟым дунъетэн лыдъя нылпиослэсь яратэмзэс.

Огкыл шедьтӥсь

Дэри ёросысь Ож-Пурга гуртысь калык котьку синмаськыса учкылӥз Алексей но Варвара Титовъёс шоры. Куспазы туж тупаса улӥзы угось. 5 кузя нылпиоссэс но огпол но тышкаськемзы ӧвӧл.

— Котькыӵе вакытъёссы вал, дыр, но анай-атаймылэсь керетэмзэс кылэммы-адӟеммы ӧвӧл, — вера Ангелина Байсарова. — Ми асьмеос но, соос шоры учкыса, адӟем карымон будыны тыршимы. Дядяй (атай) Байкузё нюлэс дуре интыяськем колхоз пасекаын 40 ар пала тыршиз. Анай колхозын рядовой вал. Мон нылпиос пӧлысь пичиез вал бере, ужатыны нырысь-валысь жаляллязы. Ужаса вуттод ай, шуылӥзы. Адямиослэн пиналъёссы колхозэ потало, нош монэ уг лэзё. Талы кӧты ӝож луылӥз. 6-тӥ классысен ужаны потӥ ик. Туж кельшылӥз бригадаосы пыриськон. Ужан но шудон валче пӧлэстӥськылӥзы. Али гуртэ бертӥськод но, нылпиос ульчаын уг адӟисько. Ми ялан ульчаын вал. Асьмеос ӝытъёсы концерт пуктылӥмы. Эшеным ӵош сценарий гожтӥськом, кырӟан но эктон дышетӥськом вал.

Ангелина Алексеевна ассэ пичи дырысеныз дышетӥсьын адӟылӥз. Эшъёсыз дораз вуо ке, соосты ӝӧк сьӧры пуктэ но урок ортчытэ вал. Нош анаезлэн сузэрез доры Иже куное вуылыкуз, одно ик сьӧраз Ижысь 30 номеро школае дыртылӥз. Химия кабинетэ пыремелы быдэ урок нуисько кадь потылӥ, шуэ Ангелина Байсарова.

Нылпиос борды бурмеменыз ик, Сарапулысь педучилищее пыриз. Татын соку воспитательёсты дышетонъя огез юнэз училище вал. Ижын соку гинэ училище усьтыны медо вал ай.

Педучилище бере Ангелина Алексеевнаез Ижысь радиозавод бордысь 208 номеро нылпи садэ ужаны кутӥзы. Мар но ӧз малпалля со пиналъёслэсь дырзэс ортчытон понна. Инкуазе поталлязы, нюлэскытӥ поръязы, мылкыдъёссэс бумага вылэ суреданы дышетскизы. Аслыз но та ваньмыз кельшылӥз.

Синмаськон дунне улон сюрессэ мукет ӧре выжтӥз.

— Володяен 8 ар эшъяськеммы бере кузпалъяськоно кариськимы, — вера Ангелина Байсарова. — Ӝыны ар ӵош улыса вуттӥмы, куспамы мукет нылкышно пыриз. Ӧй быгаты та вӧсез ньылыны. Соку мон секытэн ни вал. Котьма ке но, семьяысь кошки, уг люкеты, шуи. Кусып ум возиське. Пие атайзэ татчыозь ӧз адӟылы. Сумкаосты бичакум, эн дырты, шуэ вал. Но мон вази: кӧня чидано на? Мон сыӵе вал: мар малпасько, сое лэсьтӥсько, ӵогисько. Али визьмыным ӧй кошкысал ни, дыр. Соку картэ шуиз: ул астэ малпаса, йырдэ урдыса, весь огнад улод. Улӥсько огнам. Синмаськисьёс вал. Но мон ӧй дӥсьты ни бызьыны. Пие но ноку атай ӧз куры. Огпол, 4 арес дыръяз, бертӥсько но Алёша атаезлэсь туспуктэмзэ кесяса пуке… Анайлэн гинэ Володяез куаретэмез вань: кокасал, нылме озьы быдтӥз шуыса. Володя бератаз жаляз но, дыр, но сямзэ ӧз вормы.

