Акмаров Петр Борисович

Материал из Воршуда
Перейти к: навигация, поиск

Нюлэскы мон мынысал

П. Б. Акмаров

Туннэ газет тодматэ Ижысь Гурт удысъя кун академиысь одӥгеныз удмурт тодосчиен, профессорен, дышетон ужъя проректорен, ректорлэн нырысетӥ воштӥсеныз Пётр АКМАРОВЕН.

- Пётр Борисович, ойдолэ вераськонмес туж огшоры мытомы. Кытын вордскиды но дышетскиды?

- Вордски 1956-тӥ арын 23-тӥ сентябре Ува районысь Родники гуртын. Али со пыре «Дружба» эштосэ. Азьло милям Нылга ёрос вал, нош гуртмес Парсьгурт шуо вылэм. Озьыен, пересьёсмы трос парсь вордыны ярато вал, дыр.

Я бен, гуртлэн шулдыр, умой улонэз со бордысь уг поты. Родникиос, булайёс ужась калык, секыт вакытэ но хозяйство возиське, гуртоос лэсьтӥсько, ю-нянь, сӥль-йӧл потто, етӥн будэто, нош ӟеч выжы валъёс вордэменызы, быдэс шаерамы но Россиын тодмо луо. Нош гуртъёсмес данъяло отын вордӥськем, будэм пиос но нылъёс. Ӧжыт палэнски, лэся, юандылэсь. Дышетски вордскем гуртам, отын йылпумъяй 8 классэз. Собере тодон-валанме будэтӥ Нылга шор ёзо школаын.

1974-тӥ арын дышетскыны пыри Ижысь Механикая институтэ (али Техникая кун университет). Бырйи приборостроительной факультетэз, дышетски электровычислительной машинаосын (ЭВМ-ёсын) ужаны. 1979-тӥ арын инженер-системотехник луи.

- Кытын ужаны кутскиды?

- Ужаны ыстӥзы Ижысь Гурт удысъя институтэ. Отын выль вычислительной центр усьтӥськиз но, монэ кивалтӥсе пуктӥзы. Малы ке шуоно, институтын дышетскыкум ик, кафедраын вычислительной машинаосъя лаборант-программист луыса 2 ар ужай. Удысам шумпотыса, ӝутскем мылкыдын лыктӥ.

- Кызьы но малы наукаен герӟаськиды тӥ?

- Центрын 6 ар пала ужай. Огпол дораз проректор Валентин Фокин дораз ӧтиз но шуэ: «Пётр Борисович, тыныд дышетскыны кулэ, азьланез сярысь малпаськоно, центрын весь уд пукы». Соглаш луи. Озьы Москвае, Кибернетикая Всесоюзной научно-исследовательской институтэ аспирантурае дышетскыны лэзизы. Со вал 1985-тӥ арын. Ньыль ар огдыре ужаса дышетски но вуонояз, 1990-тӥ арын, научной ужме, кандидатской дисcертациме ути. Сое умоен но кулэен лыдъязы. Уже сӥземын вал гурт удысысь предприятиосын но хозяйствоосын ваньбурез (музъемез, техникаез но мукетсэ) пайдаё кутонлы. Со вакытэ институтын вордскиз экономикая выль факультет. Отчы валтӥсь дышетӥсе пуктӥзы. Нош 1993-тӥ арын экономикаын кибернетикая кафедраын доцент луи.

- Пётр Борисович, мынам тодэмея, академиын тӥ одӥгез усто декан вал.

- Кызьы бен астэ ушъялод? Но ужаме сярысь верало. Академиын экономикая факультет - самой бадӟымез. Нуназе 1200 студент дышетске, 90 пала дышетӥсьёс, соос пӧлысь 6-ез - наукая докторъёс но профессоръёс, 45-ез - кандидатъёс но доцентъёс. Солэн ёзъёсыз (филиалъёсыз) усьтэмын но ужало Завьял но Вавож районъёсын. Нош декан, студентъёслы муресь тодон-валанъёс сётэм, дышетӥсьёслэсь ужзэс радъям сяна, ваньмыз сярысь сюлмаськыны кулэ.

- Декан - со факультетлэн йырыз. Мар бордысен кутскиды?

- Бырйизы 1995-тӥ арын. Та арын ик институтмы академия луиз. Куать но ӝыны ар декан вал, но нырысетӥ вамышъёсме вольытэсь уд шуы. Нырысь ик юн сюлэм-шугъяськытӥз дышетӥсьёслэн студентъёслэсь палэнскыны кадь выремзы. Соин ик пӧртэм амалъёс утчаса, огъя кужымен, тодосчиосты но дышетӥсьёсты студентъёс пала берыктыны, матэгес карыны быгатӥм кадь.

