Александрова Ольга Яковлевна

Материал из Воршуда
Перейти к: навигация, поиск

Уйпалан сяськаясь италмас

Александрова О. Я.

Дуннеысь тужгес тодмо удмурт адями, актёр, режиссёр, тодосчи. Аслаз моноспектакльёсыныз 25 пала кунэ вуылэм, отысь калыкъёслэсь сюлэмзэс вырӟытыса кельтэм кышномурт - Ольга Александрова.

Сое ужаны ӧтчазы дуннеысь пӧртэм театръёс. Но кӧня ке ар талэсь азьло удмуртъёслэн италмассы шедиз Ханты-Манси округе. Ольга Яковлевна обь-угор калыкъёслэсь нырысетӥ театрзэс кылдытӥз, солэн чеберлыкъя кивалтӥсез луиз. Сыӵе театр быдэс Россиын ӧвӧл ни.

Удмурт калыкен мур нюжаосын герӟаськем адямиез шаермылэн палэназ туж вылӥ дунъяло. Нош асьмеос трос-а тодӥськом Ольга Александрова сярысь?

"Куинь сюан гуръёс" моноспектакльме пуктыку.

- Кытысь тӥ сыӵе йӧспӧртэм?

- Удмурт семьяысь. Анае - Анна Афанасьевна - Сюмси ёросысь, атае - Яков Кузьмич - Можга музъем вылысь. Институтын дышетскыкузы ик, соос семья кылдыто, ӵошен ветло выльвылэ ужаны. Институтэз йылпумъямзы бере Сюмси ёросысь Гура черкогуртэ школае ужаны лыкто. 1963-тӥ арын мон вордӥськи. Куинь ареслы бадӟым апае вань на.

Семьяямы секыт адӟон вуиз ньыль арес дыръям. Атай кулӥз. Анайлэн милемлы ӟеч тодон-валан сётэмез потэ вал. Соин атаймес ыштон аре ик ми Иже кошким. Мон быдэсми городын, тодэ ваёнъёсам Гура гуртэ кылиз выжыкыл дунне выллем.

Пичи дыры зарни вал. Гужем апаеным ӵош келяллязы Можга ёросысь гуртэ, песянае доры. Син шоры сыӵе яркыт пуксё эмезё нюлэс, гондырен пумиськон, эшъёсыным ӵош солэсь тапыр гинэ пегӟон, гуртысь улмо сад, бусыысь кӧжы, шур дурысь таш-таш борыё вырйылъёс… Мон сыӵе яратӥ фольклорез, гуртын удмурт дэремъёсын ветлӥсь песянайёсты! Удмурт культураез мыным пыӵатӥз, анай кылын вераськыны дышетӥз песянае.

Жаляса верано, соку интеллигенция удмурт кылызлэсь палэнскылӥз. Анай-атай милемыз пичиысен ик немец, англи кылъёслы дышетыны тыршизы. Атае ялан кыстӥськиз тодон-валан борды. Йылпумъяз Можга педучилищеез, Удмурт кун университетысь филологияя факультетэз, Казаньысь университетысь географияя факультетэз, отысь ик аспирантурае пыриз. Трос эскериз пӧртэм калыкъёсты, мифологиез, дышетӥз кылъёсты. Наукаын со бадӟым пытьы кельтысал, вылды. Но…

- Солэсь куспетӥ луэм сюрессэ Тӥ азинтӥськоды кадь уг поты-а? Пӧртэм калыкъёсты, соослэсь сям-йылолъёссэс эскериськоды, кылъёсты дышетӥськоды…

- Бен, бен, мон но сыӵе ужъёсын вырисько, но - театрын. Мон туж бадӟым, кытӥяз вормонтэм ныпъет нуисько, туж трос ужасько. Нуналаз 10-15 час ӵоже тыршоно луэ. Соин ик куддыръя ачим но малпасько: атае аслэсьтыз сюрессэ пумозяз ӧз вутты, мон вылэ кельтӥз, дыр. Кык мурт понна тыршоно.

