Баженова Галина Николаевна

Материал из Воршуда
Перейти к: навигация, поиск

Чӧльытэк ки ӧвӧл

Та кышномуртлэсь куаразэ шаерысьтымы ваньмыз сямен улӥсьёс тодо. Пичиослы со «Чагыр-чагыр дыдыке» передачаысь Галяпай, нош арлыдоос понна - тодмо радио- но тележурналист Галина Николаевна Баженова. Дано нимъёсыз та востэм апайлэн трос: Удмурт Республикаысь кун премилэн лауреатэз, культура удысысь дано ужась, журналистъёслэн союззылэн но ветеранъёслэн кенешсылэн ёзчиез. Нош улон сюресэз - узыр но тунсыко.

- Галина Николаевна, кыӵе тужгес но яркытэсь тодэ ваёнъёсты кылемын пичи дырысьтыды?

- Можга город мон пичи дыръя вал бадӟым удмурт гурт. Адямиос туж тупаса, эшъяськыса улӥзы. Дышетски паймымон школаын. Мон сое калыккуспо эшъяськонлэн эталонэз шуысал. Отын дышетскизы бигер, удмурт, ӟуч пиналъёс. Огшоры переменаосы ми, хороводэ султыса, пӧртэм кылын кырӟанъёсты кырӟаськомы вал.

- Соку ик пыӵаз, вылды, удмурт кылэз яратон?

- Бен, отысен. Мон малпасько, удмурт адями анай кылзэ уг тоды ке, со бадӟым сьӧлык. Со ас выжыостэ гажамтэдэ возьматон луэ ини. Нош туннэ со туж паськыт вӧлскемын. Тани ми вӧзысь базарын пичиос но пересьёс йӧлэн, бакча сиёнэн вуз каро. Мон огезлэсь пияшлэсь юасько: «Йӧлыд кӧня сылэ?» Со пумитам ӟуч сямен вазе. Быгатӥськод-а, шуисько, удмурт сямен вераськыны? (Адӟисько, тусаз ик удмурт шӧм пыӵамын). Быгатӥсько, шуэ. Нош малы уд вераськиськы? Уг тодӥськы, шуэ. Вот, шуисько, озьы бере, мон тынэсьтыд йӧлдэ туннэ уг басьты. Табере тэшкыли котьку но удмурт сямен гинэ шорам вазьылэ ини. Со сяна, школаысен валэктӥзы, макем паськытэсь кусыпъёссы удмуртъёслэн кунгож сьӧрысь калыкъёсын.

- Пичи дыръяды кин луэмды потэ вал?

- Пичи классъёсысен милемыз гожъятӥзы сочинение: кин мон луо, будӥ ке. Соку мон гожтӥ вал, станокъёс лэсьтӥсь заводын ужало шуыса. Кытысь потэм ини сыӵе малпан - ӧйтӧд. Заводэз матысен адӟылэме но ӧй вал. Но зэмзэ ке, мон пичи дырысеным ик дышетӥсь луыны малпалляй. Соин ик мынӥ дышетскыны Можгалась педучилищее. Городын будэмын бере, одно ик гуртын ужаме потэ вал. Дышетскыкум, мон календарьысь нуналъёсты чотасько вал: ку гуртэ ужаны мыно. Но милям выпускысьтымы 117 адями пӧлысь ужан инты сётӥзы куинезлы гинэ. Кылемъёсызлы шуизы: инты асьтэос утчалэ - коть библиотекаре мынэ, коть избаче (азьло озьы клубын ужасьёсты шуо вал). Мон понна со туж бадӟым куректон луиз. Эшъёсыным мынӥмы Можгалась руное - инты ӧвӧл. Жингыртӥмы Москвае, шуиськом: ми коть кыдёкысь Севере мыныны дась, но одно ик дышетӥсь луыса. Озьы но милемлы номыр ӧз ӵектэ.

Гужем ортчиз, кутскиз дышетскон ар, мон ужтэк. Али егитъёс аръёсын доразы пукыны быгато, нош соку ужтэк улыны туж возьыт вал. Одӥг нуналэ монэ ӧтизы райкоме: кулэ, пе, удмурт кылэз тодӥсь мурт. Монэным нырысь кенешиз райкомлэн секретарез, собере ӧтчазы комсомоллэн обкомаз. Доре бертӥсько но, анае шуэ: ветлӥзы тонэ ӧтчаны, Бадӟым Учанысь школае удмурт кылын дышетӥсь, пе, кулэ. Ма карыны пайми. Али гинэ ужаны кутӥзы, кызьы мон отысь кошком на? Возьыт потӥз солань-талань кыстаськыны. Озьы кыли дышетӥсь луытэк.

