Агафонова Елена Рафаиловна

Материал из Воршуда
Перейти к: навигация, поиск

Чипеез гочато мур вуос

Е.Р. Агафонова

Эгра ёросысь Зура шор ёзо школаысь удмурт кылъя но литературая дышетӥсь Елена АГАФОНОВА ӵемысь ассэ тышкаське: мар со керпотон сям луоз ни… Но со дыре ик сцена вылын солы малы ке оско зол сямо геройёслэсь рольёссэс. Ма, улонын но озьы ик пӧрме: Елена Рафаиловна – ньыль пиналъёслэн анайзы. Ӵош ужась эшъёсызлэсь быдэс йырлы вылӥын ассэ возёно луэ – нылпиос удмурт кылъя урокъёсы мыло-кыдо мед ветлозы. 2010-тӥ арын шаерысьтымы анай кылъя дышетӥсьёс пӧлын конкурсын вормемез бере Удмуртилэсь данзэ утиз Москваын. Агафонова отын но шедиз тужгес адӟем карымон визьнодасьёс пӧлы.

Синмаськисько калыкелы

-Россиысь анай кылъя дышетӥсьёслэн конкурсазы дасяськыкум, аслым ачим шуи: вормисьёс радэ ӧй поты ке но, ӵок. Но мукетъёсызлэсь бездытгес медам адӟиськы. Угось аслэсьтым сяна, быдэс Удмуртилэсь данзэ утёно луоз ук.

Конкурсэ республикаысьтымы кык кузя ветлӥм. Мон сяна, отын кужымзэ мертаз на Дэри ёросысь Первомай школаысь ӟуч кылъя но литературая дышетӥсь Ольга Павловна Исаева. Отчыозь ог-огмес ум но тодӥське вал. Нырысь ик вераськыны-юалляськыны кутским телефон пыр: тон мар дасяд ни конкурслы, костюм шедьтӥд ни-а… Кыкнамы вал шуыса, туж умой – ог-огмылы юрттӥським, кужыммылы оскон пыӵатӥм.

40 дышетӥсь ӵошатсконэ пыриськиз. Таос конкурслэн улосъёсын ортчем нырысетӥ этапаз вормисе потэмъёс вал ни. Ваньзы ик кужмоесь, ас удысазы чипей кадь уяло. Куд-огез улосъёссы сярысь быдэс фильмъёс но дасяллям – огназ дышетӥсь тае уз вормы, нимысьтыз профессионалъёс кулэ. Уката синмаськыса учки калмыкъёслэсь фильмзэс. Быдӟым тылож дыръя та калык бырон калэ вуылэм. Табере соос пырыен-пырыен люкало быдэс кун тыр пазьгиськем ас выжы адямиоссэс, сямъёссэс но йылолъёссэс тодэ ваён но утён сярысь сюлмасько.

Мынам туж данъяськеме потӥз Удмурт музъеммы вылын улӥсь калыкен. Слайдъёс вылын ке но возьматыны тырши, макем соос зӥбытэсь, ужасесь, сюлмоесь.

Уроклы тема ӟеч бырйи: числительнойёс. Умой луиз, фин, венгер, бигер, ӟуч но удмурт кылъёсысь лыдпусъёсты тодэ вайыса, ӵошатыны. Аслым визитка дасяй: мон – нылкышно, дышетӥсь, анай – куас вылэ но султӥсько, машина руль сьӧры но пуксисько, пӧраськыны яратӥсько, 17 ар одӥг сюрестӥ яратоно ужам вамышъясько…

Мукет улосъёсысь дышетӥсьёс сярысь министерствоысь, руноысь специалистъёс ӟеч кылъёс веразы на. Азьланьын но Удмуртиысь дышетӥсьёс таӵе ӵошатсконъёсы пыриськозы, малпасько. Соин ик милесьтым куд-ог тырмымтэосмес лыдэ мед басьтозы вылэм. Но Ольга Павловнаен ми но туж ӟеч мылкыдын берытским. Кӧня выль тодмоосмы кылдӥзы, выль ужан амалъёсын тодматскимы.

Жюри синйылтӥз милемыз! Ольга Исаеваез устоез дышетӥсь-исследователен лыдъязы, монэ нимысьтыз пусйизы выль но аспӧртэмлыко ужан амалъёсты кутэме понна. Конкурсын куинетӥ луи.


Физкультурникысь – филологе

Чокыр выжыысь мон, нылдыр фамилие Феоктистова. Эгра ёросысь Зура школаын дышетэмелэсь азьло ачим но отысь 9-тӥ-10-тӥ классъёсты йылпумъяй. 8-тӥ классозь дышетски Шоргурт школаын.

