Бадретдинов Ульфат Шайхутдинович

Материал из Воршуда
Перейти к: навигация, поиск

Буш ӧвӧл буш

У. Ш. Бадретдинов

Бадретдинов Ульфат Шайхутдинович – удмурт нылпи писатель но «Кизили» журналлэн валтӥсь редакторез. «Серекъян - адскисьтэм кужым» книгаяз со гожтэ: «Нимы мынам Шуд. Араб кылысь берыктыса, озьы луэ. Нош нимтуллэсь нырысь букваоссэ вераса – БУШ. Тазэ удмурт кылын валано ӧвӧл, сое политикаен герӟало. Вордӥськемын Куать Гондырын яке Горд Гурезьын – Алтаю но Алтау гуртмылэн нимыз бигер кылысь озьы берыктӥське, нош документэ гожто – Алтаево». Со Алтаево гуртэз шедьтыны быгатоды башкир музъем вылысь Бурай ёрослэн одӥг сэрегысьтыз.

Вордскем гуртаз тямыс классэз быдтыса, Ульфат мынэ Можга педучилищее (мар малпанэн - тододы берлогес). Одӥг арзэ дышетэ аслаз гуртаз. Собере, вань пиосмуртъёс сямен, солы но пӧськытъяно луэ солдат сапегъёсты. Бӧрысь нош дышетэ пиналъёсты, со дыре ик ачиз но дышетске.

Ӝоген сое ӧтё «Советской Удмуртия» газетэ ужаны. Тямыс ар татын тырше. Но нылпиосты яратон мылкыдыз ворме но вуттэ Ульфатэз «Кизили» журналэ.

- Ульфат Шайхутдинович, тӥ луиськоды нылпиослы потӥсь журналлэн валтӥсь редакторез. Гожъяськоды но пичиослы. Монэ паймытэ одӥгез - кызьы тӥ соосын одӥг кыл шедьтыны быгатӥськоды? Со понна дунне шоры но соослэн синмынызы учкыны быгатэм кулэ, дыр?

- Пиналъёслэн улонзы – аспӧртэм дунне. Покчиосты валаны мыным юрттэ со дуннеын бергаме, «Кизили» журналын ужаме, школаын кӧня ке ар дышетӥсь луэме, Можга педучилищеез быдтэме но. Ми ӵемысь поталляськом школаосы, кенешиськом, вераськиськом, пиналъёсын гожтэтъёс пыр но кусып возиськом. Соин, оло, огъя кыл шедьтыны капчи.

- Та удыс маиныз кыскиз ас бордаз?

- Ваньзэ улон герӟаз, шуыны луоз. Нырысь ик мон кутски вал бадӟымъёслыгес гожъяны. Нырысетӥ веросъёсын сборнике но чакламын быдэ вуэм лыдӟисьёслы. Бӧрысь «Дась лу!» газетэ веросъёс гожъяны кутски. Ваньмыз вольыт кошкиз кадь. Пиналъёслы гожъян мыным кельшыны ӧдъяз.

- Кызьы тӥ малпаськоды, кыӵе адӟиське туала удмурт нылпи литературамы но ма сое вите азьланяз?

- Удмурт писательёс пӧлын нылпи литератураен вырисьёс туж ӧжыт. Соос чиньыен лыдъямон. Быдэс улонзэс пиналъёслы сӥзизы Аркадий Клабуков, Герман Ходырев, туалаос пӧлысь, шуом, Иосиф Иванов. Тани Пётр Чернов но нырысь нылпиослы повестьёс гожъяз, нош собере бадӟымъёслы кутскиз.

Азьло «Удмуртия» издательстволэн книга поттонъя планэз вал. Отчы пырон понна, писательёс нылпиослы но гожъяллязы. Ӟечлыксыя произведениоссы пӧртэмесь вал. Книга поттон сярысь но сюлэмшугъяськонъёс ӧз луэ. Нош туала вакытэ со ласянь туж шуг. Гожъяськем сяна, аслыд ик выроно луэ книга поттон ужен. Тани мынам но куинез книгае печатламын аслам кужыменым.

- «Пальпотон но малпаськон» книгады но алигес озьы ик потӥз. Ӧжыт со сярысь вералоды-а?

