Ахтариева Людмила Менладшиновна

Материал из Воршуда
Перейти к: навигация, поиск

Куаратэк кырӟалод, сюлэмтэк - уд

Людмила Ахтариеваез сцена вылысь нырысьсэ адӟыку, малпан кылдэ: таӵе чиед мугоро мурт мар меда кырӟалоз ини? Но тани векчигес, чангес куара залэ кужмогес но кужмогес чузъяське, сюлмысь потэм гур тонэ быдэсак басьтэ ни, вань котыр дуннеез вунэтытэ. Кырӟан бырем бере но мылкыд кема уг буйга на: чылкыт ошмес кадь жильыраса кошкись куараез эшшо но эшшо кылзэм потэ.

Кырӟаны усточи, Башкортостанысь Янаул ёросысь Будӟа-Вараш гуртын вордӥськем нылаш, эктонъя но кырӟанъя «Италмас» кун ансамбле вуиз 1989-тӥ арын, Ижысь культурая училищеез йылпумъямез бере. Ансамбльлэн кивалтӥсез Анатолий Мамонтов Людмила Ахтариевалэсь чебер куаразэ дунъяз: хорын сяна, понназ но кырӟатылӥз. Озьы нылашлэн данэз будӥз но будӥз. 1995-тӥ арын солы Удмуртиысь дано артистка ним сётӥзы.

Мугорыд, пе, пичигес

- Ог 50-60 коркаем Будӟа-Вараш вордӥськем гуртэ но Вуж Вараш дышетскем гуртэ пуксемын бигер но удмурт гуртъёсын артэ. Котырамы ӟучъёс ӧй вал, соин ми ӟуч кылэз умой-умой тодытэк будӥмы. Шор ёзо школа бере Иже шонтӥ, дышетскыны Удмурт кун университетысь филологияя факультетэ пырыны малпай: дышетӥсь луэме потӥз. Пырыны ӧй быгаты. Гуртам мылкыдтэк бертыкум, Янаулысь культура юртын ужась тодмо кышномуртэ учыртӥ. Мылкыддэ сокем эн уськыты, шуиз, кырӟаны быгатӥськод, Ижысь культурая училищее пыр, вуод на. Озьы берен Иже шонтӥ. Одӥг нуналскын кык экзамен сётоно луи, хорлы дирижёре дышетскыны пыри.

- «Италмасэ» нош кызьы вуид?

- Училищеез йылпумъян азьын ӵош дышетскись эше шуэ: «Италмасын», пе, кырӟасьёслы конкурс ортче, ойдо ветлыса утчалом. Мон, котьмалэсь курдась мурт, шуисько: лекциосты кельтыса, кызьы кошкод?! Ойдо, шуэ, ойдо, собере ку таӵе учыр кылдоз на? Мынӥм. Филармония соку вуж юртын ужаз на, куара туж зол шуккиське. Конкурсэ пыриськыны калык трос лыктэм: эктӥсьёсты но бырйизы угось. Кырӟасьёсты кылзӥськи-кылзӥськи но шугъяськыны кутски: куарае мынам сыӵе чебер, кужмо ӧвӧл ке? Учкисько но — тодмое Светлана Смагина. Со «Италмасын» одӥг ар ужаз ни вал. Мыным шуэ: сопраноен (векчи куараен) кырӟась муртъёс трос ни, альтэн (зӧк куараен) кырӟа, ява. Ярам, шуисько. Пыри, альтэн кырӟаса сётӥ. Ойдо ай, пе, эктыса но возьматы. Тапыртӥ. Ваньмыз умой кадь, но шуо: мугорыд пичигес. Соку жюриын пукись Женя Серебренников вазиз: мон но пичи мугоро ук, мыным альтэн кырӟась пар луоз. Нош Анатолий Мамонтов монэ шуак ансамбленызы Ленинградэ мыныны ӧтиз. Со дыре ик Японие но чортӥллям вылэм, но кырӟасьёссы уггес тырмо, пе. Мар кароно? Госэкзаменъёс ныр улын ни. Сётытэк кошки ке, училищеез уг йылпумъя ук. Пумит луи.

Экзамен сётыкум, весяк малпаськыса ветлӥ: «Италмасэ» кутозы-а, уз-а медам? Ӧтён ӧвӧл но ӧвӧл. Ленинградэ ӧй мыны но, вожзы потӥз, вылды, шуисько. Гуртэ кошкыса ӧй вутты, ӧтён басьтӥ. Сыӵе шумпотӥ! Толэзь ужаса вуи-а, ӧй-а, Украинаетӥ, Белоруссиетӥ гастролен ветлӥмы ни. Выль аре - инбамын

- Та дано ансамбльын дас тямыс ар ужатозяд, дуннеез трос гинэ котыръяд, вылды?

- Россиетӥ трос ветлӥ ини, нош кунгож сьӧры Америкае но Францие гинэ вуылыны кылдӥз ай. 1993-тӥ арын Америкаын кык арня ӵоже улӥм. Со аре Выль арез но самолётын пумитамы. Кунгож сьӧры нырысьсэ потӥ вал ай бере, отчы ветлэммы али но мылкыдэз шунтэ. Асьме дорын со вакытэ магазин ӝажыос бушесь вал, котькытын кырсь. Соин Америкаын нырысь ик чылкытлыклы туж паймимы, нош супермаркетэ пыримы но, ыммес усьтыса, кема сылӥмы: сомында котырез ноку но адӟеммы ӧй вал на угось. Адямиос но отын пӧртэмгес потӥзы: пальпотӥсесь, юрттыны дасесь. Сюрес вамен потыны шугъяськыса сылыкуд, дорад лыктозы но валэктозы.