Асме огнам шуыса ӧй шӧды. Пумиськонъёс, праздникъёс дыръя гинэ ке шат сюлэм интыяз ӧй вал. Отын котькудӥз семьяеныз. Алёшалы секытгес йӧтӥз. Соку оген нылпизэс будэтӥсьёс ӧжыт вал. Песятаез вань яратонзэ но быгатонлыкъёссэ солы пыӵатӥз ни. Анаен дядяй ӧй луысалзы ке, али ке но нылпи садын ужасал ай. Удмурт кун университетэ заочно амалэн дышетскыны пырыны малпасько вал. 1 аресъем пиналме кытчы кельтом шуыса сюлмаськылӥ. Но дядяй шуиз: кыӵе тодон-валан басьтод, заочнойын дышетскыса? Ми быгатӥськомы на, Алёшаез учкомы. Университетэ экзаменъёс сётыны лыктӥ. Нылъёс-пиос мынэсьтым 9 ареслы пичиесь. Билет кыски но дышетӥсьёс юало: туж-а дышетскемед потэ? О-о, шуисько. Кызьы дышетскыны, кытын улыны малпаськод, пидэ огнад будэтӥськод шуыса индылыны кутскизы. Кутозы но дышетскыны уг быгаты шуыса, кышказы, вылды. Вань аръёссэ «витьёслы» гинэ дышетски. Студентъёс но монэ пересь ӧз каре. Пие будӥз гуртын. Шутэтскон нуналъёсы бертасько вал. Огпол но ӝожтӥськемзэ кылэме ӧвӧл. «Шудкар» кылдытӥсь

Удмурт кун университетэз йылпумъямез бере, Ангелина Байсароваез Дэри ёросысь Якшур гуртысь шор ёзо школае ыстӥзы. Но ужаны кутскыса ӧз вутты — декретын пукись нылкышно, ужзэ ыштэмезлэсь кышкаса, дырызлэсь вазь школае берытскиз. Но Ангелина Алексеевна ужтэк ӧз кыльы. Сое роное методист луыса ужаны кутӥзы. Нылпи садын ужамзэ тодыса, воспитательёсты но дышетӥсьёсты огазеян борды басьтӥськыны косӥзы. Озьы нылпи садъёсысь но школаосысь удмуртоведъёсын ужрадъёс ортчытъяны кутскиз. Ёросазы Ангелина Байсарова «Удмурт кылъя устоез дышетӥсь» конкурс но радъяз. Вожвылъяськонэ дышетӥсьёс мыло-кыдо пыриськылӥзы. Та соослы выль шокчон кадь луылӥз. Отӥяз конкурс шаерамы но ортчылыны кутскиз.

— Пичи дыръям концертъёс пуктыса ветлэммы пытьытэк ӧз кыльы, — тодаз вае Ангелина Алексеевна. — Нылпиос пӧлын но вожвылъяськонъёс ортчытъяны ӧдъямы. Кылбуръёсты вольыт лыдӟонъя, литературая но крезьгуръя композициос пуктонъя конкурс радъямы. Али ёросысь методобъединение ас понназгес ужа, нылпи садысь воспитательёсты уггес куты. Соку ми, ог-огмес валаса, ог-огмылы дурбасьтыса, удмурт нылпиосты дэмен будэтыса, тыршимы. Удмурт кылэз дышетон но соку ӧръяськиз.

Ужаны быгатонлыкъёссэ адӟыса, нылпиосын огкыл шедьтэмзэ синйылтыса, Ангелина Байсароваез Дэри шор ёзо школае удмурт кылъя урокъёс ортчытъяны ӧтьыны кутскизы. Отӥяз школалэн директорез Татьяна Кощеева бордысьтыз ӧз кыльы ни: мар кык ужын ужалоды, ойдолэ ми доры, тӥ милемлы туж кулэ, шуиз. Озьы роноын 5 ар ужамез бӧрсьы быдэсак школае выжиз.

— Шумпотыса ик кутски. Нылпиослэсь кыӵе мӧзми, — вера Ангелина Алексеевна. — Дышетӥсь луон сярысь уйбыртыса улӥ ук. Соин но, кыӵе гинэ произведениез ум ортчиське, урокъёсын яратон, улон, ож но мукет темаослы сӥзем диспутъёс ортчытъясько вал. Кыӵе со кельшылӥз нылпиослы! Али но пумиськеммылы быдэ тодазы ваё со эчешонъёсты. Нош кыӵе шунытэн тодазы возё удмурт дискотекаосты. Со аръёсы ӟуч дискотекаос гинэ сяме пыӵамын вал. Удмурт нылпиос понна ӝытъёс радъяно кариськи. Огъя шулдыръяськонъёс дыръя ми удмурт нылпиосын удмурт кылъя классэ люкаськылӥм. Владимир Анисимов дышетскисе гуртысьтыз колонкаос вуттылӥз. (Со али ке но удмурт дискотекаос ортчытъя.) Удмурт сямен кырӟаськом, эктӥськом, собере чай юиськом вал. Тае кылыса, ӟуч нылпиос но пӧламы итӥськылӥзы.