Атай сямен ик, ужан вискам мон ялан будэтӥсько тодон-валанме. Удмурт кун университетысь филологияя факультетлэсь кык курссэ йылпумъяй, Москваысь Культурая институтэз, Искусствоя, культурая но туризмъя ужасьёслэсь тодон-валанзэс будэтонъя Москваысь академиез. 2002-тӥ арын пыри на Москваысь академилэн ик аспирантураяз, бырйи «Искусстволэн теориез но историез» удысэз.

- Нош сыӵе ныпъетэз нуонъяды атайдылэсь кужым сётэмзэ шӧдӥськоды-а?

- Шӧдӥсько. Бадӟым улон кужым - энергия - котьку ваське кытысь ке вылӥысь. Малпасько, Инмар мыным, талант, быгатонлык кузьмам сяна, сётэм на бадӟым лулкужым, ас бордад ужаны тыршон но туж трос ужаны быгатон. Соку гинэ талантэз улонын быдэсак усьтыны луэ. Ваньмыз потэ ачид бордысь гинэ.

Аслэсьтыд быгатонлыктэ аналтыны, быдтыны тынад правоед ӧвӧл. Инмар со понна но кылэз юа. Кыӵе ке быгатонлык сётэмын ке, тыршоно сое улонэ пыӵатыны. Нош Россия туж узыр таланто адямиосын! Жаль, уноез азьтэмске яке дӥсьтонэз уг тырмы.

- Тӥлесьтыд будэмдэс тодӥсь адямиос пусъё: Оли, пе, туж пичиысен ик тодӥз артист луонзэ, вамыш бӧрсьы вамыш мынӥз со сюресъя.

- Озьы. Мон котьку малпаськи кыӵе ке пусъёсын, символъёсын, образъёсын. Потэ вал соосты сцена вылын возьматэме. Куке соку, Москваысь вузэз йылпумъяме бере, чагыр малпанэ вал: Россилэн шоркарысьтыз театръёсын ӟуч модерн амалъя спектакльёсын шудо, «азвесь даурысь» кылбур дуннее выё. Но институтын дышетскыкум ик, мыным шуылӥзы: Оля, тыныд фольклорен выроно. Зэм, тон быгатӥськод ӟуч фольклор котыртӥ берганы но тон удмурт ук, кут ас калыкедлэсь вашкала культуразэ.

Ваньзэ тае ачим но шӧдӥсько вал. Но соку вашкала ӟуч кыл монэ бордаз кыскиз, пӧртмаз. Соин ик 1991-тӥ арын дасяй «Слово о полку Игореве» моноспектакльме, быдэсак вашкала ӟуч кылын. Соку мон Нижний Тагилысь мунё театрын ужасько ни вал. Моноспектакльме туж яратыса пумитазы Екатеринбургын, Сочиын, Воронежын, Архангельскын, Астраханьын, Санкт-Петербургын. 1990-тӥ арлэн кутсконаз Совето Союз куашказ, славян калыкъёс висъяськизы. Но со дыре ик финн-угор дунне ачиз сярысь ваньмызлы кылӥськымон ӝот-ӝот вераз. Мон туж оскисько космос кужымлы, историын сублимация шуонлы. Огез куашка, вайяське ке, мукетыз ӝутске, огазеяське.

Калык выжыос борды кыстӥськыса, улӟыны ӧдъяз Россия. Финн-угоръёс ог-огзы доры куное ветлыны кутскизы. Аслым ачим шуи: мар ке удмуртсэ лэсьтыны кулэ. Мон ке ӧй, кин?