Деканлэн ужез герӟаськемын адямиосын, котькудӥзлэн аслаз сюлэмшугъяськонъёсыз. Тани верало ужысьтым одӥг учыр сярысь. Школаез зарни медален быдтэм удмурт нылашлэн милям факультетамы пырыны ӝыны баллэз тырмымтэ. Гуртоос пӧлын медалистъёс ӧжыт луо, соин ик тодыны малпай, кыӵе меда мугез та учырлэн. Нылашез ӧтьыса вераським но, тодмо луиз: экзаменъёс азьын солэн атаез кулэ. Валамон, со юн куректӥз. Кызьы ке но юрттоно вал. Мынӥ Валентин Фокин доры. Ваньзэ рос-прос валэктӥ. Ректор валаз, али та нылаш бухгалтере дышетске, 4-тӥ курсын ини. Мынам но улонам таӵегес ик югдур вал. Витетӥ классын дышетскыкум, атае кулӥз, нош институтын 3-тӥ курсын дыръям - анае. Озьы мон ужаны вазь кутски. Семьяын 5 кузя кылим, ачим кыкетӥез. Анай кулон арын пичиез сузэре 8-тӥ классэ гинэ ветлӥз. Солы юрттоно вал. Котьку бадӟым стипендия басьтылӥ но эшшо лаборантын ужай на. Озьыен, коньдон тырмылӥз аслым но, кӧня ке юрттыны быгатӥ на брат-сузэръёсылы. Дипломам умоесь оценкаосы вал бере, уж шедьтыны шуг ӧй вал.

- Пётр Борисович, кызьы тӥ, проректор, ректорлэн нырысетӥ воштӥсез луиды?

- Меӵак верало: мон карьерист ӧвӧл, ноку но ӧй малпаськылы кивалтӥсь луыны. Берло дыре узыр ужбергатӥсьёсмы кужмысь кивалтонэ кыстӥсько, депутатэ донгисько. Нош огшоры калык соос понна куаразэ сётэ. Соиз валантэм. Деканын ужаме сярысь кӧня ке верай ини. Туэ январе эшшо бадӟым ныпъет оскизы, дышетон ужъя проректор, ректорлэн нырысетӥ воштӥсез луи. Табере кыл кутӥсько 6000 студентэз дышетон понна. Со сяна, 400-лэсь уно дышетӥсьёсын ужано. Соос пӧлысь 40-эз докторъёс но профессоръёс, 200-эз - кандидатъёс но доцентъёс.

- Котьмар шуэ, но бадӟым ӝӧк сьӧрын пукыны дышиды ни-а? Пӧсь таба вылын кадь уг поты-а?

- Ужлэсь уг кышкаськы, бер ӝытозь пукисько, гуртэ кӧланы гинэ бертылӥсько, умой коть, семьяе вала. Со кужым сётэ. Уже пӧрме-ӧръяське ни. Татын 23-тӥ арзэ ужасько, коллективез тодӥсько, студентъёсты валасько. Соин ик пуконме пӧсь таба ӧй шуысал.

- Наукаен вырыны дырды кыле на-а?

- Кызьы бен сотэк? Со мынам «висёнэ», улонэ. Ужасько доктор уж бордын. Солы материал дасямын, шуыны луоз ни. Азинтӥсько но муромытӥсько кандидат ужме. Солэн пуштросэз люконтэм герӟаськемын гурт хозяйствоен, дунтэмгес сиён-юон поттонэн. Одӥг-кык ар со бордын ужано луоз на. Оглом вераса, материалъёс люкасько Удмуртиысь, Башкортостан, Татарстан республикаосысь, Киров, Пермь, Свердловск но музон улосъёсысь. Вуоно арын доктор ужме утьыны чакласько.

- Азьланезлы кыӵе малпанъёсын улӥськоды?

- Нырысь ик, студентъёсты дышетонэ выль амалъёсты кутоно, информационной технологиосты пыӵатоно. Кыкетӥез, выль специальностьёс усьтыны малпаськом: гурт ужын технологиос, сиён-юонъёсты переработать карон, АПК-ын машинаосты возён, утён но тупатъян. Гуртлы тужгес кулэ специалистъёс. Отын чик ӧвӧл на, шуыны луоз, автосервис. Соин ик та ёзъёсты кылдытонъя документъёс дасяськом ни. Огдыре академилэсь уставзэ но выльдӥськом. Ваньмыз та ужъёс мыным оскемын.

Зэм, сюлэмшугъяськытӥсез ичи ӧвӧл. Соос пӧлысь одӥгез - коньдон. Кулэ учебникъёс, дышетон пособиос, юнматоно академилэсь инъетсэ (базазэ) но музон. Коньдон утчаськом республикаын но, Москваын но. Ведь милям одӥг ньыльмосэз, 25 процентэз гинэ студентъёс дун тырыса дышетско. Соос пӧлысь данакез луо экономистъёс но бухгалтеръёс. Нош соос ваньмыз гуртэ уг мыно, мукет удысэ кошко. Соин ик хозяйствоосын 25 процентэз гинэ валтӥсь бухгалтеръёс но экономистъёс дипломен ужало. Азьланьын югдур тупатскоз шуыса, оскисько. Со понна гуртын ужан условиосты умоятоно. Специалист кулэезъя уждун мед басьтоз.