Фестивале ветлӥм куэм удмурт дэремъёсын, чигвесьёсын. Асьме дорын куазь толалтэ вал ни, нош отын сыӵе пӧсь. Сцена вылын мон выль кенэз шудӥ бере, йырам эшшо айшон понэмын на. Суть-суть котмиськиз. Дӥселы синмаськыса, япон кышномурт весяк сьӧрам ветлӥз, олокызьы но фотое пуктылӥз. Супермаркетэ но мынам тусбуеным туж бадӟым фотосуред ошемын вал.

- Чебередлы но синмаськизы, луоз.

- Озьы, дыр. Пинал вал на ук соку, кызь ньыль арес гинэ. 1997-тӥ арын Францие фестивале ветлӥм на. Соку гинэ Александр Дюмалэсь «Граф Монте-Кристо» романзэ лыдӟи. Книгаын гожтэм Иф замокез адӟемелы шумпотӥ. Франциын тужгес но сяськаослы пайми. Соос - котькытын, сыӵе яркытэсь, чебересь, одӥг жуг-жагез но ӧвӧл. Табере асьме дорын но сяська будэтыны тыршо ни. Америкаын но, Франциын но фестивальёс урамын ортчизы. Учкисьёс туж трос люкаськылӥзы. Асьмелэн сыӵе ужрадъёсы малы ке калык ӧжытгес пыриське кадь потэ. Сьӧд но тӧдьы ваче учко

- Кырӟась мурт шудтэм луэ шуэмлы оскиськод-а?

- Уг. Мон аслым шудтэм уг потӥськы. Сцена вылын кырӟаны быгатӥсько. Шуд ӧвӧл шат со? Яратоно пие будэ.

Анаезъя нылыз

- 1995-тӥ арын ми тынад гуртад ветлӥмы вал. Соку сузэред чебер кырӟаменыз ваньзэс паймытӥз.

- Пичи сузэре, Лилиана, вал, дыр, со. Динара апаелэн но, Лилиана сузэрелэн но куараоссы шулдыресь. Пичиысен ик куиньнамы школа но колхоз понна кырӟаса ветлӥм, олокыӵе но конкурсъёсын вормылӥм. Нош мон Уфаын лауреат ним но басьтӥ.

- Кытысь сыӵе — чингылиен жингырась куара?

- Анкаелэсь. Анаймес ми озьы шуиськомы. Анкае шумпотыкуз но, куректыкуз но ялан кырӟалляз.

- Кыӵегес кырӟанъёсты тужгес но яратыса быдэсъяськод?

- Анкаймы нёжмыт калык кырӟанъёсты яратэ, мон но озьы ик.

“Ротару Софиялэн сузэрез”

- Кырӟасьёс пӧлысь нош кин мылкыддэ бугыртыса лэзе?

- Пичиысен ик мыным София Ротару кельше. Монэ асме но куд-ог дыръя вылтусын солы кельшыто. Одӥг пол поездысен проводница юа: София Ротарулэн сузэрез ӧвӧл-а, пе, тон? Но, София Ротару сямен, огнам кырӟаны курдасько. Сямы сыӵе: мыным весь кин ке но ӝуткась кулэ, вӧзам эшъёсы мед луозы. Ваньзэ сюлмам укыр матэ басьтӥсько, соин, дыр, маке вылез борды кутскыны курдасько.

- Сцена вылысен туж капчиен кырӟаськод шуыса адӟиське. Озьы-а со?

- Сцена вылэ выль кырӟанэн нырысьсэ потыкум, котьку туж шугъяськисько: кызьы сое учкисьлы возьматыны быгато, кызьы пумиталозы? Котькудӥз бордын сюлэмдэ поныса ужаськод ук, куара вӧзы одно ик мылкыдэз сётоно. Нош кырӟан куарая тупа ке, адямиослэсь шорад пальпотыса учкемзэс адӟиськод ке, крезьгур кисьтӥськыса кадь кошке.

Магнитофон лента вылэ гожтэм кырӟанъёсме кылзыкум, шекъёссэ соку ик шедьтӥсько. Та интызэ тазьыгес кырӟано вал, шуисько, татӥзэ озьыгес кароно. Кырӟанэз макем трос пол быдэстӥськод, сокем трос пол со бордын ужаськод. Тӥляд кылъёстыя «Буртчин возьмы вылэ...», «Нюлэскын но, ой, но узыед...», «Егит ныл уз вить» кырӟанъёсыз калыклы ярамон карон понна но трос гинэ пӧсяно луиз. Соосты али мон мукет сяменгес кырӟасал ни.

- Али мар бордын ужаськод?

- Пантелей Кузнецовлэн крезьгурезъя «Чебер уйвӧт», «Тон лыктӥд», Михаил Журавлёвлэн крезьгурезъя «Инвожо» кырӟанъёс бордын.

Ненег сюлэмо Лев

- Амалыд ке луысал, улондэ воштысалыд-а?

- Куд-ог интыоссэ одно ик воштысал, но ужме - ӧй. Школаысен дышетӥсь луэме потэ вал. Табере шумпотӥсько отын ужамтэелы. Пие керӟегъяськыны кутске, уг кылзӥськы ке, шуисько: ой, кызьы меда мон пиналъёсты дышетысал!

- Ненег сямо адскиськод ке но, мыным тон, Людмила, лул-сюлмын лев кадь кужмо потӥськод. Но сьӧд гожъёсты пумитаны медаз кылды ни.

- Инмар солэсь мед утёз. Калыклы шумпотон вайыны кема мед быгато. Нош яратонме мон одно ик пумитало ай.

Источник:

Ахтариева Л. М. Куаратэк кырӟалод, сюлэмтэк - уд / Л. М. Ахтариева ; записала Г. Романова // Удмурт дунне. - 2007. - 30 нояб. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"