- Жаляськоды-а?

- Туж. Оскисько, мынэсьтым ӟеч дышетӥсь пӧрмысал. Мон быгатысал, дыр, лякыттэм, кылзӥськисьтэм нылпиосын ужаны. Но дышетӥсь ӧй луы бере, мар карод на. Шуи ни: нырысь ужай райкомын, учётъя отделэн кивалтӥ. Татын мон вылын вал документация, сейфъёс, коньдонэн герӟаськем ужъёс. Одӥг пол командировкаысь бертӥсько но, монэ Ижысь адями возьма.

- Тон удмурт-а? - шуэ.

- Удмурт.

- Милемлы кышкытлыклэсь утиськонъя комитетэ удмурт кылэз тодӥсь адями кулэ. Мынысалды-а?

- Пумит уг луы, - шуисько, номыр созэ-тазэ малпатэк.

Озьы мон Ижын КГБ-ын ужаны кутски. Тырши отын 9 но ӝыны ар. Но ӝокыт йӧтыны кутскиз. Вылез уже монэ ачиз шедьтӥз. Кылӥськиз, телестудие ужась кулэ шуыса. Отчы монэ гожтэтъёсын ужаны кутӥзы. Мон дасялляй «Тӥляд гожтэтъёстыя» передачаез. Соку со кырӟанъёсын но ӟечкыланъёсын герӟаськемын ӧй вал - возьматъямы кыӵе ке «ӝуась» ужпумъёсты. Кыӵеесь но гожтэтъёс ӧз вуылэ редакцие: кинлэн ке липетэз вия, кытын ке выжзы сисьмем. Котькуд адресъя потыны тыршылӥм, адямиослы пичильтык ке но юрттыны быгатылӥм ке, со туж бадӟым шумпотон вал ини.

Собере мон нуи «Тазалык» тележурналэз, «Чебер город понна», «Город но ми», «Республикалэн нуналэз» передачаосты. Соос сӥземын вал калыклы улон-вылонын юрттэт сётонлы, тазалыкез утёнлы, городмес чеберматон-утялтонлы.

- Кудӥз передача тужгес но сюлмады кылиз?

- Самой яратоноез уже – «Ижевск ӝытазе» («Ижевск вечерний»). Та передачае пыриськизы Ижысь тросэз кивалтӥсьёс. Со тележурнал выллем вал, отын ми вераськылӥмы городмылэн туннэ нуналыз сярысь – Ижлэн азинскемез, тодмо адямиос, тунсыко ужрадъёс – ваньзэ возьматыны тыршим. Одно ик луэ вал сюлмаськытӥсь ужпумъёслы сӥзем бамез. Тросэз адямиос критикаез кылзыны уг ярато, мыскыл карем кожало. Но критика - адямилэсь шекъёссэ шараян гинэ ӧвӧл, со тырмымтэосты тупатыны, умой пала воштӥськыны юрттэ. Та передачаез туж ярато вал. Ӝыт ураметӥ мынӥськод но, анай-атайёслэсь нылпиоссылы ваземзэс кылӥськод: «Пыре ини, пыре, «Ижевск ӝытазе» кутске.»

- Нош телевидениысь радиое кызьы вуиды?

- Огпол мыным жингыртӥз Леонид Петрович Емельянов – соку радиолэн директорез: мыным, пе, юрттӥсь кулэ. Огпол ӧтемен ӧй ӝутӥськы. Соку Емельянов кыкетӥзэ жингыртӥз – лыктӥськод-а, шуэ. Жади ини, пе, редактортэк ужаса. Озьы мон радиоын ужась луи. Телевидениысь кошкеме пумысь уг жаляськы, уго озьытэк мон ӧй вуысал «Чагыр-чагыр дыдыке» передачае. Отчы монэ ӧтиз Раиса Семеновна Куликова. Мон солы али но тау карисько – со передача мыным котьку но кужым но капчи мылкыд сётылӥз. «Чагыр-чагыр дыдыкеын» мон ужай 14 ар. Ужасьёсмы милям туж тунсыкоесь вал: редактормы Надежда Степанова, режиссёрмы Леонид Гусев - передачамес пӧртэм крезьгуръёсын чеберма, тодмо артистъёс Александр Перевозчиков но Алевтина Степанова выжыкылъёс лыдӟо. Одӥг передача ӵоже соос туж трос рольёсты шудоно луо, котькудзэ геройзэс пӧртэм куараен вераськыто. Таӵе быгатонлыксы воксё паймымон. Мон отын внештатной автор гинэ, асме пичи чӧльы гинэ шуисько. Озьы ке но, чӧльытэк ки ӧвӧл.