- Чакламын со начальной классъёсын удмурт кылъя дышетӥсьёслы урокъёсазы уже кутыны. Отын котькуд произведение бере мынэ юан. Кылсярысь, вань бӧчы сярысь таӵе кылбуре: Отчы-татчы Ветлэ бӧчы. Ымыз – качы, Йырыз – сяртчы. Утча чечы Оло пучы… Вольыт пуӵысь.

Юан: «Малы бӧчы пуксиз вольыт пуӵе?» Валэктонэз огшоры: бӧчылэн вольыт пуӵе пуксемез потӥз, озьы ӧй луысал ке, со лобасал. Та выллем юанъёс эскеро но азинто нылпилэсь малпаськыны тыршонзэ. Валэктонъёс утчаку, пальпотыса малпаськыны кулэ. Пальпотыны ке кутскиськом, асьмеос малпаськемысь дугдӥськом кадь, малпаськиськом ке, пальпотонмы кытчы ке ыше. Адями мед быгатоз пальпотыса малпаськыны. Пальпотон, серекъян – со адскисьтэм кужым.

- Произведениостылэн сюжетъёссы улонысь басьтэмын-а?

- Бен. Куд-ог учыръёсты нокыӵе писатель но малпаны уз быгаты, ачиз нылпи сяна. Кылсярысь, таӵе учыр. Вань мынам Сергей нимо племяннике. Нылпи садэ ветлыкуз, соос малпаллям концерт пуктыны.

Дасяськиллям нылпи садын ик, нош концерт клубын возьматыны кулэ вал. Сергей сцена вылэ потэ но бакоме – отын сомында калык, ваньмыз шораз учко. Паймеменыз юа: «Мар-о тӥ татын кариськоды?» Кыкетӥ учыр. Гуртамы вал пичи пи, кудзэ ваньзы пӧяло. Нош со оске. Одӥг пол малпам та пияш кинэ ке алданы. Клубе кино учкыны мынэм но киномеханиклы вить коньы сётэм. Нош ачиз дораз бызьыса кошкем. Атаезлы, пе, шуэ: «Мон киномеханикез алдай, солы вить коньы сётӥ, нош кинозэ учкыны ӧй пыры». Таӵезэ юри но уд малпа. Мон веросъёсам улонысь учыръёсты кутылыны тыршисько.

- Нош асьтэос пичи дыръяды кин луыны малпаськоды вал?

- Витетӥ классын дышетскыкум, юан-веран ортчытӥзы. Мон гожтӥськем: «Луо писатель, Можга педучилищее мыно». Директормы шуэ: «Отын писательлы уг дышето ук». Тросэз гожъяськисьёсмы отын дышетскиллям бере, мон малпай, гожъяськыны ик дышето, дыр. Шумпотӥсько, мынам малпанэ быдэсмиз, йылпумъяй Можга педучилищеез, луи писатель. Писательёслэн союзазы табере кутэмын.

- Веросъёстыя мон валай, тӥ туж яратӥськоды инкуазез. Куке но юннатъёслэсь отрядзэс но кылдытӥллямды. Нюлэсчи луон мылкыдды ӧй-а вал?

- Паймоно кадь, сыӵе малпан йырам но ӧз лыктылы. Нош отрядмы, зэм но, вал. Ми нырысь лушкем выримы. Собере быдэс республикамы ми сярысь тодӥз. Ма, Башкирия гинэ ӧвӧл, быдэс Советской Союзын дано луим. Ми сярысь Москва радио пыр вераллязы. Соку нуналлы быдэ ог витьтон-куатьтон гожтэт басьяськом вал. Гожъязы пӧртэм сямен: кин данъяськиз, кин тышкаськиз, юрттэт курылӥз. Нош малы керетӥзы?

Дышетӥсьёс радио пыр кыло но ӵекто пиналъёслы милям выллем ик отряд кылдытыны. Нош соослэн ужамзы уг поты. Соин ик покчиос тазьы но гожто вал: «Э, зелёные штаны, кому нужны ваши наблюдения? Из-за вас нас заставляют работать». Адямилы мылкыд кужмысь уд пыӵаты. Нош милемлы ужмы кельше, тунсыко потэ вал.