Дышетӥсь луон сярысь пичиысен ноку ӧй малпаськылы. Эмъясь луо кожасько вал. Ӟеч дышетски, школа ужрадъёсы мыло-кыдо пыриськылӥ. 8-тӥ классын дышетскыкум, кыл кутӥ школаын ёлка шулдыръяськонъёсты ортчытон понна. Соку классэн кивалтӥсьмы Зоя Никитична Корепанова сабиз: тыныд одно мыноно дышетӥсе! Малпаськыны ӧдъяй ик: оло, физкультурник луо? Угось туж яратӥсько вал куасэн ширтылыны, районмылэн данэз понна но бызьылэме вань. 10-тӥ классысен ни котыртӥм берганы кутскиз удмурт кылъя но литературая дышетӥсьмы Надежда Геннадьевна Алексеева: тыныд одно быръёно удмурт филологияя факультетэз. Ачим но тыро-пыдо валатэк, соин соглаш кариськи.

Сузэре макем ӝожомиз филфакез быръеме понна! Экзаменъёсме сётӥ ни, со бӧрдэ – мынэсьтым интыме басьтӥд, пе. Ольгамы нырысь Дэбесысь педучилищее, собере УдГУ-э мыныны малпа вал. Но мон бӧрсьы кык ар ортчыса, со филфаке ик лыктӥз, педучилищее ӧз ветлы ни. Али со Эграысь 3 номеро школаын ӟуч кылъя но литературая урокъёсты нуэ.

Студент аръёс – туж тунсыко вакыт. Дышетскем сяна, Анатолий Митрофанов доры калык театре ветлӥ на. Соин сэрен быдэс Удмуртиез котыртӥ, шуыны луоз – спектакльёсын гастрольёсы потаськом вал. Пӧртэм рольёсты шудылӥ. «Мон оскисько» спектакльын колхоз пред вал, «40-тӥ уй» постановкаын – кырӟаны, юыны яратӥсь, соин ӵош ик зол сямо Степанида. Али малпасько ни, кызьы 18 аресъем маке сыӵе мӧйы, улонэз адӟемъёсты но шудылӥськем? Ачим туж востэм сямо вал ук. Ма, али но мон туж возьдаськись. Бадӟым классъёсын дышетскисьёслэсь гинэ но кепыр вайисько – урокъёслы туж-туж дасяськисько, кыӵе ке юанзылы валэктон сётыны ӧй быгаты ке – мар луоз?


Ӵошен – школа дырысен

Берпуметӥ курсын дышетскыкум, пинал вайи ни. Кылиз на вал экзамен сётыны но диплом гожтыны. Картэ юрттӥськиз, пиналын ӵемысь пукылӥз. Со мынам Зура вӧзысь ог 10 иськеме интыяськем Квардавозьысь. Сергее – механизатор. Университетысь одӥгез дышетӥсьмы визьманы выре вал: нылъёс, гуртэ бертӥды ке но, колхозникъёслы, механизаторъёслы эн бызе – тӥляд улонэз адӟонды-валанды чылкак пӧртэмесь луозы, семьяды уз пӧрмы, кусыпъёсты тэшкалозы. Таӵе дыръёсы мынам пушкам маиз ке бугыръяське вал: механизаторъёс сыӵе ик адямиос ук! Картэным кызь ар улӥськом ни.

Одӥг классын ми соин дышетским. Армиысь бертыкуз, нырысь ик общежитие кожем. Нош ми со нуналэ Кельмаковлы экзаменмес сётӥм вал. Лыдъяськылӥз: та экзамен пыр потӥд ке, иське, витетӥ курсозь одно вуод ни. Экзаменъёс бере киное ветлӥм на, город кузя поръям. Куке-соку улон интыямы вуиськом ни, пумитам нылъёс бызё: Лена, тонэ отын пияш возьма! Сергей потэ пумитам: фуражкаен, чебер, ӝужыт.

Пичиез пимы – иностранец

Трос нылпи вордыны мылкыдмы кузпалылэн-а, мынам-а золгес вал – уг тодӥськы. Бадӟымез пимы, Димамы, табере дышетске ни Ижысь механикая кун институтын. Биатлонэн туж тунсыкъяське. Куинез пиналъёсмы бордамы на. Максиммы 8-тӥ классын дышетске – таиз биологияя, химияя олимпиадаосы пыриське. Дышетскыны яратэ. Кин луоз Лерамы – валамон ӧвӧл на. Куинетӥ классын дышетске, кырӟаны но яратэ, суредаське но – отчы но, татчы но вуттӥськемез потэ. Самой пичиез – куинь аресъем Захармы. Иностранец со милям. Алигес ветлыны кутскиз нылпи садэ. Отысь пичиос анай-атайёссылы шуо, пе: Захар англи кылын вераське. Удмурт сямен бӧтьыртэмзэ озьы кожало. Садикмы Зураын, нош отын калык ӟучгес вераське. Пимес нылпи садэ нуллон вылысь ик праволы но дышетски – ог 10 иськемез нуналлы быдэ пыдын солань-талань уд ветлы ук. Асме тышкаськисько: малы вазенгес ик руль сьӧры ӧй пуксьы?