- Кытысь кылдӥзы передачаысь геройёс - Тэшкыли но Кузьгубей?

Соос басьтэмын Г.Ходыревлэн книгаысьтыз. Но отын соослэн сямъёссы кӧня ке пӧртэмесь. Тэшкыли - котыр ласянь ӟеч, Кузьгубей - урод. Нош милемлы передачаямы умойтэм геройёс кулэ ӧй вал. Соку Кузьгубеез кӧня ке воштӥмы. Со луиз ерпечка сямо, шаплы, котькытчы но чуртнаськись. Мон котьку но син азям соосты тазьы пуктӥсько вал: Тэшкыли - со гуртысь нылаш, вӧт-вӧт, ужась, ӝикыт. Нош Кузьгубей - гуртысь ик шаян пияш, кылзӥськисьтэм, етӥз. Адӟисько, кызьы со толалтэ нискыламысь пыре - кынмемын, лымыпог луэмын, нырулыз чиля. Кыкназы но соос туж яркытэсь, соин ик, передачаез гожтыны ӝок сьӧры пуксисько ке, кыл вӧй вылтӥ кадь кошке.

- Кызьы вордӥсько передачалы сюжетъёс?

- «Чагыр, чагыр дыдыкелы» ноку но «вылласянь» темаос ӧз сётъялэ. Соин ик ми лэсьтылӥмы передачаос со пумысен, ма сярысь сюлэм висе, ма сюлмаськытэ: удмурт кылэз гажан, анаен-атаен кусыпъёс, тылобурдоосты яратон, пӧртэм калык веранъёслы, приметаослы оскон. Кылсярысь, сьӧд коӵышен пумиськонэз уродлы, шуо. Янгыш верам со. Коӵыш - сьӧд-а со, тӧдьы-а - одӥг кадь. Со визьмо, лякыт сямо пӧйшур, кызьы со маке уродзэ лэсьтыны быгатоз?

Сюжетъёс ӝӧк сьӧрын пукыку уг кылдо. Малпанъёс йыре котьку но шуак лыкто. Малы ке но ӵемысь - трамвайысен. Озьы одӥг пол бертӥсько дорам, сумкаосы секытэсь. Малпаськисько, кызьы ке но Кузьгубеез бакчаям «вайылоно» вал шуыса. Шӧдтэк шорысь чилектӥз: мон сое юрттӥськыны ӧтё. Син азям пуктӥ, кызьы со улмопу вылэ тубоз, кызьы вуэ усёз - гор-гор серекъяса мынӥсько. Адямиос шорам паймыса учко.

Передачаын ортчытъямы пӧртэм конкурсъёс, трос ужрадъёсы пыриськылӥм. Кылсярысь, быдэс дунне пусйиз А.С.Пушкинлэн вордскемез дырысен 200 ар тырмонэз. Ми но, солы сӥзьыса, бадӟым ужрад ортчытӥмы. Отчы ветлӥзы Алнашысь, Кизнерысь, Пургалась, Ижысь нылпиос. Ми быдӟым поэтлэсь пичи дырысьтыз одӥг учырзэ пуктӥмы-возьматӥмы. Мон отын шудӥ Арина Родионовнаез.

- Радиоын но телевидениын уно ар ужаса, мар дэмласалды кутскись журналистъёслы?

- Журналистика - со туж бадӟым но секыт уж. Уго журналист ваньзэ ас пыртӥз поттыса возьматыны кулэ. Дасям материалаз со усьтыны кулэ аслэсьтыз малпанъёссэ, улон шоры учкемзэ. Котькинэн быгатыса вераськыны кулэ – кивалтӥсен но, выж ӵужисен но. Трос ар ӵоже ужаннам, ноку но ӧй вал бадӟым адямиос азьын «тэтэ» кареме. Скал кыскисен но, директорен но мон огкадь вераськыны тыршылӥ, малы ке шуоно соос ваньзы адямиос ук. Шуом, мынам тодмо нылкышноосы –азбар утялтӥсьёс. Котькыӵе куазь мед луоз – зоро-а, ӟар кезьыт-а - соослэн ульчаоссы котьку но чылк-чылкесь улӥзы. Сыӵе ужзы понна кызьы адямиез уд дунъя, солы уд йыбыртты?