Урокъёс нуыса гинэ, Ангелина Байсаровалэн сюлэмыз ӧз буйга. Улонын маке эшшо уг тырмы на, шуылӥз со аслыз. Ӵапак со вакытэ школалэн выль директорезлы Эльвира Дудыревалы ӵектӥллям Ангелина Байсароваез наукая воштӥсе кутыны. Со быгатоз шуыса оскытӥллям. Озьы 2000-тӥ аръёслэн кутсконазы Байсаровалэн эшшо одӥг кыл кутонэз кылдӥз. Ас азяз соку ик ужпум пуктӥз: нацпроектъёсы пыриськоно, конкурсъёсын вормоно. Озьы 2006-тӥ арын устоез школа луон, 1 миллион манет утон вылысь ӵошатсконэ пыриськыны документъёсты дасян А. Байсарова вылэ усиз. Ёросысь дышетонъя управление конкурсэ мукет школаослэсь куриськонъёссэс возьма вал. Ми вормомы, шуиз Ангелина Байсарова. Соку ик ассэ но нацпроектъя конкурсэ дасяны кутскиз. Аслыз но, школалы но грант висъязы. Умой тыршемез понна сое Москваысь дышетӥсьёслэн форумазы но пыриськыны ӧтчазы.

Со вакытлы Ангелина Алексеевналэн вормонъёсын кудыез узыр вал ни. Со сюлмаськемен, ёросысь удмурт нылпиослы «Шундыберган» шудон кылдӥз. Проектэз сӥземын вал черкогуртлэсь, ёрослэсь но Удмуртилэн Россие пыремезлэсь юбилейзэ пусъён ужрадъёслы. Нылпиос понна пӧртэм викторинаос, творчествоен вырыны мылкыдзэс сайкатонъя ужрадъёс малпаз. Станциосъя шудонъёс, КВН, концертъёс радъяны ӧдъяз. Нылпиослы но дышетӥсьёслы та проект сокем кельшиз, али ке но «Шундыберганэ» пырисько. Али квест-шудонъёс пыр ортче со. Кылем арын ёросысь нылпиос тодматскизы черкогуртэн. Тросэзлэн культурая юртэ но, музее но, «Пригородные вести» ёрос газетлэн редакцияз но татчыозь пырамзы ӧй вал. Шудонлы луыса отчы но вуылӥзы, шуэ дышетӥсь. Шудонэ пыриськон понна нылпиос исследовательской ужъёс гожто, сое калык азьын верало-возьмато, проектъёс кылдыто. Командаосын но, нимаз-нимаз но, куспазы но вожвылъясько. Ваньмыз радъяське удмурт кылын.

— «Шундыберган» проект паськытаны кутскиз. Отысь ик вордскиз «Дэривидение» проект (али со «Шунды куара» нимаське ни.) Отын 1-тӥ-11-тӥ классын дышетскись нылпиос англи, ӟуч но удмурт кылын кырӟаны быгатэмзэс возьмато. Вормисьёслы «Шундыкар» лагере путёвкаос висъяськомы, — шуэ Ангелина Байсарова.

«Шундыберганысь» потӥз мукетыз но проект — элькунысьтымы шаертодонэн тунсыкъяськись удмурт нылпиос понна «Шудкар» лагерь. Сое но Ангелина Алексеевна кылдытӥз. Со нырысь-валысь ёросысь пиналъёслы гинэ чакламын вал. Аслаз дышетоно классысьтыз нылпиосты бурдъян вылысь сое малпаз. Отӥяз «Шудкар» республикаысь нылпиосты но огазеяз.

— Лагерь туэ кадь тунсыко ӧй вал на кадь. Нылпиос но мыло-кыдоесь сюризы, малпанъёсме но пыӵатыны быгатӥ, — шуэ дышетӥсь. — Нылпиосты угось Пыӵанка гуртэ экспедицие поттыны быгатӥмы. Емельян Пугачёвлэсь кладзэ утчамы. Дискотекаез удмурт шудонъёслы сӥзимы, соослэсь историзэс тодамы вайимы. Эктӥсьтэм нылпиос но тапыртӥзы. Асьсэос ик выжыкыл малпазы, соя мунёос вуризы но спектакль пуктӥзы. Милемыз но паймытӥзы, асьсэос но шумпотӥзы.