Со дырлы визьмы но, сюлмы но вылезлы дась ни вал. Угось кенешылӥ Татьяна но Владимир Владыкинъёс тодосчиосын. Быдэс нуналъёсын пуки УдНИИ-ын, удмурт но финн-угор этнографияя книгаос лыдӟыса. Удмурт калык сямъёсты, фольклорез эскеронъям мон туж мур копай, туж пыдло кошки. Потай экспедициосы. Бичай кыӵе ке вашкала арбериосты, песянайёслэсь дэра дэремъёссэс, гожъяса кельтӥ кырӟан-веранъёссэс. Москваысь «Лаборатория» театрын ужакум но, удмурт книгаос котьку сьӧрам вал.

«Куинь сюан гуръёс» моноспектакльме кылдытон понна куинь ар ӵоже материал люкай. Со вордӥськиз 1994-тӥ арын. Та спектакль монэ кизили кариз.

- Малы одно ик куинь сюан гуръёс?

- Удмурт дунневаланын адямилэн куинь сюанэз. Вордӥськиськом - Улонэн сюан. Быдэ вуиськом - мукет адямиен сюан шудӥськом. Улонысь кошкиськом - Кулонэн сюан, мыддорин сюан. Со образъёс монэ сокем пӧртмазы! Валай: асьмелэн улонамы ваньмыз сюан! Мар ке маин ке герӟаське ке - сюан! Та малпанлэн сыӵе мур пуштросэз.

Спектаклям туж огшоры учыръёсты возьматӥсько: адями вордӥське, улэ, кулэ. Всё. Сое возьматон понна кутӥсько кык мунёез но шыркунэз (бубен). Шыркун нуны веттан зыбка но луэ, кык дуннеос вискысь кусыпез но возьматэ, шур кузя кошкись пыжлы но пӧрме. Сыӵе огшоры сюжет сокем кужмо луэ! Учкисьёслэсь пушсэс тыре. Тани сцена вылын пу мунё берыктӥське но, кулон шур кузя сопал дуннее кошке. Сое адӟыса, куд-огез бӧрдэ.

Мар бордын искусстволэн кужымез? Мон пичи пуэз берыктӥ но, табере со сопал дуннеысь адями луиз, со бордын-а? Яке спектаклез вашкала удмурт кырӟанъёсын тырмытон бордын-а? Ӟуч сямен шуо: всё гениальное просто…

«Куинь сюан гуръёс» спектакль бере мон ачим но пумозяз ӧй вала мар лэсьтэмме. Но шӧдӥсько вал: мае ке туж умойзэ быдэстӥ. Монэ соку ик ӧтизы Финляндиысь Нурмес городэ финн-угор фестивале. Отын час куспын кизили луи. Азям усьтӥськиз Европа, быдэс дунне. Монэ котькытын витизы. Кыӵе гинэ кунъёсы ӧй вуылы! Канадае ӧтьыкузы, юай: нош кытысь мон сярысь тодӥды? Милемлы, пе, Швециысь радио дэмлаз.

Дунне бадӟым, но ваньмы асьмеос фольклор нюжаосын герӟаськемын. Инъетмы - язычество. Гренландиысь эскимос, Канадаысь индеец, Норвегиысь саам… Зэмос искусство азьын борддоръёс ӧвӧл.

- Ӝыны дуннеез котыръямды бере тӥледыз Ижысь театре ужаны ӧтизы, озьы-а?

- Солэсь азьвыл куинь ар ӵоже ужай ай Москваысь «Тень» театрын. Удмурт шаерам ӧтемзы витёнтэм шорысь луиз. Татын кылдытӥм егитъёслэсь «Иднакар» театрзэс. Мон валтӥсь режиссёр вал. 1997-тӥ - 1999-тӥ аръёсы кык спектакль пуктыса вуттӥм: «Тристан и Изольда», «Журавлиные перья». Собере пыд пуктӥсьёс шедизы. Мынам уг поты вал жугиськеме, султӥ но кошки.