Со сяна, мынам малпамея, журналист, адямиен вераськыны мыныкуз, одно ик дасяськыны кулэ. Егит гожъяськисьёс ӵем дыръя, ӝог малпаськыны быгатонзылы оскыса, интервью басьтыны «буш йырын» мыно. Тодам лыктэ тодмо журналистэн Василий Михайлович Песковен луэм учыр. Ужаны кутскыкуз, со бадӟым учёноен вераськыны мынэм. Дасяськытэк-маратэк, вераськемзыя ӝогак гинэ гожъяло кожам. Нош бертыса бордэм: гожъян удыссэ ӟеч-ӟеч тодымтэысьтыз, юанъёс дасямтыысьтыз, му пыр виямон возьдаськоно луэм. Огъя вераса, котькудзэ адямиез - министр-а со, выж миськись-а - гажаны кулэ.

- Тодӥсько, тӥ радиоын музей но кылдытӥды шуыса. Кытысь лыктӥз сыӵе малпан?

- Пенсие кошкон азяз одӥгаз нуналэ радиокомитетлэн директорез Л. П. Емельянов мон доры пыриз, быдэс ӟыгыртэт мында фографиос пыртыса. Тани, пе учкы, маиз кулэ - кельты, маиз кулэтэм - кушты. Со фотоос люкамын вылэм радиолэн кылдэмез дырысен ик. Нырысь ик мон соослэсь стенд лэсьтӥ. Собере, пенсие потон азям, ГТРК-лэн кивалтӥсез Олег Корнилович Шибанов доры пыри но, шуисько: мон кошки ке, со фотоос ышозы-бырозы, ойдолэ соослэсь журнал лэсьтом. Малы журнал гинэ, ойдолэ лэсьтомы музей, мед ваньзы сое адӟозы, шуэ. Тодӥмы, радиолэн музеез Ленинградын гинэ вань шуыса. Мон ветлӥ отчы командировкае, ваньзэ учки, гожъяй но, доре бертыса, кык толэзь ӵоже сыӵегес ик экспозиция лэсьтыны выри. Со бордын ужакум, мон аслым ачим горд следопыт кадь потӥсько вал. Уго пӧртэм справочникъёсын бугыръяськоно, архивъёсы но адресной бюроосы вазиськылоно, пӧртэм адямиосын пумиськылоно луиз. Со ужмес мон музей ӧй шуысал, со бадӟым ик ӧвӧл, но солы луыса, уно нимъёс но ужрадъёс табере уз вунэ ни - азьвылзэ тодытэк, вуоноез сайкыт уг луы ук.

- Нош кызьы кылдӥзы тӥляд удмурт радиолы но телевиденилы сӥзем книгаосты?

- Ӵап со экспозиция бордысен ик. Сое дасякум, бичам материалэ туж трос люкаськиз. Нош фотоос улэ самой тросссэ куинь предложение гинэ пуктыны луэ. Соку мон выльысь Шибанов доры вамыштӥ. Ойдолэ, шуисько, со материалъёслэсь маке книга выллем лэсьтомы. Малы, пе, книга выллем, ойдо йӧн-йӧн книга лэсьтом. Озьы вордӥськизы «Радиовещание Удмуртии» но «Телевидение Удмуртии» книгаос.

- Галина Николаевна, кызьы тӥ журналистысь выжыкыл гожъясь луиды?

- «Чибориё тубатъёс» книгае кылдӥз, «Чагыр-чагыр дыдыкелы» луыса ик. Передачае лыктэме бере, выль ужез ӧръян капчиен ӧз сётӥськы. Асьме выжыкылъёсмы пӧлын трос бугыръяськоно, тупасьсэ кема утчано луылӥз. Нош ми доры Надежда Андреевна Степанова лыктӥз но, соку ик бразиль калык выжыкылэз берыктӥз. Озьы мон но та уже кыстӥськи. Нырысетӥез берыктэм уже - Океаниысь но Австралиысь калыкъёслэн «Кызьы Хина толэзе тубиз» выжыкылзы. Собере пичи кылзӥськисьёсмес мон Африкаысь калыкъёслэн выжыкылъёсынызы тодматӥ. Адямиос детектив лыдӟо, нош мон нылпи библиотекаостӥ передачалы тупась выжыкылъёс утчасько. Дыр ортчемъя берыктэм выжыкылъёсы трос люкаськизы.