Туж яратӥсько нылпиосмылэсь вордскем нуналъёссэс – пӧраськиськомы, кузьым дасяськом. Выль аре но, 8-тӥ Мартэ но мылкыды сокем уг бурдъяськы.

Пи шӧмъем дыды

Нылкышно, анай, дышетӥсь… Кудӥз мыным матынгес – вераны уг быгаты, ваньмыз одӥг бугоре биниськемын. Дышетӥсь луи шуыса, чик уг жаляськы, тыршемелэн емышъёсыз адӟисько. ӝожомонъёсы луыло, малы со удмурт кылэд кулэ шуыкузы, часъёсты кулэстыны турттыкузы… Но ас малпанъёсы-валанъёсы вылын сылыны турттӥсько. Нылпиосын сяна, анай-атайёсын но удмуртлык сярысь трос вераськоно луэ. Зураын калык вала: Удмуртиын улӥськом бере, удмурт кылэз одно тодоно. Но тросэз малпало: анай кылын вераськиськом ке, малы солы дырез быдтоно на. Гуртамы ӧжыт ӧвӧл удмуртлык сярысь сюлмаськись адямиос. Фольклор ӝытъёс радъяськыло. Тросэз анай кылынызы чылкыт верасько. Но гожъяськыны уг пӧрмыто. Маке гожто ке – лачак янгышъёс.

Кӧня асме тодӥсько, ялан басьтӥськом удмурт газет-журналъёсты. Туэ но гожтӥськи «Удмурт дуннелы», «Ӟечбур!»-лы, «Инвожолы», «Вордскем кыллы»… Соостэк удмурт кылэз уд воляты, уд утьы. Лыдӟисько картэ но, нылпиосмы но.

Школаямы вань ӟуч но удмурт классъёс. Озьы удмурт кылъя но литературая урокъёсты ваньзы уг дышето. Но удмурт шӧм котькуд уроке сямен ик пыртыны выриськом. Нылпиосмы тодо Удмуртилэсь историзэ, отысь тодмо интыосты, адямиосты. Шумпотӥсько: Зура палъёсысь тросэз нылпиос институтэ, университетэ вамышто. УдГУ-ысь удмурт факультетэз бырйисьёс но вань.


Удалтон но вормон

Вань сыӵе веран: вормисе пото кужмоосыз. Нош мон верасал на – удалтон но та понна кулэ. Республикаысьтымы удмурт кылъя но литературая зол дышетӥсьёс туж трос. Кин тодэ, соос пӧлын республикаямы ортчем ӵошатсконэ мукет аръёсы пыриськысал ке, оло, нырысетӥ интые ӧй но потысал. Нош монэн ӵош нюръяськисьёс пӧлын вал Алнашысь дышетӥсь Марина Яковлевна Никонова. Туж синмаськи солэн кужмо, зэмос удмурт шӧмъем луэмезлы. Малпай вал: монэ азьпалтоз. Но мынам папкае тыро-пыдогес дасямын вылэм. Удалтӥз.


Нылпиос понна кыл кутон

Вал сыӵе учыр. Школаын дышетскыкум ай, директорлэн кабинетаз пыртазы. Ӵош дышетскись эшъёсынымы ваньмы ик вераським вал: ойдолэ берпуметӥ уроке ум пырелэ! Пегӟим. Но кык-куинь мурт – самой-самой сыӵеосыз – пыриллям. Кылемъёсызлэсь кылзэс юазы. Мон сыӵе адями: кинлы ке, малы ке кылме сётӥ ке, одно сое быдэсто. Уг быгаты ке – одно верало.

Асме кизилиен чик уг лыдъяськы – газетэ но мон сярысь гожтонэз ӧвӧл, оло? Адямилэсь пӧртэм ӧвӧл ук мон. Урокъёс нуыса гинэ, кӧты тыремысь дугдӥз – соин пӧртэм конкурсъёсы пыриськыны кутски, асме республикаын возьматыны дыр вуэмын, малпай. Угось, калыке потаса, выль адямиосын тодматскиськод, выль ужан амалъёсты пыӵатыны кутскиськод. Йыре выль малпанъёс чилекто, выль тубатъёсты басьтэмед потыны кутске, мургес вуэ зымылэм потэ. Валасько ук: интыям лёгаськи ке, мынэсьтым дышетэм пиналъёсме но нокытын уз адӟе, уз тодэ. Дышетӥсь ачиз понна гинэ уг, нырысь ик нылпиос понна кыл кутэ.

Источник:

Агафонова Е. Р Чипеез гочато мур вуос / Е. Р. Агафонова ; записала Э. Кумачёва // Удмурт дунне. - 2012. - 13 янв. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"