Москваын дышетсконме азинтӥ. Стажировкаосме ортчи «Ленком» театрын Марк Захаров дорын но ТЮЗ-ын (Театр юного зрителя) Генриетта Яновская дорын. Моноспектакленым пӧртэм кунъёстӥ ветлӥ.

- Финляндиысь тодмо режиссёр юри тӥ понна, пе, роль гожъяз.

- Драматург Олли-Пекка Улкунием монэ чакласа возем кӧня ке фестивальёсын. Ачиз со туж тунсыкъяськиз ожгар темаен. Кыкетӥ дунневыл война дыръя Финляндие пегӟемъёс трос вал. Пӧлазы - Россиысь адямиос но. Улкунием гожтӥз удмурт нылашлэн фин нюлэсъёсын пегаса улэмез сярысь. Со - юри малпам учыр. Но ачиз спектакль зэмос документъёс вылэ пыкиськыса лэсьтэмын. Сое мон «Кеми» театрын фин кылын шудӥ быдэс сезон. Нош собере ӧтизы Финляндиысь ик Хямеенлинна городысь театре. Отын мон Гогольлэн «Записки сумасшедшего» произведениезъя постановкаын шудӥ. 2001-тӥ арын ужай Норвегиысь Финнскуген городысь культурая центрын. Отын пуктӥм «Волк из Финнскугена» спектаклез.

- Сизьым ар ӵоже улӥськоды ни хантыослэн но мансиослэн музъемзы вылын, кылдытӥды соослэсь «Солнце» театрзэс. Быдэс дунне вылын, шуо, сыӵе театр ӧвӧл ни. Кызьы озьы луиз?

- Веранэ кузь луоз. 1994-тӥ арын моноспектакльме возьматон вылысь ӧтизы ЮНЕСКО-лэн конференцияз. Отын мон нырысьсэ тодматски ханты, манси тодосчиосын. Соосын ӵош вал 4-тӥ - 5-тӥ классъёсын дышетскись нылпиослэн ансамбльзы. Пиналъёс шудӥзы калык инструментъёсын, возьматӥзы эктонъёссэс, гондыр шудонзэс. Мон Надежда Лукина тодосчилэсь «Мифология хантов» книгазэ 1980-тӥ аръёсы лыдӟемын ни вал. Жаляса малпай: кызьы озьы, хантыослэн но мансиослэн одӥг профессиональной коллективзы но ӧвӧл. Та пиналъёсын но тодосчиосын кыкетӥ пумиськонэ Будапештын фин-угор конгресс дыръя вал. Мон озьы ик та калыкъёсты жаляса пуки, соослэн одӥг дышетскем режиссёрзы но ӧвӧл шуыса.

Мукетъят, Хельсинкиын конгресс дыръя, мон возьматӥ «Сотканный из песен и снов» выль моноспектакльме. Туж зол пумитазы. Нош быдэ вуись ханты, манси нылпиос ялан со эктонъёссэс но гондыр шудонъёсты возьматъязы на. Ӧй чида ни, тодосчиоссылы шуи: тӥледлы кемалась кулэ профессиональной коллектив кылдытыны: калык культураез шӧдӥсь нылпиос шур кузя пазям инӟыос выллем кыллё. Нокин но соосты уг бича, со узырлыкен ма карыны уг тоды.

Ноку ӧй малпалля, со инӟыосты бичась адями мон луо шуыса. 2002-тӥ арын ӧтизы Ханты-Мансийске финн-угор фестивале. Мынам моноспектакленым со ужрад усьтӥськиз. Паймымон учыр луиз. Спектакле бере ик монэ кутӥзы Ханты-Манси округысь Правительстволэн Тӧроезлэн уйпалась ӧжыт лыдъем калыкъёслэн ужпумъёссыя воштӥсез но Культурая департаментлэн кивалтӥсез, нуизы губернатор доры. Шуизы: милемлы кулэ театр, тӥ гинэ сое лэсьтыны быгатоды.

