Байметов Владимир Александрович

Материал из Воршуда
Перейти к: навигация, поиск

Вала астэ ачид

В. А. Байметов

«Удмурт тодосчиос» книгаын Владимир Александрович Байметов атаеныз Александр Кальманович Байметовен артэ сылэ. Кыкназы – психология наукая кандидатъёс. Александр Кальманович Дышетӥсьёслэсь тодон-валанзэс будэтонъя институтын 1984-тӥ арын педагогикая но психологияя кафедра усьтэ, бӧрысьгес – психологияя нимысьтыз кафедра. Со ик кутске школаосын ужась психологъёсты дасян борды. Пиез – Владимир Александрович азьланьтэ атаезлэсь ужзэ, психология наукаосъя кандидат луэ, огдыре УдГУ-ын проректор луыса ужа. (Шонер верало: улмопулэн улмоез выжыяз усе.) Туннэ со пӧртэм удысъёсы вуттӥське, гажамон адями луэ.

- Владимир Александрович, биографияды гожтэмын, тӥ Ярын вордскемын шуыса, но фамилиды уйпалъёслы маке уг тупа кадь…

- Зэмзэ ке, Ярын чик но ӧвӧл. Атае со вакыт аспирантураын дышетске вылэм, соин мама, вордон дырзэ шӧдыса, Ижысь ас палаз бертыны кариськем - общежитиын курадӟонлэсь ас анаед бордын каньылгес ук. Ярозь чидамтэ, Глазовысь роддоме пыртоно луиллям. Но соку Глазов пытсам город вал, соин вордскем сярысь свидетельство басьтӥллям Ярын, соин ик вордскем интые но со луиз. Куинь аресозь мон зэмзэ но анаеным отынгес улӥ, бӧрысь котькуд гужем каникулэ бертылӥ, но дореным Ижез ик лыдъясько. Нош атаея выжымы милям воксё но Татарстанысь.

- Дышетӥсьёслэн семьяязы будэмъёс ӝожтӥськыло, анай-атайёссы соослы пичи дыръязы бадӟым куронъёс пуктылӥзы, шаянъяськыны ӧз лэзьылэ шуыса…

- Уг тодӥськы, кызьы мукет семьяосын, мынам ӝожтӥськыны мугъёсы ӧвӧл. Мултэс ноку но ӧз косъяськылэ, ваньмыз кызьы ке но огшоры, гань-гань вал. Анаен-атай ӧз черекъялэ. Куке-соку споръяськылӥзы, дыр, но ми, нылпиос, керетэмзэс ӧм шӧдылэ. Дышетскыны косонэз ӧй но вал кадь, мыным кельшылӥз книгаос пӧлын пукыны. Выныным ӧй жугиськылы – со мынэсьтым 7 арлы пичи. Ма, мон сое рос-прос тодылыса но ӧй вутты – вордскыкуз школаын дышетскисько ни вал, нош со школае мынӥз но, мон Москвае кошки. Москваысь бертӥ но, со Америкаын ни…

- Куинь аресозь песянаен будыса, анай-атайдылэн куспазы удмурт сямен лушкем вераськемзы уг лу ни вал, дыр…

- Городэ лыктытозям, мон удмурт кылын гинэ вераськисько вылэм. Но анай-атае (асьсэос дышетскемзыя удмурт кылъя дышетӥсьёс ке но) монэн ӟуч сямен гинэ вераськыны кенешиллям. Нырысь сётӥзы 25 номеро школае (со коркамылы матын вал), собере выжи 30-тӥяз.

- МГУ-э пырыны атайды юрттӥз, дыр?

- Визьманы ке шат? Школаын дышетскыкум, мон тросгес тунсыкъяськи химиен, шаерамы ортчылӥсь олимпиадаосы пыриськылӥ. Но атае психология наукаосъя кандидат бере, дырын-дырын мынам ӝӧк вылам тырылӥз психологъёс, соослэн исследованиоссы сярысь книгаос. Мыным туж тунсыко потыны ӧдъяз. Кытчы шонскемме шӧдыса, бӧрысь со монэ дугдытыны выриз на но, мон аслэсьтым кари: бадӟым ни ук! Озьы кошки психологе дышетскыны. Соку секыт ӧй вал кадь Москваысь вузэ дышетскыны пырыны - юрттэмзы кулэ ӧз луы. Ми одӥг классысь ик олокӧня кузя Москвае кошким. Зэм, мон школаме зарни медален йылпумъяй бере, осконэ вал одӥг экзамен гинэ сётыса пырыны, ӧз пӧрмы. «4» басьтӥ, но мукетъёссэ умой сётӥ - студент луи.