Соосты мон «Чибориё тубатъёс» книгае огазеяй. Али эшшо одӥг сыӵе книга дасясько. Удмурт радиолэн шыкысаз туннэ «бабе» на ог 117 калыклэн 330 пала выжыкылэз. Соосты одно ик пичиос доры вуттоно. Мон малпасько, калык нимъёслэсь нырысетӥ букваоссэс алфавитъя радъяса, соослэн выжыкылъёсынызы эшшо одӥг книга пӧраны. Ӝоген ужме йылаз-пумаз вутто ни. Кема утчай «ч» но «з» букваен кутскись калыкъёсты. Но шедьтӥ – чиганъёс но Африкаысь зулусъёс, нош «ж» буквалы озьы ик шедьтыны ӧйлась ини.

- Кызьы кылдо меда выжыкылъёс?

- Англиысь нылпи писатель Ганс Христиан Андерсен тазьы вералля вылэм: «Мае котырысьтыды адӟиськоды - ваньмыз сярысь выжыкыл гожтыны луэ». Мон соин быдэсак соглаш. Зэмзэ но, выжыкыл пӧрмытыны луэ котькыӵе арбери сярысь. Тани, коть очки бордысь (ныр вылысьтыз «кыкетӥ синмыз» борды йӧтӥське Галина Николаевна – авт.) Нош ватосэз-усьтонэз выжыкыллэн туж капчи. Быръёно тӥледлы тунсыко луись арбери, сётоно солы лул, выжыкылысьтыды геройёслы котькудӥзлы - одно ик нимысьтыз сям, бордаз кӧня ке гинэ фантазидэс ватсано. Татын ини тӥ - кузё. Геройдэс гурезьёсы но ӝутыны, зарезь пыдсы но лэзьыны, дуннеез но котыръятыны быгатӥськоды.

- Нош асьтэлэн нылпиостылы ӵем-а выжыкылъёс лыдӟылиды?

- Ӵем. Мынам соос кык кузя. Оля но Андрей. Пичи дыръязы, шуом , висьыкузы мон соослы горчичник пуктӥсько но дельфинъёс сярысь выжыкыл верасько вал. Горчичниклэн пӧсятэмезъя, мынам дельфинъёсы вылӥегес но вылӥегес тэтчало, яке кыӵе туж секыт но паймымон югдуре шедё. Пичиосы, пӧсямзэс вунэтыса, ымзэс ик усьтыса кылзӥсько.

- Шуо, тӥ кема аръёс ӵоже ини котькуд нунал куазьлэсь кыӵезэ гожъяса кельтӥськоды.

- 1974-тӥ арысен. Мон соку ужай радиоын. Эфирын котькуд нунал вераськомы вал куазьлэсь кыӵе луэмзэ. Со дырысен мон пичи дневник выллем нуисько. Котькуд нунал гожъясько отчы, мар луиз монэным, мар выльзэ тодӥ, кыӵе куазь вал. Со гожъямъёсылы луыса, парк вӧзын улӥсько бере, мон тодӥсько ку но кыӵе тылобурдоос лыкто асьме доры. Кылсярысь, каксяос (цапляо) котькуд ар вуо Благовещение нуналэ.

- Удмурт нылкышноослэн «Табань» клубазы но ти пӧраськиськоды, лэся.

- Озьы. Тани берлояз ужрадэ мыныкумы, табаньлы котэм нянез мон банкае поныса нуи. Усьтыны кутски но - со сюрес вылын зуркам-а, мар-а - отысь котэм нянез ыбиськыса сямен потӥз - ваньмыз вылам. Сыӵе но «джинъёс» банкаосын уло вылэм.

- Галина Николаевна, али, улонды шоры берытскыса, быгатӥськоды-а вераны, маиз тужгес но яркытэз, шумпотоноез?

- Ваньмыз. Мон дышетӥ асме котьмалы но шумпотыны, дунне шоры пальпотӥсь синъёсын учкыны. Бен, со бадӟым шумопотон, тынад нуныед ке вордӥське, нырысь вамыш ке лэсьтэ, тонэ «анай» ке шуэ. Но котькуд ӵукна выль нуналэз пумитан - озьы ик туж бадӟым шуд.

Источник:

Баженова Г. Н. Чӧльытэк ки ӧвӧл / Г. Н. Баженова ; записала Н. Образцова // Удмурт дунне. - 2007. - 18 мая - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"