Та отрядмы сярысь мон гожтӥ «Шордин» нимо повесть. Малы «Шордин»? Ми шордин пиос вал. Башкир республикаысь тросаз удмурт гуртъёсын урамъёссы тазьы нимасько: уллапал, ваннапал, шордин. Озьы ик со йыръянлэн вань мукет валэктонэз но. «Шордин» кылдэмын шор кыллэсь. Нош пинал дыр – со адямилэн улонэзлэн шорыз луэ. Ма ласянь? Кызьы Шунды котыртӥ бергало планетаос, озьы ик адямилэн улонэз но берга егит дыр котыртӥ. Пинал дыр – со яркыт, шулдыр вакыт. Отын уродэз луэ ке но, со ыше, быре, вунэ. Умоез гинэ, тужгес умоез гинэ кыле, адямиез азьлань сюресаз валтэ.

- Нош ку но кытын печатламын вал нырысетӥез ужды?

- 1969-тӥ арын «Дась лу!» газетын потӥз мынам нырысетӥ заметкае. Со понна мыным йӧтӥз но. Отын мон мади тылобурдоосты рогаткаен ыбылыса виылӥсь пиналъёс сярысь. Нимтулъёссэс, кызьы ке вань, озьы ик гожтӥ вал. Редакциын со пиослэсь нимъёссэс кельтӥллям, нош фамилизэс букваен гинэ пусйиллям. Гуртоослы секыт ӧй вал соосты тодманы. Одӥгезлэн анаез мынэсьтымзэ анайме тышкаськем. Собере анаелэсь мыным но йӧтӥз, эн ни гожъяськы, шуиз. Озьы ке но мон гожъяськемысь ӧй дугды. Критика борды гинэ малпаськытэк ӧй кутскылы ни. Верам-гожтэм кылъёсыдлы ачид ик кыл кутоно луиськод. Бен, соку мон ӧй пӧяськы, зэмзэ гожтӥ вал…

«Дась лу!» газет мыным Можга педучилищее но сюрес усьтӥз.

- Тямыс классэз быдтыса, вордскем гуртэныды, эшъёсыныды люкиськыны секыт-а вал?

- Школаез йылпумъятозям, одӥг городэз но, поездэз но ӧй адӟылы. Ваньмыз мон понна выль вал. Кык сю иськеме палэнэ кошкон капчи ӧвӧл. Нырысь-валысь вераськыны но шуггес потылӥз. Каллен дыши, эшъёс но юрттӥзы.

Мон али но ӵемгес тыршисько гуртам бертылыны. Отын мон эркынгес шокасько. Тодосчиос верамъя, адями вордскем интыысьтыз котькытынлэсь трос кужым басьтыны быгатэ. Ма ке уг ке пӧрмы, сюлмылэн кыӵе ке сэрегыз буша ке, бертӥсько вордӥськем палъёсам. Отысь котьку ӟеч мылкыдын вуисько.

- Ульфат Шайхутдинович, тӥ Инмарлы оскиськоды-а?

- Котькуд адями, ас понназ ке но, оске Инмарлы. Мон но сыӵе ик адями. Мынам малпамея, дунне вылын вань кыӵе ке кужым. Со ваньзэ адӟе, ваньзэ тодэ но быгатэмъяз адямиослы юрттэ. Инсьӧр кужым, шуысал мон сое. Со ик вань, дыр, Инмар но.

Кузь сюрес вылэ потыкум, вӧсяськытэк, нянь борды кутскытэк уг вырӟиськы. Анаен атай но вӧсяськыса улӥзы. Мыным но соослэн осконзы пыӵаз, луоз. Азьло милям гуртамы Элин вӧсь ортчылоз вылэм. Эль – со дунне. Нош Элин вӧсь – со быдэс дунне вӧсь. Отчы люкаськылӥллям котыр удмурт гуртъёсысь калыкъёс. Озьы соос ог-огенызы кусып возьылӥллям. Инмар герӟа вылэм удмурт адямиосты.

- Кызьы малпаськоды, гожъяськон тӥледлы Инмарен-а сётэмын?

- Инкуазьлэн кузьыменыз гинэ вормонъёс уд басьты. Сое будэтыны, азинтыны кулэ. Адями быдэс улонзэ дышетске. Нош писатель луыны нокытын уд дышето.