Тӥни озьы мынам спектакле нош ик пӧртмаськон боды выллем луиз. Губернатор вуоно театрлэсь концепцизэ гожтон понна куинь нунал сётӥз. Малпанъёсме ӝыны час пала кылзӥз но шуиз: мынэ но лэсьтэ. Кык толэзь ӵоже дасяй театрлэсь огъя «сьӧмзэ», концепцизэ, уставзэ, кӧня ке пол ветлӥ Москвае. Арня ӵоже радъяй 8 миллион манетъем бюджетэз. Озьы кутскиз мынам ханты-манси улонэ. Театрам нырысь актёръёс вал ӵапак со тодмо пиналъёс ик…

- Маиз секытгес вал: инкуазьлы-а дышон, уйпал калыкъёсын одӥг кыл-а шедьтон?

- Ваньмыз. Уйпал инкуазь - туж кужмо, но со дыре ик туж кышкыт. Мон али но шурдӥсько солэсь. Пеймыт кедр нюлэсъёслэн кыӵе ке валантэм секыт кужымзы вань кадь потэ. Соосын ӵошатыса, Удмуртиын тэльёс капчиесь, сайкытэсь, куаро но лысо писпуос вискын - ошмесъёс, кыралъёс.

Ханты-Манси улосын туж кужмо шуръёс. Обь но Иртыш ӧръёслэсь ваче вуон интызэс гинэ син азяды пуктэ ай. Кызьы ӵошатод соосты вуоссэ шыпыт нуись Калмезэн? Хантыосын, мансиосын одӥг финн-угор выжые пыриськом ке но, соос мукетэсь, инкуазьзы кадесь ик. Фольклорзы но секытгес.

Обь-угор калыкъёс асьсэды уйпалъёс шуо. Но соос пӧлы пыро улон интызыя но язычество осконзыя гинэ. Шуом, якутъёс ик - тюрк выжыысь, эвенъёс, эвенкъёс воксё тунгуско-маньчжурской вае пыро. Якутэз анай кылыныз вераськыны эн лэзь ай! Улытозяз уз кылзӥськы! Кужмо тюрк культуразы понна соос ваньзэ лэсьтозы, асьсэды ултӥяны ноку уз сётэ. Нош хантыос но мансиос туж востэмесь, ас пушказы выемын, ултӥямын.

- Кызьы тӥ соосты усьтыны, быдэс дуннелы тодмо карыны быгатӥды?

- Юрттӥз калык сям-йылолъёсты яратэме, гажаме. Туж зол шӧдӥсько вашкала выжыосты. Асьсэос хантыос но мансиос инъетсэс ӵемысь уг тодо. Шуом, соос кыӵе ке сям-йылолзэс быдэсъяло. Малы? Валэктыны уг быгато. Нош мон, тодосчи сямен, ваньзэ соослы кушасько. Но пусйысал на: инкуазен сётэм шӧдонэд ӧвӧл ке, котькӧня визьмо книга лыдӟы, калык сям-йылолъёслэсь мурдалазэс уд вала. Мынам ханты-манси улонэ выжыкыл выллем ӧз кутскы, туж но туж трос ужано луиз. Нырысь ик, артистъёс ласянь. Ас выжызэс тодӥсь-шӧдӥсь егитъёсты стойбищеосысь утчаса ветлоно луиз. Ханты-мансиос 30 сюрс пала ке но, тросэз кылзэс уг тодо.