- Маке куалекъятъяз-а бадӟым городын?

- Ӧз. Ма, азьвыл Москваын но ваньмыз огшорыгес вал ук. Мон пӧртэмзэ ӧй валалля: Ижын-а, Москваын-а… Эшъёсы вал, стипендия тырылӥзы, пумен лабораториын ужаллям (вӧзаз эшшо стипендия быдӟа уждун тырылӥзы на). Гужемъёсы стройотрядэн уйпала ветлылӥм – ваньмыз туж огшоры. Зэм, витетӥ курсысен кузпалъяськи ни (Елена - Казахстанысь), озьы университетэз ми куинь кузя йылпумъям – вордскиз нырысетӥ пимы.

- Соку ик Иже бертэмды ӧз поты-а, Москвае кылиды?

- Ми бертӥм, но берен кошким … ясли ӧвӧлысь. Осконтэм кадь, но зэм, соку туж шуг вал нылпиез садике интыяны. Вылаз ик, милемлы кыкнамылы ӵектӥзы вал аспирантурае кыльыны. Озьы малпаським-малпаським но дышетсконмес азинтоно кариським. Соку уго аспирантъёс туж ӟеч уло вал: уксёлы но, улон интылы но, нылпи садлы но ӧз ёрмылэ. Мон кандидатскойме дыраз дасяй, нош Лена ӝегазгес – со куспын эшшо одӥг пи вайим на уго.

Ижын психология удыс сярысь сокугес гинэ вераськыны кутскизы ай, нокин но уг тоды вал, «маин сое сиёно». Интыяськи Дышетӥсьёслэсь тодон-валанзэс будэтонъя институтэ. Удыс гырымтэ бере, мон туж бадӟым тунсыкен ужай. Со берегес психологъёслы кулэяськыны ӧдъязы югдурез утён удысын ужасьёс, монэ МВД-е ӧтизы. Озьыен шаерысьтымы милиция удысысь мон нырысетӥ психолог. Ужай ай азьвыл министрен Николай Перевощиковен (1991-тӥ арын виемын вал – авт.).

- Кыӵе ужез быдэсъяз вылӥ лейтенант?

- Тросгес – кадръёс быръёнэн, мынам кандидат уже но уго герӟаськемын ужез (профессиез) быръёнын куд-ог аспӧртэмлыкъёсын. Со вие ӵап кутскизы Северной Осетиын керетонъёс, асьме милиционеръёсты отчы келялляны ӧдъязы. Валамон ини, отысь пиос мукетгес луыса берытскылӥзы. Ожез адӟем мурт улон шоры мукет синмын учкыны кутске – со котькуд учырысь кышкытлыкез утча-адӟе, кулэлыкез ӧвӧл дыръя но ассэ утьыны выре. Тӥни соосын ужалляй. Бӧрысьгес дышетӥ на МВД-лэн академияз. Улыса-вылыса кызьы ке но пумиським УдГУ-ысь профессорен Б. С. Шульгаен. Со монэ университетэ лӧпкытъяны ӧдъяз. Мынам кемалась отын ужаны мылкыды вал ни. Ар ӵоже чакласьки на, пумен УдГУ-ын занятиос нуылӥ, нош 1993-тӥ арын луонлык кылдӥз Удмурт университетэ выжыны. Ярам ай соку милициысь ас мылкыд каремъя кошкыны луэ на вал, туала законъя ӧй быгатысал. Татысен кутскиз улонысьтым тужгес яркытэз вакыт. Тулыс лыктыса, гужем монэ кафедралы кивалтӥсе пуктӥзы ни. Нош ар ужаса, УдГУ-лэн ректорез Виталий Анатольевич Журавлёв мыным дышетон люкетъя проректор луыны ӵектӥз.

- Кема-а малпаськиды?

- Ӧй. Ма малпаськонэз, мон соку пинал на вал ук – кужым вань, визьмы бордам.

Со вакытэ ик кусып тупатӥм Светлана Смирноваен. Соку со Егитъёсын ужанъя кун комитетын ужа вал. Огкылын вераса, со монэ юрттыны куриз Ижын ортчоно конференцилы бадӟым проект дасяны. Ми уен-нуналэн пукылӥм, нокин нокыӵе коньдон ӧз сӥзьы, но сыӵе тунсыко потылӥз. Ужрадмы туж усто ортчиз. Ӵап соку ик вылӥ кивалтӥсьёс но дурбасьтӥзы национальной ужпумъёсъя нимысьтыз министерство кылдытонлы. Со дырысен Светлана Константиновнаен ӵош ужаськом, мон солэн юрттӥсез луисько, Шара политикая школаен кивалтӥсько.