- Мон асме Кам сьӧр удмурт шуисько. Тӥ но отысь ик. «Кунгож» удмуртъёс асьсэлэсь кылзэс юнгес ярато. Мыным озьы потэ. Тӥ кызьы малпаськоды?

- Мон ваче пумит карыны уг турттӥськы татысь удмуртъёсты, шуом, башкир яке бигер шаерын улӥсьёсыныз. Котькудӥзлэн вань аслаз ӟечез но тырмымтэез. Но калык лыдъян-гожъян возьматэ (1989-тӥ арын ортчытэмезъя верасько), башкир удмуртъёс пӧлысь 96 процентэз асьсэдыз удмуртэн пусйиллям. Нош Удмуртиын со лыдпус 76 процент вылэм. Нокинэ ӝожомытэм уг поты. Но лыдпусъёс маке но верало… Мон данъяськисько удмурт луэменым. Асьме калык лыдызъя Россиын дасэтӥ интыын мынэ. Нош калыкъёс сю витьтонлэсь уно ук! Удмуртъёсты пичи калык шуыны ымы уг пыры. Но асьмеос вань луонлыкмес, кужыммес огазеяны ум быгатӥське на. Кин янгыш? Ачиз адями гинэ ӧвӧл, улонмы но, политикамы но.

- Политикае пыриськиськоды?

- Солэн вань пӧртэм удысъёсыз. Монэ та ужен герӟаськымтэысьтым пыкылӥсьёс но вань. Ваньмаз вутскыны уг луы ук. Журнал поттон – политика ӧвӧл шат? Ми школаосы потаськом, адямиосын пумиськылӥськом, радио пыр вераськиськом, пӧртэм журналъёсы, газетъёсы гожъяськом. Калыкен ужан но – политика.

- Мыным тунсыко потэ асьтэдыз БУШ нимамды но…

- Бен, асме куддыръя серем пыр озьы шуисько. БУШ – со буш ӧвӧл. Мынам вань семьяе, эшъёсы, лыдӟисьёсы, вордскем палэ. Ваньмыз тыраз. Озьыен, мон ӧвӧл буш. Джордж Буш но мон ӧвӧл. Солэн нырысь букваез гинэ бадӟымен гожтӥське, нош мынам ваньмыз ик.

- Тӥледыз лыдӟо, тодо, эскеро. Асьтэдыз кизилиен лыдъяськоды-а?

- Уг. Мон кизили ӧвӧл. Кизилиос вылын, инбамын. Соос пӧлын вань пӧртэмез: яркытэз, бездытэз, бадӟымез, пичиез… Кин ке монэ соос пӧлысь самой покчиеныз ке но лыдъя, шумпотӥсько.

- Нош яратонлы дырды тырме-а?

- Вал яратон. Школаын но, педучилищеын но. Одӥгзэ, тужгес яратонозэ, мон пумитай ни, Ижевскын ужакум. Нимыз солэн Юлия. Али милям будо кык чебер нылъёсмы.

- Тӥляд вань яратоно семьяды, дуно лыдӟисьёсты, мӧзмыны сётӥсьтэм «Кизили» журналды. Кинэ яке мае вунэтӥмы?

- Вань на одӥг эше - «Москвич» машинае. Со вуж ни ке но, аслэсьтыз ужзэ лэсьтэ на. Ми соин командировкаосы но поталляськом, семьяеным вордскем палъёсам но шонтӥськом.

- Нош редакцилэн машинаез ӧвӧл шат?

- Ӧвӧл. Мукет удмурт редакциосын окмымон эшъёсмы вань. Соос узыресьгес. Машина ласянь, шуисько. Вазиськиськом ке, сьӧразы басьто, соослы тау.

- Тӥ асьтэдыз шудоен лыдъяськоды-а?

- Мыным ним но огшоры сётӥллямтэ. Со но шудме сьӧраз нуллэ. Ачим но асме шудоен лыдъяны тыршисько.


Источник:

Бадретдинов У. Ш. Буш ӧвӧл буш / У. Ш. Бадретдинов ; записала О. Самигулова // Удмурт дунне. - 2002. - 6 нояб. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"