Пересьёс пӧлын но вашкала сямъёссэс тодӥсьёс ӧжыт кылемын ни, соос кӧня ке сю иськеме пазьгиськемын. Удмуртъёсын ӵошатоно ке, асьмеос котьку ӵошгес возиським, выжыен, бадӟым гуртъёсын. Нош хантыос но мансиос кӧня ке семьяен, ог-огзылэсь кыдёкын улӥзы. Пужей вордӥсьёс тундраын пудозы сьӧрын ветлӥзы. Озьы дауръёс ӵоже. Соин ик кылъёссы но туж висъясько. Хантыослэн сомында диалектъёссы! Одӥг хант адями воксё уг вала мукет хант муртэ. Мар на манси сярысь веранэз. Со сяна, совето вакытъёсы пиналъёсты кужмысь ишкаллязы стойбищеосысь, интыяллязы интернатъёсы. Нылпиос тыпак вунэтӥзы асьсэ кылзэс.

Паймоно кадь, но Югра кун университетысь обь-угор филологияя факультетэ дышетскыны пыро анай кылзэс тодӥсьтэмъёс. Син азяды пуктэ ай: УдГУ-ысь удмурт филологияя факультетын, пе, дышетске удмурт сямен вераськыны быгатӥсьтэм адями… Нош обь-угор факультетэз йылпумъямъёс кытӥяз озьы ик анай кылынызы вераськыны, лыдӟиськыны уг дышо, валаны гинэ быгато.

- «Солнце» обь-угор театрез али быдэс дуннеын шумпотыса пумитало. Ортчем ар пумын тӥледыз ӧтчазы Кремльысь двореце. Нош Ханты-Мансийск округын кызьыгес пумитало?

- Нырысь спектакльмес туж шуген валазы. Изъёсын лэзьяны дась вал. Сюрес усьтӥсьлы, азьветлӥсьлы ноку капчи уг луы. Тужгес но лекъяськиз ханты, манси интеллигенция: кызьы озьы, кивалтӥсьсы калыкмы пӧлысь ӧвӧл ук, мурт адями, анай кылмес уг тоды! Но мон - профессионал. Ужасько зэмос искусстволэн кылыныз. Табере округамы асьмелэн учкисьмы вань ини. Песянай-песятайёс адӟо ке, бӧрдо. Угось асьсэ нылпиоссы вашкала выжызэс, кылзэс, кырӟанъёссэс вунэтэмын ни. Театрам артистъёс пӧлысь ӝыныез анай кылзэс уг тодо, но дышето, асьсэ выжызэс туж мур шӧдонзы вань. Ваньзы сямен ик шудо калык инструментъёсын, экто.

Костюмъёс вуриськом, тодосчиослэн эскеронъёссы вылэ пыкиськыса. Та ласянь бадӟым тау Удмуртиысь тодосчилы Людмила Молчановалы. Дӥсь вылысь котькуд суредлэн вашкала вакытэ аслаз пуштросэз, кужымез вал ук. Дӥсь - со урод кужымъёслэсь утись выллем. Нош мар дауртылӥзы совето вакытъёсы? Удмуртиысь «Италмас» коллективез ик басьтоно ке. Дӥсьёс вуриськизы Москваын, отысь суредасьёс, удмурт этнографиез тодытэк, кытчы сюрем пуктылӥзы бадӟым пужыос.

Обь-угор театрамы ваньмыз сямен кутэм чеберъяськон арбериос лэсьтэмын вашкала хант, манси могильникъёсысь шедьтосъёсъя. Соосты дурыны юрттӥз Удмурт шаерысь ик кибашлы - Василий Степанов. Туж шугъяськиськом калык инструментъёсты лэсьтӥсьёсты шедьтон ласянь. Округын соос чиньыен лыдъямон но ӧвӧл, уно сю иськеме пазьгиськемын.

Сизьым ар ӵоже туж трос лэсьтэмын. Репертуарамы тямыс пӧртэм возьматон - концертъёс, спектакльёс. Сизьымзэ со пӧлысь мон быдэсак ачим пуктӥ, театрлэн директорез но, режиссёр-постановщикез но, актёрез но луыса.

- Али театрдэс мукет киосы кельтыны тӥ дась-а?