- Нош УдГУ? Жаль ӧй вал-а?

- УдГУ-ен люкиськон соин герӟаськемын ӧвӧл. Отын мукетгес мугъёс. Но озьы кулэ вал, дыр: кивалтӥсьлэн вань правоез решениос кутыны, отын номыр сыӵе-таӵеез ӧвӧл.

- Ӧд но куректэ?

- Мар понна? Мон тодӥсько аслэсьтым визьме, сямме, быгатонлыкъёсме – ужтэк ноку уг кыльы. УдГУ бере кык ар вал Ижысь Кивалтонъя (управлениея) институтлэн ректорез.

- Тӥ котыр ласянь визьмо тодосчи, огкыл шедьтыны, кусып тупатыны быгатӥсь адями. Малы асьтэос бадӟым кивалтӥсе ӧд кыстӥське, политикае ӧд мынэ – ӟеч карьера лэсьтысалды…

- Со сярысь малпаськысал ке, шугез ӧй луысал, дыр. Но мыным со чик кулэ ӧвӧл - мыным яра кельшись ужен вырыны..

- Шара политикая школаен кивалтон, иське, мылкыддыя?

- Бен, малы ке шуоно со югдытон уж. Та школа юрттэ улосъёсысь адямиослэсь политика ласянь тодон-валанзэс будэтыны, азьветлӥсь луыны, асьсэлэсь малпанъёссэс-кичӧлтонъёссэс улонэ пыӵатыны. Огкылын, граждан общество кылдытыны. Семинаръёсын, лекциосын саклык нырысь ик висъяське улосъёслэн ужпумъёссылы-сюлмаськонъёссылы. Интыосысь кивалтӥсьёсын но Москваысь экспертъёсын ӵош милям егит дышетскисьёсмы тужгес сюлмаськытӥсь ужпумъёсъя кенешо.

- Кызьы тӥ учкиськоды туала партийной система шоры? Кыӵе партие пыриськоды?

- Али нокыӵе партие уг пыриськы, егит дыръям одӥгаз вал ни. Отын луыны кема ӧз кылды, билетме берыктӥ. Россиын та ласянь рос-прос система ӧвӧл. Партиос трос кадь, но тунсыкъяськыны кутскиськод но… Огез укыргес куасалтэ, мукетыз серекъятэ. Мон лыдъясько, партия одӥг луыны кулэ – со Россилэн Конституциез! Конституция мед луоз меӵак быдэсяськись закон. Кызьы кулэ, кызьы гожтэмын! Со закон ваньмыз понна – вылӥ кивалтӥсьёс но, огшоры адямиос понна но - огкадь быдэсъяськыны кулэ. Брежнев вакытэ, нялтас вераса, Конституциын ваньмыз вал ни.

- Та школаен кивалтэм сяна, Тӥ «Эхо Москвы в Ижевске» радиоын ужаськоды. Эшшо?..

- …судебной департаментын, пичияк - Егитъёсын ужанъя кун комитетын, пичияк эшшо кытын ке.

- Куд-огез ужез ӵемгес вошъяны ӵекто, куд-огез сое бадӟым шуккетэн лыдъяло. Кудӥз малпан шонергес?

- Кинлы кызьы, ваньмыз нимаз адямилэн сямыз бордысь потэ: кинлы ке кулэ вошъяськон, кинлы ке – ӧвӧл. Мон понна уж вошъян яке огдыре кӧнязэ ке быдэсъян номыр кадь ик ӧвӧл. Ваньмыз соос ог-огенызы герӟаськемын – отын но, татын но калыкен ужано.

- Нош семьядылы саклык висъяны вуттӥськоды на-а?

- Ӧйтӧд. Уг ӝожтӥсько кадь. Кузпалылэн аслаз но ужез трос – со ИжГТУ-ысь кафедраен кивалтэ. Куд-ог дыръя чорыганы но вуттӥсько, волейболэн шудыны но. Али пиосмы бадӟымесь ни ук: нырысетӥез УдГУ-ысь юридической факультетэз йылпумъя, кыкетӥез Техникая университетын дышетске.

- Тӥ асьтэдыз удмуртэн шӧдиськоды-а?