«Шудкар» арлы быдэ пӧртэм темаослы сӥземын луэ. Узыр пуштросэныз но экспедициосыныз паймытэ. Сое арлы быдэ «Родные просторы» нимаськись элькун ӵошатсконын но пусъё — нылпиос котьку вормисе пото.

Шокчон кузьмась

Ангелина Байсарова тэк улонэз уг тоды. Со нылпиос понна ялан маке выльзэ кылдытэ. 10-тӥ классын дышетскисьёс понна «Перспектива» проект гожтӥз. Соя нылпиос вуоно профессиенызы матэгес тодматскыны, ведомствоосын 2 арняем практика ортчыны быгато — 8-12 ӧръя ужало. Судын но юрттӥсь луыса ужало, гурт хозяйствоын но, аптекаын но тодон-валанзэс муромыто, ФСБ-ын но асьсэды эскеро. Кивалтӥсьёсын огкыл шедьтыны шуг ӧвӧл. Асьсэлы но нылпиослы тазьы ужаны тунсыко, шуэ дышетӥсь.

Ачиз нуналлы быдэ дасяське урок ортчытыны, сое тунсыкогес карыны. Туэ тани 6-тӥ классысь 7 параллелез удмуртлы дышетоз.

— 1-тӥ сентябрез котькуд ар возьмасько, — шуэ Ангелина Алексеевна. — Нылпиосын пумиськон мон понна — праздник. Гужем ӵоже мӧзмисько соослэсь. Адӟиськиськом ке, ӟыгыръяськиськом но.

Дышетэм сяна, А. Байсарова школаысь музеен но кивалтэ. Азьвыл аръёсы татчы пырась-потасез ик сокем трос ӧй вал ни, табере калык уг бырылы. Татын угось пӧртэм ужрадъёс ортчыло. Нуналысь нуналэ проектъёс кылдо. Соин но нылпиос Ангелина Алексеевна борды сокем биниськыса уло.

— Удмурт кылъя кабинет ужаку, дышетӥсьёс но котырысьтым ӧз кошкылэ. Али классъёс тырмымтэен, кабинет быриз. Озьы ке но бордам кыскисько, лэся. Нылпиос понна вань быгатонлыкъёсме сётэме потэ. Россиысь «Молодёжь 21 века» вожвылъяськонэ но 5 пиналэз дасяй. Быдэн 30 сюрс манетэн грант утӥзы. Нырысетӥ вормисе — Евгения Толстая, табере со Дэриысь крезьгуръя школаын ужа ни. Вань данъетъёслэсь дуно нылпиослэн вормонъёссы. Соос понна шумпотыса, вань куректонъёс вуно, аслыд ачид шудолэсь но шудо потоно.

Музейлэсь ужамзэ табере Россиын но тодо ни. Данзэ утьыны нылпиос кивалтӥсенызы Ангелина Байсароваен Москвае 2013-тӥ арын, ветлӥзы, возьматӥзы, кызьы ужаны кулэ школаосысь музейёс, 3-тӥ инты басьтӥзы. Татын командаен ужаны быгатэмзэс нимысьтыз пусйизы.

— Музей — со мынам висёнэ. Сотэк табере улыны но уг ни быгатӥськы кадь. Солы 40 ар ни. Музейын али 2 зал. Огаз школалэн историез, мукетаз — ёрослэн. Кыӵе но арбериос татчы бичамын ӧвӧл! Туж трос вашкала утюгъёс, самоваръёс, пыдкукъёс. Дышем сямъя гинэ экскурсия ортчытыса, кӧт уг буйга ни. Соин ик усьтӥ сайт. Кылдытӥ экскурсиосъя 3 аудиогид. Текстсэ, суредъёсты ачим утчай. Верасько отын нылпиос. Огез аудиогид сӥземын ёросысьтымы Пыӵанка гуртлы, мукетыз — школалэн историезлы, куинетӥез — черкогуртлэн 7 паймымон интыосызлы. Со аудиогидэн ми музейёс пӧлын улоскуспо вожвылъяськонын туэ 7-тӥ интые потӥмы. Аслым но музеен кивалтыны, маке выльзэ лэсьтыны кельше. Нош макем шумпото нылпиос, экскурсовод карисько ке. Тани 1-тӥ классэ лыктӥсьёсты нырысетӥ ручкалэн историеныз тодматыны дасяськиськом. Тылыен гожъяськыса утчакузы, синъёссы ик ӝуало ук. Со ӝуась синъёс понна ялан маке выльзэ малпам-кылдытэм потэ.