- Маке выльзэ кутскысал. Нош театрез кельтон ласянь ке… Кинлы? Сыӵе адями ӧвӧл округын но, быдэс Россиын но. Мон зэмзэ верасько. Зэмос режиссёръёс туж ӧжыт. Москваысь режиссёр, туж трос дышетскемез вань ке но, уз быгаты сыӵе театрез валтыны. Со понна тодоно но яратоно калык культураез.

Россиын этно (калык) ӧрез нуись режиссёръёс ӧвӧл. Национальной театръёс ужало ӟуч театрлэн куронъёсызъя. Дуннеысь классикаез шудо асьсэ кылын - со гинэ пӧртэмез. Вань артистъёс дышетско Станиславскийлэн системаезъя, коть грузин, коть удмурт мед луозы. Зэм, профессилы дышетсконо. Но ваньмы асьмеос туж пӧртэмесь ук. Артистэз кызьы дышетоно, калык выжызэ тӥятэк? Мон тодӥсько. Мукет нокин уг. Тодысалзы ке, кемалась со борды басьтӥськысалзы. Режиссёр-профессионал, тодосчи, со дыре ик быдэсак пыӵамын калык культураен. Вань шат сыӵеос Россиын? Вань шат Удмуртиын?

Театрысьтым нырысьёсыз пиналъёс туэ басьтозы артист луэмзы сярысь дипломъёс. Но… Улоз-а «Солнце», мон кошки ке, шуг вераны. Ваньмыз возиське мынам лулкужыме вылын.

- Удмурт шаере бертэмды уг поты-а?

- Удмуртия сярысь вӧсь луонэ котьку бордам. Туж зол мӧзмисько. Но мынам сыӵе учконэ: ноку эн йыгаськы ворсам ӧсэ. Уг ке ӧтё, уг мынӥськы. Но туж потэ татчы гастрольёсы театреным вуылэме.

- Владимир Владыкин тодосчи тӥледыз дуннеысь тужгес тодмо удмурт адями шуиз. Кызьы та кылъёсты дунъяськоды?

- Со зэмзэ но озьы. Дуннеысь 25 кун монэ ӧтчалляз. Мынам туж узыр архиве - сыӵезэ адӟеме ӧвӧл одӥг удмурт тодосчилэсь но. 10 ар талэсь азьло архивмы бичаны кутскиз монэн герӟаськем вань ивортонъёсты. Шуизы: тӥледын герӟаськем бумагаос, гожъямъёс история понна туж кулэ луозы.

- Нош семья кылдытон сярысь ноку ӧд малпаське-а?

- Яратоно пиосмуртъёсы вал но, вань но. Но асме быдэсак сӥзи искусстволы. Туж жалясько, нылпиосы ӧвӧл шуыса. Мынам картэ - театр, пиналъёсы - актёръёс.

Бызи ке, мон аслэсьтым эрикме кульчояло кадь потэ. Нош эриктэк мон шӧдтэк шорысь султыны но одӥг интыысь мукетаз кошкыны, выль дуннеосты усьтыны уг быгаты. Чагыр малпанэ: Тибетэ, Египетэ, Индие кошкыны. Быдэсак со дуннее выйыны. Творчествоен вырись адямилы ялан выль омыр, мылкыд кулэ ук.

Мыным туж зол кужым сётэ инкуазь. Аръёс ортчемъя сое ялан золгес но золгес шӧдӥсько. 15 ар талэсь азьло Сьӧлта ёросын пичи корка басьтӥ. Вужгес гинэ юрт сылэ но шып возьма гужем бертэмме.

Бен, мон лэсьтӥ карьера, быдэстӥ Инмарлэсь косэмзэ. Но вань на ук аслам улонэ. Со мынам али гинэ кутске ай...


Источник:

Александрова О. Я. Уйпалан сяськаяськись италмас / О. Я. Александрова ; записала Е. Миннигараева // Удмурт дунне. - 2010. - 22 янв. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"