Табере кӧня ке умойзэ но пусъё. Академиын 15 компьютер класс усьтэмын, Интернет ужа. Озьы Россиысь гуртэн герӟаськем 58 вуз пӧлысь академимы компьютер техникая 3-тӥ инты басьтэ. Нош «Июльское» дышетскон хозяйствомы Урал регионысь 17 учхоз пӧлын нырысетӥ инты басьтэ. Соин ик алигес дорамы Всероссийской кенеш ортчиз, 120 куно учхозмылэн ужан амалъёсыныз но академиын дышетонэн тодматскиз. Нырысетӥез таӵе ужрад вал Новосибирскын, кыкетӥез - дорамы.

- Но мар тужгес сюлэмшугъяськытэ?

- Ужпумъёс лачак. Но соос пӧлысь уката ик лэчытэз - компьютер техникаен ужанлэсь пайдазэ ӝутон. Со герӟаськемын кызьы ке дышетонэ выль амалъёсты кутонэн, озьы ик огъя кун экзамен сётонэн. Озьы ик сюлэмы висе тестирование амалэн ужанэ выжон пумысен. Со кулэ каре дышетӥсьёслэсь уно тодэм-валамзэс.

- Пётр Борисович, семьяды сярысь но тодэммы потэ.

- Кузпалэ Валентина Васильевна артэ Сухая Видзя гуртысь, Ува ёросысь ик. Ужа Октябрь районысь пенсиосъя фондын. Ольга нылмы академиын ик бухгалтере дышетске, туэ 4-тӥ курсэз быдтэ. Евгений пимы миым пыриз Ижысь Техникая кун университетэ. Мынэсьтым адӟем карыса, лэся, информатикая но вычислительной техникая факультетэз бырйиз. Кыксы ик умой дышетско, удмурт кылэз валало.

- Кыӵе со - туала студент?

- Улон воштӥськемъя, студентъёс но воштӥсько. Соос дӥсьтӥсьгес луэмын, кышкан, востэмъяськон сямзы туж ик уг шӧдӥськы ни. Куронъёс ваньмыз азе одӥг кадь пуктэмын. Кинлэн уг поты со куронъёсъя дышетскемез, соосты ми академиын ум возиське.

- Асьтэос политикае пыриськиськоды-а?

- Одно ик. Ветлӥсько удмурт огазеяськонъёслэн но Удмуртиысь Наукая но инженеръёсъя организацилэн союзэзлэн кенешъёсаз. Берлоеныз кивалтэ шаерысьтымы тодмо тодосчи, экономист Юрий Перевощиков. Ачим но союзлэн президиумаз быръемын. Отын эскериськом наукаен герӟаськем ужпумъёсты. Быръёнъёслэсь но палэнэ уг кылиськы.

- Ӟеч дышетӥсьёстэс, юрттӥсьёстэс тодӥськоды на-а?

- Кызьы бен соосты вунэтод? Котырам котьку ӟеч адямиос ужало-бергало. Школаысь дышетӥсьёсы пӧлысь нимысьтыз пусйысал Зоя Михайловна Лыткинаез. Со математикалы дышетӥз но классэнымы кивалтӥз. Соин но, лэся, экономикаез, лыдъян-чотанэз уката ик яратӥ. Нош Родники школалэн директорез вал Кузьма Николаевич Лыткин. Со милемлы ваньзэ сётӥз, лулысь-сюлмысь дышетӥз. Соослы тау карисько, музъемозь йыбырттӥсько.

Сюлмаськись дышетӥсьёс вал Нылга школаын но, институтын но. Ужан сюресме мытыны юрттӥз профессор Георгий Александрович Тихонов, нош уж дорын нырысетӥ кивалтӥсе вал туж тунсыко дышетӥсь - учёной Георгий Александрович Кургузкин. Соос али ӧвӧл ни, но улонам вунонтэм пытьы кельтӥзы. Али но мыным бадӟым юрттэт сёто ӵош ужась эшъёсы - удмурт профессоръёс - А. К. Осипов, М. И. Шишкин. Академиын ужез валаса радъя ректормы профессор А. И. Любимов.

- Кыӵе ужен вырыса уд жадиське?

- Гужем визнанэн чорыгакум но телевизор тупатъякум. Но берлоез тужгес кельше. Озьы ик яратӥсько нюлэскытӥ ветлыны но губи бичаны.

- Отпускады мар кариськоды?

- Наука уже вискын лыдӟисько классикъёсты.

- Кыӵе газетъёс ярало?

- Басьтӥсько но лыдӟисько «Удмурт дуннеез». Киоскысь октӥсько «АиФ в Удмуртии», «Российская газета» но «Известия Удмуртской Республики» газетъёсты.

- Кыӵе кырӟанъёс кельшо?

- Тужгес но удмуртъёсыз. Ветлӥсько удмурт но ӟуч спектакльёсты учкыны, но сюлэмлы тужгес матын Удмурт театр.

- Мылкыд карисько выль ужады трос ӟечсэ лэсьтыны но докторской уждэс йылаз-пумаз вуттыны.

Источник:

Акмаров П. Б. Нюлэскы мон мынысал / П. Б. Акмаров ; записал Г. Романов // Удмурт дунне. - 2002. - 12 июля. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"