Дэри ёрослэсь шаертодонъя азбуказэ но Ангелина Байсарова кылдытӥз. Солэн историеныз сяна, со табере лыдӟисьёсты тодматэ районысь калыкен, сям-йылолъёсын.

— Огвакытэ туж трос юрттӥзы ёросысьтымы дано нылкышноос Раиса Моторина, Мария Ишматова, Елизавета Камашева. Соос котьку вӧзам вал. Пинал дышетӥсьёс но котырам. Оген номыре но уд вормы. Куд-огез ужаны быгатэмелы йыркуръясько ке но, асме буйгатӥсько: вожвылъяськон ӧз луы ке, азьлань уд мыны.

Юрт кутӥсь

Ангелина Байсарова нылпиостэк гань-гань шутэтскыны но, улыны но уг пӧрмыты. Туэ но шаертодонэн тунсыкъяськись 37 нылпиосты Ставрополь улосысь Железноводск городэ санаторие нуллӥз. Отын со «азвесь волонтёр» ним басьтӥз.

— Дунъяло пумтэм, — шуэ дышетӥсь. — Кылем арын Эрик Батуев нимо ёрос премиен сӥлы каризы — шумпотонэ сюлэмам уг тэры ни вал. Вормонъёслы дышыны уг луы. Огвакытэ ёрослэн данъян пул вылаз нимме пыртылӥзы. Внучкаосы вӧзтӥз кошкеммылы быдэ шуо вал: учкы, тынад туспуктэмед отын. Кенэлэн тау каремез вань: тӥледлы луыса бадӟымез нылмы отличница, конкурсъёсын вормылэ. Аслам нылпиосылы адӟем карымон луисько ке, туж шумпотӥсько. Пие понна но котьку адӟем карымон луыны тырши. Мыным эшъёсы ӵемысь шуо вал: малы тон пидэ ялан алӥськод? Пиосмуртэ будэтӥсько, шуылӥ. Оскымон будӥз. Ваньмыз умой та улонам но, семьяын но, ужын но, нош картэн улыны ӧз кылды. Оло, кылдоз. Туно шуиз ук: 70 арескады бызёды ай. Яке уж, яке семья, дыр. Мукет сямен уг луы.

Ангелина Байсарова юрт но ачиз ик пуктӥз. Квартиразэ вузаз но Дэри черкогуртысь выль кылдэм урамысь коркалы бугро басьтӥз. Укноез но, ӧсэз но ӧй вал. Апрель толэзь. Быдэс семьяен озьы ульчае потӥзы. Ангелина Байсарова урокъёссэ ортчытэм бере бызьыса бертэ, коръёсты ӝуйыен туйылэ. Киям дрель кутыны дыши, пиме но соин ужаны дышетӥ, шуэ со. Табере Алёша ваньзэ ачиз быгатэ ни, пе. Корказэс ӝоггес вуттон понна уйин но фонарикен ужаллязы. Озьы толэзь куспын вуттӥзы. Пушсэ эшшо 3 ар лэсьтӥзы на. Табере мунчо но сылэ ни. Азьланяз пудо вордэме потэ, шуэ А. Байсарова. Туэ чипы басьтӥз. Тэк пукид ке, сэрыт пересьмод, дыр, пе.

— Кужым басьтӥсько гуртам. Ож-Пурга гуртысь атай юртэ йыг-йыг сылэ на. Отчы вуылӥсько. Со сяна, кужым сёто нылпиос. Соос доре лыкто ке, ярато ке, бурдъяськоно. Уже мон празднике кадь мынӥсько.

Источник:

Байсарова А. А. Кужым сёто нылпиос / Ангелина Байсарова ; вераськиз Елена Сараматова // Удмурт дунне. - 2019. - 30 августа. - С. 10, 15 : фот. - (Тӧр шорын)

За предоставление материала выражаем огромную благодарность редакции газеты "Удмурт дунне"