- Кызьы ум шӧды – виры удмурт ук. Но солэсь урод палъёссэ уг адӟиськы, удмурт луэмысьтым маке карытэк, лэсьтытэк, малпанме быдэстытэк кылеме ӧвӧл. Мон кыл шедьтыны быгато пӧртэм адямиосын - кусып тупатонын кыӵе выжыысь луэм уг люкеты.

Вань-а удмуртъёслэн шугъяськонъёссы? Вань. Зэм, троссэ сэрттыны-пертчыны быгатысал ачиз адями. Кылсярысь, ялан верало удмурт выжыысь нылпиослы квотаос юнматон сярысь. Бен, юрттоно, но чылкак озьы уг яра, дыр. Яке тани университетын ужакум жаляны куро вал удмурт филологияя факультетэз. Мар понна? Лябъёс пӧлы кариськем интые тыршоно мукетъёсыныз вожвылъяськыны быгатэмдэ возьматыны.

Мукетыз ужпум – куке удмуртъёс асьсэ музъем вылазы асьсэды муртэн шӧдо, соосты юромо вӧсь карыны вырисьёс вань. Мон верасько куд-ог адямиослэн газетъёс пыр удмуртъёсты ултӥ карыны турттэмзэс. Азьвылгес ултӥязы удмурт нылкышноосты, табере, пе, удмуртъёсын йырин Удмуртиысь вань калыклэн депрессия… Сыӵе учыръёсы, мон малпасько, «Удмурт кенеш» гинэ ӧвӧл, Правительство, Президент чурыт кылзэс вераны кулэ. Вылӥ кивалтӥсьёс выжы калыклы шара дурбасьтысалзы ке, оло, иназ мынысал. Асьсэлэсь но данзэс ӝутысалзы, нялтас вераса.

- Нош нимаз адямилы кызьы юрттыны луэ, мылкыд зӥбиськыку? Тӥледлы тодмо-а сыӵе вакытъёс?

- Депрессиез ке вераськоды – ӧвӧл. Секыт вакытъёс кинлэн уг луыло, но мон тыршисько сюлмаськонъёсты сыӵе югдурозь вуттытэк сэрттыны-пертчыны. Сотэк кыӵе мон психолог? Вылаз ик, мон пиосмурт. Нош ӵектон ласянь ке… Психолог – врач ӧвӧл ук, со эмъюм уз сёты. Психолог - со синучкон. Юрттэтлы вазиськем мурт соин вераськыса, ассэ валаны, палэнысен адӟыны быгатыны кулэ. Астэ шӧдыны-валаны дышид ке, улон соку ик воштӥськоз, сюлмаськонъёс асьсэ коже сылмозы, малы ке шуоно адями, ассэ валаку, тодэ, мар лэсьтоно сояз яке таяз учыре. Нош психолог тодӥсьяськыса кыӵе ке меӵак ӵектон сётэ ке, пегӟоно со дорысь кыдёкегес.

- Юрттэт курыса, ӵем-а вазиськыло?

- Уг. Кӧня ке ар талэсь азьло тодмое куриз пиезлы киросатай луыны. Асме Инмарлы оскисен уг лыдъяськы, но сыӵе дыръя, пе, пумитъяськыны уг яра, мон, эшме гажаса, соглаш кариськи. Соку ик асме пылатӥзы. Мыным малы ке уг яра черкъёслэн институтсы – берло дыре сое кыӵе ке конторалы пӧрмытӥзы кадь, йӧтэ…

- Кызьы потэ, вань-а Тӥ вылэ йыркуръяськисьёс, куатаськисьёс?

- Вань, дыр. Мар понна, уг тодӥськы. Куараме бадӟыматыса огпол но вераськеме ӧвӧл, но мон ужасьёс азе чурыт куронъёс пуктӥсько. Огпол-кык пол янгышаз – умоен верасько на, нош отӥяз но тупатскыны мылкыдыз ӧз ке луы, малы мыным сыӵе ужась?

- Вынды Америкаын улэ-ужа шуиськоды. Тӥляд сыӵе мылкыдды ӧй вал-а? Ӵем-а куное ветлӥськоды?

- Отчы выжон сярысь малпанэ ӧз ик кылдылы. Мон зӥбыт, огсыр улонэз яратӥсько: туннэ мон тазьы улӥсько ке, мукет сямен улыны быгатымтэысь ӧвӧл – озьы улэме потэмысь.

Источник:

Байметов В. А. Вала астэ ачид / В. А. Байметов ; записала З. Рябинина // Удмурт дунне. - 2006. - 26 мая. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"